និវេសនដ្ឋានឯកអគ្គរដ្ឋទូតអាមេរិក
ថ្ងៃចន្ទ ទី២៩ ខែមេសា ឆ្នាំ២០១៩
(រៀបចំសម្រាប់ថ្លែង)
ជម្រាបសួ អស់លោក លោកស្រី! សូមស្វាគមន៍មកកាន់និវេសដ្ឋានរបស់ឯកអគ្គរដ្ឋទូតអាមេរិក និងសូមអរគុណដែលបានអញ្ជើញមកនាយប់នេះ ដើម្បីអបអរពិធីសម្ពោធបើកការសាងសង់គម្រោងរបស់ក្រុមហ៊ុន អង្គរ វ៉ាយដ៍ឡាយហ្វ៍ & អឹឃ្វារៀម (Angkor Wildlife and Aquarium) ។
ខ្ញុំឈ្មោះ Michael Newbill ហើយខ្ញុំគឺជាភារធារីនៃស្ថានទូតអាមេរិក។ ពិតមែនតែខ្ញុំមិនរស់នៅក្នុងផ្ទះដ៏ប្រណីតនេះក្តី តែយ៉ាងហោចណាស់ក៏ខ្ញុំអាចរៀបចំពិធីធំៗ នៅទីនេះបានដែរ។ ខ្ញុំសង្ឃឹមថា អ្នកទាំងអស់គ្នា នឹងសប្បាយក្នុងការពិសាអាហារ ហើយជជែកលេងជាមួយគ្នា។
មុនពេលខ្ញុំនិយាយបន្តទៀត ខ្ញុំសូមគោរពចំពោះភ្ញៀវកិត្តិយសរបស់យើង ដែលមានវត្តមាននៅយប់នេះ គឺ៖
- ឯកឧត្តម ទិត ចន្ថា រដ្ឋមន្ត្រីស្តីទី ក្រសួងទេសចរណ៍
- ឯកឧត្តម ពៅ ពិសិដ្ឋ អភិបាលរងខេត្តសៀមរាប
- លោក Zeb Hogan (មកពីគំរោង Wonders of Mekong របស់ទូរទស្សន៍ National Geographic)
- ឯកអគ្គរាជទូត Tina Redshaw និង ឯកអគ្គរដ្ឋទូត Angela Corcoran
ព្រមទាំងមិត្ត និងសហការី បើគ្មានពួកគេទេ គម្រោងសាង់មួយនេះក៏មិនអាចមានចេញជារូបរាងបានដែរ ក្នុងនោះមាន៖
- លោក ម៉េង ហ៊ាង
- លោក Roger Reynolds ប្រធានក្រុមហ៊ុន Angkor Wildlife &Aquarium
គម្រោងក្រុមហ៊ុន Angkor Wildlife &Aquarium ធ្វើឲ្យខ្ញុំរំភើប ដោយសារមានហេតុផលច្រើន។
ទីមួយ គម្រោងនេះជាគម្រោងមួយក្នុងចំណោមការវិនិយោគធំជាងគេរបស់អាមេរិក នៅកម្ពុជា នៅក្នុងរយៈពេលជាច្រើនឆ្នាំមកនេះ ហើយនេះគឺជាអ្វីដែលយើងត្រូវអបអរ និងទទួលស្គាល់។ ម្យ៉ាង ដោយសារការគាំទ្ររបស់សហរដ្ឋអាមេរិក ជលវប្បដ្ឋាន ត្រីទឹកសាប ទឹកប្រៃ និងជម្រកអភិរក្សសត្វ នឹងក្លាយជាគោលដៅទេសចរថ្នាក់ពិភពលោក ។ ហើយយើងមានអ្នកឯកទេសរបស់ក្រុមហ៊ុន ICM ដែលជាក្រុមហ៊ុនឯកទេសនាំមុខគេផ្នែកជលវប្បកម្ម ដែលយើងត្រូវអរគុណ ចំពោះរឿងនេះ ។
ទីពីរ ខ្ញុំដឹងថា គម្រោង Angkor Wildlife &Aquarium គឺជាវិធីដ៏ប្រពៃមួយសម្រាប់ឲ្យក្រុមគ្រួសារ ចំណាយពេលវេលាជាមួយគ្នា នៅទឹកដីសៀមរាប ។ ថ្វីបើមនុស្សពេញវ័យ ហាក់គ្មានការនឿយណាយនឹងទស្សនានូវភាពអស្ចារ្យនៃតំបន់ប្រាសាទអង្គរក្តី តែពេលខ្លះ កូនៗរបស់យើងមានភាពធុញទ្រាន់ ។ ជលវប្បដ្ឋាននេះ នឹងបន្ថែមនូវបទពិសោធន៍សម្រាប់គ្រួសារ ចូលទៅក្នុងបញ្ជីនៃគោលដៅដែល «ត្រូវទៅមើល» នៅខេត្តសៀមរាប ហើយវាជាកន្លែងមួយដែលខ្ញុំរីករាយនឹងនាំកូនប្រុស ២ នាក់របស់ខ្ញុំ ទៅមើលផងដែរ។ ជារួម វានឹងលើកទឹកចិត្តឲ្យអ្នកទេសចរស្នាក់នៅរយៈពេលយូរ ហើយបង្កើនចំណូលទេសចរណ៍។
ចំណុចចុងក្រោយ ក្នុងនាមជាអ្នកការទូតអាមេរិកម្នាក់ ខ្ញុំមានក្តីរំភើប ពីព្រោះនៅពេលខ្ញុំនិយាយពីការវិនិយោគរបស់ប្រទេសអាមេរិក ខ្ញុំមិនមែនសំដៅតែទៅលើលុយតែមួយមុខនោះទេ។ លើសពីលុយទៅទៀតនោះ គម្រោងនេះ តំណាងអោយការវិនិយោគរបស់សហរដ្ឋអាមេរិក នៅក្នុងប្រទេសកម្ពុជាមួយ ដែលមានសុខុមាលភាព វិបុលភាព ប្រជាធិបតេយ្យ និងសន្តិសុខ ។
ក្រុមហ៊ុនអាមេរិកឲ្យតម្លៃលើគុណភាព និងតម្លាភាព។ ក្នុងករណីនេះ តម្លាភាពសំដៅលើន័យត្រង់តែម្តង ។ តម្លាភាពបង្កើតទំនុកចិត្ត ហើយទំនុកចិត្តបង្កើតបានវេទិកាមួយសម្រាប់យើងផ្លាស់ប្តូរយោបល់ និងចែករំលែកចំណេះដឹង។ ការវិនិយោគនេះថែមទាំងជាគំរូដ៏ប្រពៃមួយ ថា កាលណាច្បាប់ទម្លាប់ មានភាពច្បាស់លាស់ ហើយដំណើរការលទ្ធកម្មមានភាពបើកចំហ ប្រទេសកម្ពុជាមិនចាំបាច់ធ្វើការជ្រើសរើសដៃគូមួយណាៗនោះទេ តែតាមពិតទៅ អាចទទួលបានប្រយោជន៍ពីទំនាក់ទំនងជាមួយដៃគូច្រើន ដើម្បីទទួលបានលទ្ធផលល្អបំផុតសម្រាប់ប្រទេស និងប្រជាជនកម្ពុជា។ ក្នុងករណីនេះ ប្រទេសកម្ពុជាទទួលបានតម្លៃបន្ថែមលើគោលដៅទេសចរណ៍ដ៏ប្រពៃដែលមានស្រាប់។
យើងនៅក្នុងសហរដ្ឋអាមេរិក ឲ្យតម្លៃផងដែរនូវការអភិរក្ស បរិស្ថាន និងការអប់រំ។ អ្វីដែលយុវជនកម្ពុជាបានប្រាប់យើង ក៏មានសារៈសំខាន់បំផុតសម្រាប់ពួកគេផងដែរ។ ការអភិវឌ្ឍនេះមានភាពស្របឥតខ្ចោះជាមួយនឹងផលប្រយោជន៍ទាំងនោះ ហើយវាពិតជាទាក់ទាញឲ្យប្រជាជនកម្ពុជាចង់រៀនថែមទៀត អំពីប្រព័ន្ធបរិស្ថានអេកូឡូស៊ីដ៏សម្បូរបែបនៃមាតុភូមិរបស់គេ។ តាមពិតទៅ ខ្ញុំគិតមិនឃើញពីវិធីប្រសើរណាមួយក្នុងការជំរុញកំណើនសេដ្ឋកិច្ច ជាងការអភិរក្សជីវចម្រុះដ៏សម្បូរបែបនៃតំបន់ទន្លេមេគង្គ ដែលជាសួនសត្វព្រៃ និងជលវប្បដ្ឋានដ៏ល្អបំផុតនោះទេ។
ខ្ញុំសូមអរគុណលោក លោកស្រីទាំងអស់សាជាថ្មីម្តងទៀត ដែលបានអញ្ជើញមក នៅកម្មវិធីនារាត្រីនេះ។ ខ្ញុំមានការសប្បាយចិត្ត ដែលស្ថានទូតអាមេរិក អាចជួយផ្សព្វផ្សាយគម្រោងដ៏អស្ចារ្យនេះ ហើយខ្ញុំរង់ចាំមើលនូវគម្រោងមួយនេះសម្រេច។
