រាជធានីភ្នំពេញ
ថ្ងៃទី២៧ ខែមករា ឆ្នាំ២០១៥
សូមជំរាបសួ! សូមអរគុណព្រះអង្គម្ចាស់ នរោត្តមសេរីវុឌ្ឍ ប្រធានវិទ្យាស្ថាន CICP ចំពោះការណែនាំដ៏ល្អ។ សូមទទួលពរឆ្នាំថ្មីរបស់ខ្ញុំ។ ខ្ញុំមានសេចក្តីរីករាយណាស់ដោយបានត្រឡប់មកកាន់ទីក្រុងភ្នំពេញវិញ ហើយមករួមជាមួយវិទ្យាស្ថាន CICP ដែលជាអង្គការដ៏ល្អមួយដែល អស់រយៈពេល ២០ ឆ្នាំហើយ បានធ្វើអោយរដ្ឋាភិបាល និងសាធារណជន មានការយល់ដឹងពីបញ្ហានយោបាយសំខាន់ៗ។ ក្រុមអ្នកជំនាញដែលផ្តល់ប្រឹក្សា ដូចជាវិទ្យាស្ថាននេះ រួមជាមួយនឹងសង្គមស៊ីវិល មានសារៈសំខាន់ណាស់ នៅសហរដ្ឋអាមេរិក សូម្បីតែគេធ្វើការរិះគន់ក៏ដោយ។ ដូច្នេះ សហរដ្ឋអាមេរិកគាំទ្រស្ថាប័នបែបនេះ នៅកម្ពុជា និងនៅគ្រប់កន្លែង។
យើងគូសបញ្ជាក់ចំណុចនេះ និងព្រឹត្តិការណ៍ដទៃទៀត នៅថ្ងៃនេះ តាមប្រព័ន្ធផ្សព្វផ្សាយ ដែលបានក្លាយជាមធ្យោបាយដ៏មានប្រសិទ្ធភាពមួយ សំរាប់ធ្វើការទាក់ទងជាមួយគ្នា។ សូមតាមដានព័ត៌មានអំពីយើងតាម Twitter ដែលមានអាសយដ្ឋាន @USAsiaPacific ។ ខ្ញុំដឹងថា ក្រុមបុគ្គលិករបស់យើងនៅក្នុងស្ថានទូតបានមានការទាក់ទងជាមួយលោកអ្នកហើយ។ យើងមានក្រុមបុគ្គលិកដ៏ល្អនៅកម្ពុជា ដែលដឹកនាំដោយឯកអគ្គរដ្ឋទូត Todd ។ លក្ខណៈនៃក្រុមបុគ្គលិករបស់យើងបង្ហាញពីសារៈសំខាន់នៃទំនាក់ទំនងរវាងសហរដ្ឋអាមេរិក និងប្រទេសកម្ពុជា។ កាលពី២ឆ្នាំមុន ខ្ញុំបានមកព្រះរាជាណាចក្រកម្ពុជា ដោយអមដំណើរលោកប្រធានាធិបតី Obama ។ លោកបានសំរេចចិត្តធ្វើដំណើរមកប្រទេសកម្ពុជាក្នុងនាមជាប្រធានាធិបតីកំពុងកាន់អំណាចរបស់សហរដ្ឋអាមេរិក ដោយសារហេតុផលជាច្រើន។
ប្រទេសកម្ពុជា និងសហរដ្ឋអាមេរិកមានលក្ខណៈរួមច្រើន។ សុភាសិតខ្មែរមួយថា “យល់ដឹងតាមរយៈការសិក្សា ទទួលបានជោគជ័យតាមរយៈការខិតខំ” ក៏ប្រាប់ពីឥរិយាបទរបស់ប្រទេសអាមេរិកផងដែរ។ យុវជននៅក្នុងប្រទេសទាំងពីរជឿថា គេមានឥទ្ធិពលទៅលើប្រទេសរបស់គេ ហើយគេប្រែក្លាយជំនឿទាំងនេះអោយទៅជាសកម្មភាព។ យើងមានការគោរពដូចគ្នាចំពោះបេតិកភណ្ឌវប្បធម៌ និងអារ្យធម៌បូរាណរបស់ប្រទេសកម្ពុជា។ កាលពីឆ្នាំទៅ យើងឃើញគំរូមួយនៃលក្ខណៈនេះ ដោយសហរដ្ឋអាមេរិកបានជួយសំរួលដល់ការបញ្ជូនត្រឡប់វិញនូវបដិមាករបូរាណសម័យមុនអង្គរ ដែលត្រូវបានគេលួចយកទៅ រាប់ទសវត្សមុន ហើយយើងមានការទាក់ទងគ្នារឹងមាំ តាមរយៈសហគមន៍ខ្មែរអាមេរិក ដែលរក្សាទំនាក់ទំនងជាមួយគ្រួសារ និងមិត្តភក្តិ នៅកម្ពុជា។
ទំនាក់ទំនងនេះ គឺជាហេតុផលសំខាន់មួយ ដែលសហរដ្ឋអាមេរិកមានការគាំទ្រចំពោះប្រជាជនកម្ពុជា អស់រយៈពេលជាច្រើនឆ្នាំមកហើយ ដោយបានផ្តល់ថវិកាចំនួនជាង ១ ពាន់លានដុល្លាអាមេរិក សំរាប់ប្រជាជនកម្ពុជា តាំងពីដើមទសវត្សឆ្នាំ ១៩៩០ មក។ ការទាក់ទងរបស់យើងមានកាន់តែច្រើនឡើងថែមទៀត តាំងពីលោកប្រធានាធិបតី Obama បានចាប់ផើ្តមគោលនយោបាយបំបែរការយកចិត្តទុកដាក់មកទ្វីបអាស៊ី កាលពីឆ្នាំ២០០៩។ ក្រោយពីស្តាប់ប្រជាជនកម្ពុជាអំពីសេចក្តីត្រូវការរបស់គេ យើងបានធ្វើការចំណាយលើវិស័យជាច្រើន។
យើងកំពុងតែធ្វើការចំណាយច្រើនលើធនធានដ៏សំខាន់របស់ប្រទេសកម្ពុជា គឺប្រជាជនកម្ពុជា តាមរយៈកម្មវិធីនានា ដូចជាកម្មវិធីស្តីពីគំនិតផ្តួចផ្តើមទាក់ទងនឹងជំងឺគ្រុនចាញ់ និងសុខភាពសាកល PEPFAR ដែលប្រយុទ្ធនឹងជំងឺអេដស៍។ ការឆ្លើយតបរួមគ្នារបស់យើងទៅនឹងការផ្ទុះឡើងនៃការឆ្លងមេរោគអេដស៍នៅបាត់ដំបងគឺជាគំរូដ៏ល្អមួយនៃកិច្ចសហការផ្នែកសុខភាពសាធារណៈ ក្នុងការផ្តល់ការព្យាបាល និងការថែទាំដល់អ្នកមានតំរូវការ។ យើងបានជួយក្នុងវិស័យអប់រំតាមរយៈគំរោងកែលំអការអប់រំជាមូលដ្ឋាននៅកម្ពុជា (IBEC)។ យើងជួយដល់វិស័យកសិកម្ម និងសន្តិសុខស្បៀង តាមរយៈកម្មវិធី Feed the Future ដែលជាកម្មវិធីថ្មីមួយ ដែលធ្វើការដោយផ្ទាល់ជាមួយកសិករតូចតាច ដោយផ្តល់ដល់កសិករទាំងនេះចំនួន ៧២ ០០០ នាក់នូវបច្ចេកទេសថ្មីៗដែលជួយគេអោយផលិតបានច្រើន ហើយយកផលដំណាំរបស់គេទៅលក់។
យើងគាំទ្រការអភិរក្សបរិស្ថាន និងអគ្គិសនីស្អាត កសិកម្មដែលធានានិរន្តភាព និងអ្វីច្រើនទៀត តាមរយៈកម្មវិធីនៃគំនិតផ្តួចផ្តើមនៅតំបន់មេគង្គក្រោម (Lower Mekong Initiative) ដែលជាកម្មវិធីធំមួយដែលមានការចូលរួមផងដែរនៃប្រទេសឡាវ ភូមា ថៃ និងវៀតណាម។ ដោយមើលជារួមទៅលើបញ្ហានានានៅក្នុងប្រទេសទាំង ៥ គំរោងនេះជួយកម្ពុជា និងប្រទេសជិតខាងខ្លួនក្នុងការធ្វើផែនការ និងធ្វើការជាមួយគ្នា។ ខ្ញុំសូមលើកទឹកចិត្តអោយប្រទេសកម្ពុជាធ្វើខ្លួនជាដៃគូ ដែលមានការទទួលខុសត្រូវ នៅក្នុងការអភិវឌ្ឍប្រកបដោយនិរន្តភាពនៃទឹកទន្លេ ដើម្បីជាប្រយោជន៍សំរាប់ទាំងអស់គ្នា។
យើងគាំទ្រពាណិជ្ជកម្ម និងការវិនិយោគ ពីព្រោះថា ថ្វីត្បិតតែជំនួយរបស់រដ្ឋាភិបាលអាមេរិកមានការកើនឡើងចំនួន ៨០% នៅក្នុងទសវត្សកន្លងទៅនេះក្តី តែការវិនិយោគពីវិស័យឯកជនរបស់អាមេរិកនៅមានកំរិតទាបនៅឡើយ។ គំរោងពង្រីកការវិនិយោគចំនួន ១០០ លានដុល្លាអាមេរិកថែមទៀតរបស់ក្រុមហ៊ុន Coca-Cola គ្រាន់តែជាឧទាហរណ៍ចុងក្រោយមួយតែប៉ុណ្ណោះ។ ការនេះបញ្ជាក់អោយឃើញថា សហរដ្ឋអាមេរិកមិនគ្រាន់តែជាទីផ្សានាំចេញដ៏ធំជាងគេតែមួយរបស់ប្រទេសកម្ពុជាតែប៉ុណ្ណោះទេ តែយើងថែមទាំងជាប្រភពធំមួយនៃការវិនិយោគឯកជនផងដែរ។
អ្វីដែលសំខាន់នោះមិនគ្រាន់តែជាបរិមាណនៃពាណិជ្ជកម្ម និងការវិនិយោគតែប៉ុណ្ណោះទេ តែគុណភាពក៏សំខាន់ដែរ។ ការធ្វើជំនួញជាមួយប្រទេសអាមេរិកមានន័យថា អ្នកធ្វើការកម្ពុជាទទួលបានការបណ្តុះបណ្តាល និងជំនាញបន្ថែម បទដ្ឋានការងារ និងបរិយាសការងារល្អដែលពង្រឹងកំណើនលូតលាស់ ហើយកែលំអជីវិតរស់នៅរបស់ប្រជាជនសាមញ្ញ។ ឧទាហរណ៍ តាមរយៈកម្មវិធីស្តីពីរោងចក្រល្អនៅកម្ពុជា ដែលទទួលជំនួយពីសហរដ្ឋអាមេរិក និងមជ្ឈមណ្ឌល AFL-CIO Solidarity Center យើងកែលំអបរិយាកាសការងាររបស់កម្មកររោងចក្រកាត់ដេររាប់ពាន់នាក់ ហើយជួយពួកគេក្នុងការចងក្រងជាក្រុម ជាសហជីព។ ការចរចាអនុសញ្ញារួម (Collective bargaining) និងការប្រាស្រ័យទាក់ទងបានល្អឡើង រវាងកម្មករ និងថៅកែនឹងជួយអោយគេបន្តទទួលបានជោគជ័យថែមទៀតលើជោគជ័យក្នុងពេលថ្មីៗនេះ។ ការនេះនឹងបង្កើនស្ថិរភាពនៃសេដ្ឋកិច្ចកម្ពុជា ដែលកំពុងមានការលូតលាស់។
នេះគឺជាលក្ខណៈរួមនៃអ្វីដែលយើងកំពុងធ្វើជាលក្ខណៈទ្វេភាគី។ ការបង្វែរការយកចិត្តទុកដាក់មកទ្វីបអាស៊ីថែមទាំងជួយប្រទេសកម្ពុជានៅក្នុងតំបន់ តាមរយៈការបង្កើនទំនាក់ទំនងរបស់យើងជាមួយតំបន់ទាំងមូល ជាពិសេសជាមួយអាស៊ាន។ លោកប្រធានាធិបតី Obama បានបង្កើនការទាក់ទងជាមួយអាស៊ាន ដោយបានបើកស្ថានទូតមួយ ហើយបានបញ្ជូនឯកអគ្គរដ្ឋទូតដំបូង ដែលឥឡូវនេះមានឯកអគ្គរដ្ឋទូតទី២ ហើយដែលមកធ្វើការក្នុងស្ថានទូត ហើយលោកបានសំរេចចូលរួមដោយផ្ទាល់ នៅក្នុងកិច្ចប្រជុំកំពូលអាស៊ីបូព៌ា។ យើងគាំទ្រសមាហរណកម្មអាស៊ាន និងការអភិវឌ្ឍន៍របស់អាស៊ាន ដូចជាសហគមន៍សេដ្ឋកិច្ចដែលនឹងមានក្នុងឆ្នាំនេះ។ យើងថែមទាំងធ្វើការជាមួយដៃគូ និងសម្ព័ន្ធមិត្តជាច្រើនទៀតក្នុងតំបន់ ដើម្បីជំរុញនិតិរដ្ឋហើយរក្សាស្ថិរភាពនៅទូទាំងតំបន់។ និតិរដ្ឋជួយប្រទេសតូចៗដូចជាប្រទេសកម្ពុជា ក្នុងការការពារផលប្រយោជន៍របស់គេជាមួយប្រទេសជិតខាងដែលធំជាងខ្លួន។ បរិយាកាសសន្តិសុខអន្តរជាតិដែលមានស្ថិរភាពមានសារៈសំខាន់ណាស់សំរាប់ឧស្សាហកម្មនាំចេញ ដែលផ្តល់ការងារអោយមនុស្សជាច្រើននៅកម្ពុជា។ សន្តិសុខមានន័យថា នាវាអាចនាំទំនិញនាំចេញរបស់អ្នកទៅកាន់ទីផ្សា ហើយវាជាគ្រឹះនៃកំណើនសេដ្ឋកិច្ច ដែលបង្កើតអ្នកប្រើប្រាស់ក្នុងវណ្ណៈកណ្តាល នៅទូទាំងតំបន់។
ទស្សនកិច្ចរបស់លោកប្រធានាធិបតីក៏ជាការទទួលស្គាល់ផងដែរនៃភាពជឿនលឿនផ្នែកនយោបាយដែលប្រទេសរបស់អ្នកបានសំរេចបាន។ ដោយចាប់ផ្តើមនៅឆ្នាំ១៩៨៩ នៅពេលខ្ញុំបំរើការងារនៅក្នុងអង្គការសហប្រជាជាតិ ខ្ញុំបានធ្វើការដោយផ្ទាល់ទាក់ទងនឹងការចរចាលើកិច្ចព្រមព្រៀងសន្តិភាពក្រុងប៉ារីស ជាមួយនឹងលោក Dick Solomon និងលោក Ken Quinn ហើយបានជួយនៅក្នុងការរៀបចំអ៊ុនតាក់។ ក្នុងពេលដែលលោកនៅជាសមាជិកព្រឹទ្ធសភាអាមេរិក ប្រធានរបស់ខ្ញុំ គឺលោករដ្ឋមន្រ្តី Kerry បានជួយបង្កើត និងផ្តល់ថវិកាដល់តុលាការកាត់ទោសខ្មែរក្រហម ដោយបានចាប់ផ្តើមផ្លូវដ៏វែងទៅរកយុត្តិធម៌សំរាប់ជនរងគ្រោះ។ ក្នុងពេលដែលតុលាការស្វែងរកយុត្តិធម៌សំរាប់អំពើព្រៃផ្សៃកន្លងមក មេដឹកនាំបច្ចុប្បន្ននេះកំពុងធ្វើការដើម្បីកសាងអនាគតនៃប្រទេសកម្ពុជា។ ការបោះឆ្នោតនៅឆ្នាំ២០១៣ គឺជាព្រឹត្តិការណ៍ដ៏សំខាន់មួយ។ អ្នកបោះឆ្នោតនៅក្នុងប្រទេស ពិសេសយុវជន បានអំពាវនាវយ៉ាងច្បាស់អោយមានការកែទំរង់។ យើងបានតាមដានយ៉ាងជិតដិតនូវការធ្វើពហិការមិនចូលសភា និងការធ្វើបាតុកម្មនយោបាយ ដែលជាទូទៅមានលក្ខណៈសន្តិភាព របស់គណបក្សសង្គ្រោះជាតិកម្ពុជា។ វាបង្ហាញពីការតាំងចិត្តរបស់ប្រជាជនកម្ពុជា ក្នុងការបញ្ចេញអោយគេលឺ និងគោរពសំលេងរបស់គេ។ កិច្ចព្រមព្រៀងរវាងគណបក្សកាន់អំណាច និងគណបក្សប្រឆាំងគឺជាជំហានដំបូងយ៉ាងសំខាន់សំរាប់ធ្វើកំណែទំរង់។ ពេលនេះ យើងឃើញសភាធ្វើអោយរដ្ឋាភិបាលមានការទទួលខុសត្រូវចំពោះទង្វើរបស់ខ្លួន ដោយហៅរដ្ឋមន្រ្តីមកសួរ។ គណបក្សធំជាងគេទាំងពីរទទួលស្គាល់សារៈសំខាន់នៃការធ្វើតាមការអំពាវនាវរបស់ប្រជាជនដែលចង់បានកំណែទំរង់ប្រកបដោយអត្ថន័យ។ រឿងសំខាន់គឺមិនត្រូវបន្ធូរការខិតខំឡើយ នៅពេលនេះ! ភាគីទាំងពីរគួរផ្តោតការយកចិត្តទុកដាក់លើអាទិភាពនេះ។
ការដែលរដ្ឋាភិបាល និងគណបក្សប្រឆាំងធ្វើការជាមួយគ្នាមានសារៈសំខាន់ណាស់ សំរាប់ដោះស្រាយបញ្ហាបន្ទាន់ដែលប្រទេសកំពុងតែប្រឈមជាមួយ រាប់ពីអំពើពុករលួយដល់កង្វល់ពីសិទ្ធិមនុស្ស ដល់បញ្ហាកម្មករ និងការការពារបរិស្ថាន។ការសំរេចចិត្តក្នុងការបង្កើនប្រាក់ខែអប្បរិមា និងការអនុវត្តដោយជោគជ័យ និងដោយសន្តិភាពលើការសំរេចចិត្តនោះគឺជាសញ្ញាដ៏សំខាន់នៃភាពជឿនលឿនទៅមុខ។ សញ្ញាទាំងនេះត្រូវបានកត់សំគាល់នៅជុំវិញពិភពលោក ទាំងនៅក្នុងរដ្ឋធានី និងទីស្នាក់ការធំរបស់ក្រុមហ៊ុនធំៗ ហើយសកម្មភាពនេះនឹងជួយរក្សាកំណើនសេដ្ឋកិច្ចដ៏គួរអោយចាប់អារម្មណ៍របស់ប្រទេសកម្ពុជា។ យើងសូមស្វាគមន៍ដំណោះស្រាយនយោបាយកាលពីឆ្នាំទៅ និងជំហានទៅរកកំណែទំរង់ការបោះឆ្នោតប្រកបដោយអត្ថន័យ ដូចជាការចុះឈ្មោះអ្នកបោះឆ្នោតប្រកបដោយតំលាភាព និងការបង្កើតគណកម្មាធិការបោះឆ្នោតឯករាជ្យមួយ។
តែនៅមានបញ្ហាប្រឈមជាច្រើននៅឡើយ។ ខ្ញុំដឹងថា ប្រជាជនកម្ពុជាចង់បានកំណើនលូតលាស់ស្ថិតស្ថេរ និងទូលំទូលាយ ដែលបង្កើនប្រាក់ចំណូល។ ប្រជាជនកម្ពុជាចង់មានប្រព័ន្ធយុត្តិធម៌ដែលគេសមនឹងទទួលបាន គឺប្រព័ន្ធដែលមានយុត្តិធម៌ មិនលំអៀង និងត្រូវបានអនុវត្តដោយស្មើភាពគ្នា។ គេចង់អោយរដ្ឋាភិបាលធ្វើអោយបានច្រើនថែមទៀតក្នុងការប្រយុទ្ធនឹងអំពើពុករលួយ ហើយបង្កើនការគោរពសិទ្ធិមនុស្ស។ យើងសង្ឃឹមថា មេដឹកនាំកម្ពុជានឹងធ្វើការជាមួយគ្នាដើម្បីជំរុញការខិតខំ នៅក្នុងផ្នែកទាំងនេះ។ តែរដ្ឋាភិបាលគ្រាន់តែជាផ្នែកមួយតែប៉ុណ្ណោះ។ ប្រទេសកម្ពុជាមានហេតុផលល្អក្នុងការមានមោទនភាពចំពោះសង្គមស៊ីវិលដ៏រស់រវើករបស់ខ្លួន ដែលមានសមាជិកខិតខំធ្វើការដើម្បីធ្វើអោយប្រទេសកម្ពុជា និងពិភពលោករបស់យើងក្លាយជាកន្លែងល្អប្រសើរមួយ។
សង្គមស៊ីវិលមានសារៈសំខាន់ណាស់ ពីព្រោះវាផ្តល់ជាមធ្យោបាយយ៉ាងសំខាន់សំរាប់អោយប្រជាជនកម្ពុជាធ្វើការតស៊ូមតិ និងអនុវត្តការផ្លាស់ប្តូរដែលគេចង់បាន។ នៅពេលជនជាតិកម្ពុជាក្នុងគ្រប់និន្នាការនយោបាយទាំងអស់ដោះស្រាយជំលោះដោយសន្តិវិធី នោះប្រទេសរបស់អ្នកអាចក្លាយជាប្រទេសគំរូសំរាប់ប្រទេសដែលទើបនឹងរះឡើងថ្មីៗ។ ប្រទេសអាមេរិកដឹងថា ប្រជាជនកម្ពុជាចង់បានអ្វីៗដូចប្រជាជននៅជុំវិញពិភពលោកដែរ នោះគឺឱកាសទទួលបានការសិក្សា ឱកាសខំធ្វើការនិងសន្សំលុយ មានសន្តិសុខនៅក្នុងផ្ទះ និងនៅលើដីរបស់គេ ជាមួយគ្រួសារគេ។ ដោយមនុស្សចំនួន ៧០% នៅក្នុងប្រទេសស្ថិតក្នុងអាយុក្រោម ៣០ ឆ្នាំ យុវជនកម្ពុជាគឺជាគន្លឹះសំរាប់អនាគត។ យុវជនកម្ពុជាមានការទាក់ទងគ្នា មានការទាក់ទងគ្នាក្នុងតំបន់ និងក្នុងពិភពលោកច្រើនជាងមនុស្សជំនាន់មុន ដោយសារភាពបើកចំហរបស់ប្រទេស និងបច្ចេកទេសថ្មី។ ត្រង់នេះ យើងមើលឃើញតាមរយៈ Fan នៃ Facebook របស់ស្ថានទូតអាមេរិក ដែលមានចំនួនកើនដល់ ៣៨០ ០០០ នាក់នៅកម្ពុជា និងនៅមានច្រើននាក់ទៀតនៅជុំវិញពិភពលោកដែលបានចុច Like លើ Facebook នេះ។ ប្រទេសអាមេរិកជួយយុវជនកម្ពុជាតាមលក្ខណៈជាច្រើន ដូចជាតាមរយៈកម្មវិធីផ្លាស់ប្តូរក្នុងការសិក្សា កម្មវិធីវប្បធម៌ និងការបង្រៀនភាសាអង់គ្លេស។
កម្មវិធីថ្មីដ៏គួរអោយចាប់អារម្មណ៍របស់លោកប្រធានាធិបតី Obama ដែលមានឈ្មោះថា កម្មវិធីថ្មីនៃគំនិតផ្តួចផ្តើមស្តីពីមេដឹកនាំយុវជននៅអាស៊ីអាគ្នេយ៍ (YSEALI) មានការចូលរួមរបស់យុវជនមកពីប្រទេសជាសមាជិកអាស៊ានទាំង ១០។ យើងបានជួយអោយយុវជនកម្ពុជាចូលរួមក្នុងកម្មវិធី YSEALI ដែលលោកប្រធានាធិបតី Obama បានរៀបចំនៅប្រទេសម៉ាឡេស៊ី និងប្រទេសភូមា ហើយកម្មវិធី YSEALI មានភាពសកម្មក្នុងឆ្នាំទាំងមូល។យើងមានសេចក្តីរីករាយដោយយុវជនកម្ពុជាប្រមាណ ១៨០០ នាក់បានចូលរួមក្នុងកម្មវិធី YSEALI ។ នៅឆ្នាំនេះ ស្ថានទូតអាមេរិកនៅភ្នំពេញនឹងរៀបចំសិក្ខាសាលា YSEALI ថ្នាក់តំបន់ជាលើកដំបូងមួយ ដោយផ្តោតលើការតស៊ូមតិផ្នែកបរិស្ថាន ការទទួលខុសត្រូវ និងការងារជាក្រុម។ សិក្ខាសាលានេះនឹងមានការចូលរួមរបស់មេដឹកនាំយុវជនចំនួន ៧០ នាក់ ដែលមកពីទូទាំងសមាគមអាស៊ាន នៅខែមេសា ដោយមានការផ្តោតពិសេសលើវិធីដែលសមាជិកអាចជួយបានក្នុងការប្រយុទ្ធប្រឆាំងនឹងការប្រែប្រួលអាកាសធាតុ។ នេះជាប្រធានបទមួយបន្ទាន់ និងសំខាន់សំរាប់អនាគតនៃប្រទេសកម្ពុជា និងនៃសមាគមអាស៊ាន។ កម្មវិធី YSEALI នឹងមានសកម្មភាពច្រើនទៀត។
យើងថែមទាំងជួយអោយនិស្សិតកម្ពុជាសិក្សានៅតាមមហាវិទ្យាល័យ និងសាកលវិទ្យាល័យក្នុងសហរដ្ឋអាមេរិក។ កាលពីឆ្នាំទៅ ចំនួននិស្សិតកម្ពុជាដែលសិក្សានៅសហរដ្ឋអាមេរិកមានចំនួនប្រហែល ៤០០ នាក់។ យើងចង់បង្កើនចំនួននេះអោយឡើងទ្វេដង។ ដើម្បីសំរេចគោលដៅនេះបានត្រឹមឆ្នាំ២០២០ យើងកំពុងធ្វើការចំណាយលើការបង្រៀនភាសាអង់គ្លេស និងការណែនាំលើការសិក្សា ដែលនឹងធ្វើអោយយុវជនអាចធ្វើការប្រកួតប្រជែងបាន ហើយត្រៀមទទួលជោគជ័យ។ នៅពេលគេរៀនចប់ យើងចង់អោយគេវិលត្រឡប់មកវិញ ដើម្បីប្រើជំនាញថ្មីៗរបស់គេ នៅក្នុងសហគមន៍របស់គេ នៅទូទាំងប្រទេសកម្ពុជាដ៏ល្អ។ ការជួយយុវជនដោយពង្រីកឱកាសក្នុងការទទួលបានការសិក្សា និងឱកាសក្នុងមុខរបរបំរើផលប្រយោជន៍នៃប្រទេសអាមេរិកនៅក្នុងការជួយប្រជាជនកម្ពុជាអោយនាំប្រទេសរបស់គេអោយក្លាយជាប្រទេសប្រកាន់លទ្ធិប្រជាធិបតេយ្យស្ថិតស្ថេរមួយ ដែលមានរដ្ឋាភិបាលប្រកបដោយការទទួលខុសត្រូវ ដែលគោរពសិទ្ធិមនុស្ស ហើយលើកទឹកចិត្តអោយមានការចូលរួមរបស់ពលរដ្ឋ។ ខ្ញុំចង់ស្តាប់ពីគំនិតរបស់លោកអ្នកស្តីពីវិធីដែលយើងអាចធ្វើបានថែមទៀត ដើម្បីសំរេចគោលដៅនេះ ហើយរីករាយនឹងពិភាក្សាជាមួយលោកអ្នក។ សូមអរគុណ។
