សហរដ្ឋអាមេរិក និងប្រទេសកម្ពុជា បានបង្កើតទំនាក់ទំនងការទូតជាលើកដំបូង នៅឆ្នាំ១៩៥០ នៅពេលអ្នកការទូតអាមេរិកម្នាក់ឈ្មោះ Donald Heath ប្រចាំការនៅទីក្រុង Saigon ដែលស្ថិតក្រោមការគ្រប់គ្រងរបស់បារាំង បានថ្វាយសារតាំងជូនព្រះករុណា ព្រះបាទនរោត្តម សីហនុ ។ ឆ្នាំ ២០២០ គឺជាឆ្នាំខួបលើកទី ៧០ នៃការបង្កើតទំនាក់ទំនងការទូតនេះ។ ដើម្បីបង្ហាញពីការរួមចំណែករបស់សហរដ្ឋអាមេរិក ចំពោះការអភិវឌ្ឍន៍នៃប្រទេសកម្ពុជា ក៏ដូចជាភាពជាដៃគូជាច្រើនដែលជួយគាំទ្រដល់ទំនាក់ទំនងទ្វេភាគីនេះ ស្ថានបេសកកម្មរបស់សហរដ្ឋអាមេរិក គ្រោងធ្វើការអបអរដែលមានរយៈពេល ១ឆ្នាំ ។ ការងាររបស់ស្ថានទូតទាំងមូលនឹងផ្តោតលើការយកចិត្តទុកដាក់របស់យើង ចំពោះប្រជាជនកម្ពុជា រួមទាំងបុគ្គល ស្ថាប័ន និងអង្គការដែលមានការប្តេជ្ញាចិត្តដូចយើង ក្នុងការចង់ឲ្យព្រះរាជាណាចក្រមួយនេះមានវិបុលភាព ប្រជាធិបតេយ្យ និង អធិបតេយ្យភាព ។
នៅក្នុងខែនីមួយៗនៃឆ្នាំ ២០២០ ស្ថានទូតនឹងផ្តោតលើវិស័យជាប្រធានបទដែលមាន ការងារនិងការរួមចំណែករបស់យើង ដោយប្រើប្រាស់ប្រព័ន្ធផ្សព្វផ្សាយសង្គម សកម្មភាពជាមួយសាធារណៈជន ការផ្លាស់ប្តូរគ្នា ការធ្វើដំណើរ និងការចុះមើលទីកន្លែងនានា និងកម្មវិធីផ្សេងទៀត។
ខួបលើកទី ៧០ នៃចំណងទាក់ទងផ្នែកការទូតរវាងសហរដ្ឋអាមេរិក និងប្រទេសកម្ពុជា នឹងមានខែនីមួយៗនៃឆ្នាំ ២០២០ ផ្តោតលើប្រធានបទដូចខាងក្រោម៖
- ខែមករា – កសិកម្ម
- ខែកុម្ភៈ – យុវជន អប់រំ និងបច្ចេកវិទ្យា
- ខែមិនា – ស្រ្តី និងសមធម៌ជេនឌ័រ
- ខែមេសា – បរិស្ថាន
- ខែឧសភា – សុខភាពសាធារណៈ
- ខែមិថុនា – ទំនាក់ទំនងរវាងប្រជាជន និងប្រជាជន
- ខែកក្កដា – ការអបអរខួបលើកទី ៧០
- ខែសីហា – ជំនួយមនុស្សធម៌
- ខែកញ្ញា – ពាណិជ្ជកម្ម និងការវិនិយោគ
- ខែតុលា – ការអនុវត្តច្បាប់
- ខែវិច្ឆិកា – សហប្រតិបត្តិការក្នុងតំបន់/អាស៊ាន
- ខែធ្នូ – លទ្ធិប្រជាធិបតេយ្យ និងសិទ្ធិមនុស្ស
