ដោយភារធារីនៃស្ថានទូតអាមេរិកនៅកម្ពុជា Michael Newbill
ខ្ញុំសូមអបអរសាទរនិស្សិតកម្ពុជាទាំងអស់ ដែលត្រូវបានទទួលអោយចូលរៀននៅក្នុងស្ថាប័នមួយក្នុងចំណោមស្ថាប័នឧតុ្តមសិក្សានៅក្នុងសហរដ្ឋអាមេរិក ដែលមានការទទួលស្គាល់ជាផ្លូវការចំនួនជាង៤៧០០ ។ អ្នកដែលបានទទួលសញ្ញាប័ត្រពីសាកលវិទ្យាល័យរបស់សហរដ្ឋអាមេរិក បានក្លាយជាអ្នកដឹកនាំ និងជាអ្នកបង្កើតថ្មី (Innovator) នៅក្នុងវិស័យជាច្រើន នៅជុំវិញពិភពលោក ហើយអ្នកគួរតែមានមោទនភាពចំពោះការអញ្ជើញអោយចូលរួមជាមួយក្រុមយុវជនពិសេសនេះ ដែលជីវិតរបស់គេនឹងមាការផ្លាស់ប្តូរជារៀងរហូត ដោយសារថាមភាព ភាពបើកចំហ និងគុណភាពនៃសាលា នៅទូទាំងសហរដ្ឋអាមេរិក។ នៅកម្ពុជា មានសិស្សកាន់តែច្រើនឡើងសិក្សានៅបរទេស ក្នុងសហរដ្ឋអាមេរិក ពីមួយឆ្នាំទៅមួយឆ្នាំ។ តាមពិតទៅ នៅឆ្នាំ ២០១៨ ចំនួននិស្សិតកម្ពុជាសិក្សានៅក្នុងសហរដ្ឋអាមេរិកមានកំណើនលើសឆ្នាំ ២០១៧ ចំនួន ២៩% ហើយគេរំពឹងថា និន្នាការនេះនឹងបន្តមានទៀត។
ការផ្តល់ការអនុញ្ញាតអោយចូលរៀន គឺជាលទ្ធផលនៃការគិតគូរហ្មត់ចត់ច្រើន និងការខិតខំ ទាំងរបស់និស្សិតដែលដាក់ពាក្យចូលរៀន ទាំងមហាវិទ្យាល័យ និងសាកលវិទ្យាល័យអាមេរិក ដែលធ្វើការពិនិត្យហ្មត់ចត់លើពាក្យសុំចូលរៀនទាំងនោះ។ យើងមើលឃើញពីការប្រឹងប្រែង និងគំនិតច្នៃប្រឌិត ដែលអ្នកដាក់បញ្ចូលទៅក្នុងសំណេរនិងការស្រម៉ៃចង់បានរបស់អ្នក ការខិតខំរៀបចំសំរាប់ការប្រលងផ្នែកភាសាអង់គ្លេស និងការប្រលងដទៃទៀត ហើយនិងការប្តេជ្ញាចិត្តរបស់អ្នក ចំពោះការងារដើម្បីសហគមន៍ ហើយនិងចំណាប់អារម្មណ៍ផ្សេងៗក្រៅកម្មវិធីសិក្សា។
ពេលនេះ មាននិស្សិតអន្តរជាតិចំនួនជាងមួយលាននាក់កំពុងសិក្សានៅតាមស្ថាប័នឧត្តមសិក្សា ក្នុងសហរដ្ឋអាមេរិក ដែលជាការធ្វើអោយសហរដ្ឋអាមេរិកនៅតែជាប្រទេសដែលមាននិស្សិតអន្តរជាតិសិក្សាច្រើនជាងគេ អស់ពេលដ៏យូរមកហើយ។ នេះគឺជាការបញ្ជាក់ពីគុណភាពគ្មានអ្នកណាស្មើបាន នៃឧត្តមសិក្សានៅសហរដ្ឋអាមេរិក នៅក្នុងក្រសែភ្នែករបស់និស្សិតអន្តរជាតិ និងគ្រួសាររបស់គេ។
និស្សិតអន្តរជាតិពង្រឹងទំនាក់ទំនងរវាងសហរដ្ឋអាមេរិក និងប្រទេសនានាជុំវិញពិភពលោក បណ្តុះទំនាក់ទំនងរវាងប្រជាជន និងសហគមន៍ ដែលមានភាពចាំបាច់ដើម្បីដោះស្រាយបញ្ហាប្រឈមជាសាកល។ យើងអោយ តំលៃលើការចូលរួមទាំងអស់គ្នា ហើយគាំទ្រយ៉ាងសកម្ម ចំពោះនិស្សិតមកពីមជ្ឈដ្ឋាននានា ដែលមករៀននៅក្នុងសាលារបស់យើង។ មហាវិទ្យាល័យ និងសាកលវិទ្យាល័យនៅទូទាំងសហរដ្ឋអាមេរិកអោយតំលៃនិស្សិតអន្តរជាតិ ដែលមានទស្សនៈពិសេស និងផ្សេងៗគ្នា ដែលគេផ្តល់ ទាំងនៅក្នុងថ្នាក់ ទាំងនៅក្រៅថ្នាក់។ សហគមន៍ និងសាកលវិទ្យាល័យអាមេរិកទទួលអត្ថប្រយោជន៍ពីចំណេះដឹង និងទេពកោសល្យរបស់និស្សិតអន្តរជាតិ ដែលជាការជួយក្នុងការរៀបចំយើងសំរាប់អនាគតរួម និងប្រកបដោយជោគជ័យ នៅក្នុងពិភពលោកមួយ ដែលមានការទាក់ទងគ្នាទៅវិញទៅមក។
មហាវិទ្យាល័យ និងសាកលវិទ្យាល័យរបស់សហរដ្ឋអាមេរិកមានមោទនភាពក្នុងការផ្តល់បរិយាកាសប្រកបដោយសុវត្ថិភាព និងការស្វាគមន៍ ដល់និស្សិតរបស់គេទាំងអស់។ ខ្ញុំសូមបញ្ជាក់ថា អ្នកនឹងទទួលបានការស្វាគមន៍ នៅក្នុងសហរដ្ឋអាមេរិក។ សាកលវិទ្យាល័យជាច្រើនផ្ញើសារស្វាគមន៍ទៅកាន់និស្សិត នៅជុំវិញពិភពលោក តាមរយៈយុទ្ធនាការ #YouAreWelcomeHere Campaign (https://www.youarewelcomehereusa.org)។ ខ្ញុំសូមចូលរួមជាមួយគេ ក្នុងការស្វាគមន៍អ្នកមកកាន់សហរដ្ឋអាមេរិក ដែលក្នុងនោះ មហាវិទ្យាល័យ និងសាកលវិទ្យាល័យរបស់យើងផ្តល់ឱកាសសិក្សាដ៏មានតម្លៃ ដើម្បីជួយអ្នកក្នុងការសម្រេចគោលដៅក្នុងអាជីព និងក្នុងជីវិតរបស់អ្នក។
មន្រ្តីកុងស៊ុលនៅភ្នំពេញ និងនៅតាមស្ថានទូតនិងស្ថានកុងស៊ុលអាមេរិក នៅជុំវិញពិភពលោកបន្តធ្វើការដោយយកចិត្តទុកដាក់ នៅក្នុងការពិនិត្យសម្រេចលើសំណើសុំទិដ្ឋាការសិស្ស ហើយព័ត៌មានស្តីពីដំណើរការទាក់ទងនឹងទិដ្ឋាការមាននៅក្នុងគេហទំព័រ https://travel.state.gov/content/visas/en.html ឬនៅក្នុងគេហទំព័ររបស់យើង https://kh.usembassy.gov/visas/nonimmigrant-visas/។
អ្នកផុ្តល់ការណែនាំរបស់មជ្ឈមណ្ឌលផ្តល់ប្រឹក្សាស្តីពីការសិក្សានៅសហរដ្ឋអាមេរិក (EducationUSA) ត្រៀមខ្លួនជាស្រេចក្នុងការផ្តល់ចម្លើយចំពោះសំណួរស្តីពីការសិក្សានៅក្នុងសហរដ្ឋអាមេរិក។ អ្នកអាចរកឃើញមជ្ឈមណ្ឌលផ្តល់ប្រឹក្សានេះតាមគេហទំព័រ https://educationusa.state.gov/find-advising-center។ ចំពោះអ្នកដែលកំពុងពិចារណាចង់សិក្សានៅក្នុងសហរដ្ឋអាមេរិក អ្នកផ្តល់ការណែនាំរបស់មជ្ឈមណ្ឌល EducationUSA អាចផ្តល់ព័ត៌មានល្អៗ សំរាប់ជួយក្នុងការសម្រេចចិត្តរបស់ពួកគេ។ ដោយមានស្ថាប័នដែលមានការទទួលស្គាល់ជាផ្លូវការចំនួនជាង ៤៧០០ នៅក្នុងរដ្ឋទាំង ៥០ វាពិតជាមានមហាវិទ្យាល័យមួយ ឬសាកលវិទ្យាល័យមួយ ដែលត្រូវសម្រាប់មនុស្សគ្រប់គ្នា។ មានជម្រើសក្នុងការសិក្សា ក្នុងតម្លៃផ្សេងៗ ដោយរួមទាំងមហាវិទ្យាល័យសហគមន៍ និងទម្រង់ “២ បូក ២” ដែលបូកបញ្ចូលគ្នានូវការសិក្សានៅក្នុងមហាវិទ្យាល័យសហគមន៍ និងការសិក្សានៅក្នុងស្ថាប័នសិក្សា ៤ ឆ្នាំ ដើម្បីទទួលបាននូវសញ្ញាប័ត្របរិញ្ញា។
សាកលវិទ្យាល័យ និងមហាវិទ្យាល័យអាមេរិក ក៏ដូចជាប្រជាជនអាមេរិក និងបណ្តាសហគមន៍នៅទូទាំងប្រទេសរបស់យើងសូមស្វាគមន៍អ្នក។
ក្នុងនាមជាភារធារីនៃស្ថានទូតអាមេរិកនៅកម្ពុជា ខ្ញុំសូមសំដែងអំណរសរសើរ និងសូមលើកទឹកចិត្តអ្នកដែលបានទទួលការអនុញ្ញាតអោយចូលរៀន សូមទទួលយកនូវឱកាសនេះដែលធ្វើអោយជីវិតមានការផ្លាស់ប្តូរ ហើយចូលរួមជាមួយមិត្តរបស់អ្នក ក្នុងការទទួលបាននូវតម្លៃពិសេសនៃឧត្តមសិក្សានៅក្នុងសហរដ្ឋអាមេរិក។
