ថ្ងៃទី៣០ ខែតុលា ឆ្នាំ២០១៦
សូមជំរាបសួ និងសូមអរគុណដែលបានមកចូលរួមនៅក្នុងពិព័រណ៍របស់យើងស្តីពីការសិក្សានៅសហរដ្ឋអាមេរិក និងសិស្សប្រលងជាប់បាននិទ្ទេស A ។ ខ្ញុំសូមអរគុណចំពោះក្រសួងអប់រំ យុវជន និងកីឡា ឯកឧត្តម បណ្ឌិត ហង់ ជួនណារុន តំណាងរបស់លោក ឯកឧត្តមអនុរដ្ឋលេខាធិការ ឡាវ ឈីវអៀវ ចំពោះការប្តេជ្ញាចិត្តក្នុងការកែលំអការសិក្សាអប់រំនៅកម្ពុជា។
ជាបឋម ខ្ញុំសូមកោតសរសើរសិស្សទាំងអស់ដែលប្រលងបាននិទ្ទេស A។ យើងដឹងថា វាមិនមែនជាការងាយស្រួលទេ ហើយវាទាមទារការយកចិត្តទុកដាក់ ការខំរៀន និងការលះបង់ច្រើន។ គ្រួសារ សាលារៀន និងសហគមន៍របស់អ្នកគួរតែមានមោទនភាពខ្ពស់។
អ្នកគឺជាសិស្សដែលមានប្រាជ្ញា ហើយអ្នកនឹងមានឱកាសច្រើន ក្នុងពេលដែលអ្នកបន្តការសិក្សារបស់អ្នក រួមទាំងការបានទៅសិក្សានៅបរទេស បើអ្នកចង់។ ហេតុផលដែលខ្ញុំអញ្ជើញអ្នកមក នៅថ្ងៃនេះ គឺដើម្បីអោយអ្នកដឹងថា សហរដ្ឋអាមេរិកកំពុងសំលឹងរកសិស្ស ដូចជាអ្នក អោយទៅសិក្សានៅក្នុងមហាវិទ្យាល័យ និងសាកលវិទ្យា ល័យរបស់យើង។
សហរដ្ឋអាមេរិកមានប្រព័ន្ធឧត្តមសិក្សាល្អជាងគេបំផុត ក្នុងពិភពលោក ដោយមានសាលាចំនួនជាង ៥០០០ ដែលមានកម្មវិធីសិក្សាគ្រប់មុខវិជ្ជាទាំងអស់។ ខ្ញុំដឹងថា សហរដ្ឋអាមេរិកស្ថិតនៅឆ្ងាយណាស់ ហើយការជ្រើសរើសសាលាដែលត្រូវ អាចជាការពិបាក។ ខ្ញុំដឹងផងដែរថា មានខ្លះក្នុងចំណោមអ្នកមានការបារម្ភលើការបង់ថ្លៃសិក្សា ឬបារម្ភលើការសុំទិដ្ឋាការ។
ខ្ញុំចង់អោយអ្នកដឹងថា មានកន្លែងផ្តល់ព័ត៌មានសំរាប់ជួយអ្នក រាប់ពីមជ្ឈមណ្ឌលផ្តល់ប្រឹក្សាស្តីពីការសិក្សានៅសហរដ្ឋអាមេរិក (EducationUSA) ដែលផ្តល់ប្រឹក្សាដោយមិនគិតថ្លៃដល់សិស្សដែលចង់ទៅសិក្សានៅសហរដ្ឋអាមេរិក។ មានសិស្ស និស្សិតកម្ពុជា ដូចអ្នកចំនួនរាប់ពាន់នាក់ ដែលបានសិក្សានៅក្នុងសហរដ្ឋអាមេរិក ហើយបានវិលត្រឡប់មកមាតុភូមិវិញ។ ពួកគេជាច្រើនមានវត្តមានជាមួយយើង នៅថ្ងៃនេះ។ វិធីដ៏ល្អបំផុតក្នុងការរៀនសូត្រគឺការសួរ ដូច្នេះសូមកុំអៀន។ បើអ្នកមិនទាន់ក្លាយជាសមាជិកទេ សូមចុះឈ្មោះតាមអ៊ិនធ័រណែត ឬនៅក្នុងពិព័រណ៍នេះ ដើម្បីចូលរួមនៅក្នុងបណ្តាញនៃគំរោងគំនិតផ្តួចផ្តើមស្តីពីមេដឹកនាំវ័យក្មេងនៅអាស៊ីអាគ្នេយ៍ (YSEALI) របស់លោកប្រធានាធិបតី Obama ។ នៅទីនេះ មានធនធានព័ត៌មានជាច្រើនដែលផ្តល់ជាគំនិត និងប្រាប់ពីវិធីសំរាប់បន្តការសិក្សារបស់អ្នក។
អ្នកទាំងអស់គឺជាសិស្សនិទ្ទេស A ដូច្នេះ អ្នកពិតជាឆ្លាត។ ការមានភាពវ័យឆ្លាតមានសារៈសំខាន់ តែការមានតែប៉ុណ្ណឹងគឺមិនគ្រប់គ្រាន់ទេ។ អ្នកត្រូវមានជំនឿលើខ្លួនឯង។ នៅឆ្នាំនេះ មានសិស្ស និស្សិតកម្ពុជាចំនួនជាង ៥០០ នាក់កំពុងសិក្សានៅក្នុងសហរដ្ឋអាមេរិក។ ខ្ញុំសូមសន្យានឹងអ្នកថា អ្វីៗអាចទៅរួច។ អ្នកអាចជាអ្នកបន្ទាប់ បើអ្នកបន្តខិតខំរៀនសូត្រ ហើយមានជំនឿលើសមត្ថភាពខ្លួនឯង។ ក្នុងពេលអ្នកខិតខំដើម្បីសំរេចបានតាមការស្រម៉ៃចង់បានរបស់អ្នក អ្នកទាំងអស់គ្នាមានការទទួលខុសត្រូវក្នុងការជួយអភិវឌ្ឍ និងធ្វើអោយប្រទេសកម្ពុជាមានភាព សំបូរសប្បាយ។ ស្ថានទូតអាមេរិកមានមោទនភាពចំពោះអ្នកទាំងអស់គ្នា ហើយសូមជូនពរអោយអ្នកទទួលបានជោគជ័យជាច្រើន។
