លោក Michael Newbill បានចូលកាន់ភារធារីនៃស្ថានទូតអាមេរិកនៅក្នុងរាជធានីភ្នំពេញនៃប្រទេសកម្ពុជា នៅខែវិច្ឆិកា ឆ្នាំ២០១៨។ លោកគឺជាបុគ្គលិកអាជីព នៅក្នុងកិច្ចការបរទេសរបស់សហរដ្ឋអាមេរិក។
ពីឆ្នាំ ២០១៥ ដល់ឆ្នាំ ២០១៧ លោក Michael Newbill បានធ្វើជាអនុប្រធានផ្នែកកិច្ចការសំរាប់តំបន់ដីគោកនៅអាស៊ីអាគ្នេយ៍ក្នុងការិយាល័យទទួលបន្ទុកកិច្ចការតំបន់អាស៊ីខាងកើត និងតំបន់ប៉ាស៊ីហ្វិក ដែលគ្របដណ្តប់លើប្រទេសភូមា កម្ពុជា ឡាវ ថៃ និងវៀតណាម។ មុនកាន់តំណែងនេះ លោក Newbill គឺជាទីប្រឹក្សាសំរាប់កិច្ចការសេដ្ឋកិច្ច និងនយោបាយ ក្នុងស្ថានទូតសហរដ្ឋអាមេរិក ក្នុងទីក្រុង Kampala នៃប្រទេសអ៊ូហ្កង់ដា។ ពីឆ្នាំ២០១០ ដល់ឆ្នាំ២០១២ លោក Newbill គឺជាប្រធាន និងបន្ទាប់មកជាប្រធានជាន់ខ្ពស់ សំរាប់កិច្ចការអាស៊ីខាងត្បូង នៅក្នុងក្រុមប្រឹក្សាសន្តិសុខជាតិរបស់សេតវិមាន ដោយធ្វើការលើបញ្ហានយោបាយ សេដ្ឋកិច្ច និងយោធាទាំងអស់ សំរាប់ប្រទេសឥណ្ឌា និងប្រទេសនៅតំបន់អាស៊ីខាងត្បូងដទៃទៀត។ ក្រៅពីនេះ លោក Newbill បានធ្វើជាប្រធានផ្នែកកិច្ចការសេដ្ឋកិច្ច និងនយោបាយ នៅទីក្រុង Mumbai នៃប្រទេសឥណ្ឌា (ពីឆ្នាំ ២០០៧ ដល់ឆ្នាំ ២០១០) ជាមន្រ្តីកិច្ចការសេដ្ឋកិច្ចសំរាប់ប្រទេសឥណ្ឌានៅទីក្រុង Washington (ពីឆ្នាំ ២០០៥ ដល់ឆ្នាំ ២០០៧) ជាមន្រ្តីផ្នែកសេដ្ឋកិច្ចនៅក្នុងស្ថានទូតសហរដ្ឋអាមេរិកប្រចាំនៅទីក្រុង Bangkok នៃប្រទេសថៃ ដោយមានការទទួលខុសត្រូវលើពាណិជ្ជកម្មទ្វេភាគី និងពហុភាគី សិទ្ធិលើកម្មសិទិ្ធបញ្ញា ជីវបច្ចេកវិទ្យា និងបញ្ហាសេដ្ឋកិច្ចដទៃទៀត (ពីឆ្នាំ ២០០៣ ដល់ឆ្នាំ ២០០៥) និងជាអនុប្រធានកុងស៊ុល នៅក្នុងទីក្រុង Manila នៃប្រទេសហ្វីលីពីន (ពីឆ្នាំ ២០០០ ដល់ឆ្នាំ ២០០២)។
មុនពេលចូលបំរើកិច្ចការបរទេស លោក Newbill បានដឹកនាំគំរោងមួយស្តីពីសន្តិសុខតំបន់ និងការកសាងទំនុកចិត្ត នៅអាស៊ីខាងត្បូង សំរាប់មជ្ឈមណ្ឌល Henry L. Stimon Center ដែលជាវិទ្យាស្ថានស្រាវជ្រាវមួយមានមូលដ្ឋាននៅទីក្រុង Washington ។
លោក Newbill បានទទួលសញ្ញាប័ត្របរិញ្ញាផ្នែកប្រវត្តិសាស្រ្ត និងអក្សរសាស្រ្តអង់គ្លេសពីសាកលវិទ្យាល័យ Illinois, Champaign –Urbana នៅក្នុងឆ្នាំ ១៩៩៤ និងបានទទួលសញ្ញាប័ត្រអនុបណ្ឌិតផ្នែកប្រវត្តិសាស្រ្តនៃតំបន់អាស៊ីខាងត្បូង ពីសាកលវិទ្យាល័យ Wisconsin ក្នុងទីក្រុង Madison ក្នុងឆ្នាំ ១៩៩៧។ នៅឆ្នាំ ១៩៩៤-១៩៩៥ លោក Newbill បានទទួលអាហារូបករណ៍ Rotary International Ambassadorial Scholarship សំរាប់ការសិក្សាស្រាវជ្រាវនៅសាកលវិទ្យាល័យ Jawarharlal Nehru University ក្នុងទីក្រុង New Delhi ៕
