សណ្ឋាគារសុខា ភ្នំពេញ
ថ្ងៃទី១៨ ខែកញ្ញា ឆ្នាំ២០១៩
(រៀបចំសម្រាប់ថ្លែង)
តាងនាមឲ្យស្ថានទូតអាមេរិក នៅកម្ពុជា ខ្ញុំសូមសម្តែងការស្វាគមន៍យ៉ាងកក់ក្តៅ ចំពោះតំណាងសាកលវិទ្យាល័យ និងមហាវិទ្យាល័យ ទីប្រឹក្សាផ្នែកអប់រំនៅសហរដ្ឋអាមេរិក សហការី និងមិត្តភក្តិ ដែលមានវត្តមាននៅក្នុងវេទិកាស្តីពីការអប់រំរបស់សហរដ្ឋអាមេរិក នៅរដ្ឋធានីភ្នំពេញ។
សូមស្វាគមន៍មកកាន់ព្រះរាជាណាចក្រអច្ឆរិយៈ!
ស្ថានទូតអាមេរិកនៅភ្នំពេញ មានមោទកភាពក្នុងការរៀបចំវេទិកាថ្នាក់តំបន់ ស្តីពីការអប់រំនៅសហរដ្ឋអាមេរិក សម្រាប់តំបន់អាស៊ីបូព៌ា និងប៉ាស៊ីហ្វិក ជាលើកដំបូង។ វេទិកានេះគឺជាផ្នែកសំខាន់មួយនៃការខិតខំរបស់យើង ក្នុងការបង្កើនចំនួនសិស្ស និស្សិតដែលសិក្សានៅក្នុងសហរដ្ឋអាមេរិក។ ស្ថាប័នអប់រំថ្នាក់ឧត្តមនៅសហរដ្ឋអាមេរិកមានកេរ្តិ៍ឈ្មោះល្បីដាច់គេ ចំពោះគុណភាពអប់រំ ការវិភាគលម្អិត វិទ្យាសាស្រ្ត និងការបញ្ចូលគំនិតច្នៃប្រឌិតថ្មី ការរៀបចំផ្នែកភាសាអង់គ្លេសសម្រាប់អាជីព និងការរកនិងការផ្តល់ការងារ។
ឧត្តមសិក្សានៅសហរដ្ឋអាមេរិកផ្តល់បទពិសោធន៍ខុសពីកន្លែងដទៃ។ ពួកគេផ្តល់បរិយាកាសសម្រាប់ឲ្យសិស្សធ្វើការវិភាគលម្អិត ហ៊ានប្រឈមបញ្ហាពិបាកៗ ហើយស្វែងយល់លក្ខណៈថ្មីៗ ទាក់ទងនិងប្រាជ្ញា ការសិក្សា និងចំណូលចិត្តផ្ទាល់ខ្លួន។ នៅតាមមហាវិទ្យាល័យក្នុងសហរដ្ឋអាមេរិក គំនិតថ្មីៗ ការបញ្ចូលគំនិតច្នៃប្រឌិតថ្មី និងការស្វែងយល់ត្រូវបានជំរុញលើកទឹកចិត្ត។ វាមានហេតុផលថា ហេតុអ្វីក៏ការអភិវឌ្ឍន៍ដ៏ខ្លាំងបំផុត ផ្នែកបច្ចេកវិទ្យា សង្គម និងវប្បធម៌នៅសហរដ្ឋអាមេរិក មានឡើងនៅតាមមហាវិទ្យាល័យក្នុងសហរដ្ឋអាមេរិក (ដូចជាក្រុមហ៊ុន Dell, Facebook, Dropbox, Snapchat, WordPress)។
ប្រទេសកម្ពុជាមានយុវជនច្រើន។ ប្រជាជនចំនួន ៧០% ស្ថិតនៅក្នុងអាយុក្រោម ៣៥ ឆ្នាំ។ ដូចនៅក្នុងគ្រប់កន្លែងក្នុងពិភពលោកដែរ យុវជននៅទីនេះមានការទាក់ជាមួយគ្នា និងជាមួយពិភពលោក។ តាមរយៈភាពយន្ត សៀវភៅ កម្មវិធីរបស់ស្ថានទូត
បណ្ណាល័យរបស់ស្ថានទូត មជ្ឈមណ្ឌល និងទីប្រឹក្សារបស់មជ្ឈមណ្ឌលស្តីពីការសិក្សានៅសហរដ្ឋអាមេរិក (EducationUSA) គេមានការយល់ដឹងកាន់តែច្រើនឡើង ស្តីពីសហរដ្ឋអាមេរិក វប្បធម៌និងគុណតម្លៃរបស់យើង។
ប្រទេសកម្ពុជា និងតំបន់អាស៊ីបូព៌ា និងប៉ាស៊ីហ្វិកស្ថិតនៅក្នុងស្ថានភាពល្អពិសេស សម្រាប់ជំរុញការសិក្សានៅក្នុងសហរដ្ឋអាមេរិក។ និស្សិតមកពីតំបន់អាស៊ីបូព៌ា និងប៉ាស៊ីហ្វិកមានចំនួនជិត ៥០% នៃចំនួននិស្សិតអន្តរជាតិចំនួនជាង ១ លាននាក់ ដែលកំពុងសិក្សានៅក្នុងសហរដ្ឋអាមេរិក។ ប្រទេសចំនួន ៧ ក្នុងចំណោមប្រទេសចំនួន ២៥ ដែលបញ្ជូននិស្សិតទៅរៀនច្រើនជាងគេ ស្ថិតនៅក្នុងតំបន់នេះ ហើយប្រទេសទាំងនេះក៏ជាគោលដៅធំជាងគេដែរ សម្រាប់និស្សិតអាមេរិក។
សម្រាប់កម្ពុជា គ្រាន់តែនៅឆ្នាំទៅនេះ មានកំណើនចំនួន ២៨,៧% ក្នុងចំនួនសិស្ស និស្សិតដែលសិក្សានៅក្នុងសហរដ្ឋអាមេរិក។ ដោយសារក្រសួងអប់រំធ្វើការកែទម្រង់ និសិ្សតកម្ពុជាកាន់តែមានសមត្ថភាពប្រកួតប្រជែង មានការរៀបចំល្អ សម្រាប់ការសិក្សាដ៏លំបាក ថ្នាក់ឧត្តមសិក្សាក្នុងសហរដ្ឋអាមេរិក។ ដូច្នេះ កម្ពុជាគឺជាទីផ្សារមានកំណើនសម្រាប់ស្វែងរកសិស្ស និស្សិតទៅសិក្សាក្នុងសហរដ្ឋអាមេរិក។ ក្នុងពេលមួយដែលនិស្សិតមានជម្រើសច្រើនក្នុងការសិក្សានៅបរទេស នៅក្នុងតំបន់នេះ កំណើនចំនួន ២៨,៧% នៃចំនួននិស្សិតសិក្សានៅអាមេរិក បង្ហាញឲ្យឃើញពីតម្លៃនៃការអប់រំរបស់អាមេរិក។
យើងមានសំណាងដោយមានកម្មវិធីស្តីពីគម្រោងផ្តួចផ្តើមនៃអ្នកដឹកនាំយុវជននៅអាស៊ីអាគ្នេយ៍ (YSEALI) នៅក្នុងតំបន់ ដែលជួយបង្ហាញដល់និស្សិត នូវស្ថាប័នឧត្តមសិក្សានៅក្នុងសហរដ្ឋអាមេរិក និងអ្វីដែលគេសម្រេចបាន ទាក់ទងនឹងការសិក្សា ផ្នែកសង្គម វប្បធម៌ និងអាជីព បើគេសិក្សានៅសហរដ្ឋអាមេរិក។
តាមរយៈកម្មវិធីអាហារូបករណ៍ Fulbright និស្សិតរបស់យើងអាចទទួលបានសញ្ញាប័ត្រក្រោយបរិញ្ញា នៅទូទាំងសហរដ្ឋអាមេរិក ហើយត្រឡប់មកកម្ពុជាវិញ ដើម្បីពង្រឹងស្ថាប័ន ហើយធ្វើឲ្យសហគមន៍របស់គេមានភាពប្រសើរឡើង។ អតីតនិស្សិតអាហារូបករណ៍ Fulbright ដូចជា ជា កញ្ញារិទ្ធ ស្រ៊ុន សុវណ្ណ ផេង មាសសក្តិ ដែលបានសិក្សានៅក្នុងសាកលវិទ្យាល័យ Arizona State, Colorado State និងសាកលវិទ្យាល័យ Brandeis ។ ពួកគេបានបង្កើតក្រុមហ៊ុនមួយ ឈ្មោះ Edemy ដែលជាក្រុមហ៊ុនបច្ចេកវិទ្យាទាក់ទងនឹងការអប់រំ មានបេសកកម្មធ្វើឲ្យមានលទ្ធភាពស្មើគ្នា ក្នុងការទទួលបានការអប់រំ ហើយផ្តល់បទពិសោធន៍ចម្រុះទាក់ទងនឹងការសិក្សា ដល់សិស្ស និស្សិត គ្រូ និងអ្នកគ្រប់គ្រង។ ពួកគេបានរៀនជំនាញរបស់គេនៅក្នុងស្ថាប័នសហរដ្ឋអាមេរិក ហើយបញ្ចូលគ្នានូវជំនាញឯកទេសរបស់គេក្នុងការអប់រំ និងដំណោះស្រាយតាមបច្ចេកវិទ្យា ដើម្បីបង្កើត Edemy ឡើង។
យើងមានមោទកភាពចំពោះអ្វីដែលអតីតនិស្សិតកម្ពុជានៅក្នុងស្ថាប័នឧត្តមសិក្សាក្នុងសហរដ្ឋអាមេរិក សម្រេចបាន នៅកម្ពុជា។ ដោយមានកម្មវិធីសិក្សារាប់ពាន់ ស្ថាប័នថ្នាក់ពិភពលោក និងភាពអាចបទបែនបានដែលគ្មានអ្នកដូច សហរដ្ឋអាមេរិកផ្តល់ឱកាសច្រើនស្តីពីឧត្តមសិក្សា ដែលអ្នកមិនអាចឃើញមាននៅតំបន់ដទៃទៀត ក្នុងពិភពលោក។
សប្តាហ៍នេះ ត្រូវបានរៀបចំឡើងក្នុងបំណងពង្រឹងទំនាក់ទំនងនិងការសហការគ្នា រវាងមជ្ឈមណ្ឌល EducationUSA និងផ្នែកឧត្តមសិក្សាក្នុងសហរដ្ឋអាមេរិក ហើយថែមទាំងជួយដល់ការខិតខំរបស់មហាវិទ្យាល័យ និងសាកលវិទ្យាល័យសហរដ្ឋអាមេរិក នៅក្នុងតំបន់ ហើយជំរុញការប្រាស្រ័យទាក់ទង និងការធ្វើកិច្ចសហប្រតិបត្តិការគ្នា ក្នុងចំណោមទីប្រឹក្សា នៅតំបន់អាស៊ីបូព៌ា និងប៉ាស៊ីហ្វិក។
ឧត្តមសិក្សារបស់សហរដ្ឋអាមេរិកគឺជានិមិត្តរូបនៃសេរីភាពក្នុងការគិត ការបញ្ចេញមតិ និងការបញ្ចូលគំនិតច្នៃប្រឌិតថ្មី នៅជុំវិញពិភពលោក។ ការទទួលបានសញ្ញាប័ត្រពីសហរដ្ឋអាមេរិកគឺជាការស្រម៉ៃចង់បានរបស់មនុស្សជាច្រើន និងជាការស្រម៉ៃដែលលោកអ្នកម្នាក់ៗជួយឲ្យនិស្សិតទទួលបាន តាមរយៈការងាររបស់លោកអ្នកជាទីប្រឹក្សា ជាអ្នកជ្រើសរើសនិស្សិត និងជាអ្នកផ្តល់ប្រឹក្សាទាក់ទងនឹងការទទួលឲ្យចូលរៀន។
ខ្ញុំសូមអរគុណលោកអ្នក ចំពោះការចូលរួមនៅក្នុងវេទិកា EducationUSA និងសូមអរគុណដល់ការិយាល័យកិច្ចការវប្បធម៌ និងអប់រំរបស់ក្រសួងការបរទេសសហរដ្ឋអាមេរិក ព្រមទាំងដៃគូរបស់យើងនៅវិទ្យាស្ថានអប់រំអន្តរជាតិ ដែលបានជ្រើសរើសទីក្រុងភ្នំពេញ សម្រាប់រៀបចំវេទិកាថ្នាក់តំបន់នេះ។
ខ្ញុំសង្ឃឹមថា ទស្សនកិច្ចរបស់លោកអ្នកនៅព្រះរាជាណាចក្រអច្ឆរិយៈគឺជារឿងមិនអាចភ្លេចបាន និងថា លោកអ្នកនឹងចាកចេញទៅវិញ ពោរពេញដោយគំនិតថ្មី និងការទាក់ទងថ្មីៗ ក្នុងពេលដែលលោកអ្នកបន្តការងារដ៏មានសារៈសំខាន់របស់លោកអ្នក ក្នុងការជំរុញការសិក្សានៅក្នុងសហរដ្ឋអាមេរិក។
សូមអរគុណចំពោះអ្វីៗដែលលោកអ្នកធ្វើ ដើម្បីធ្វើយ៉ាងណាឲ្យនិស្សិតអន្តរជាតិម្នាក់ៗ នៅប្រទេសអាមេរិក ទទួលបានបទពិសោធន៍សម្រាប់មួយជីវិតរបស់គេ។ សូមទទួលបាននូវភាពសប្បាយរីករាយ!
