សប្តាហ៍ដំបូងបង្អស់ស្តីពីអាហារដ្ឋានអាមេរិក នៅកម្ពុជានឹងត្រូវប្រារព្ធឡើងពីថ្ងៃទី២៧ ខែមិថុនា ដល់ថ្ងៃទី៤ ខែកក្កដា ដែលជាទិវាបុណ្យឯករាជ្យជាតិនៅក្នុងសហរដ្ឋអាមេរិក។ ដើម្បីអបអរថ្ងៃបុណ្យនេះ ស្ថានទូត
អាមេរិកបានធ្វើជាដៃគូជាមួយអាហារដ្ឋានចំនួន ២០ ដែលត្រូវបានជ្រើសរើសមក ដើម្បីនាំមកនូវម្ហូបអាហារ ផ្សេងៗ របស់អាមេរិក ដល់សាធារណជនកម្ពុជា។
នៅក្នុងអំឡុងពេលនៃសប្តាហ៍អាហារដ្ឋាននេះ អាហារដ្ឋានដែលចូលរួមនៅក្នុងរាជធានីភ្នំពេញនឹងផ្តល់ការបញ្ចុះតំលៃពិសេសៗជាច្រើន។ ភ្ញៀវដែលមកបរិភោគក្នុងអាហារដ្ឋានទាំងនេះ អាចទិញម្ហូបអាហារផ្សេងៗដែលគេបានយកមកពីទូទាំងសហរដ្ឋអាមេរិក ដែលមានដូចជា Hamburger តាមប្រពៃណី ការ៉េមកី ស៊ុប Gumbo ម្ហូបរបស់អ្នកស្រុកនៅរដ្ឋ Hawaii ម្ហូបពិសេសរបស់អាមេរិកតាមបែបជនជាតិម៉ិកសិក និងបន្ទះសាច់អាំងឬចៀនប្រកបដោយឱជារសរបស់អាមេរិក។
អាហារដ្ឋានដែលចូលរួមមានដូចជា Aloha Ono, Black Bambu, Botanico Wine and Beer Garden, Brooklyn Pizza and Bistro, Burger King, Cold Stone Creamery, Dairy Queen, Digby’s, Domino’s Pizza, the Exchange, Fatboy Sub ‘n’ Salad, KFC, Krispy Kreme, Lone Pine Café, Mike’s Burger House, New York Steakhouse, Ocean Prime Steakhouse, the Original Steakhouse, Swensen’s, និងអាហារដ្ឋាន Taqueria Corona។ ព័ត៌មានលំអិតស្តីពីការលក់បញ្ចុះតំលៃរបស់អាហារដ្ឋានមួយៗទាំងនេះមាននៅអាហារដ្ឋាន និងនៅក្នុងគេហទំព័រឬលើទំព័រហ្វេសបុករបស់គេផ្ទាល់។
ជាការឆ្លើយតបនឹងការអភិវឌ្ឍន៍ដ៏ឆាប់រហ័សនៃសេដ្ឋកិច្ចរបស់ប្រទេសកម្ពុជា អ្នកវិនិយោគ និងក្រុមហ៊ុនអាមេរិក ក្នុងចំនួនកាន់តែច្រើនឡើង បានមកប្រកបមុខជំនួញនៅកម្ពុជា។ ដោយឡែកឧស្សាហកម្មផ្នែកបដិសណ្ឋារកិច្ច និងម្ហូបអាហារមានកំណើនកាន់តែច្រើនឡើង ដោយសារមានកំណើននៃតំរូវការរបស់មនុស្សក្នុងស្រុក ក៏ដូចជាអ្នកទេសចរ។ ក្រុមហ៊ុនអាមេរិកចង់មកបំរើប្រជាជនកម្ពុជា ដែលមានចំណូលចិត្តកាន់តែច្រើនឡើងលើសេវា និងម្ហូបអាហាររបស់អាមេរិក។
អ្នកសារព័ត៌មានដែលមានការចាប់អារម្មណ៍ចង់បានព័ត៌មានបន្ថែមទៀត អាចទាក់ទងមកផ្នែកកិច្ចការសាធារណៈរបស់ស្ថានទូតអាមេរិក តាមអ៊ីម៉េល PHPPASPress@state.gov។
