លោក John Kerry រដ្ឋមន្រ្តីក្រសួងការបរទេសហរដ្ឋអាមេរិក បានចេញរបាយការណ៍ ឆ្នាំ ២០១៦ ស្តីពីការជួញដូរមនុស្ស (TIP) ពីទីក្រុងវ៉ាស៊ីនតោន នៅថ្ងៃទី៣០ ខែមិថុនា ឆ្នាំ២០១៦។ តាមការកំណត់នៃ ច្បាប់របស់សហរដ្ឋអាមេរិក ស្តីពីការការពារជនរងគ្រោះដោយការជួញដូរ (TVPA) របាយការណ៍ TIP វាយតំលៃរដ្ឋាភិបាលនៅជុំវិញពិភពលោកលើការខិតខំរបស់គេ ក្នុងការប្រយុទ្ធប្រឆាំងនឹងទាសភាពសម័យទំនើប។ នៅក្នុងរបាយការណ៍ឆ្នាំនេះ ប្រទេសកម្ពុជាមានចំណាត់ថ្នាក់លេខ ២ ដែលជាចំណាត់ថ្នាក់ល្អជាងចំណាត់ថ្នាក់លេខ ២ ក្នុងបញ្ជីតាមដាន កាលពីឆ្នាំទៅ។ ចំណាត់ថ្នាក់លេខ ២ គឺសំរាប់ប្រទេសដែលរដ្ឋាភិបាលរបស់គេមិនបានគោរពតាមបានពេញលេញចំពោះបទដ្ឋានអប្បរិមាដូចមានចែងក្នុងច្បាប់ TVPA តែកំពុងមានការខិតខំច្រើនគួរសម ដើម្បីគោរពតាមបទដ្ឋានទាំងនោះ។
ការបានឡើងដល់ចំណាត់ថ្នាក់លេខ ២ គឺផ្អែកតាមការខិតខំគួរសមរបស់រដ្ឋាភិបាលកម្ពុជា នៅក្នុងការប្រយុទ្ធប្រឆាំងនឹងការជួញដូរមនុស្ស នៅក្នុងឆ្នាំកន្លងទៅនេះ។ រដ្ឋាភិបាលកម្ពុជាបានចាប់ផ្តើមអនុវត្តផែនការសកម្មភាពជាតិ ដែលត្រូវបានបង្កើតឡើង នៅក្នុងអំឡុងពេលនៃរបាយការណ៍លើកមុន ហើយបានកំណត់ផ្តល់ថវិកាចំនួន ៥០០ ០០០ ដុល្លាអាមេរិកដល់គណកម្មាធិការអន្តរក្រសួង ដែលដឹកនាំការងារប្រយុទ្ធប្រឆាំងនឹងការជួញដូរមនុស្សរបស់ប្រទេសកម្ពុជា។ គោលការណ៍ណែនាំថ្នាក់ជាតិសំរាប់កំណត់ និងបញ្ជូនជនរងគ្រោះត្រូវបានអនុម័ត ហើយអាជ្ញាធរមូលដ្ឋានបានរកឃើញជនរងគ្រោះចំនួន ៥៨៩ នាក់ ដែលជាចំនួនកើនពីចំនួន ៣២៦ នាក់ កាលពីឆ្នាំទៅ។ របាយការណ៍ឆ្នាំ២០១៦ នេះក៏បានកត់សំគាល់ឃើញផងដែរពីដំណើរជឿនលឿនរបស់រដ្ឋាភិបាលកម្ពុជា ក្នុងការកាត់ទោស និងដាក់ទោស ពិសេសលើបទល្មើសនៃការជួញដូរកំលាំងពលកម្ម។ ក្រៅពីការបញ្ជាក់ពីជោគជ័យទាំងនេះ របាយការណ៍នេះថែមទាំងផ្តល់អនុសាសន៍ផងដែរ ហើយបង្ហាញចំណុចនានាសំរាប់ធ្វើការកែលំអ នៅក្នុងការខិតខំរបស់ប្រទេសកម្ពុជាដើម្បីប្រយុទ្ធប្រឆាំងនឹងទាសភាពសម័យទំនើប។
របាយការណ៍ TIP ប្រចាំឆ្នាំលើកទី ១៦ នេះមានការរៀបរាប់ពីប្រទេសនិងទឹកដីចំនួន ១៨៨ ដោយរួមទាំងសហរដ្ឋអាមេរិកផងដែរ។ នៅក្នុងពិធីប្រកាសរបាយការណ៍នេះ លោករដ្ឋមន្រ្តី Kerry ថែមទាំងបានផ្តល់កិត្តិយសដល់វីរៈជនក្នុងរបាយការណ៍ TIP ឆ្នាំ ២០១៦ គឺមនុស្សប្រុស ស្រី ដែលការខិតខំផ្ទាល់ខ្លួនរបស់គេបានធ្វើអោយគេមានស្នាដៃលេចធ្លោ នៅក្នុងការប្រយុទ្ធជាសាកល ប្រឆាំងនឹងទាសភាពសម័យទំនើបនេះ។
អត្ថបទទាំងមូលនៃរបាយការណ៍ TIP ឆ្នាំ ២០១៦ ស្តីពីប្រទេសកម្ពុជាមាន នៅក្នុងវែបសាយរបស់ក្រសួងការបរទេសអាមេរិក។ អត្ថបទបកប្រែជាភាសាខ្មែរនៃរបាយការណ៍នេះនឹងមានបង្ហាញដល់សាធារណជន ក្នុងពេលប៉ុន្មានថ្ងៃទៀតនេះ។ បើចង់អានរបាយការណ៍ឆ្នាំ២០១៦ ស្តីពីប្រទេសកម្ពុជា សូមចុចត្រង់នេះ។
