លោកស្រី Walker ចូលបំពេញការងារ នៅថ្ងៃ២៥ ខែកក្កដា ជាអនុប្រធានស្ថានបេសកកម្មទូត​នៃស្ថានទូតអាមេរិក នៅទីក្រុងភ្នំពេញ។

លោកស្រីអនុប្រធានទូត Walker ជាមន្ត្រីអាជីពក្នុងកិច្ចការបរទេស ដែលបានចូលបម្រើការងារ​ក្នុង ក្រសួងការបរទេសនៃសហរដ្ឋអាមេរិក នៅឆ្នាំ ២០០២។ ក្នុងពេលថ្មីៗបំផុត​នេះ លោកស្រីបានធ្វើជាអនុប្រធានស្ថានបេសកកម្មទូត​ នៅទីក្រុង Dushanbe នៃប្រទេស Tajikistan ហើយមុន​នោះ បានបំពេញតួនាទីផ្សេងៗ​នៅប្រទេស អាស៊ែបៃហ្សង់ អេហ្ស៊ីប លីបង់ និងឥណ្ឌូនេស៊ី ។ ក្រៅ​ពីនេះ លោកស្រីបានបំពេញការងារជាច្រើន នៅទីក្រុងវ៉ាស៊ីនតោន ក្នុងការិយាល័យទទួលបន្ទុកកិច្ចការអឺរ៉ុប អាស៊ីបូព៌ានិងប៉ាស៊ីហ្វិក និងការិយាល័យស្រាវជ្រាវ និងព័ត៌មានសម្ងាត់។

លោកស្រី Walker បានទទួលសញ្ញាប័ត្រអនុបណ្ឌិតពីមហាវិទ្យាល័យសង្គ្រាមកងទ័ពជើងទឹកសហរដ្ឋអាមេរិក ផ្នែកការសិក្សាយុទ្ធសាស្រ្ត និងសន្តិសុខជាតិ និងសញ្ញាប័ត្របរិញ្ញាវិទ្យាសាស្ត្រ ពីមហាវិទ្យាល័យធុរកិច្ច McDonough School of Business នៃសាកលវិទ្យាល័យ Georgetown University។ លោកស្រីបានរៀនភាសារុស្ស៊ី តាហ្ស៊ីក អាស៊ែបៃហ្សង់ ភាសាអារ៉ាប់ និងភាសាឥណ្ឌូនេស៊ី។ លោកស្រីជាអ្នករស់​នៅក្នុងទីក្រុង Hyattsville នៃរដ្ឋម៉ារីលែន ហើយមានស្វាមីជាមន្រ្តីយោធាចូលនិវត្តន៍ ឈ្មោះ James ។