អង្គភាពលេខ ២ ផ្នែកស្រាវជ្រាវវេជ្ជសាស្រ្ត របស់កងទ័ពជើងទឹកសហរដ្ឋអាមេរិក ប្រចាំនៅភ្នំពេញ

បេសកកម្មរបស់អង្គភាពលេខ២ ផ្នែកស្រាវជ្រាវវេជ្ជសាស្រ្ត របស់កងទ័ពជើងទឹកសហរដ្ឋអាមេរិក នៅភ្នំពេញ (NAMRU-2 PP) គឺស្រាវជ្រាវរកមើលការគំរាមកំហែងនៃជំងឺឆ្លង ដើម្បីជាប្រយោជន៍ សំរាប់សហរដ្ឋអាមេរិក ក្រសួងសុខាភិបាលកម្ពុជា និងក្រុមធ្វើការផ្នែកសុខភាពសាធារណៈអន្តរជាតិ ហើយរៀបចំ និងវាយតំលៃអន្តរាគម និងលទ្ធផលការងារ ដើម្បីកាត់បន្ថយការគំរាមកំហែងទាំងនោះ។ NAMRU-2 PP ចូលរួមសហប្រតិបត្តិការក្នុងសកម្មភាពសុខាភិបាលជួយដល់ក្រុមបុគ្គលិកសហរដ្ឋអាមេរិក ប្រចាំនៅក្នុងប្រទេសកម្ពុជា ក្រសួងសុខាភិបាលកម្ពុជា បញ្ជាការដ្ឋាននៃកងកំលាំងសហរដ្ឋអាមេរិក ប្រចាំនៅតំបន់ប៉ាស៊ីហ្វិក និងការិយាល័យវេជ្ជសាស្រ្ត និងការវះកាត់នៃកងទ័ពជើងទឹកសហរដ្ឋអាមេរិក។

ពត៌មានសំរាប់ទាក់ទង៖
ទូរស័ព្ទ៖ +៨៥៥-២៣-៧២៨-០០០
Fax៖ +៨៥៥-២៣-៧២៨-៦០០

ប្រវត្តិនៃអង្គភាពលេខ២ ផ្នែកស្រាវជ្រាវវេជ្ជសាស្រ្ត របស់កងទ័ពជើងទឹកសហរដ្ឋអាមេរិក (NAMRU-2)

NAMRU-2 មានប្រភពដើមនៅលើកោះ Guam ក្នុងអំឡុងសង្គ្រាមលោកលើកទី២ ក្រោមមូលនិធិ Rockefeller Foundation ។ មុខងារសំខាន់របស់ក្រុមនេះ នៅពេលនេះក៏ដូចជានៅពេលនេះដែរ គឺដើម្បីសិក្សាពីជំងឺឆ្លង ដែលអាចមានសារៈសំខាន់ផ្នែកយោធា នៅអាស៊ី។ អង្គភាពនេះត្រូវបានបង្កើតឡើងនៅឆ្នាំ១៩៥៥ នៅទីក្រុងតែប៉ិ កោះតៃវ៉ាន់ ដែលនៅទីនោះ អង្គភាពនេះបានដំណើរសកម្មភាព អស់រយៈពេល ២៤ ឆ្នាំ។ អង្គភាព NAMRU-2 ត្រូវបានបង្កើតឡើងនៅទីក្រុង Jakarta នៃប្រទេសឥណ្តូនេស៊ី។ នៅឆ្នាំ១៩៧៩ នៅពេលនយោបាយតំរូវអោយអង្គភាព NAMRU-2 ចាកចេញពីតៃវ៉ាន់ បញ្ជាការដ្ឋានបានបែរទៅរកអ្នកសហការជាមួយខ្លួននៅសាធារណរដ្ឋហ្វីលីពីន ដើម្បីរកមើលកន្លែងថ្មីសំរាប់ដាក់មន្ទីរពិសោធន៍។ អង្គភាពនេះត្រូវបានបង្កើតឡើងជាផ្លូវការនៅទីក្រុង Manila នៅថ្ងៃទី១៥ ខែមេសា ឆ្នាំ១៩៧៩។ នៅខែមិនា ឆ្នាំ១៩៩១ បញ្ជាការដ្ឋានត្រូវបានផ្ទេរទៅទីក្រុង Jakarta ហើយអង្គភាពនៅទីក្រុង Manila ក៏ត្រូវបានបិទនៅខែមិថុនា ឆ្នាំ១៩៩៤។

នៅឆ្នាំ២០០២ សកម្មភាពនៅភ្នំពេញ ត្រូវបានបង្កើតឡើងដោយ NAMRU-2 ដើម្បីធ្វើការស្រាវជ្រាវជំងឺឆ្លងនៅក្នុងតំបន់និងផ្តល់ការគាំទ្រផ្នែកមន្ទីរពិសោធន៍ដើម្បីកំណត់រោគវិនិច្ឆ័យ តាមរយៈមន្ទីរពិសោធន៍ ដែលមានទីតាំងស្ថិតនៅវិទ្យាស្ថានជាតិសុខភាពសាធារណៈ នៅទីក្រុងភ្នំពេញ នៃប្រទេសកម្ពុជា។ នៅឆ្នាំ២០០៧ ដើម្បីឆ្លុះបញ្ចាំងពីអាទិភាពផ្នែកវេជ្ជសាស្រ្តរបស់កងទ័ពជើងទឹកក្នុងការឆ្លើយតបនឹងការគំរាមកំហែងថ្មីៗនៃជំងឺឆ្លងក្នុងសាកលលោក NAMRU-2 បានទទួលស្គាល់សកម្មភាព នៅទីក្រុងភ្នំពេញថាជាក្រុមមួយ ដោយទន្ទឹមនឹងនោះ បានផ្តើមក្រុមមួយនៅក្នុងការិយាល័យសហប្រតិបត្តិការយោធា នៅក្នុងស្ថានទូតសហរដ្ឋអាមេរិក នៅប្រទេសសឹង្ហបូរី។

មន្ទីរពិសោធន៍ និងទីស្នាក់ការធំរបស់ NAMRU-2 ស្ថិតនៅក្នុងទីក្រុង Jakarta នៅឡើយ រហូតដល់ឆ្នាំ២០១០ នៅពេលរដ្ឋាភិបាលឥណ្តូនេស៊ីស្នើសុំអោយបិទ។ ទីស្នាក់ការធំរបស់អង្គភាពនេះត្រូវបានផ្ទេរទៅកំពង់ផែ Pearl Habor ក្នុងរដ្ឋ Hawaii វិញ ហើយត្រូវបានបើកជាផ្លូវការជាអង្គភាព NAMRU-2 Pacific នៅថ្ងៃទី១៧ ខែមិថុនា ឆ្នាំ២០១០ ចំណែកមន្ទីរពិសោធន៍របស់ NAMRU-2 PP បំរើមុខងារជាមន្ទីរពិសោធន៍មេ នៅក្នុងតំបន់។

បុគ្គលិករបស់អង្គភាព NAMRU-2 PP

អង្គភាព NAMRU-2 PP មានសមាជិក ៤ នាក់ មកពីកងទ័ពជើងទឹកសហរដ្ឋអាមេរិក និងមានអ្នកវិទ្យាសាស្រ្ត វេជ្ជបណ្ឌិត អ្នកបច្ចេកវិទ្យា អ្នកបច្ចេកទេសខាងទិន្នន័យ និងបុគ្គលិករដ្ឋបាលចំនួន ៩០ នាក់ នៅទីក្រុងភ្នំពេញ និងខេត្តកំពង់ចាម។ NAMRU-2 PP ផ្តល់ការបណ្តុះបណ្តាលយ៉ាងល្អ ផ្នែកស្រាវជ្រាវជីវវេជ្ជសាស្រ្ត។ ក្រៅពីនេះទៀត NAMRU-2 PP ប្តេជ្ញាបន្តលើកកំពស់សមត្ថភាពនៃបុគ្គលិករបស់ខ្លួន ក្រុមអ្នកស្រាវជ្រាវវិទ្យាសាស្រ្ត និងក្រសួងសុខាភិបាលកម្ពុជា តាមរយៈកម្មវិធីហាត់ការ (Internship) ភាពជាដៃគូផ្នែកមន្ទីរពិសោធន៍ ការផ្តល់អាហាររូបករណ៍សំរាប់សិក្សានៅបរទេស និងការចូលរួមក្នុងសនិ្នសីទវិទ្យាសាស្រ្តអន្តរជាតិ។

កម្មវិធីរបស់ NAMRU-2 PP

ការស្រាវជ្រាវ និងតាមដានជំងឺ
ដោយធ្វើការជិតស្និទ្ធជាមួយមន្រ្តីសុខាភិបាលកម្ពុជា NAMRU-2 PP ធ្វើការតាមដាន និងស្រាវជ្រាវជំងឺឆ្លង ក្នុងផ្នែកដូចខាងក្រោមនេះ៖

ជំងឺផ្លូវដង្ហើម (ពិសេសជំងឺផ្តាសាយ)
ជំងឺក្រពះ ពោះវៀន
សរីរៈទប់ទល់នឹងការរាលដាលនៃអតិសុខុមប្រាណ (Antimicrobial resistant organisms) (ពិសេសចេញពីមុខរបួស)
ជំងឺក្តៅខ្លួន
ជំងឺគ្រុនឈាម
ជំងឺ Chikungunya (ប្រហាក់ប្រហែលនឹងជំងឺគ្រុនឈាម)
ជំងឺគ្រុនចាញ់

NAMRU-2 PP នៅតែមានការឈានមុខក្នុងការតាមដានរកជំងឺឆ្លងថ្មីៗ នៅប្រទេសកម្ពុជា។ NAMRU-2 PP បានប្រមូលនិងវិភាគសំណាកចំនួនជាង ៥០០០ ក្នុងមួយឆ្នាំ ហើយផ្សព្វផ្សាយលទ្ធផលយ៉ាងឆាប់ដល់ដៃគូខាងកម្ពុជា និងដៃគូនានារបស់រដ្ឋាភិបាលសហរដ្ឋអាមេរិក។ ក្រៅពីនេះ ពេលមានការស្នើសុំ NAMRU-2 PP ធ្វើការស៊ើបអង្កេតលើការផ្ទុះនៃជំងឺរាតត្បាត ហើយគាំទ្រការរៀបចំសំរាប់ឆ្លើយតបការផ្ទុះនេះ។

គំរោងស្រាវជ្រាវទាំងអស់របស់ NAMRU-2 PP មានការត្រួតពិនិត្យផ្នែកសីលធម៌វិន័យយ៉ាងច្រើន ទាំងនៅក្នុងប្រទេសកម្ពុជា ទាំងនៅក្នុងសហរដ្ឋអាមេរិក ដើម្បីធានាលើការការពារសិទ្ធិ និងសុខមាលភាព របស់អ្នកដែលចូលរួមក្នុងកម្មវិធីស្រាវជ្រាវ របស់ NAMRU-2 PP ។ យើងមានការតាំងចិត្តខ្ពស់ចំពោះបទដ្ឋានសីលធម៌។

ការកសាងសមត្ថភាព
ទន្ទឹមគ្នាជាមួយនឹងអង្គការសុខភាពពិភពលោក ក្រសួងសុខាភិបាលកម្ពុជា និងអង្គការមិនមែនរដ្ឋាភិបាលនានា NAMRU-2 PP ពង្រឹងសមត្ថភាពស្រាវជ្រាវផ្នែកជីវវេជ្ជសាស្រ្ត ដោយពង្រឹងផ្នែកមន្ទីរពិសោធន៍កំណត់រោគវិនិច្ឆ័យ ផ្នែកអតិសុខុមប្រាណ (Diagnostic Microbiology Laboratories) នៅតាមមន្ទីរពេទ្យបង្អែក។ NAMRU-2 PP ធ្វើការបណ្តុះបណ្តាល ដល់បុគ្គលិកលើវិធីសាស្រ្ត និងបច្ចេកវិជ្ជាថ្មីៗបំផុត ពង្រឹងបទដ្ឋាននៃការងារផ្នែកមន្ទីរពិសោធន៍ ជួយកំណត់រោគវិនិច្ឆ័យនៃជំងឺឆ្លង និងផ្តល់សេវាបញ្ជូនអ្នកជំងឺដោយឥតគិតថ្លៃ។

នៅពេលបច្ចុប្បន្ននេះ ការងារស្រាវជ្រាវរបស់ NAMRU-2 មាននៅទូទាំងតំបន់អាស៊ីអាគ្នេយ៍ ដោយរួមមានប្រទេសវៀតណាម ឡាវ សឹង្ហបូរី និងថៃ។

ពត៌មានបន្ថែម៖

ប្រវត្តិ​នៃ​អង្គភាព​លេខ​២ ផ្នែក​ស្រាវជ្រាវ​វេជ្ជសាស្រ្ត របស់​កងទ័ព​ជើង​ទឹក​សហរដ្ឋ​អាមេរិក (NAMRU-2)

បុគ្គលិក​របស់​អង្គភាព NAMRU-2 PP

កម្មវិធី​របស់ NAMRU-2 PP

ប្រវត្តិនៃអង្គភាពលេខ២ ផ្នែកស្រាវជ្រាវវេជ្ជសាស្រ្ត របស់កងទ័ពជើងទឹកសហរដ្ឋអាមេរិក (NAMRU-2)

បុគ្គលិករបស់អង្គភាព NAMRU-2 PP

កម្មវិធីរបស់ NAMRU-2 PP