យើងមានការសោកស្តាយចំពោះការលំបាកចំពោះអ្នកចូលលេងឆ្នោត DV ។ ដើម្បីអោយមានយុត្តិធម៌ត្រឹមត្រូវ ហើយការពារភាពត្រឹមត្រូវនៃដំណើរការលេងឆ្នោតនេះសំរាប់អ្នកពាក់ព័ន្ធទាំងអស់ យើងត្រូវតែចាប់ផ្តើមឡើងវិញនូវដំណើរការលេងឆ្នោតនេះ សំរាប់ឆ្នាំនេះ (DV-២០១៩)។
អំឡុងពេលចុះឈ្មោះថ្មីសំរាប់ឆ្នោត DV-២០១៩ ចាប់ផ្តើមការចុះឈ្មោះតាមអ៊ិនធ័រណែតនៅថ្ងៃពុធ ទី ១៨ ខែតុលា ឆ្នាំ ២០១៧ វេលាម៉ោងថ្ងៃត្រង់ ម៉ោងក្នុងសហរដ្ឋអាមេរិក ហើយបិទនៅថ្ងៃពុធ ទី ២២ ខែវិច្ឆិកា ឆ្នាំ ២០១៧ ម៉ោងថ្ងៃត្រង់ ម៉ោងក្នុងសហរដ្ឋអាមេរិក។
បើលោកអ្នកបានចុះឈ្មោះមុនថ្ងៃពុធ ទី១៨ ខែតុលា ឆ្នាំ២០១៧ ការចុះឈ្មោះនោះនឹងមិនត្រូវបានគេយកជាការទេ ហើយលោកអ្នកត្រូវចុះឈ្មោះម្តងទៀត នៅក្នុងអំឡុងពេលចុះឈ្មោះថ្មី។ លោកអ្នកអាចចុះឈ្មោះម្តងទៀត ដោយមិនខ្លាចរងការបដិសេធដោយសារហេតុផលចុះឈ្មោះច្រើនដងទេ។ អ្នកដែលចុះឈ្មោះលើសពីម្តងនៅក្នុងអំឡុងពេលចុះឈ្មោះថ្មី នឹងត្រូវបានបដិសេធ។
អ្នកលេងឆ្នោតអាចចូលមើលទំរង់ចុះឈ្មោះឆ្នោត DV (E-DV) នៅក្នុងគេហទំព័រផ្លូវការ dvlottery.state.gov នៅក្នុងអំឡុងពេលចុះឈ្មោះ។ ការណែនាំស្តីពីឆ្នោត DV មាននៅក្នុងគេហទំព័ររបស់ក្រសួងការបរទេសសហរដ្ឋអាមេរិក usvisas.state.gov/dv/instructions ។
លក្ខខ័ណ្ឌទាមទារដទៃទៀតនៅដដែល។
ចាប់ពីថ្ងៃទី ១៥ ឧសភា ឆ្នាំ ២០១៨ ទៅ អ្នកលេងឆ្នោត DV-២០១៩ នឹងអាចប្រើលេខបញ្ជាក់ (Confirmation Number) របស់គេម្នាក់ៗ ដែលត្រូវបានផ្តល់អោយនៅពេលគេចូលលេង ដើម្បីតាមដានព័ត៌មានសំរាប់អ្នកចូលលេង តាមគេហទំព័រ dvlottery.state.gov ដើម្បីដឹងថា តើគេជាប់ឬអត់។ វានឹងប្រាប់ផងដែរដល់អ្នកជាប់នូវព័ត៌ស្តីពីវិធីចូលលេងឆ្នោត DV សំរាប់រូបគេនិងសមាជិកគ្រួសាររបស់គេដែលមានលក្ខណៈស្របតាមលក្ខខ័ណ្ឌតំរូវ។ ក្រសួងការបរទេសអាមេរិកថែមទាំងបញ្ជាក់ពីការណាត់ជួបធ្វើការសំភាសន៍ផ្តល់ទិដ្ឋាការ តាមរយៈគេហទំព័រនេះ ត្រង់ Entrant Status Check ។
