សហគ្រិនធុនតូចនិងមធ្យមជាង១២៥នាក់បានចូលរួមក្នុងសិក្ខាសាលាដែលមានរយៈពេល១ថ្ងៃពេញ នៅថ្ងៃនេះ នៅភ្នំពេញ ដើម្បីបង្កើនចំណេះដឹងនិងជំនាញរបស់ពួកគេ លើការអនុវត្តន៍ល្អក្នុងមុខជំនួញ។ បទបង្ហាញនេះត្រូវបានធ្វើដោយក្រុមហ៊ុនពហុជាតិរបស់សហរដ្ឋអាមេរិច។
ក្រោមការឧបត្ថម្ភរបស់សម្ព័ន្ធភាពពាណិជ្ជកម្មអាមេរិច អាស៊ានដើម្បីសហគ្រាសតូចនិងមធ្យម ដែលមានភាពប្រកួតប្រជែង ភាពជាដៃគូរវាងទីភ្នាក់ងារសហរដ្ឋអាមេរិកដើម្បីអភិវឌ្ឍន៍អន្តរជាតិ (USAID) និងក្រុមប្រឹក្សាពាណិជ្ជកម្មអាមេរិក-អាស៊ាន US-ASEAN Business Council (US-ABC) សិក្ខាសាលានេះមានការបណ្តុះបណ្តាលពីធុរកិច្ចល្អ ការអនុវត្តផ្នែកហិរញ្ញវត្ថុនិងច្បាប់ និងដំណោះស្រាយដែលរួមមានពាណិជ្ជកម្មតាមអ៊ិនធឺណែត និងមធ្យោបាយផ្នែកភស្តុភា ដើម្បីជួយបង្កើនសមត្ថភាពប្រកួតប្រជែងរបស់ក្រុមហ៊ុនដែលចូលរួមក្នុងសិក្ខាសាលានេះ។
អ្នករៀបចំសិក្ខាសាលាបានធ្វើការសហការជាមួយក្រុមការងារនៃសហគ្រាសធុនតូចនិងមធ្យមអាស៊ាន តាមរយៈនាយកដ្ឋានសិប្បកម្ម និង សហគ្រាសធុនតូចនិងមធ្យមរបស់ក្រសួងឧស្សាហកម្មនិងសិប្បកម្មកម្ពុជា រួមទាំងសមាគមសហគ្រិនវ័យក្មេងកម្ពុជា សមាគមសហគ្រិនស្ត្រីកម្ពុជា សហព័ន្ធពាណិជ្ជកម្មស្ត្រីកម្ពុជា មូលនិធិ Hinrich Foundation និងភ្នាក់ងារសហប្រតិបត្តិការអន្តរជាតិជប៉ុន។
លោកស្រី Rebecca Black នាយិកានៃទីភ្នាក់ងារសហរដ្ឋអាមេរិចសំរាប់ការអភិវឌ្ឍន៍អន្តរជាតិនៅកម្ពុជា បានមានប្រសាសន៍ថា៖“សាជីវកម្មជាដៃគូនៅក្នុងសិក្ខាសាលានេះមានសមត្ថភាពប្រកួតប្រជែងខ្ពស់នៅក្នុងសាកលលោក ក្នុងជំនួញអន្តរជាតិ បច្ចេកវិទ្យា និង ភស្តុភា ។ ខ្ញុំសូមអោយអ្នកទាំងអស់គ្នាយកឱកាសនេះដើម្បីបង្កើនភាពខ្លាំងក្នុងការប្រកួតប្រជែង និងសមត្ថភាពឈោងចាប់នៃក្រុមហ៊ុនរបស់លោកអ្នក។
ការបង្កើតសហគមន៍សេដ្ឋកិច្ចអាស៊ាន (ASEAN Economic Community) ក្នុងពេលដែល សេដ្ឋកិច្ចតំបន់និងសេដ្ឋកិច្ចសាកលលោក ដែលចេះតែមានការរីកធំឡើង មានន័យថាយើងត្រូវការចំណេះដឹង ជំនាញ និងមធ្យោបាយថ្មីៗ ដើម្បីបន្តពង្រឹងសមត្ថភាពក្នុងការប្រកួតប្រជែង និង បន្តធ្វើអោយប្រសើរឡើងនូវផលិតផលនិងដំណើរការ ដើម្បីបង្កើនលទ្ធភាពក្នុងការចូលទៅដល់ទីផ្សារ ដែលមានអតិថិជនដែលមានការរើសផលិតផលច្រើន និងសហគ្រាសដែលកាន់តែមានសមត្ថភាពប្រកួតប្រជែង នៅជុំវិញពិភពលោក។
លោក Anthony Nelson នាយកទទួលបន្ទុកផ្នែកអាស៊ានរបស់ក្រុមប្រឹក្សាពាណិជ្ជកម្មអាមេរិក-អាស៊ាន បានមានប្រសាសន៍ថា៖ “សិក្ខាសាលានេះជាផ្នែកមួយកិច្ចប្រឹងប្រែងរបស់ក្រុមហ៊ុនអាមេរិកអស់រយៈពេលច្រើនឆ្នាំមកហើយ ដែលធ្វើការតាមរយៈក្រុមប្រឹក្សានេះ ដើម្បីជួយដល់ការរីកចំរើននិងអភិវឌ្ឍន៍នៅក្នុងតំបន់។ សម័្ពន្ធភាពពាណិជ្ចកម្មនេះទទួលបានជោគជ័យ ក្នុងការបណ្តុះបណ្តាលសហគ្រិនចំនួន១៦០០នាក់ ក្នុងបណ្តាប្រទេសនៅអាស៊ាន។ បន្ទាប់ពីសិក្ខាសាលាថ្ងៃនេះ យើងនឹងរៀបចំកម្មវិធីបណ្តុះបណ្តាលជាន់ខ្ពស់ដែលនឹងរួមបញ្ចូលកម្មវិធីផ្តល់ប្រឹក្សាមួយទល់មួយ ព្រមទាំងសកម្មភាពអភិវឌ្ឍទេពកោសល្យនិងភាពជាអ្នកដឹកនាំ ដែលនឹងធ្វើឡើងដោយសាជីវកម្មជាដៃគូរបស់យើង”។
ជាបន្ថែមលើសិក្ខាសាលាមុនៗនៅប្រទេសដទៃទៀតក្នុងអាស៊ាន ក្រុមហ៊ុននាំមុខគេក្នុងពិភពលោក ដូចជាក្រុមហ៊ុន Google, UPS, VISA International, ConocoPhillips, Inc. និង ដៃគូក្នុងស្រុក ក្រុមហ៊ុន Sciaroni & Associates គាំទ្រកម្មវិធីបណ្តុះបណ្តាលរបស់សម្ព័ន្ធភាពពាណិជ្ជកម្មក្នុងថ្ងៃនេះ ដើម្បីធ្វើអោយប្រសើរឡើង ដល់សមត្ថភាពប្រកួតប្រជែងរបស់សហគ្រាសធុនតូចនិងមធ្យមនៅអាស៊ាន។ សិក្ខាសាលានេះក៏មានបញ្ចូលវគ្គពិភាក្សា និង ចែកក្រុមសម្រាប់ប្រឹក្សាយោបល់រវាងវាគ្មិន និង សហគ្រិនធុនតូចនិងមធ្យមដែលបានចូលរួម។
សម្ព័ន្ធភាពពាណិជ្ជកម្មដែលបង្កើតឡើងនៅឆ្នាំ២០១៤ នឹងធ្វើសកម្មភាពមួយចំនួននៅឆ្នាំ២០១៥ អំពីការប្រើប្រាស់បច្ចេកវិទ្យានិងឧបករណ៍ទំនើបក្នុងការធ្វើជំនួញ និង អំពីតំរូវការដើម្បីធ្វើការជាដៃគូក្នុងសង្វាក់ផ្គត់ផ្គង់ នៅបណ្តាប្រទេសក្នុងអាស៊ាននៅឆ្នាំ២០១៥។ សម្ព័ន្ធភាពពាណិជ្ជកម្មក៏នឹងបង្កើតគេហទំព័រ ដែលមានផ្តល់ការបណ្តុះបណ្តាលនិងប្រឹក្សាដែលមានលក្ខណៈជាការពិភាក្សាគ្នា ព្រមទាំងព័ត៌មានពាណិជ្ជកម្មតាមអ៊ិនធឺណែត ដើម្បីគាំទ្រការបង្កើត ការអភិវឌ្ឍន៍ អន្តរជាតូបនីយកម្ម នៃសហគ្រាសធុនតូចនិងមធ្យមនៅអាស៊ាន។
