សណ្ឋាគារ Rosewood
ថ្ងៃទី ២៦ ខែកញ្ញា ឆ្នាំ ២០១៨
សូមជំរាបសួរ លោកជំទាវរដ្ឋលេខាធិការក្រសួងពាណិជ្ជកម្ម និងសហការីដទៃទៀតក្នុងរាជរដ្ឋាភិបាល កម្ពុជា លោកឧកញ៉ា លោកជំទាវឧកញ៉ា និងអ្នកដឹកនាំឆ្នើមៗដទៃទៀតក្នុងក្រុមហ៊ុនកម្ពុជា។
សូមជំរាបសួរ លោក Allen Tan ប្រធានសភាពាណិជ្ជកម្មសហរដ្ឋអាមេរិកនៅកម្ពុជា សមាជិកជាទីគោរពនៃប្រតិភូធុរកិច្ចអាមេរិករបស់យើង ដែលកំពុងធ្វើទស្សនកិច្ចនៅកម្ពុជា ភ្ញៀវកិត្តិយស អស់លោក លោកស្រី
សូមអរគុណដែលបានអញ្ជើញចូលរួមជាមួយយើង នៅថ្ងៃនេះ។ នៅពេលចុងក្រោយដែលខ្ញុំបានធ្វើការជំរុញផ្សព្វផ្សាពាណិជ្ជកម្មនៅក្នុងបន្ទប់នេះ ខ្ញុំបែរជាបានផឹកទឹកដែលចេញពីម៉ាស៊ីនសំអាតកំរាលព្រំ។ ថ្ងៃនេះ ខ្ញុំសង្ឃឹមថា នឹងមិនជួបប្រទះនឹងការភ្ញាក់ផ្អើលដូចនោះទៀតទេ។
ខ្ញុំរីករាយដោយឃើញមនុស្សច្រើនមកនៅព្រឹកនេះ ដើម្បីពិភាក្សា និងស្វែងយល់ថែមទៀតពីឱកាសធុរកិច្ច នៅក្នុងវិស័យកសិកម្មរបស់ប្រទេសកម្ពុជា និងដើម្បីផ្សាភ្ជាប់ទំនាក់ទំនង ដែលយើងសង្ឃឹមថា នឹងក្លាយជាភាពជាដៃគូយូរអង្វែង ប្រកបដោយផ្លែផ្កា ។
ខ្ញុំសូមចាប់ផ្តើមដោយអរគុណរដ្ឋាភិបាលដែលបានធ្វើសហប្រតិបត្តិការ នៅក្នុងការធ្វើអោយមានការប្រជុំធុរកិច្ចនេះឡើង។ យើងទើបតែមានការស្រស់ស្រូបអាហារពេលព្រឹកជាមួយគ្នាដែលក្នុងនោះ មានការផ្លាស់ប្តូរព័ត៌មានគ្នាយ៉ាងច្រើន ជាមួយឯកឧត្តម ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្ម ហើយរសៀលនេះ យើងគ្រោងនឹងជួបជាមួយរដ្ឋមន្រ្តីក្រសួងកសិកម្ម។
ការងាររបស់យើងនៅចន្លោះពីពេលនេះដល់ពេលនោះ គឺស្វែងយល់លំអិតពីសក្តានុពលនៃកំណើនផ្នែក វិស័យកសិកម្មរបស់កម្ពុជា ដែលយើងនឹងពិភាក្សាគ្នាជាបួនវគ្គដាច់ដោយឡែកពីគ្នា ហើយយើងសង្ឃឹមថា វានឹងនាំអោយមានការទាក់ទងជាមួយគ្នាថ្មីៗ។ ដូច្នេះ នៅព្រឹកនេះ ខ្ញុំនឹងមិននិយាយច្រើនទេ។
នេះជាលើកដំបូងហើយដែលស្ថានទូតអាមេរិកបានរៀបចំព្រឹត្តិការណ៍ពាណិជ្ជកម្ម ផ្នែកកសិកម្ម។ ដូច្នេះ ខ្ញុំសូមនិយាយបន្តិចអំពីគណប្រតិភូរបស់យើង
- ក្រុមហ៊ុននៅក្នុងគណប្រតិភូរបស់យើងមានប្រវត្តិជាងមួយសតវត្សមកហើយ ក្នុងការធ្វើការជាមួយដៃគូ នៅក្នុងប្រទេសចំនួនជាង ១៣០ នៅទូទាំងសាកលលោក ហើយមានបច្ចេកទេស បរិក្ខា និងឯកទេសល្អបំផុត រាប់ពីផ្នែកជីវបច្ចេកវិទ្យានិងជី ដល់ការវេចខ្ចប់ និងភាពស្វ័យប្រវត្តិ រាប់ពីកសិគីមី និងការវិភាគទិន្នន័យដល់ថ្នាំសម្រាប់សត្វ និងគ្រឿងម៉ាស៊ីនសម្រាប់ប្រមូលផល។
- ក្រុមហ៊ុនចំនួន ៥ នៅក្នុងនេះ គឺជាផ្នែកមួយនៃក្រុមហ៊ុនល្បី និងធំបំផុតចំនួន ៥០០ របស់សហរដ្ឋអាមេរិក។ កាលពីឆ្នាំទៅ ប្រាក់ចំណូលបូកចូលគ្នាសរុបរបស់ក្រុមហ៊ុនទាំង ៥ នេះមានតំលៃជិត ៧៦០ ពាន់លានដុល្លា។
យើងសប្បាយរីករាយដោយមានក្រុមហ៊ុនកម្ពុជាចំនួនជាង ៦៥ ចូលរួមនៅក្នុងកម្មវិធីនេះ នៅថ្ងៃ
នេះ ដូចជាក្រុមហ៊ុន Mong Rethy Group, Amru Rice Group, LCH Investment Group និងក្រុមហ៊ុនSanatra Farm Company ។ ក្រុមហ៊ុនទាំងនេះគឺជាក្រុមហ៊ុនឈានមុខគេនៅក្នុងទីផ្សា ហើយវាតំណាងអោយអ្វីដែលល្អបំផុតរបស់កម្ពុជា ផ្នែកបញ្ចូលរបៀបថ្មីៗ និងភាពជាសហគ្រិន។ ក្រុមហ៊ុនទាំងនេះ និងក្រុមហ៊ុនកម្ពុជាដទៃទៀត ដែលមានតំណាងនៅទីនេះ បានជួយធ្វើអោយវិស័យកសិកម្មកម្ពុជាមានការរីកដុះដាល ពីការចាប់ផ្តើមតូច ក្លាយជាផលិតករនិងទីផ្សារដ៏សំខាន់ នៅក្នុងតំបន់។
វិស័យកសិកម្មកម្ពុជាមានសក្តានុពលច្រើនសម្បើម។ ពីឆ្នាំ ២០០៤ ដល់ឆ្នាំ ២០១២ កំណើននៅក្នុងវិស័យនេះមាន ៥,៣% ដែលស្ថិតនៅក្នុងចំណោមកំណើនលឿនជាងគេ ក្នុងពិភពលោក។ ទិន្នផលដំណាំ និងការនាំចេញផ្នែកកសិកម្មមានការកើនឡើងគួរឲ្យកត់សំគាល់។ ឥឡូវ ចាប់មានក្រុមហ៊ុនធំៗ ដែលមានសមត្ថភាពប្រកួតប្រជែងហើយ ដូចជាក្រុមហ៊ុនដែលមានតំណាងនៅទីនេះស្រាប់។
នៅក្នុងរយៈពេលប៉ុន្មានឆ្នាំចុងក្រោយនេះ កំណើនមានការថយចុះ។ តែខ្ញុំជឿជាក់ថា ដោយមានគោលនយោបាយត្រូវ បច្ចេកទេសកសិកម្មកាន់តែល្អ និងបច្ចេកទេសត្រឹមត្រូវ ប្រទេសកម្ពុជាអាចក្លាយជាផលិតករឈានមុខមួយ។ ក្រុមហ៊ុនអាមេរិកអាចជួយជំរុញបាននៅត្រង់ចំណុចនេះ។
ដោយសារហេតុផលមួយចំនួន ទស្សនកិច្ចរបស់គណប្រតិភូនៅពេលនេះគឺត្រូវពេលវេលាល្អណាស់។ ទីមួយ យើងទាំងអស់គ្នាដឹងថា ផលិតករកម្ពុជាប្រឈមនឹងការប្រកួតប្រជែងយ៉ាងខ្លាំងនៅក្នុងតំបន់។ ក្រុមហ៊ុនអាមេ រិក ដែលមានតំណាងនៅក្នុងគណប្រតិភូ កំពុងតែមានជោគជ័យនៅតំបន់អាស៊ីអាគ្នេយ៍។ គេស្គាល់ទីផ្សារនៅក្នុងតំបន់នេះច្បាស់។ គេមានបច្ចេកទេស គ្រឿងបរិក្ខា ម៉ាស៊ីន និងសេវាថ្នាក់ពិភពលោក ដែលអាចជួយប្រទេសកម្ពុជានៅក្នុងការបង្កើនផលិតផល និងផលិតភាព ហើយលើកកំពស់សមត្ថភាពកែច្នៃស្បៀងអាហារ និងការវេចខ្ចប់។
ទីពីរ វិស័យកសិកម្មរបស់កម្ពុជាប្រឈមនឹងឧបសគ្គស្មុគស្មាញ ដូចជាកំរិតអនាម័យ កំរិតបទដ្ឋទាក់ទងនឹងសត្វចង្រៃនៅក្នុងផ្លែឈើនាំចូល ដែលចោទជាបញ្ហាក្នុងការបង្កើនចំនួនមុខទំនិញនាំចេញ។ ក្រុមហ៊ុនអាមេរិកដែលចូលរួមនៅក្នុងបេសកកម្មនេះ អាចជួយប្រទេសកម្ពុជា ក្នុងការដោះស្រាយបញ្ហាប្រឈមទាំងនេះផងដែរ ហើយជួយអោយកម្ពុជាឈានឡើងមួយកំរិតទៀត។
ទីបី គណប្រតិភូនេះបំពេញបន្ថែមលើការងារ និងការកែទំរង់សំខាន់ៗ ទាំងរបស់រដ្ឋាភិបាល ទាំងរបស់ វិស័យឯកជន នៅកម្ពុជា ក្នុងការកំណត់លក្ខខ័ណ្ឌសម្រាប់កំណើនលូតលាស់ឆាប់រហ័ស នៅក្នុងវិស័យនេះ។ ឧទាហរណ៍ នៅក្នុងពេលថ្មីៗ រដ្ឋាភិបាលបានបង្កើនការកែលំអផ្នែកផ្តល់ឥណទានសម្រាប់កសិករ។ ការងារនេះផ្ញើសារមួយយ៉ាងច្បាស់អោយគេដឹងថា សេវាកម្ម គ្រឿងបរិក្ខា និងបច្ចេកវិទ្យាថ្នាក់ពិភពលោកត្រូវបានស្វាគមន៍ នៅ កម្ពុជា។
ចំណុចចុងក្រោយ គណប្រតិភូនេះផ្តើមការងារចេញពីមូលដ្ឋានរយៈពេល ១០ ឆ្នាំនៃការផ្តល់ជំនួយផ្នែកអភិវឌ្ឍន៍របស់សហរដ្ឋអាមេរិក ដល់វិស័យកសិកម្មរបស់កម្ពុជា។ ដើមឡើយ ជំនួយរបស់យើងផ្តោតលើសន្តិសុខស្បៀង និងការផលិតស្បៀងអាហារចាំបាច់ តែនៅពេលនេះ បែរទៅរកការជួយកសិករខ្មែរក្នុងការប្រកួតប្រជែង នៅក្នុងទីផ្សារអន្តរជាតិ និងទីផ្សារថ្នាក់តំបន់ ដែលមានការប្រកួតប្រជែងគ្នាខ្លាំង។ ដូច្នេះ យើងរីករាយដែលតំណាងមកពីទីភ្នាក់ងារសហរដ្ឋអាមេរិកសម្រាប់ការអភិវឌ្ឍន៍អន្តរជាតិ (USAID) និងកម្មវិធី Harvest II របស់យើងចូលរួមនៅក្នុងការពិភាក្សានៅថ្ងៃនេះ។
ក្រុមហ៊ុនអាមេរិកតំណាងអោយគុណតំលៃរបស់អាមេរិក។ គេមានកំរិតស្តង់ដាខ្ពស់ ហើយទទួលបានការអោយតំលៃនៅទូទាំងសាកលលោក ចំពោះការមានវប្បធម៌ក្រុមហ៊ុនដែលជំរុញតំលាភាព ការអភិវឌ្ឍន៍ដែលផ្តោតការយកចិត្តទុកដាក់លើសហគមន៍ និងការគោរពច្បាប់។
ក្រុមហ៊ុនដែលមានវត្តមាននៅថ្ងៃនេះ កំពុងរកមើលអតិថិជន តែគេក៏រកមើលផងដែរនូវដៃគូរយូរអង្វែង មិនមែនគ្រាន់តែត្រឹមក្រុមហ៊ុនប៉ុណ្ណោះទេ តែថែមទាំងភាពជាដៃគូជាមួយកសិករ សហគមន៍មូលដ្ឋាន និងមន្រ្តីរដ្ឋាភិបាលដែលមានការតាំងចិត្តច្បាស់លាស់ផងដែរ។ ដោយសាររឿងនេះ ពួកគេគឺជាទូតដ៏ប្រពៃមកពីប្រទេសអាមេរិក នៅតំបន់ដទៃទៀត ក្នុងពិភពលោក។
យើងសង្ឃឹមថា កិច្ចប្រជុំពិភាក្សានៅថ្ងៃនេះគឺជាការចាប់ផ្តើមនូវភាពជាដៃគូយូរអង្វែង និងជាដំណើរការដែលនឹងនាំការរកស៊ីថែមទៀតផ្នែកកសិកម្ម និងពាណិជ្ជកម្ម សម្រាប់ប្រទេសយើងទាំងពីរ។ យើងមានការប្តេជ្ញាក្នុងការបន្តធ្វើការខ្ជាប់ខ្ជួនជាមួយលោកអ្នកទាំងអស់គ្នា ដើម្បីធ្វើអោយការនេះកើតមានទៅបាន។
ខ្ញុំសូមណែនាំមនុស្សមួយចំនួនដែលនឹងដឹកនាំការងារជាបន្តនេះ ហើយដែលមានចំណែកយ៉ាងសំខាន់នៅក្នុងការរៀបចំកិច្ចប្រជុំពិភាក្សាគ្នានេះឡើង។
- Greg Wong គឺជាទីប្រឹក្សាផ្នែកកិច្ចការពាណិជ្ជកម្មក្រៅប្រទេសរបស់យើង នៅទីក្រុងបាងកក។
- Robert Hanson គឺជាប្រធានការិយាល័យរបស់ក្រសួងកសិកម្មសហរដ្ឋអាមេរិកប្រចាំនៅទីក្រុងហាណូយ និង Megan Francic គឺជាអនុព័ន្ធកសិកម្មរបស់យើងប្រចាំនៅទីក្រុងហូជីមីញ
- Clint Brewer តំណាងការិយាល័យកិច្ចការពាណិជ្ជកម្មក្រៅប្រទេសរបស់យើង ប្រចាំនៅប្រទេសសឹង្ហបូរី។
- David Sequeira និង Sang Lee ដូចដែលលោកអ្នកបានស្គាល់ហើយ នៅក្នុងស្ថានទូតរបស់យើងនៅកម្ពុជា។
ពួកគាត់ទាំងអស់គ្នានេះ តំណាងអោយជួរមុខនៃការងាររបស់យើងក្នុងការជំរុញផ្នែកពាណិជ្ជកម្ម
នៅអាស៊ីអាគ្នេយ៍ ហើយជាអ្នកដែលក្រុមហ៊ុនកម្ពុជាគួរទាក់ទងជាមួយមុនគេ។ គេអាចជួយភ្ជាប់ទំនាក់ទំនងរវាងក្រុមហ៊ុនកម្ពុជាជាមួយក្រុមហ៊ុនអាមេរិកដទៃទៀត ដែលធ្វើការនៅក្នុងវិស័យនេះ។ ព័ត៌មានសម្រាប់ទាក់ទងរបស់គេគឺមានបញ្ចាំងអោយឃើញនៅទីនេះ ហើយយើងក៏មានបង្ហាញនៅក្នុងសំណុំឯកសារដែលលោកអ្នកបានទទួល ។ លោកអ្នកអាចទាក់ទងពួកគាត់ដោយផ្ទាល់។
ខ្ញុំសូមអរគុណលោកអ្នកជាថ្មីម្តងទៀត ដែលបានអញ្ជើញមក ថ្ងៃនេះ ហើយសូមអោយការពិភាក្សាគ្នានៅថ្ងៃនេះមានលទ្ធផលល្អ។ នៅក្នុងរយៈពេលមួយឆ្នាំ ឬ ២ ឆ្នាំទៀត ខ្ញុំសង្ឃឹមថា យើងអាចក្រលេកមើលមកថ្ងៃនេះហើយឃើញថាថ្ងៃនេះគឺជាថ្ងៃដែលយើងបានចាប់ផ្តើមជួយអោយប្រទេសកម្ពុជាឈានឡើងចេញពីការនាំចេញផលិតផលកសិកម្មជាវត្ថុធាតុដើម ក្លាយជាប្រទេសដែលមានភាពខ្លាំងក្នុងការកែច្នៃ និងចែកចាយផលិតផល នៅតំបន់អាស៊ីអាគ្នេយ៍!
សូមអរគុណ។ ខ្ញុំសូមលើកកែវស្រាអាមេរិក ដែលជាផលិតផលកសិកម្មដ៏ល្អបំផុតមួយរបស់យើង ជាមួយលោកអ្នក នៅក្នុងពិធីនេះ។
