អាកាសយានដ្ឋានអន្តរជាតិភ្នំពេញ
ថ្ងៃសុក្រ ទី ៣០ ខែ កក្កដា ឆ្នាំ ២០២១
សូមជម្រាបសួរ ឯកឧត្តមវេជ្ជបណ្ឌិត ម៉ម ប៊ុនហេង រដ្ឋមន្រ្តីក្រសួងសុខាភិបាល តំណាងនៃអង្គការយូនីសេហ្វ(UNICEF) តំណាងនៃអង្គការសុខភាពពិភពលោក (WHO) សមាជិកអ្នកសារព័ត៌មាន អស់លោក លោកស្រីទាំងអស់
តាមនាមឱ្យលោកឯកអគ្គរដ្ឋទូត Murphy ខ្ញុំមានកិត្តិយស និងសេចក្តីរីករាយដែលមានវត្តមានជាមួយអស់លោក លោកស្រី នៅព្រឹកនេះ
លទ្ធភាពទទួលបានជាសាកល ប្រកបដោយសមធម៌ នូវវ៉ាក់សាំងដែលមានសុវត្ថិភាព និងប្រសិទ្ធភាព មានសារៈសំខាន់ណាស់ សម្រាប់បញ្ចប់មេរោគរាតត្បាតកូវីដ១៩ ធ្វើការសង្គ្រោះជីវិត កសាងប្រទេសឡើងវិញ ហើយបញ្ឈប់ការគំរាមកំហែងនៃវីរុសបម្លែងថ្មី។ ដូច្នេះ ដូចដែលលោកប្រធានាធិបតី Biden បានមានប្រសាសន៍ហើយថា យើងត្រូវតែរូតរះដូចគ្នានឹងកិច្ចប្រឹងប្រែងរបស់យើងនៅក្នុងស្រុកកំណើត ក្នុងការងារចាក់វ៉ាក់សាំងនៅក្រៅប្រទេស។
នៅព្រឹកនេះ ជើងយន្តហោះទីមួយ ក្នុងចំណោមជើងយន្តហោះចំនួនពីរ ដែលដឹកវ៉ាក់សាំងចំនួន ១,០៦០,១០០ដូស នៃវ៉ាក់សាំង Johnson & Johnson ដែលតម្រូវឲ្យចាក់តែមួយដូស បានមកដល់ព្រលានយន្តហោះអន្តរជាតិភ្នំពេញ។ នេះគឺជាអំណោយរេបស់ប្រជាជនអាមេរិក តាមរយៈមជ្ឈមណ្ឌលកូវ៉ាក់ ដែលនឹងការពារប្រជាជនកម្ពុជាបានចំនួនជាង ១ លាននាក់។ ជាមួយនឹងការរួមចំណែកនេះ សហរដ្ឋអាមេរិកបញ្ជាក់សាជាថ្មី នូវការប្តេជ្ញាចិត្តយូរអង្វែង ចំពោះសុខភាពសាធារណៈ នៅកម្ពុជា។ ការប្តេជ្ញាចិត្តនេះមានភាពច្បាស់លាស់ជាងពេលណាទាំងអស់ នៅក្នុងអំឡុងពេលនៃការផ្ទុះជំងឺរាតត្បាតជាសាកលនេះ។
ខ្ញុំសូមបញ្ជាក់ថា យើងមិនមែនផ្តល់វ៉ាក់សាំងទាំងនេះដើម្បីយកចិត្ត ឬទាញយកសម្បទានអ្វីនោះទេ។ យើងផ្តល់វ៉ាក់សាំងដោយគ្មានចំណងភ្ជាប់លក្ខខណ្ឌនោះទេ ។ យើងផ្តល់វ៉ាក់សាំងមកនេះ គឺដើម្បីសង្គ្រោះជីវិតមនុស្ស និងដឹកនាំការខិតខំរបស់ពិភពលោក ដើម្បីបញ្ចប់រោគរាតត្បាតនេះ។
សហរដ្ឋអាមេរិកបានសន្យាផ្តល់ប្រាក់ចំនួន ៤ ពាន់លានដុល្លារ ដល់យន្តការកូវ៉ាក់ ដែលធ្វើឲ្យសហរដ្ឋអាមេរិកជាប្រទេសរួមវិភាគទានធំជាងគេតែមួយគត់ ដល់ការឆ្លើយតបជាអន្តរជាតិ ចំពោះជំងឺកូវីដ១៩។ នៅកម្ពុជា សហរដ្ឋអាមេរិក បានផ្តល់ថវិកាចំនួនជាង ១១ លានដុល្លារ ជាជំនួយទាក់ទងនឹងជំងឺកូវីដ១៩ ចាប់តាំងពីរោគរាតត្បាតនេះបានផ្ទុះឡើង។ តាំងពីការចាប់ផ្ទុះឡើងនៃមេរោគនេះ ទីភ្នាក់ងារនានាផ្នែកសុខាភិបាលរបស់រដ្ឋាភិបាលសហរដ្ឋអាមេរិក បានធ្វើការជាមួយសមភាគីខាងកម្ពុជារបស់គេ លើការអង្កេត តាមដានអ្នកប៉ះពាល់ ការគាំទ្រលើការចាក់វ៉ាក់សាំង និងការស្រាវជ្រាវ ដើម្បីទប់ស្កាត់ការរាលដាលនៃមេរោគកូវីដ ១៩។
ពិតមែនហើយ ការយកឈ្នះលើមេរោគរាតត្បាតទាមទារឲ្យមានការខិតខំរួមគ្នា ហើយសហរដ្ឋអាមេរិកមានកិត្តិយសក្នុងការចូលរួមជាសមាជិកមួយនៃក្រុមការងារឆ្នើម ដែលរួមមានអ្នកចូលរួមថ្នាក់ជាតិ និងអន្តរជាតិ។ ចំពោះសហការីមកពីអង្គការ UNICEF ខ្ញុំសូមអរគុណចំពោះការសហការរបស់គេ។ យើងបានរួមគ្នាផ្តល់សម្ភារៈផ្តត់ផ្គង់ចាំបាច់ សម្រាប់ការការពារ និងអនាម័យ ដល់សាលារៀន មជ្ឈមណ្ឌលចត្តាឡីស័ក និងវត្តអារាម។ យើងបានធ្វើការរួមគ្នាជាមួយក្រសួងសុខាភិបាលកម្ពុជា សំដៅលើប្រជាជនកម្ពុជាចំនួនជាង ១០ លាននាក់នៅទូទាំងប្រទេស ដោយប្រើវិទ្យុ វីដេអូ ឯកសារបោះពុម្ព ដើម្បីការពារការឆ្លងមេរោគកូវីដ។ តាមរយៈការរៀបចំផែនការដ៏ល្អរបស់ក្រសួង ទើបយើងអាចបញ្ជូនវ៉ាក់សាំងមកបាន នៅថ្ងៃនេះ និងនៅថ្ងៃចន្ទ។
ខ្ញុំសូមអរគុណផងដែរ ចំពោះលោកស្រីវេជ្ជបណ្ឌិត Ailan និងក្រុមបុគ្គលិកនៃអង្គការសុខភាពពិភពលោក ដែលបានខិតខំដោយមិនគិតការនឿយហត់ ដើម្បីបន្ធូរបន្ថយផលប៉ះពាល់នៃរោគរាតត្បាតនេះ នៅកម្ពុជា រាប់ពីការមកដល់នៃនាវាទេចរណ៍ដឹកអ្នកដំណើរ MS Westerdam កាលពីខែកុម្ភៈកន្លងទៅ រហូតដល់ថ្ងៃនេះ។ ការដឹកនាំរបស់គាត់មានសារៈសំខាន់ណាស់ ក្នុងការពូនផ្តុំសម្ព័ន្ធភាពក្នុងចំណោមដៃគូអន្តរជាតិដែលធ្វើការទាក់ទងនឹងសុខភាព និងរាជរដ្ឋាភិបាលកម្ពុជា។
សំខាន់បំផុតគឺចំពោះឯកឧត្តមរដ្ឋមន្រ្តីក្រសួងសុខាភិបាល ដែលខ្ញុំសូមអរគុណចំពោះការខិតខំដ៏ប្រសើររបស់ក្រុមបុគ្គលិកថ្នាក់ជាតិរបស់គាត់ ភាពក្លាហានរបស់អ្នកធ្វើការជួរមុខរបស់កម្ពុជា និងភាពជាអ្នកដឹកនាំរបស់ឯកឧត្តមនៅក្នុងពេលដ៏លំបាកបំផុតនេះ។ ក្រោមការដឹកនាំរបស់ឯកឧត្តម ប្រទេសកម្ពុជាបានវាយតម្លៃបានយ៉ាងឆាប់រហ័ស នូវការគំរាមកំហែង បង្កើតផែនការ និងចូលរួមជាមួយដៃគូទាំងអស់ ដើម្បីបញ្ឈប់ការរាលដាលនៃមេរោគកូវីដ១៩។ ពិតមែនតែការតស៊ូនេះមិនទាន់ទទួលបានជោគជ័យក្តី តែប្រទេសកម្ពុជាសម្រេចបានជោគជ័យច្រើន នៅក្នុងការរៀបចំប្រព័ន្ធសុខាភិបាល ដើម្បីទប់ទល់នឹងការគំរាមកំហែង បង្កើនសមត្ថភាពក្នុងការព្យាបាល កែលម្អប្រព័ន្ធមន្ទីរពិសោធន៍ ធានាលើការតាមរកអ្នកមានការពាក់ព័ន្ធ និងណែនាំការងាររបស់ថ្នាក់ខេត្ត។
សហរដ្ឋអាមេរិកនៅតែមានមោទកភាពក្នុងការធ្វើជាដៃគូជាមួយពួកគេ និងជួយក្នុងការផ្តល់មធ្យោបាយ ដើម្បីបញ្ចប់មេរោគរាតត្បាតនេះ និងដើម្បីការពារកុំឲ្យមានមេរោគរាតត្បាតថ្មីទៀត៕
