ថ្ងៃទី១ ខែកក្កដា ឆ្នាំ២០១៦
សូមជំរាបសួ ឯកឧត្តម ប្រាក់ សុខុន ទេសរដ្ឋមន្រ្តី និងជារដ្ឋមន្រ្តីក្រសួងការបរទេស និងសហប្រតិបត្តិការអន្តរជាតិ តំណាងកិត្តិយសដទៃទៀតនៃរាជរដ្ឋាភិបាលកម្ពុជា សមាជិកអង្គទូតដទៃទៀត អស់លោក លោកស្រី។
ខ្ញុំសូមអរគុណច្រើនចំពោះការអញ្ជើញមកចូលរួមជាមួយយើង នៅយប់នេះ នៅក្នុងពិធីអបអរខួបលើកទី២៤០ នៃការចាប់កំណើតរបស់សហរដ្ឋអាមេរិក។
សុទ្ធីហើយនិងខ្ញុំសប្បាយរីករាយណាស់ដោយបានស្ថិតនៅក្នុងចំណោមមិត្តភក្តិជាច្រើន នៅយប់នេះ ក្នុងរាជធានីភ្នំពេញ។ ចាប់តាំងពីយើងត្រឡប់មកប្រទេសកម្ពុជាវិញ យើងបានជួបជាមួយមនុស្សដែលធ្វើអោយយើងចង់យកគំរូតាម នៅទូទាំងប្រទេសកម្ពុជា ដែលកំពុងប្រកបមុខជំនួញជាមួយប្រទេសអាមេរិក ធ្វើជាដៃគូជាមួយយើងនៅក្នុងកម្មវិធីផ្តល់ជំនួយ ជួយកសាងសង្គមស៊ីវិលអោយរឹងមាំ។ មនុស្សដ៏អស្ចារ្យទាំងនេះតំណាងអ្វីដែលល្អបំផុត ដែលប្រទេសកម្ពុជា និងសហរដ្ឋអាមេរិកអាចសំរេចបាន នៅពេលយើងធ្វើការជាមួយគ្នា។
គ្រប់គ្រាន់ហើយ។ ជាបន្តទៅទៀត ជាភាសាអង់គ្លេស។
ឧទាហរណ៍ សយ ពិសី មកពីខេត្តរតនៈគីរី ស្ទើរតែមិនចេះភាសាអង់គ្លេសសោះ រហូតដល់នាងសិក្សាចប់ក្នុងកម្មវិធីអាហារូបករណ៍ខ្នាតតូចផ្នែកភាសាអង់គ្លេស ដែលមានរយៈពេល ២ ឆ្នាំ របស់ស្ថានទូតអាមេរិក។ តាំងពីពេលនោះមក នាងបានទទួលជោគជ័យជាលំដាប់។ នៅរដូវស្លឹកឈើជ្រុះនេះ ពិសីនឹងចូលរៀននៅក្នុងសាកលវិទ្យាល័យ North Carolina ដើម្បីក្លាយជាគ្រូបង្រៀនភាសាអង់គ្លេសម្នាក់។ នាងគឺជាមនុស្សដំបូងគេដែលមកពីកុលសម្ព័ន្ធជនជាតិព្រៅ ដែលនឹងបានទៅសិក្សាក្នុងសហរដ្ឋអាមេរិក។ នាងនឹងចូលរួមជាមួយនិស្សិតខ្មែរចំនួន ៥០០ នាក់ទៀត ដែលកំពុងសិក្សានៅក្នុងសាលាក្នុងសហរដ្ឋអាមេរិក។
តាំង លី គឺជាកសិករម្នាក់នៅជនបទ ក្នុងខេត្តសៀមរាប។ ដោយមានការជួយពីកម្មវិធីសនិ្តសុខស្បៀងសំរាប់អនាគត (Feed the Future program) របស់រដ្ឋាភិបាលសហរដ្ឋអាមេរិក លីបានក្លាយជាកសិករគំរូ និងជាអ្នកផ្គត់ផ្គង់សំខាន់នៃអាហារសំរាប់សាលារៀន នៅក្នុងស្រុករបស់គាត់។ បន្លែរបស់លីមានន័យថា សិស្សនៅក្នុងសហគមន៍របស់គាត់ទទួលបានអាហារប្រកបដោយជីវជាតិ រាល់ថ្ងៃ សំរាប់ជួយពួកគេក្នុងការខិតខំរៀនសូត្រ។
យើងមានមោទនភាពចំពោះហេង សំណាង ដែលបានធំដឹងក្តីនៅក្នុងគ្រួសារអ្នកធ្វើស្រែក្រីក្រមួយ នៅខេត្តព្រះវិហារ។ សំណាងបានជិះកង់លើចំងាយផ្លូវប្រវែង ១៨ គម ទៅរៀននៅសាកលវិទ្យាល័យ ដោយបានទទួលពិន្ទុខ្ពស់ជាងគេ។ កាលពីឆ្នាំទៅ សំណាងត្រូវបានទទួលអោយចូលរៀនក្នុងបណ្ឌិតសភាកងទ័ពជើងទឹកសហរដ្ឋអាមេរិក នៅទីក្រុង Annapolis ក្នុងរដ្ឋ Maryland ដែលជាសាកលវិទ្យាល័យមួយក្នុងចំណោមសាកលវិទ្យាល័យដែលមានការប្រកួតប្រជែងខ្លាំងជាងគេបំផុតរបស់សហរដ្ឋអាមេរិក។ គាត់គឺជាជនជាតិខ្មែរទី៧ ហើយដែលបានចូលរៀននៅក្នុងបណ្ឌិតសភាយោធារបស់សហរដ្ឋអាមេរិក ហើយជានិមិត្តរូបនៃទំនាក់ទំនងកាន់តែរីកធំឡើង រវាងយោធានៃសហរដ្ឋអាមេរិក និងយោធានៃប្រទេសកម្ពុជា។
ក្មេងប្រុសម្នាក់ដែលមានឈ្មោះថា ពិសី បានកើតនៅខេត្តព្រៃវែង នៅឆ្នាំ១៩៩៩ ហើយបានកំព្រាតាំងពីនៅជាទារក។ គាត់ត្រូវបានបុរសជនជាតិអាមេរិកម្នាក់យកទៅចិញ្ចឹមជាកូន នៅពេលគាត់មានអាយុ ២ ឆ្នាំ ហើយបានធំឡើងនៅក្នុងសហរដ្ឋអាមេរិក ដោយមានឈ្មោះថ្មី គឺឈ្មោះ Jordan Windle ។ Jordan មានទេពកោសល្យពីធម្មជាតិដ៏អស្ចារ្យ តាំងពីតូចមក ហើយដោយមានការខិតខំ បានក្លាយជាកីឡាករលោតទឹកលំដាប់ពិភពលោក។ កាលពីខែឧសភា Jordan និងឳពុកបានវិលត្រឡប់មកប្រទេសកម្ពុជាជាលើកដំបូង ដើម្បីលើកទឹកចិត្តអោយយុវជនវ័យក្មេងកម្ពុជាខិតខំសំរេចការស្រម៉ៃចង់បានរបស់គេ។ Jordan គ្រោងនឹងប្រឡប់មកវិញច្រើនដងទៀត ហើយប្រហែលនៅថ្ងៃណាមួយ នឹងចូលរួមក្នុងការប្រកួតតំណាងអោយប្រទេសកំណើតរបស់គាត់។
ចុងក្រោយ មានរឿងមួយស្តីពីកុមារីម្នាក់នៅខេត្តពោធិសាត់ ដែលមិនខុសពីប្រជាជនកម្ពុជាដទៃជាច្រើនទៀតដែរ មានជីវិតមួយដែលមានការក្រឡាប់ចាក់ដោយសារពួកខ្មែរក្រហម។ បន្ទាប់ពីទៅតាំងទីលំនៅជាមួយបងស្រីរបស់ខ្លួននៅក្នុងសហរដ្ឋអាមេរិក នាងបានទទួលសញ្ញាប័ត្របរិញ្ញា និងសញ្ញាប័ត្រអនុបណ្ឌិតពីសាលាដ៏ល្បីបំផុត បានចាប់ផ្តើមអាជីពមួយ ហើយនៅទីបំផុត បានវិលត្រឡប់មកប្រទេសកម្ពុជាវិញ នៅទសវត្សឆ្នាំ១៩៩០។ គឺនៅពេលនោះហើយដែលខ្ញុំបានជួបគាត់។ ខ្ញុំកំពុងនិយាយពីភរិយាដ៏ស្រស់ស្អាតរបស់ខ្ញុំ ឈ្មោះ សុទ្ធី ដែលស្ថិតនៅក្នុងចំណោមជនជាតិអាមេរិកមានដើមកំណើតខ្មែររាប់ម៉ឺននាក់ ដែលកំពុងធ្វើជាស្ពានរវាងប្រទេសយើងទាំងពីរ ហើយកំពុងជួយអភិវឌ្ឍមាតុភូមិរបស់គេ។
លោករដ្ឋមន្រ្តី រឿងដ៏គួរអោយកត់សំគាល់ទាំងនេះគឺជានិមិត្តរូបដែលបង្ហាញច្បាស់ជាងកម្មវិធីណាទាំងអស់របស់រដ្ឋាភិបាល នូវមូលដ្ឋានរឹងមាំនៃទំនាក់ទំនងរវាងសហរដ្ឋអាមេរិក និងប្រទេសកម្ពុជា។ ទំនាក់ទំនងរបស់យើងឈរនៅលើមូលដ្ឋាននៃការគោរពវប្បធម៌ និងប្រវត្តិសាស្រ្តរបស់គ្នាទៅវិញទៅមក ហើយនិងឈរលើមូលដ្ឋាននៃគុណតំលៃរួម ដែលមានចែងនៅក្នុងរដ្ឋធម្មនុញ្ញនៃប្រទេសយើងទាំងពីរ។
ទំនាក់ទំនងនេះឈរនៅលើមូលដ្ឋាននៃការងារយូរអង្វែង ក្នុងការកសាងលទ្ធិប្រជាធិបតេយ្យរឹងមាំ និងការគោរពយ៉ាងជ្រាលជ្រៅចំពោះសិទ្ធិមនុស្ស ទាំងនៅក្នុងប្រទេសកម្ពុជាទាំងនៅក្នុងសហរដ្ឋអាមេរិក។ សំខាន់ជាងអ្វីទាំងអស់ ទំនាក់ទំនងនេះឆ្លុះបញ្ចាំងអោយឃើញនូវការមានចំណងទាក់ទងគ្នាយ៉ាងជ្រាលជ្រៅ រវាងប្រជាជនរបស់យើង និងក្តីសង្ឃឹមដូចគ្នារបស់កុមារកម្ពុជា និងកុមារអាមេរិកថា ពួកគេនឹងមានអនាគតមួយភ្លឺស្វាងជាមួយគ្នា។
ដូច្នេះ នៅខួបទី២៤០ នេះនៃការចុះហត្ថលេខា លើសេចក្តីប្រកាសឯករាជ្យសហរដ្ឋអាមេរិក ខ្ញុំសូមអញ្ជើញឯកឧត្តម និងភ្ញៀវកិត្តិយសទាំងអស់ចូលរួមលើកកែវស្រាប្រសិទ្ធិពរជាមួយខ្ញុំ។
ដើម្បីព្រះសុខភាពរបស់ព្រះករុណាជីវិតតំកល់លើត្បូង ព្រះបាទនរោត្តម សីហមុនី សម្តេចព្រះមហាក្សត្រី ព្រះវររាជមាតាជាតិខ្មែរ នរោត្តម មុនីនាថ សីហនុ លោកប្រធានាធិបតី Barack Obama និងដើម្បីចំណងមិត្តភាពយូរអង្វែង រវាងសហរដ្ឋអាមេរិក និងប្រទេសកម្ពុជា។
