ថ្ងៃទី៨ ខែឧសភា ឆ្នាំ២០១៦
សូមក្រាបថ្វាយបង្គំ ព្រះករុណាជាអម្ចាស់ជីវិតតំកល់លើត្បូង ព្រះបាទ សម្តេច ព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុត។
សូមក្រាបថ្វាយបង្គំ សម្តេច ព្រះមហាក្សត្រី ព្រះវររាជមាតាជាតិខ្មែរ នរោត្តម មុនីនាថ សីហនុ ក្នុងសេរីភាព សេចក្តីថ្លៃថ្នូរ និងសុភមង្គល ជាទីគោរពសក្ការៈដ៏ខ្ពង់ខ្ពស់បំផុត។
សូមគោរព សម្តេច ព្រះអង្គម្ចាស់ ព្រះអង្គម្ចាស់ក្សត្រី ទ្រង់ ឯកឧត្តម លោកជំទាវ លោក លោកស្រី ជាភ្ញៀវកិត្តិយសទាំងអស់ ដែលបានយាង និងអញ្ជើញចូលរួមជាទីមេត្រី។
ទូលបង្គំខ្ញុំបាទ និងសុទ្ធីជាភរិយាទូលបង្គំ ពិតជាមានកិត្តិយសជាអនេកបការ ដោយមានវត្តមាននារាត្រីនេះ ក្រោមព្រះរាជអធិបតីភាពដ៏ខ្ពង់ខ្ពង់បំផុតរបស់ព្រះករុណាជាអម្ចាស់ជីវិតតំកល់លើត្បូង ព្រះបាទ សម្តេច ព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា និងសម្តេច ព្រះមហាក្សត្រី ព្រះវររាជមាតាជាតិខ្មែរ នរោត្តម មុនីនាថ សីហនុ
ថ្ងៃស្អែកគឺជាខួបលើកទី៦០ឆ្នាំ នៃការដែលក្រុមតន្រ្តីរបស់កងទ័ពអាកាសសហរដ្ឋអាមេរិក បានមកប្រគំនៅ រាជធានីភ្នំពេញ ថ្វាយជូនដល់ អតីតព្រះមហាក្សត្រ ព្រះបាទ សម្តេច ព្រះ រោត្តម សុរាម្រិត និង សម្តេច ព្រះមហាក្សត្រិយានី ស៊ីសុវត្ថិ មុនីវង្ស កុសុមៈ នារីរតន៍ សិរីវឌ្ឍនា។ របាយការណ៍ក្នុងសារព័ត៌មានពីពេលនោះបង្ហាញថា ពិធីនោះគឺពិតជាពិធីដ៏អស្ចារ្យ។
ពិធីនៅរាត្រីនោះ បានចាប់ផ្តើមដោយភោជនីយហារជាមួយស្រាសំប៉ាញ ដែលរៀបចំដោយ ឯកឧត្តម រដ្ឋមន្រ្តីក្រសួងការបរទេសកម្ពុជា ជាមួយសមាជិកអង្គទូត។ បន្ទាប់ពីកម្មវិធីពិសារភោជនីយហាររួច ក្រុមតន្រ្តីបានប្រគំនៅខាងក្រៅ នៅមុខព្រះបរមរាជវាំង ថ្វាយព្រះមហាក្សត្រ ព្រះករុណាជាអម្ចាស់ជីវិតតំកល់លើត្បូង និង សម្តេច ព្រះមហាក្សត្រិយានី និងជូនដល់ប្រជារាស្រ្តខ្មែររាប់ពាន់នាក់ ដោយមានជាច្រើននាក់ទៀតស្តាប់តាមវិទ្យុ។
បន្ទាប់ពីក្រុមតន្រ្តីប្រគំចប់ ព្រះករុណាជាអម្ចាស់ជីវិតតំកល់លើត្បូងបានត្រាស់បង្គាប់ឲក្រុមសិល្បៈខ្មែរសំដែងជូនសមាជិកក្រុមតន្រ្តីសហរដ្ឋអាមេរិក។ ការសំដែងនោះបន្តរហូតដល់ម៉ោង ១១ យប់។
មានឱកាសរីករាយបែបនេះជាច្រើនដែលបានកើតឡើងក្នុងបណ្តាឆ្នាំកន្លងទៅ តែឱកាសភាគច្រើនមិនត្រូវបានគេចងចាំទេ។ យ៉ាងណាមិញឱកាសមួយនេះមិនត្រូវបានគេភ្លេចទេ ដោយសារតែមានមិត្តរបស់ទូលបង្គំយើងខ្ញុំម្នាក់ គឺលោក Anton Isselhardt ដែលធ្វើការនៅមូលនិធិ ArtPlus Foundation។
លោក Anton បានរកឃើញព្រឹត្តិប័ត្រដែលកប់នៅតាំងពីខែកក្កដា ឆ្នាំ១៩៥៦ មក ។ ព្រឹត្តិប័ត្រនោះនិយាយថា សមាជិកមួយចំនួននៃក្រុមតន្រ្តីកងទ័ពអាកាសសហរដ្ឋអាមេរិកត្រូវបានផ្តល់កិត្តិយសអោយ នៅក្នុងពិធីមួយក្នុងក្រសួងការបរទេសសហរដ្ឋអាមេរិក នៅចំពោះមុខឯកឧត្តម នង គិមនី ឯកអគ្គរាជទូតកម្ពុជាប្រចាំនៅសហរដ្ឋអាមេរិក។
ជាមួយនឹងភស្តុតាងដ៏តូចនេះ ទូលបង្គំយើងខ្ញុំបានចាប់ផើ្តមស្រាវជ្រាវព្រឹត្តិការណ៍និងឯកសារនានាដែលពាក់ព័ន្ធនឹងការប្រគំតន្រ្តីនៅឆ្នាំ១៩៥៦។
ទូលបង្គំយើងខ្ញុំស្វែងយល់បានច្រើនកាលណា ទូលបង្គំយើងខ្ញុំរឹតតែចង់បង្កើតឡើងវិញនូវភាពអស្ចារ្យដែលបានកើតឡើង នៅរាត្រីនោះក្នុងឆ្នាំ១៩៥៦ ច្រើនកាលនោះ។
ទូលបង្គំយើងខ្ញុំបានទាក់ទងជាមួយក្រុមតន្រ្តីកងទ័ពអាកាសសហរដ្ឋអាមេរិកដដែលនេះ ដែលបានមកប្រគំតន្រ្តីនៅព្រះរាជាណាចក្រកម្ពុជាកាលពី ៦០ ឆ្នាំមុន។
រាត្រីនេះទូលបង្គំយើងខ្ញុំមានសេចក្តីរីករាយបំផុតសូមស្វាគមន៍សមាជិក ៤ រូបនៃក្រុមតន្រ្តីលេងឧបករណ៍ខ្សែរបស់កងទ័ពអាកាសសហរដ្ឋអាមេរិក មកពីទីក្រុងវ៉ាស៊ីតោននៃសហរដ្ឋអាមេរិកដែលនឹងចូលរួមប្រគំរួមគ្នាជាមួយនឹងសិល្បករកិត្តិយសផ្សេងៗទៀត។
នារាត្រីនេះ យើងនឹងបានលឺបទចំនួនពីរដែលត្រូវបានលេងជាលើកដំបូងបង្អស់ នៅក្នុងពិធីប្រគំតន្រ្តី កាលពីខែឧសភា ឆ្នាំ១៩៥៦ នោះ។ បទទាំងពីរនេះស្ថិតនៅដក់ជាប់ក្នុងបេះដូងនៃប្រជាជននៃព្រះរាជាណាចក្រកម្ពុជា ពីព្រោះបទទាំងពីរនេះគឺជាព្រះរាជនិពន្ធរបស់ ព្រះករុណា ព្រះមហាវីរក្សត្រ ព្រះបរមរតនកោដ្ឋ នរោត្តម សីហនុ ដែលមានចំណងជើងថា “កម្ពុជា” និង “សក្រវាទិ៍”។
យើងនឹងបានលឺផងដែរនូវបទជ្រើសរើសខ្លះរបស់អ្នកនិពន្ធអាមេរិក និងអ្នកនិពន្ធអឺរ៉ុបល្បីៗ។
ទូលបង្គំខ្ញុំបាទសង្ឃឹមថា ការប្រគំតន្រ្តីនៅរាត្រីនេះគឺជាការរំលឹកមួយដល់ចំណងមិត្តភាព រវាងប្រជាជនសហរដ្ឋអាមេរិក និងប្រជាជននៃព្រះរាជាណាចក្រកម្ពុជា ដែលមានជាច្រើនទសវត្សមកហើយ ហើយដែលពេលនេះ មានភាពរឹងមាំជាងពេលណាទាំងអស់។
មុននឹងទូលបង្គំខ្ញុំបាទបញ្ចប់នូវការថ្លែងសុន្ទករថា ទូលបង្គំខ្ញុំបាទសូមសំដែងការស្វាគមន៍ជាពិសេសដល់លោក ឧត្តមសេនីយទោ Gary Sayler នៃកងទ័ពអាកាសសហរដ្ឋអាមេរិក ឧត្តមសេនីយនៃឆ្មាំជាតិរដ្ឋ Idaho និង សហការីរបស់លោក។ ទូលបង្គំខ្ញុំមានសេចក្តីរីករាយដោយលោកអាចប្តូរថ្ងៃធ្វើដំណើររបស់លោក ដើម្បីអាចមក ចូលរួមជាមួយទូលបង្គំយើងខ្ញុំ នៅក្នុងឱកាសដ៏ពិសេសនេះ ដែលមានការសំដែងរបស់ក្រុមតន្រ្តីកងទ័ពអាកាសសហរដ្ឋអាមេរិក។
ទូលបង្គំខ្ញុំបាទសូមថ្លែងអំណរគុណផងដែរដល់ក្រុមតន្រ្តីកររបស់យើងខ្ញុំ ដៃគូរសហការរៀបចំរបស់យើងខ្ញុំ និងមិត្តភក្តិរបស់យើងខ្ញុំក្នុងសណ្ឋាគារ Raffles Hotel ។
ទូលបង្គំខ្ញុំបាទសូមអរព្រះគុណនិងសូមអរគុណជាពិសេសដល់ ព្រះអង្គម្ចាស់ ព្រះអង្គម្ចាស់ក្សត្រី ឯកឧត្តម លោកជំទាវ លោក លោកស្រី ជាភ្ញៀវកិត្តិយសទាំងអស់ ដែលបានជួយធ្វើអោយរាត្រីនេះជារាត្រីដែលគួរអោយចងចាំ។
សូមអរព្រះគុណ និងសូមអរគុណច្រើន។
