ឡុងប៊ិក រដ្ខកាលីហ្វរនា
ថ្ងៃទី១១ ខែកក្កដា ឆ្នាំ២០១៦
សរសេរដោយ៖ លោកឯកអគ្គរដ្ឋទូត William A. Heidt
ទីក្រុង Long Beach មានបណ្តុំជនជាតិអាមេរិកដើមកំណើតខ្មែរច្រើនជាងគេ នៅក្នុងសហរដ្ឋអាមេរិក ដោយមានប្រមាណ ៥០ ០០០ នាក់។ ខ្ញុំមានការចាប់អារម្មណ៍យ៉ាងខ្លាំងចំពោះសហគមន៍របស់គេ និងទំនាក់ទំនងដ៏ជិតស្និទ្ធរបស់គេ ជាមួយមន្រ្តីជាប់ឆ្នោតក្នុងមូលដ្ឋាន។ លោកចៅហ្វាយក្រុង ឈ្មោះ Robert Garcia បានសំដែងការគាំទ្រយ៉ាងខ្លាំងរបស់លោកចំពោះទីក្រុងខ្មែរ (Cambodiantown) ដែលជាផ្នែកមួយនៃទីក្រុង Long Beach ដែលមានជនជាតិអាមេរិកមានដើមកំណើតខ្មែរជាច្រើនប្រកបមុខជំនួញ។ យើងបានជួបជាមួយនិស្សិតសាកលវិទ្យាល័យមួយក្រុមដ៏មានភាពវៃឆ្លាត ជាជនជាតិអាមេរិកមានដើមកំណើតខ្មែរ ដែលមានទឹកចិត្តប្តេជ្ញាក្នុងការកសាងស្ពានរឹងមាំជាមួយប្រទេសកម្ពុជា ហើយដែលកំពុងរៀបចំកិច្ចប្រជុំថ្នាក់ជាតិមួយនៃអង្គការសមាគមនៃនិស្សិតជាជនជាតិអាមេរិកមានដើមកំណើតខ្មែរ នៅក្នុងរដូវស្លឹកឈើជ្រុះក្រោយនេះ។
យើងបានជួបនឹងម្ចាស់ហាងជំនួញតូចៗជាច្រើនដែលមានទឹកចិត្តប្តេជ្ញា នៅពេលយើងដើរនៅពេលព្រឹកក្នុងទីក្រុងខ្មែរ ដូចជាជាងម៉ាស៊ីនជាជនជាតិអាមេរិកដើមកំណើតខ្មែរ នៅហាងជួសជុលដែលមានឈ្មោះថា Mike’s Auto Repair ដែលបានធ្វើសីទាត់។ អ្នកនៅទីក្រុង Long Beach ជាច្រើនបានជួយប្រទេសកំណើតរបស់គេ តាមរយៈគំរោងមនុស្សធម៌ ឬការវិនិយោគនៅក្នុងសេដ្ឋកិច្ចរបស់ប្រទេសកម្ពុជា។
សំខាន់ជាងអ្វីទាំងអស់នោះគឺថា យើងមានការចាប់អារម្មណ៍ខ្លាំងនឹងចំណងដ៏ជ្រាលជ្រៅ រវាងទីក្រុង Long Beach និងប្រទេសកម្ពុជា។ សហគមន៍នៃជនជាតិអាមេរិកមានដើមកំណើតខ្មែរនៅទីក្រុង Long Beach មានការគិតគូរយ៉ាងខ្លាំងចំពោះប្រទេសកំណើតរបស់គេ ហើយចង់ជួយអភិវឌ្ឍប្រទេសកំណើតរបស់គេ ដើម្បីអោយប្រទេសនេះមានលទ្ធិប្រជាធិបតេយ្យ និងវិបុលភាពកាន់តែច្រើនឡើង។ យើងមើលឃើញច្បាស់លើចំណុចនេះ នៅពេលយើងធ្វើដំណើរទៅវត្ត Willow ដែលជាវត្តធំនិងចាស់ជាងគេរបស់ខ្មែរ នៅក្នុងសហរដ្ឋអាមេរិក។ វាជាបេះដូងនៃសហគមន៍របស់ជនជាតិអាមេរិកមានដើមកំណើតខ្មែរ នៅទីក្រុង Long Beach ហើយយើងមានចិត្តរំភើបចំពោះការទទួលរាក់ទាក់របស់ពួកគេចំពោះយើង។
យើងសូមអរគុណគណកម្មាធិការដែលបានរៀបចំដំណើរទស្សនកិច្ចរបស់យើង ដែលបានធ្វើការបានយ៉ាងល្អ ហើយរួមមានតំណាងមកពីក្រុមសង្គម និងនយោបាយនានា នៅទីក្រុង Long Beach ។
