ក្រុមសិល្បៈដ៏ល្បីដែលមានឈ្មោះថា Dana Tai Soon Burgess Dance Company (DTSBDC) នៅទីក្រុង Washington នឹងមកសំដែងនៅប្រទេសកម្ពុជា ពីថ្ងៃទី១២ ដល់ថ្ងៃទី១៩ ខែមិនា ឆ្នាំ២០១៦ នៅក្នុងកម្មវិធីមួយដែលឧបត្ថម្ភដោយស្ថានទូតអាមេរិក និងគាំទ្រដោយក្រុមសិល្បៈ Sophiline Arts Ensenble ។
នៅថ្ងៃសុក្រ ទី១៨ មិនា វេលាម៉ោង ៧ យប់ ក្រុមសិល្បៈ DTSBDC និងក្រុមសិល្បៈ Sophiline Arts Ensenble នឹងធ្វើការសំដែងជូនសាធារណជនដោយមិនគិតថ្លៃ នៅសាលសន្និសីទចតុមុខ។ ចំពោះព័ត៌មានស្តីពីសំបុត្រចូលទស្សនា សូមហៅទូរស័ព្ទទៅក្រុមសិល្បៈ Sophiline Arts Ensenble តាមលេខ ០៧៧ ៩៤៥ ០១៥ ឬតាមដានទំព័រហ្វេសបុករបស់ស្ថានទូតអាមេរិក។ ក្រុមរបាំ DTSBDC នឹងដឹកនាំសិក្ខាសាលាមួយចំនួនជាមួយក្រុមអ្នករបាំខ្មែរ នៅសៀមរាប និងនៅភ្នំពេញ។
លោក Jay Raman ប្រធានផ្នែកកិច្ចការសាធារណៈនៃស្ថានទូតអាមេរិក បានមានប្រសាសន៍ថា “ស្ថានទូតអាមេរិកមានសេចក្តីរីករាយក្នុងការធ្វើការឧបត្ថម្ភដល់ការដើរសំដែងក្នុងន័យវប្បធម៌នេះ ដែលធ្វើអោយស្ថាប័នរបាំដ៏អស្ចារ្យទាំងពីរបានជួបគ្នា គឺក្រុមរបាំ DTSBDC មកពីសហរដ្ឋអាមេរិក និងក្រុមរបាំ Sophiline Arts Ensenble នៅកម្ពុជា។ វាជាការនាំអោយគេមានការរំភើបចិត្ត នៅពេលអ្នកសិល្បៈ ដែលមានវប្បធម៌ខុសគ្នា ជួបគ្នា ហើយខ្ញុំរីករាយនឹងឃើញលទ្ធផលនៃការសហការគ្នានេះ នៅថ្ងៃទី១៨ មិនា នៅសាលសន្និសីទចតុមុខ”។ លោកស្រី Sophiline Cheam Shapiro នាយិកានៃក្រុមសិល្បៈ Sophiline Arts Ensemble បានមានប្រសាសន៍ថា “ការផ្លាស់ប្តូរគ្នាផ្នែកវប្បធម៌ធ្វើអោយយើងមានការយល់កាន់តែច្បាស់ពីពិភពលោក ដែលយើងរស់នៅ ហើយបង្រៀនយើងពីលទ្ធភាពច្រើន សំរាប់អោយយើងអាចធ្វើការបកស្រាយបទពិសោធន៍របស់មនុស្សជាតិ”។
ក្រុមរបាំ DTSBDC បង្កើតហើយសំដែងសិល្បៈរបាំទំនើប ដែលបង្ហាញពីទិដ្ឋភាពច្រើនយ៉ាងក្នុងសង្គមអាមេរិក។ របាំរបស់ក្រុមរបាំ DTSBDC ផ្តោតលើអត្តសញ្ញាណ ក្នុងបរិបទនៃព្រឹត្តិការណ៍ប្រវត្តិសាស្រ្ត និងរឿងរបស់មនុស្សម្នាក់ៗ ដោយផ្សារភ្ជាប់គ្នានូវវប្បធម៌នានា និងបទពិសោធន៍រួមគ្នារបស់មនុស្ស។ ជាធម្មតា ក្រុមរបាំ DTSBDC ដើរសំដែងនៅក្រៅប្រទេស ហើយបានសំដែងនៅតាមប្រទេសជាច្រើន ដូចជាប្រទេសអេហ្ស៊ីប អ៊ីស្រាអែល កូរេ ចិន ឥណ្ឌា អាឡឺម៉ង់ និងម៉ិកស៊ិក។ ព័ត៌មានបន្ថែមស្តីពីក្រុមរបាំ DTSBDC សូមចុចត្រង់នេះ ។
ចំពោះព័ត៌មានស្តីពីក្រុមសិល្បៈ Sophiline Arts Ensemble សូមចុចត្រង់នេះ ។
អ្នកសារព័ត៌មានដែលមានការចាប់អារម្មណ៍ចង់ទទួលបានព័ត៌មានបន្ថែម ឬចូលរួមក្នុងការសំដែងណាមួយ គួរទាក់ទងមកឈ្មោះ John Shapiro នៅក្នុងក្រុមសិល្បៈ Sophiline Arts Ensemble ដោយផ្ញើអ៊ីម៉េលទៅកាន់ john@khmerarts.org ឬទូរស័ព្ទទៅកាន់លេខ ០១៧ ៩៣៨ ៩៩២ ។
