សេចក្តីប្រកាសព័ត៌មាន
ថ្ងៃទី២៧ ខែមេសា ឆ្នាំ២០២០
នៅសប្តាហ៍នេះ រដ្ឋាភិបាលសហរដ្ឋអាមេរិក បានផ្តល់មូលនិធិបន្ថែមចំនួន ១,៥ លានដុល្លារ សម្រាប់ជួយកម្ពុជា ក្នុងការប្រយុទ្ធប្រឆាំងនឹងជំងឺកូវីដ ១៩។ តាំងពីពេលចាប់ផ្តើមនៃការផ្ទុះមេរោគរាតត្បាតនេះមក រដ្ឋាភិបាលសហរដ្ឋអាមេរិក បានផ្តល់ជំនួយសរុបចំនួនជាង ៣,៥ លានដុល្លារ ដើម្បីទប់ទល់ការរាលដាលនៃជំងឺកូវីដ ១៩ នៅកម្ពុជា។ ជំនួយនេះ ដែលត្រូវបានផ្តល់តាមរយៈ ទីភ្នាក់ងារជំនួយអាមេរិក USAID នឹងឧបត្ថម្ភដល់ផ្នែកទំនាក់ទំនងហានិភ័យ ការចូលរួមសហគមន៍ ការគ្រប់គ្រងនិងការពារការឆ្លង និងការគាំទ្រដល់មន្ទីរពិសោធន៍ ។
លោកឯកអគ្គរដ្ឋទូតសហរដ្ឋអាមេរិក W. Patrick Murphy បានមានប្រសាសន៍ថា ៖ «ការជួយដល់ការឆ្លើយតបរបស់ប្រទេសកម្ពុជាចំពោះជំងឺកូវីដ ១៩ បន្តកិច្ចសហប្រតិបត្តិការ និងភាពជាដៃគូដ៏យូរអង្វែងរបស់យើងលើផ្នែកសុខាភិបាល ជាមួយប្រទេសកម្ពុជា។ ការយកឈ្នះបានលើមេរោគកូវីដ ១៩ គឺជាបញ្ហាប្រឈមជាសាកលមួយ ហើយសហរដ្ឋអាមេរិក កំពុងធ្វើការនៅក្នុងស្រុក និងនៅបរទេស ដើម្បីបញ្ឈប់ការរាលដាលនៃជំងឺនេះ។ ជំនួយរបស់យើងនឹងជួយប្រព័ន្ធសុខាភិបាលកម្ពុជា នៅក្នុងការតាមដានជំងឺ ព្យាបាលអ្នកឈឺ ហើយការពារកុំឲ្យមានឆ្លងជំងឺកូវីដ ១៩ ថែមទៀត»។
លោកបន្តថា ៖ «រាជរដ្ឋាភិបាលកម្ពុជា និងរដ្ឋាភិបាលសហរដ្ឋអាមេរិក មានប្រវត្តិដ៏យូរក្នុងការធ្វើការរួមគ្នា ជាដៃគូប្រកបដោយផលិតភាព និងប្រសិទ្ធភាព ក្នុងការពង្រឹងនូវប្រព័ន្ធសុខាភិបាល ដោះស្រាយនូវជំងឺឆ្លងផ្សេងៗ និងលើកកម្ពស់សមិទ្ធផលសុខាភិបាល សម្រាប់ប្រជាជនកម្ពុជា នៅក្នុងតំបន់ និងលើពិភពលោក»។ លោកបន្ថែមថា ៖ «យើងបន្តកិច្ចសហការនេះជាមួយប្រជាជនកម្ពុជា ក្នុងការប្តេជ្ញាចិត្តដ៏ខ្លាំងក្លា ដោះស្រាយបញ្ហាប្រឈមនានាដែលមិនធ្លាប់មានពីមុន មកនៃជំងឺកូវីដ១៩»។
តាមរយៈភាពជាដៃគូដែលកំពុងមានមកនេះ ក្នុងការសម្របសម្រួលជាមួយរាជរដ្ឋាភិបាលកម្ពុជា ដៃគូសប្បុរសធម៌អន្តរជាតិ និងអ្នកពាក់ព័ន្ធក្នុងស្រុក រដ្ឋាភិបាលសហរដ្ឋអាមេរិកជួយដល់៖
- ការគ្រប់គ្រងលើករណីជំងឺ ដើម្បីពង្រឹងការថែទាំអ្នកជំងឺ ហើយកាត់បន្ថយហានិភ័យនៃការចម្លងទៅអ្នកដទៃ
- ការគ្រប់គ្រង និងការការពារកុំឲ្យមានការឆ្លង ដើម្បីការពារ និងគ្រប់គ្រងការឆ្លង នៅតាមកន្លែងថែទាំសុខភាព។
- ការពង្រឹងផ្នែកមន្ទីរពិសោធន៍ ដើម្បីត្រៀមរៀបចំសម្រាប់ការធ្វើតេស្តរកមេរោគកូវីដ ១៩ ក្នុងទ្រង់ទ្រាយធំ។
- ការត្រួតពិនិត្យសុខភាពសាធារណៈនៅតាមច្រកចេញចូល ដើម្បីជួយកម្ពុជាក្នុងការអនុវត្តផែនការសម្រាប់គ្រាអាសន្ន ក្នុងការត្រួតពិនិត្យមនុស្សមកដល់ នៅតាមច្រកផ្សេងៗនៃប្រទេស ដូចជាព្រលានយន្តហោះ និងច្រកព្រំដែនគោក។
- ការធ្វើការទាក់ទងគ្នានិងការផ្ញើសារដល់សាធារណជន ដើម្បីជួយអប់រំប្រជាជនអំពីវិធីដែលគេអាចធ្វើតាម ដើម្បីការពារ និងឆ្លើតបនឹងការរាលដាលនៃមេរោគនេះ។
- ការធ្វើការអង្កេត និងការឆ្លើយតបឆាប់រហ័ស ដើម្បីពង្រីកការស្វែងរកឃើញករណី ព្រមទាំងការផ្តល់ការបណ្តុះបណ្តាល និងការគាំទ្រសម្រាប់ក្រុមឆ្លើយតបរហ័ស ក្នុងការស៊ើបអង្កេតករណីជំងឺ ហើយធ្វើការតាមរកអ្នកប៉ះពាល់។
នៅក្នុងប្រទេសកម្ពុជា ស្ថានទូតអាមេរិក ផ្តល់ជំនួយផ្នែកសុខាភិបាលតាមរយៈ ក្រុមអន្តរទីភ្នាក់ងារ ដែលរួមមានទីភ្នាក់ងារផ្តល់ជំនួយអាមេរិក (USAID) មជ្ឈមណ្ឌលគ្រប់គ្រង និងបង្ការជំងឺ (USCDC) វិទ្យាស្ថានជាតិសុខភាព (NIH) អង្គភាពស្រាវជ្រាវសុខាភិបាលនៃកងទ័ពជើងទឹកសហរដ្ឋអាមេរិក (NAMRU-2) ក្រសួងការបរទេសអាមេរិក និងអង្គការដទៃទៀត។ ជំនួយអាមេរិក លើផ្នែកសុខាភិបាលក្នុងប្រទេសកម្ពុជា នៅក្នុងការប្រយុទ្ធប្រឆាំងនឹងមេរោគអេដស៍ ជំងឺគ្រុនចាញ់ ជំងឺរបេង លើកកម្ពស់សុខភាពមាតានិងទារក ហើយពង្រឹងប្រព័ន្ធសុខាភិបាលជារួម។
អស់រយៈពេលរាប់ទសវត្សរ៍មកហើយ ដែលសហរដ្ឋអាមេរិកគឺជាអ្នកផ្តល់ជំនួយទ្វេភាគី ក្នុងវិស័យសុខភាពសាធារណៈ ធំជាងគេ នៅក្នុងពិភពលោក។ ជំងឺឆ្លង គំរាមកំហែងនៅកន្លែងណាមួយហើយ អាចគំរាមកំហែងដល់គ្រប់កន្លែងទាំងអស់។ សហរដ្ឋអាមេរិក សូមអំពាវនាវដល់ម្ចាស់ជំនួយទាំងអស់ ឲ្យចូលរួម និងរួមចំណែកដល់ការខិតខំជាសាកល ដើម្បីប្រយុទ្ធប្រឆាំងនឹងជំងឺកូវីដ ១៩៕
