វិទ្យាស្ថានជាតិសុខភាពសាធារណៈ
ថ្ងៃទី ៩ ខែកញ្ញា ឆ្នាំ ២០១៩
(រៀបចំសម្រាប់ថ្លែង)
សូមគោរព ឯកឧត្តម ម៉ម ប៊ុនហេង រដ្ឋមន្រ្តីក្រសួងសុខាភិបាល ឯកឧត្តម វេជ្ជបណ្ឌិត សុខ ផេង រដ្ឋលេខាធិការក្រសួងសុខាភិបាល ឯកឧត្តម សាស្រ្តាចារ្យ សាផុន វឌ្ឍនៈ សាកលវិទ្យាធិការនៃសាកលវិទ្យាល័យវិទ្យាសាស្រ្តសុខាភិបាល សាស្រ្តាចារ្យ អ៊ុង សំអាន ទីប្រឹក្សាក្រសួងសុខាភិបាល ឯកឧត្តម វេជ្ជបណ្ឌិត ហុក គឹមចេង អគ្គនាយកសុខាភិបាល សាស្ត្រាចារ្យ ឈា ឆវណ្ណ នាយកវិទ្យាស្ថានជាតិសុខភាពសាធារណៈ លោកស្រី វេជ្ជបណ្ឌិត Rachel Albalak ប្រធានទីមជ្ឈមណ្ឌលបង្ការជំងឺ របស់សហរដ្ឋអាមេរិក US-CDC ប្រចាំកម្ពុជា ភ្ញៀវកិត្តិយស អស់លោក លោកស្រី ជាទីរាប់អាន ។
ខ្ញុំមានសេចក្តីរីករាយដោយមានវត្តមាននៅក្នុងពិធីប្រគល់វិញ្ញាបនបត្រ បញ្ជាក់គុណភាព ISO 15189 Plus ដល់ផ្នែកពិគ្រោះជំងឺក្រៅ នៃមន្ទីរពិសោធន៍ របស់វិទ្យាស្ថានជាតិសុខភាពសាធារណៈ។
ប្រទេសកម្ពុជាបានដើរឈានមុខគេ នៅក្នុងផ្នែកសំខាន់ៗជាច្រើន លើផ្នែកសុខភាពសាធារណៈ។ ឧទាហរណ៍នៅខែកក្កដា ឆ្នាំ ២០១៧ ប្រទេសកម្ពុជាត្រូវបានទទួលស្គាល់ជាប្រទេសមួយក្នុងចំណោមប្រទេសចំនួនតែ ៧ ប៉ុណ្ណោះ ដែលបានសម្រេចគោលដៅសាកល ៩០ ៩០ ៩០ ចំពោះជោគជ័យក្នុងការប្រឆាំងនឹងការរាលដាលនៃជម្ងឺអេដស៍ ។ មានអ្នកផ្ទុកមេរោគអេដស៍ចំនួន ៩០% នៅក្នុងប្រទេសដឹងថា គេមានមេរោគនេះ ៩០% នៃពួកគេធ្វើការព្យាបាលរោគនេះ ហើយ ៩០% នៃប្រជាជនដែលព្យាបាលរោគនេះ អាចទប់មិនឲ្យមេរោគនេះឡើងខ្លាំងបាន។
សព្វថ្ងៃនេះ យើងដឹងថា ប្រទេសកម្ពុជា និងក្រសួងសុខាភិបាលកម្ពុជាសម្រេចបានជោគជ័យគួរឲ្យកត់សម្គាល់មួយទៀត។ មន្ទីរពិសោធន៍របស់វិទ្យាសា្ថនជាតិសុខភាពសាធារណៈគឺជាមន្ទីរពិសោធន៍សាធារណៈដំបូងគេ នៅកម្ពុជា ដែលត្រូវបានបញ្ជាក់គុណភាពដោយវិទ្យាស្ថានគ្រប់គ្រងគុណភាពផ្នែកថែទាំសុខភាព សម្រាប់ការទទួលបានវិញ្ញាបនប័ត្រ ISO 15189 Plus ។ នៅក្នុងពិភពលោក មានមន្ទីរពិសោធន៍មិនច្រើនទេដែលមានកម្រិតស្តង់ដាខ្ពស់បែបនេះ។ សូមអបអរសាទរ!
សេវាមន្ទីរពិសោធន៍មានសារៈសំខាន់ណាស់ ទាំងសម្រាប់សុខភាពសាធារណៈ ទាំងសម្រាប់ពេទ្យ។ មន្ទីរពិសោធន៍ផ្នែកសុខភាពជួយដល់ការថែទាំអ្នកជម្ងឺម្នាក់ៗ ព្រមទាំងជួយការពារ និងតាមដានការផ្ទុះជម្ងឺ។
សមិទ្ធិផលថ្ងៃនេះ គឺជាផ្នែកមួយនៃគោលដៅរបស់ក្រសួងសុខាភិបាល នៅក្នុងការលើកកម្ពស់គុណភាពនៃសេវាមន្ទីរពិសោធន៍ឯកជន និងសាធារណៈទូទាំងប្រទេស ដើម្បីធានាលទ្ធផលត្រឹមត្រូវ និងទាន់ពេលវេលា សម្រាប់ថែទាំអ្នកជម្ងឺ និងការឆ្លើយតបនឹងការផ្ទុះឡើងនៃជម្ងឺ។ វិទ្យាស្ថានជាតិសុខភាពសាធារណៈ និងការិយាល័យមន្ទីរពិសោធន៍សុខភាព បានដើរតួនាទីធំនៅក្នុងការជួយក្រសួងសុខាភិបាល ឲ្យសម្រេចគោលដៅនេះ។ ក្រៅពីការសម្រេចបាននូវវិញ្ញាបនប័ត្រ ISO 15189 Plus នៅមន្ទីរពិសោធន៍ផ្នែកជម្ងឺក្រៅនៅនាយកដ្ឋានរបស់ខ្លួន មន្ទីរពិសោធន៍នៃវិទ្យាស្ថានជាតិសុខភាពសាធារណៈកំពុងធ្វើការដើម្បីលើកកម្ពស់បទដ្ឋាន នៅតាមមន្ទីរពិសោធន៍ នៅទូទាំងប្រទេស។ គេកំពុងផ្តល់ការបណ្តុះបណ្តាលលើការងារមន្ទីរពិសោធន៍ និងការគ្រប់គ្រងគុណភាពនៃមន្ទីរពិសោធន៍ ដល់មន្ទីរពិសោធន៍ចំនួន ២៣ នៅពេលបច្ចុប្បន្ន ដោយមានច្រើនទៀតនឹងត្រូវបានបញ្ចូល នៅក្នុងពេលអនាគត។
ខ្ញុំសូមអរគុណឯកឧត្តមរដ្ឋមន្រ្តី ម៉ម ប៊ុនហេង និងបុគ្គលិកនៃក្រសួងសុខាភិបាល ដែលបានដឹកនាំ និងគាំទ្រនាំដល់ជោគជ័យដ៏សំខាន់នេះ។ ខ្ញុំសូមអរគុណផងដែរ ដល់សហការីរបស់ខ្ញុំនៅមជ្ឈមណ្ឌលបង្ការ ជំងឺ (CDC) និងកម្មវិធី PEPFAR ដែលបានផ្តល់ការគាំទ្រផ្នែកបច្ចេកទេស និងថវិកាដល់គម្រោងនេះ។
ផ្នែកសុខភាពគឺជា ការវិនិយោគផ្នែកអភិវឌ្ឍន៍ដ៏ធំបំផុតមួយរបស់សហរដ្ឋអាមេរិក នៅប្រទេសកម្ពុជា ហើយវាជាផ្នែកសំខាន់ជាងគេនៃកិច្ចសហប្រតិបត្តិការ រវាងប្រទេសយើងទាំងពីរ។ មន្ទីរពិសោធន៍របស់វិទ្យាស្ថានជាតិសុខភាពសាធារណៈ ទទួលបានការបញ្ជាក់គុណភាព ISO ជាផ្នែកមួយនៃកិច្ចសហប្រតិបត្តិការរួម រវាងរដ្ឋាភិបាលសហរដ្ឋអាមេរិក និងក្រសួងសុខាភិបាលកម្ពុជា។ វារួមមានជំនួយក្នុងការប្រយុទ្ធប្រឆាំងនឹងមេរោគអេដស៍ ជំងឺរបេង និងជំងឺគ្រុនចាញ់ ព្រមទាំងជំនួយបច្ចេកទេស ដូចជានៅក្នុងវិស័យប្រព័ន្ធព័ត៌មានផ្នែកសុខភាព និងការឆ្លើយតបនឹងការផ្ទុះឡើងនៃជំងឺ ។
ខ្ញុំរីករាយនឹងឮពីដំណឹងល្អៗចេញមកពីសមិទ្ធិផលថ្មីនេះ។ សំខាន់បំផុតនោះគឺ ខ្ញុំសង្ឃឹមថា វានឹងជួយប្រទេសកម្ពុជាក្នុងការជួយសង្គ្រោះជីវិតមនុស្ស ដោយវាធ្វើឲ្យអ្នកធ្វើការក្នុងមន្ទីរពេទ្យអាចផ្អែកការព្យាបាលរបស់គេលើការកំណត់រោគវិនិច្ឆ័យត្រឹមត្រូវ និងទាន់ពេលវេលា។
សូមអរគុណម្តងទៀតដែលបានអញ្ជើញខ្ញុំមកចូលរួមក្នុងពិធីនេះ។ សហរដ្ឋអាមេរិកមានមោទកភាព ក្នុងការធ្វើការសហការជាមួយប្រទេសកម្ពុជា ដើម្បីលើកកម្ពស់សុខភាពរបស់ប្រជាពលរដ្ឋ កម្ពុជាទាំងអស់ ។
សូមអរគុណច្រើន ៕
