សម្រាប់ចេញផ្សាយ
ថ្ងៃទី២៧ ខែកុម្ភះ ឆ្នាំ២០២០
២០២០/០៨
ស្ថានទូតអាមេរិកនៅរាជធានីភ្នំពេញ មានសេចក្តីរីករាយសូមប្រកាសពី ពិព័រណ៍ឆ្នាំ ២០២០ ស្តីពីការសិក្សានៅក្នុងសហរដ្ឋអាមេរិក ដែលនឹងត្រូវរៀបចំនៅ ភ្នំពេញ និងសៀមរាប ។ ដោយមានការជួយពីស្ថានទូតអាមេរិកនៅភ្នំពេញ មជ្ឈមណ្ឌល EducationUSA នៅកម្ពុជា បានរៀបចំពិពិព័រណ៍បែបនេះ ដើម្បីបង្ហាញពីឱកាសសិក្សា និងធ្វើការផ្លាស់ប្តូរគ្នាផ្នែកការសិក្សានៅក្នុងសហរដ្ឋអាមេរិក សម្រាប់សិស្សនិស្សិតកម្ពុជា។ ពិព័រណ៍នេះ គឺជាកន្លែងពិសេសមួយសម្រាប់ឲ្យ សិស្ស និស្សិតកម្ពុជា ធ្វើការទាក់ទងជាមួយស្ថាប័នឧត្តមសិក្សានៅក្នុងសហរដ្ឋអាមេរិក ហើយស្វែងយល់ពីអត្ថប្រយោជន៍ក្នុងការទទួលបានការសិក្សា នៅក្នុងសាកលវិទ្យាល័យនៅសហរដ្ឋអាមេរិក។
ពិព័រណ៍EducationUSA នឹងប្រព្រឹត្តទៅ នៅខេត្តសៀមរាប នៅថ្ងៃចន្ទ ទី ២ ខែមិនា ឆ្នាំ ២០២០ ចាប់ពីម៉ោង ៨:៣០ ព្រឹក ដល់ម៉ោង ១១:៣០ ព្រឹក នៅសណ្ឋាគារ Somadevi Angkor Resort & Spa ។ នៅភ្នំពេញ ពិព័រណ៍នេះនឹងបើកនៅថ្ងៃអង្គារ ទី ៣ ខែមិនា ឆ្នាំ ២០២០ ពីម៉ោង ២:០០ រសៀល ដល់ម៉ោង ៦:០០ ល្ងាច នៅសាលប្រជុំធំនៃសណ្ឋាគារ Cambodiana។
តំណាងចំនួន ២០នាក់ មកពីមហាវិទ្យាល័យនិងសាកលវិទ្យាល័យនៅសហរដ្ឋអាមេរិក នឹងជជែកជាមួយសិស្សនិស្សិតកម្ពុជា អំពីកម្មវិធីសិក្សាដែលផ្តល់សញ្ញាប័ត្រ លក្ខខណ្ឌក្នុងការចុះឈ្មោះចូលរៀន និងឱកាសទទួលបានអាហារូបករណ៍ សម្រាប់សិក្សានៅសហរដ្ឋអាមេរិក។ អ្នកចូលរួមការតាំងពិព័រណ៌ដទៃទៀត នឹងផ្តល់ព័ត៌មានអំពីទិដ្ឋាការសិស្សនិស្សិត កម្មវិធីផ្លាស់ប្តូររបស់រដ្ឋាភិបាលអាមេរិក និងការផ្តល់ប្រឹក្សាស្តីពីការសិក្សានៅសហរដ្ឋអាមេរិក (EducationUSA )។
សិស្សវិទ្យាល័យនិងនិស្សិតសាកលវិទ្យាល័យនៅកម្ពុជា ដែលមានចំណាប់អារម្មណ៍ សិក្សាថ្នាក់ឧត្តម នៅសហរដ្ឋអាមេរិក ត្រូវបានស្វាគមន៍ឲ្យចូលរួមនៅក្នុងពិព័រណ៍នេះ ។ ឪពុកម្តាយសិស្ស និស្សិតក៏ត្រូវបានស្វាគមន៍ និងលើកទឹកចិត្តឲ្យចូលរួមផងដែរ។
លោក Michael Newbill ភារធារីនៃស្ថានទូតអាមេរិក និងឯកឧត្តម យក់ ង៉ុយ រដ្ឋលេខាធិការនៃក្រសួងអប់រំ យុវជន និងកីឡា នឹងចូលរួមបើកពិព័រណ៍ ហើយទស្សនាពិព័រណ៍នេះ នៅរាជធានីភ្នំពេញ នាថ្ងៃទី ៣ ខែមិនា ឆ្នាំ ២០២០ នៅម៉ោង ២:00 រសៀល។ អ្នកសារព័ត៌មានដែលមានបំណងយកព័ត៌មានក្នុងពិធីនេះ សូមអញ្ជើញទៅសណ្ឋាគារ Cambodiana ត្រឹមម៉ោង ១:៣០ រសៀល។
សូមចូលមើលក្នុងគេហទំព័រ https://kh.usembassy.gov/educationusa-fair-2020/ ។ ចំពោះព័ត៌មានបន្ថែម សូមទាក់ទងមកមជ្ឈមណ្ឌលផ្តល់ការប្រឹក្សា EducationUSA ដោយហៅមកទូរស័ព្ទលេខ ០៩២ ៨០៨ ៧៣៦។
