សូមជំរាបសួសម្តេច ក្រឡាហោម ស ខេង ឧបនាយករដ្ឋមន្រ្តី និងជារដ្ឋមន្រ្តីក្រសួងមហាផ្ទៃ ឯកឧត្តមបណ្ឌិត ហង់ ជួនណារុន រដ្ឋមន្រ្តីក្រសួងអប់រំ យុវជន និងកីឡា លោកជំទាវបណ្ឌិត អ៊ឹង គន្ធាផាវី រដ្ឋមន្រ្តីក្រសួងកិច្ចការនារី លោកជំទាវ ជូ ប៊ុនអេង អនុប្រធានអចិន្រ្តៃនៃគណកម្មាធិការជាតិប្រយុទ្ធប្រឆាំងការជួញដូរ ភ្ញៀវកិត្តិយស អស់លោក លោកស្រី ខ្ញុំមានសេចក្តីរីករាយ ដោយមានវត្តមាននៅព្រឹកនេះ នៅក្នុងអង្គប្រជុំប្រចាំឆ្នាំរបស់គណកម្មាធិការជាតិប្រយុទ្ធប្រឆាំងនឹងការជួញដូរ ដែលហៅកាត់ថា NCCT ។ ស្របជាមួយនឹងទិវាជាតិប្រឆាំងការជួញដូរមនុស្ស កិច្ចប្រជុំនេះស្ថិតក្នុងចំណោមព្រឹត្តិការណ៍ដ៏មានសារៈសំខាន់បំផុតនៅឆ្នាំនេះ ក្នុងការខិតខំប្រយុទ្ធប្រឆាំងនឹងការជួញដូរមនុស្សរបស់ប្រទេសកម្ពុជា។ វាផ្តល់អោយរដ្ឋាភិបាលនូវឱកាសមួយក្នុងការផ្សព្វផ្សាយផែនការប្រឆាំងការជួញដូររបស់ខ្លួន និងសកម្មភាពផ្តួចផ្តើមសំរាប់ឆ្នាំខាងមុខ ហើយផ្តល់អោយដៃគូអន្តរជាតិរបស់កម្ពុជានូវព័ត៌មានដែលគេត្រូវការ ដើម្បីធ្វើការជួយ។ ខ្ញុំមានការចាប់អារម្មណ៍យ៉ាងខ្លាំងចំពោះរបាយការណ៍លំអិតដែលយើងបានលឺនៅព្រឹកនេះ ហើយនិងការប្តេជ្ញាចិត្តយ៉ាងម៉ឺងម៉ាត់របស់ក្រសួងនានា ក្នុងការប្រឆាំងនឹងការជួញដូរមនុស្ស។
យើងយកចិត្តទុកដាក់ចំពោះការជួញដូរមនុស្ស ពីព្រោះវាប៉ះពាល់មិនត្រឹមតែចំពោះបុគ្គលនិងគ្រួសាររបស់គេតែប៉ុណ្ណោះទេ តែវាថែមទាំងប៉ះពាល់ដល់សហគមន៍ និងប្រទេសទាំងមូលថែមទៀតផង។ យើងវាយតំលៃខ្ពស់ចំពោះការងារដ៏ប្រពៃរបស់ NCCT ដែលមានសម្តេច ស ខេងជាប្រធាន និងត្រូវបានដឹកនាំដោយលោកជំទាវ ជូ ប៊ុនអេង។ តាមរយៈបទពិសោធន៍នៅជុំវិញពិភពលោក យើងដឹងថា ការសំរបសំរួលគ្នារឹងមាំក្នុងចំណោមរដ្ឋាភិបាល សង្គមស៊ីវិល និងវិស័យឯកជនមានសារៈសំខាន់ចាំបាច់សំរាប់លុបបំបាត់ការជួញដូរមនុស្ស។ NCCT បានផ្តល់ការដឹកនាំ និងការសំរបសំរួលចាំបាច់សំរាប់ឈានទៅទទួលបានភាពជឿនលឿនក្នុងការប្រឆាំងនឹងការជួញដូរមនុស្ស។
នៅពេលខ្ញុំបានរស់នៅក្នុងរាជធានីភ្នំពេញលើកដំបូង នៅចុងទសវត្សទី ១៩៩០ ការជួញដូរផ្លូវភេទនៅកម្ពុជាមានច្រើន ជាពិសេសលើអនីតិជន។ នេះគឺជាបញ្ហាសង្គមដ៏លំបាកមួយ ហើយប៉ះពាល់យ៉ាងខ្លាំងដល់កេរ្តិ៍ឈ្មោះរបស់ប្រទេសកម្ពុជា នៅលើឆាកអន្តរជាតិ។ តែដោយមានការខិតខំរបស់រដ្ឋាភិបាល នគរបាល សង្គមស៊ីវិល ព្រមទាំងដោយមានជំនួយពីដៃគូអន្តរជាតិ ប្រទេសកម្ពុជាបានកែប្រែស្ថានភាពនេះឡើងវិញ។
តាមពិតទៅ ការសិក្សាមួយក្នុងពេលថ្មីៗនេះរបស់អង្គការបេសកកម្មយុត្តិធម៌អន្តរជាតិ (International Justice Mission) បង្ហាញអោយឃើញថា ចំនួនអនីតិជនដែលស្ថិតនៅក្នុងរបររកស៊ីផ្លូវភេទ មានការធ្លាក់ចុះក្នុងចំនួនពី១៥ ទៅ ៣០ ភាគរយ នៅក្នុងចំណោមអ្នករកស៊ីផ្លូវភេទកាលពី១៥ ឆ្នាំមុន ហើយនៅពេលនេះ មានចំនួនតែជាង ១% ប៉ុណ្ណោះ។ នេះគឺជាជោគជ័យមួយ ហើយអាចជាមោទនភាពមួយសំរាប់ប្រជាជនកម្ពុជាទាំងអស់។
ជោគជ័យរបស់កម្ពុជាក្នុងការប្រយុទ្ធនឹងការជួញដូរផ្លូវភេទលើកុមារធ្វើអោយខ្ញុំមានទំនុកចិត្តថា កម្ពុជាអាចសំរេចជោគជ័យបែបនេះ នៅក្នុងការកាត់បន្ថយការជួញដូរពលកម្ម។ បើយោងតាមអង្គការពលកម្មអន្តរជាតិ (ILO) មានប្រជាជនកម្ពុជាចំនួនជាង ១ លាននាក់កំពុងធ្វើការនៅក្រៅប្រទេស ដែលភាគច្រើនគឺនៅប្រទេសថៃ។ ពួកគេជាច្រើនប្រើប្រាស់មធ្យោបាយខុសច្បាប់ ឬគ្មានសុវត្ថិភាព ក្នុងការធ្វើចំណាកស្រុក។ តាមពិតទៅការិយាល័យអន្តោប្រវេសន៍អន្តរជាតិបានរកឃើញថា ៨៥% នៃជនចំណាកស្រុកកម្ពុជា ដែលវិលត្រឡប់ពីប្រទេសថៃវិញ នៅខែមិថុនា ឆ្នាំ២០១៤ បានប្រើប្រាស់មធ្យោបាយមិនច្បាស់លាស់ក្នុងការធ្វើចំណាកស្រុក។
នៅពេលគេស្វែងរកការងារធ្វើនៅក្រៅប្រទេស ដោយមិនបានទទួលព័ត៌មានស្តីពីមធ្យោបាយធ្វើចំណាកស្រុកស្របច្បាប់ និងប្រកបដោយសុវត្ថិភាព កម្មករកម្ពុជាអាចត្រូវបានគេរំលោភ កេងប្រវ័ញ្ច ឬមិនត្រូវបានគេបើកប្រាក់ខែអោយ។ ពួកគេជាច្រើនបានប្រថុយជីវិត។ ដោយមិនដឹងច្បាស់ពីលំហូរនៃអ្នកធ្វើចំណាកស្រុក រដ្ឋាភិបាលមានការពិបាកជាខ្លាំងក្នុងការយកធនធានផ្នែកពង្រឹងការអនុវត្តច្បាប់ទៅប្រើអោយចំគោលដៅ ឬផ្តល់សេវាដោយមានការសំរបសំរួលគ្នា សំរាប់ជនរងគ្រោះដោយការជួញដូរ។
ហេតុដូច្នេះហើយបានជាយើងជឿថា កិច្ចសហប្រតិបត្តិការកាន់តែច្រើនរបស់កម្ពុជាជាមួយប្រទេសជិតខាង និងដោយឡែក គោលការណ៍ណែនាំថ្មីស្តីពីការកំណត់អត្តសញ្ញាណជនរងគ្រោះ មានសារៈសំខាន់ណាស់។ គោលការណ៍ណែនាំថ្មីធ្វើអោយគេមានការយល់ដឹងរួមថាតើអ្នកធ្វើចំណាកស្រុកណាខ្លះជាជនរងគ្រោះដោយការជួញដូរ ជួយរដ្ឋាភិបាល និងដៃគូអោយដឹងពីទំហ៊ំនៃមធ្យោបាយជួញដូរពលកម្ម ហើយធ្វើអោយរដ្ឋាភិបាលអាចបញ្ជូនជនរងគ្រោះទៅកន្លែងផ្តល់សេវាសង្គមសមស្រប។ គោលការណ៍នេះគឺជាការសំរេចបានដ៏សំខាន់មួយដែលបង្ហាញការប្តេជ្ញាចិត្តរបស់រដ្ឋាភិបាលក្នុងការការពារជនរងគ្រោះដោយការជួញដូរមនុស្ស។
យើងសង្ឃឹមថា រដ្ឋាភិបាលនឹងពិចារណាបន្ថែមមធ្យោបាយមួយទៀតដល់វិធានការប្រឆាំងការជួញដូរនៅកម្ពុជា នោះគឺសមត្ថភាពរបស់នគរបាលកម្ពុជាក្នុងការប្រើបច្ចេកទេសស៊ើបអង្កេតដោយសំងាត់ នៅក្នុងករណីតាមចាប់ករណីជួញដូរ។ ការស៊ើបអង្កេតដោយសំងាត់គឺជាមធ្យោបាយយ៉ាងសំខាន់មួយសំរាប់សមត្ថកិច្ច នៅសហរដ្ឋអាមេរិក។ នគរបាលប្រើការស៊ើបអង្កេតដោយសំងាត់ នៅពេលតាមដានករណីរត់ពន្ធគ្រឿងញៀន នៅកម្ពុជាផងដែរ។ តែការស៊ើបអង្កេតបែបនេះមិនត្រូវបានប្រើក្នុងករណីជួញដូរមនុសុ្សទេ។ យើងជឿថា ការផ្តល់អោយនគរបាលនូវអំណាចច្បាស់លាស់ក្នុងការធ្វើការស៊ើបអង្កេត ដោយសំងាត់នៅក្នុងករណីជួញដូរមនុស្ស នឹងធ្វើអោយការស៊ើបអង្កេតមានប្រសិទ្ធភាពជាងមុន នាំដល់ការកាត់ទោសច្រើនជាងមុន ហើយនៅទីបញ្ចប់ គឺចំនួនជនរងគ្រោះតិចជាងមុន។
ខ្ញុំមានមោទនភាពចំពោះភាពជាដៃគូប្រកបដោយការប្តេជ្ញាចិត្ត រវាងសហរដ្ឋអាមេរិក និងកម្ពុជា ក្នុងរយៈពេល ១៥ ឆ្នាំមកនេះ ក្នុងការប្រយុទ្ធប្រឆាំងនឹងការជួញដូរមនុស្ស។ នៅក្នុងស្មារតីនេះ ខ្ញុំមានសេចក្តីរីករាយសូមប្រកាសនៅថ្ងៃនេះ នូវជំពូកថ្មីបំផុតមួយនៅក្នុងកិច្ចសហប្រតិបត្តិការរបស់យើង គឺកម្មវិធីថ្មី មានរយៈពេល ៤ ឆ្នាំស្តីពីការប្រឆាំងការជួញដូរមនុស្សនៅកម្ពុជា ដែលឧបត្ថម្ភថវិកា ដោយទីភ្នាក់ងារសហរដ្ឋអាមេរិកសំរាប់ការអភិវឌ្ឍន៍អន្តរជាតិ (USAID)។ កម្មវិធីនេះជួយផែនការសកម្មភាពជាតិកម្ពុជា ព្រមទាំងគណកម្មាធិការប្រឆាំងការជួញដូរខេត្ត នៅតាមខេត្តមួយចំនួន។
ក្រៅពីការជួយក្នុងការស៊ើបអង្កេតករណីបទល្មើសជួញដូរ កម្មវិធីនេះផ្តល់ការបណ្តុះបណ្តាលវិជ្ជាជីវៈ និងឱកាសការងារសមប្រកប ដល់ប្រជាជនកម្ពុជាដែលប្រឈមនឹងការជួញដូរមនុស្ស។ វាឆ្លុះបញ្ចាំងពីជំនឿរបស់យើងថា ដើម្បីដោះស្រាយបញ្ហានៃការជួញដូរ យើងត្រូវដោះស្រាយបុព្វេហតុជាឬសគល់ដែលធ្វើអោយគេមានការប្រឈមនឹងការជួញដូរ នោះគឺការសិក្សាអប់រំ និងឱកាសផ្នែកសេដ្ឋកិច្ច។
ជាទីបញ្ចប់នេះ ខ្ញុំសូមសំដែងការអបអរសាទរម្តងទៀតចំពោះជោគជ័យដ៏សំខាន់ដែលប្រទេសកម្ពុជា និងដៃគូរបស់ខ្លួនសំរេចបាន នៅក្នុងការប្រយុទ្ធប្រឆាំងនឹងការជួញដូរមនុស្សគ្រប់ប្រភេទ។ យើងមានការប្តេជ្ញាចិត្តក្នុងការធ្វើការយ៉ាងជិតស្និទ្ធជាមួយរដ្ឋាភិបាល នៅក្នុងបញ្ហាប្រឈមដ៏សំខាន់នេះ នៅក្នុងខែ និងឆ្នាំខាងមុខៗ។ យើងសង្ឃឹមថា នៅថ្ងៃណាមួយ នៅពេលប្រជាជនកម្ពុជាធ្វើចំណាកស្រុកទៅស្វែងរកការងារថ្មី ពួកគេអាចទៅដោយសុវត្ថិភាព និងដោយស្របច្បាប់ ហើយធ្វើការនិងរស់នៅដោយភាពថ្លៃថ្នូរ ដោយមិនខ្លាចរងគ្រោះដោយការជួញដូរឡើយ។
សូមអរគុណច្រើន។
