For Immediate Release
៣១ តុលា ២០២៣
2023
ភ្នំពេញ ៖ លោកឯកអគ្គរដ្ឋទូតសហរដ្ឋអាមេរិកប្រចាំនៅកម្ពុជា W. Patrick Murphy លោកជំទាវរដ្ឋមន្រ្តីក្រសួងវប្បធម៌ និងវិចិត្រសិល្បៈ ភឿង សកុណា និង លោក Chase Robinson នាយកសារមន្ទីរជាតិ សិល្បៈអាស៊ី Smithsonian បានចូលរួមជាអធិបតីនៅក្នុងពិធីចុះហត្ថលេខាលើអនុស្សារណៈនៃការយោគយល់ (MOU) រវាងក្រសួងវប្បធម៌ និងស្ថាប័ន Smithsonian ដើម្បីពង្រីកការអភិវឌ្ឍជំនាញអាជីព បង្កើនការចែករម្លែកព័ត៌មាន និងលើកកម្ពស់វប្បធម៌កម្ពុជា។
អនុស្សារណៈនេះ កំណត់គោលដៅជាក់លាក់ ក្នុងការលើកកម្ពស់សមត្ថភាពរបស់បុគ្គលិកនៃសារមន្ទីរ តាមរយៈកម្មវិធីផ្លាស់ប្តូរគ្នា សម្របសម្រួលលើការផ្តល់ប្រឹក្សាស្តីពីការគ្រប់គ្រងសារមន្ទីរ ការផ្តល់កម្ចី និងការផ្លាស់ប្តូរវត្ថុតាំង និងវត្ថុដទៃទៀត ហើយនិងការសហការគ្នាលើការស្រាវជ្រាវ។ MOU នេះនឹងពង្រឹងផងដែរ នូវការសហការគ្នារវាងសហរដ្ឋអាមេរិក និងប្រទេសកម្ពុជា លើការអភិរក្សបេតិកភណ្ឌវប្បធម៌ និងការប្រយុទ្ធប្រឆាំងនឹងការជួញដូរខុសច្បាប់ នៃវត្ថុបុរាណខ្មែរ។
ការចុះហត្ថលេខាលើ MOU នេះគឺជាការបង្ហាញឲ្យឃើញមួយទៀត នៃកិច្ចសហប្រតិបត្តិការរឹងមាំផ្នែកវប្បធម៌ រវាងសហរដ្ឋអាមេរិក និងប្រទេសកម្ពុជា ដោយរួមទាំងការខិតខំក្នុងការអភិរក្ស និងស្តារបេតិកភណ្ឌវប្បធម៌ដ៏សម្បូរបែបរបស់ខ្មែរ និងកាត់បន្ថយការលួចប្លន់នៃវត្ថុបូរាណដែលមានតម្លៃកាត់ថ្លៃមិនបាន។ សហរដ្ឋអាមេរិកបានធ្វើការសម្របសម្រួលលើការបញ្ជូនប្រឡប់មកកម្ពុជាវិញ នូវវត្ថុបុរាណដែលមានតម្លៃកាត់ថ្លៃមិនបាន ចំនួនជាង ១០០ ដុំ ហើយបានរួមចំណែកជាថវិកា និងផ្តល់ការបណ្តុះបណ្តាលក្នុងការកាពារ អភិរក្ស និងជួសជុលបេតិកភណ្ឌវប្បធម៌របស់ប្រទេសកម្ពុជា នៅក្នុងរយៈ ២០ ឆ្នាំមកនេះ ។
នៅក្នុងពិធីនោះ លោកឯកអគ្គរដ្ឋទូត Murphy បានមានប្រសាសន៍ថា៖ «ប្រទេសយើងទាំងពីរមើលឃើញតម្លៃនៃវប្បធម៌ ក្នុងការបង្រួបបង្រួមប្រជាជន ហើយបណ្តុះគំនិតមោទនភាពលើអត្តសញ្ញាណ និងបេតិកភណ្ឌ។ កិច្ចព្រមព្រៀងនេះស្តែងឲ្យឃើញការប្តេជ្ញាចិត្តយូរអង្វែងរបស់សហរដ្ឋអាមេរិក ក្នុងការអភិរក្សវប្បធម៌នៃព្រះរាជាណាចក្រកម្ពុជា»។
លោក Chase Robinson បានមានប្រសាសន៍ថា ៖ MOU នេះ «សន្យាថា កិច្ចសន្ទនា និងកិច្ចសហការគ្នានឹងបន្ត ថាយើងនឹងរៀនសូត្រពីគ្នា តាមរយៈសកម្មភាពផ្លាស់ប្តូរគ្នា ដោយបើកចំហ និងថាការស្រាវជ្រាវ និងការចែករម្លែកចំណេះដឹងនឹងត្រូវបានពង្រីកបន្ថែម»។
លោកជំទាវ បណ្ឌិតរដ្ឋមន្រ្តីក្រសួងវប្បធម៌ ភឿង សកុណា បានមានប្រសាសន៍ថា៖ «យើងមានក្តីរំភើបរីករាយក្នុងការធ្វើជាដៃគូជាមួយស្ថាប័ន Smithsonian ដើម្បីធ្វើការជាមួយគ្នា ដើម្បីការអភិរក្ស ការបណ្តុះបណ្តាលធនធានមនុស្ស និងការនិទានរឿងរ៉ាវពីបេតិកភណ្ឌវប្បធម៌របស់យើង ដើម្បីបង្ហាញទៅកាន់ពិភពលោក »។
តាំងពីឆ្នាំ ២០០១ មក សហរដ្ឋអាមេរិកបានផ្តល់ប្រាក់ចំនួន ៦ លានដុល្លារ សម្រាប់ការអភិរក្សបេតិកភណ្ឌវប្បធម៌កម្ពុជា ដែលរួមមានអំណោយថវិកាសម្រាប់ជួសជុលប្រាសាទព្រះវិហារ និងប្រាសាទភ្នំបាខែង ការជួយដល់សារមន្ទីរប្រល័យពូជសាសន៍ទួលស្លែង ធ្វើបញ្ជីសារពើពន្ធតាមប្រព័ន្ធឌីជីថលនៃនៅសារមន្ទីរតាមខេត្ត ហើយបង្កើតកម្មវិធីដែលធ្វើឲ្យមានការយល់ដឹងក្នុងចំណោមសាធារណជន លើការការពារបេតិកភណ្ឌវប្បធម៌។
###
