ក្រសួងការបរទេសសហរដ្ឋអាមេរិក
ការិយាល័យអ្នកនាំពាក្យ
ថ្ងៃទី ២០ ខែធ្នូ ឆ្នាំ ២០១៨
សកម្មភាពរបស់ចិនធ្វើអោយប៉ះពាល់ដល់ក្រុមហ៊ុនផ្តល់សេវាដែលមានការគ្រប់គ្រងជាសាកល
យ៉ាងហោចណាស់គិតចាប់តាំងពីឆ្នាំ ២០១៤ មក ក្រុមផ្នែកអ៊ិនធ័រណែតរបស់ចិន ដោយរួមគ្នាជាមួយក្រសួងសន្តិសុខរដ្ឋរបស់ចិន បានលួចចូលទៅក្នុងគេហទំព័ររបស់ក្រុមហ៊ុនផ្តល់សេវាអ៊ិនធ័រណែតជាច្រើនរបស់សហរដ្ឋអាមេរិក និងក្រុមហ៊ុនដែលមានការគ្រប់គ្រងជាសាកល។ ក្រុមទាំងនេះរបស់ចិនបានប្រើការលួចចូលនេះ ដើម្បីធ្វើអោយខូចដល់បណ្តាញនៃអតិថិជនរបស់ក្រុមហ៊ុនផ្តល់សេវា ដោយរួមទាំងក្រុមហ៊ុនពិភពលោក ដែលស្ថិតនៅតាមប្រទេសចំនួនយ៉ាងតិច ១២។
សហរដ្ឋអាមេរិកមានកង្វល់ថា សកម្មភាពនេះរំលោភលើការប្តេជ្ញាចិត្តរួមគ្នាផ្នែកអ៊ិនធ័រណែតរបស់សហរដ្ឋអាមេរិក និងប្រទេសចិន នៅឆ្នាំ ២០១៥ ដែលបានធ្វើដោយប្រធានាធិបតីចិន Xi Jinping ក្នុងការមិនធ្វើ ឬគាំទ្រដោយចេតនា នូវ “ការលួចតាមអ៊ិនធ័រណែតនូវកម្មសិទ្ធិបញ្ញា ដូចជាការសម្ងាត់ពាណិជ្ជកម្ម និងព័ត៌មានសម្ងាត់ដទៃទៀតផ្នែកធុរកិច្ច ក្នុងបំណងផ្តល់ប្រៀបក្នុងការប្រកួតប្រជែងដល់ក្រុមហ៊ុន ឬវិស័យពាណិជ្ជកម្ម”។ ប្រទេសចិនថែមទាំងបានធ្វើការប្តេជ្ញាចិត្តផងដែរជាមួយសមាជិកនៃប្រទេសមានសេដ្ឋកិច្ចធំជាងគេទាំង ២០ (G20) និងប្រទេសសមាជិកនៃអង្គការសហប្រតិបត្តិការសេដ្ឋកិច្ចនៅតំបន់អាស៊ីប៉ាស៊ីហ្វិក (APEC) ព្រមទាំងសេចក្តីប្រកាសទ្វេភាគីដទៃទៀត។
ស្ថិរភាពផ្នែកអ៊ិនធ័រណែតមិនអាចមានទៅបានទេ បើប្រទេសទាំងឡាយមានអាកប្បកិរិយាមិនទទួលខុសត្រូវ ដែលបំផ្លាញសន្តិសុខជាតិ និងវិបុលភាពសេដ្ឋកិច្ចនៃប្រទេសដទៃ។ សកម្មភាពទាំងនេះរបស់ក្រុមអ្នកប្រព្រឹត្តចិនទៅលើកម្មសិទ្ធិបញ្ញា និងព័ត៌មានរសើបផ្នែកធុរកិច្ច គឺជាការគំរាមកំហែងយ៉ាងពិតប្រាកដដល់សមត្ថភាពប្រកួតប្រជែងផ្នែកសេដ្ឋកិច្ចរបស់ក្រុមហ៊ុន នៅក្នុងសហរដ្ឋអាមេរិក និងនៅជុំវិញពិភពលោក។ យើងនឹងបន្តធ្វើអោយអ្នកប្រព្រឹត្តទង្វើទាំងនេះទទួលខុសត្រូវចំពោះអាកប្បកិរិយារបស់គេ ហើយថ្ងៃនេះ សហរដ្ឋអាមេរិកចាត់វិធានការមួយចំនួន ដើម្បីបង្ហាញអោយឃើញនូវការតាំងចិត្តរបស់យើង។ យើងសូមអំពាវនាវអោយប្រទេសចិនគោរពតាមការ ប្តេជ្ញាចិត្តរបស់ខ្លួន នៅក្នុងការប្រព្រឹត្តប្រកបដោយការទទួលខុសត្រូវផ្នែកអ៊ិនធ័រណែត ហើយសូមសម្ដែងជាថ្មីថា សហរដ្ឋអាមេរិកនឹងចាត់វិធានការសមស្រប ដើម្បីការពារផលប្រយោជន៍របស់យើង។
