ស្ថានទូតអាមេរិក ភ្នំពេញ
ថ្ងៃទី៤ ខែកក្កដា ឆ្នាំ២០១៥
សូមអរគុណ Jay ។ សូមទះដៃអបអរម្តងទៀតដល់អ្នកចំរៀងអាមេរិកមកពីក្រុមតន្រ្តី Holden Moyer និងក្រុមអ្នកចំរៀងកុមារមកពីអង្គការ Don Bosco ដែលបានច្រៀងយ៉ាងពិរោះ។
សូមជំរាបសួ សម្តេច ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ ព្រះអង្គម្ចាស់ អ្នកអង្គម្ចាស់ ឯកឧត្តម លោកជំទាវ ភ្ញៀវកិត្តិយសទាំងឡាយ សូមស្វាគមន៍មកកាន់ពិធីអបអរសាទរបុណ្យឯករាជ្យជាតិលើកទី២៣៩ របស់សហរដ្ឋអាមេរិក នាព្រឹកនេះ។
មុននឹងចាប់ផ្តើមសុន្ទរកថាផ្លូវការរបស់ខ្ញុំ ខ្ញុំសូមសម្តែងការអបអរសាទរចំពោះ ឯកឧត្តមឧបនាយករដ្ឋមន្ត្រី ស ខេង ដែលទើបបានទទួលគោរមងារជា សម្តេច នាពេលថ្មីៗនេះ។ សម្តេចគឺជាមិត្តនៃអង្គទូតក្នុងកំឡុងពេលនៃការផ្លាស់ប្តូរយ៉ាងសំខាន់ក្នុងប្រទេសកម្ពុជា និងក្នុងកំឡុងពេលនៃការបំពេញបេសកកម្មការទូតរបស់ខ្ញុំ។ សូមទះដៃអបអរសាទរភ្ញៀវកិត្តិយសរបស់យើង។
នៅថ្ងៃទី៤ ខែកក្កដា ឆ្នាំ១៧៧៦ បិតាស្ថាបនិករបស់សហរដ្ឋអាមេរិកបានចុះហត្ថលេខាលើសេចក្តីប្រកាសឯករាជ្យ នៅទីក្រុង Philadelphia នៃរដ្ឋ Pennsylvania ។ អ្វីដែលជាគំនិតថ្មីនៅពេលនោះ នៅពេលនេះ ត្រូវបានទទួលយកទាំងស្រុង។ គំនិតនេះមានន័យថា “មនុស្សគ្រប់រូបកើតមកមានភាពស្មើគ្នា ហើយមានសិទ្ធិមួយចំនួនដែលមិនអាចកាត់ផ្តាច់បាន ក្នុងនោះមានសិទ្ធិរស់រានមានជីវិត សេរីភាព និងសិទ្ធិក្នុងការស្វែងរកសុភមង្គល”។
គោលការណ៍នេះបានបង្ហាញផ្លូវដល់សហរដ្ឋអាមេរិក អស់រយៈពេល ២៣៩ឆ្នាំកន្លងមកហើយ។ វាបានកំណត់លក្ខណៈនៃប្រទេស និងកំណត់គោលនយោបាយរបស់យើង ហើយវាជាផ្នែកជាគន្លឹះនៃកិច្ចការទូតរបស់យើងផងដែរ។ ទោះបីជាយ៉ាងណាក៏ ការអនុម័តយកគោលការណ៍នេះមិនមែនជាទីបញ្ចប់នោះទេ ប៉ុន្តែគ្រាន់តែជាជំហ៊ានចាប់ផ្តើមតែប៉ុណ្ណោះ។ សហរដ្ឋអាមេរិកបន្តរីកចម្រើន និងរឹងមាំក្នុងនាមជាប្រទេសប្រកាន់របបប្រជាធិបតេយ្យ ។ ដូចដែលលោកប្រធានាធិបតី Obama បានមានប្រសាសន៍ថា៖ ពិតមែនតែការរួបរួមគ្នារបស់យើងអាចមិនមានភាពល្អឥតខ្ចោះក្តី តែជំនាន់មនុស្សពីជំនាន់មួយទៅជំនាន់មួយ បានបង្ហាញថា ការរួបរួមគ្នាអាចត្រូវបានគេធ្វើអោយមានភាពល្អប្រសើរខ្លាំងឡើងៗបាន” ។
នៅពេលយើងធ្វើការឆ្លុះបញ្ចាំងមកលើថ្ងៃមួយនេះ វាមានសារៈសំខាន់ណាស់ដែលយើងត្រូវចងចាំថាគុណតម្លៃទាំងអស់នេះគួរប្រកាន់យកដោយប្រជាជនទាំងអស់ មិនមែនត្រឹមតែប្រជាជនអាមេរិកប៉ុណ្ណោះទេ។ តាមរយៈសេរីភាពក្នុងការបញ្ចេញមតិ និងសេរីភាពក្នុងការជួបជុំ គេអាចលឺសំលេងរបស់ប្រជាជន ហើយនេះគឺជាមូលហេតុដែលយើងជម្រុញអោយមានការជជែកគ្នារវាងភាគីផ្សេងៗដែលមានការពាក់ព័ន្ធ លើបញ្ហាទាំងឡាយណាដែលមានឥទ្ធិពលលើសង្គមស៊ីវិល ដូចជាសេចក្តីព្រាងច្បាប់ស្តីពីអង្គការមិនមែនរដ្ឋាភិបាល ជាដើម។
ក្នុងស្មារតីនៃទិវា ៤ កក្កដានេះ ខ្ញុំនៅតែជឿជាក់ថា សង្គមស៊ីវិលដែលមានសេរីភាព និងរឹងមាំគឺជាក្បាលម៉ាស៊ីនដ៏មានឥទ្ធិពលសម្រាប់ភាពរីកចម្រើន។ សង្គមស៊ីវិលមួយដ៏រឹងមាំ គឺជាមូលដ្ឋានគ្រឹះនៃភាពចម្រុងចម្រើន និងសេរីភាពរបស់ប្រទេសនីមួយៗ រួមទាំងសហរដ្ឋអាមេរិកផងដែរ ហើយប្រទេសកម្ពុជាពិតជាមានសំណាងដោយមានធនធានដ៏ល្អទាំងនេះ។ នេះជាមូលហេតុដែលសហរដ្ឋអាមេរិកបន្តអបអរសាទរចំពោះការងាររបស់អង្គការសង្គមស៊ីវិលនៅកម្ពុជា ក្នុងភាពជាដៃគូជាមួយរាជរដ្ឋាភិបាលកម្ពុជា ដើម្បីលើកកម្ពស់អភិបាលកិច្ចល្អ ប្រសិទ្ធភាព និងតម្លាភាព ដែលសុទ្ធតែជាធាតុផ្សំនៃសេដ្ឋកិច្ច និងលិទ្ធិប្រជាធិបតេយ្យដែលរឹងមាំ និងការអភិវឌ្ឍសំរាប់ទាំងអស់គ្នា។
នៅពេលខ្ញុំមកដល់ប្រទេសកម្ពុជា កាលពីជាង៣ឆ្នាំកន្លងទៅ អាទិភាពចំបងរបស់ខ្ញុំមួយគឺ ព្យាយាមធ្វើអោយប្រសើរឡើងនូវជីវភាពប្រជាជនសាមញ្ញកម្ពុជា និងនាំមកនូវការផ្លាស់ប្តូរ។ ក្នុងភាពជាដៃគូជាមួយរាជរដ្ឋាភិបាលកម្ពុជា សហរដ្ឋអាមេរិកបានជួយលើកកម្ពស់សុខភាពប្រជាជនខ្សត់ខ្សោយ បានកាត់បន្ថយភាពក្រីក្រក្នុងចំណោមជនងាយរងគ្រោះ និងបានជួយផ្តល់ឱកាសដល់យុវជននៃប្រទេសដ៏ល្អនេះ។
មានមនុស្ស និងអង្គការរាប់ពាន់នៅកម្ពុជាដែលមានស្នាដៃការងារលេចធ្លោ ដោយរួមទាំងអ្នកដែលមានវត្តមាននៅពេលនេះផងដែរ។ គឺមានច្រើនពេក ដែលនាំអោយពិបាករាប់ឈ្មោះមួយៗ។ ខ្ញុំសូមថ្លែងអំណរគុណយ៉ាងជ្រាលជ្រៅចំពោះអ្នកទាំងអស់គ្នា រួមទាំងសហគមន៍អង្គការមិនមែនរដ្ឋាភិបាល និងដៃគូអនុវត្តការងាររបស់យើង ដែលដើរតួនាទីយ៉ាងសំខាន់ក្នុងការគាំទ្រការអភិវឌ្ឍន៍ផ្នែកលទ្ធិប្រជាធិបតេយ្យ ការជួយដល់ជនងាយរងគ្រោះ និងការការពារបរិស្ថាន។ ខ្ញុំសូមកោតសរសើរចំពោះសភាពាណិជ្ជកម្មអាមេរិក និងប្រតិភូដែលបានចូលរួមក្នុងបេសកកម្មពាណិជ្ជកម្មរបស់ខ្ញុំទៅកាន់សហរដ្ឋអាមេរិក ចំពោះកិច្ចខិតខំប្រឹងប្រែងរបស់ពួកគេក្នុងការនាំការវិនិយោគដោយផ្ទាល់ពីបរទេស និងការងារអោយកម្ពុជា។ ជាចុងក្រោយ ខ្ញុំសូមអរគុណដល់ក្រុមបុគ្គលិកដ៏ល្អរបស់ខ្ញុំក្នុងស្ថានទូតអាមេរិក។ ពួកគេជាក្រុមបុគ្គលិកដ៏ល្អបំផុតក្នុងចំណោមក្រុមបុគ្គលិកដែលខ្ញុំបានធ្វើការជាមួយ នៅក្នុងអាជីពដែលមានរយៈពេល ៣០ ឆ្នាំមកនេះរបស់ខ្ញុំ។ សូមអរគុណចំពោះអ្វីដែលអ្នកបានធ្វើ។
ជាទីបញ្ចប់ សូមអ្នកទាំងអស់គ្នាចងចាំថា ថ្ងៃនេះយើងមិនមែនអបអរសាទរតែបុណ្យឯករាជ្យជាតិអាមេរិកប៉ុណ្ណោះទេ តែយើងក៏អបអរសាទរដល់គុណតម្លៃនៃសេរីភាព សមភាព និងលទ្ធិប្រជាធិបតេយ្យដែលយើងមានជាមួយគ្នាផងដែរ។ សម្រាប់រូបខ្ញុំផ្ទាល់ ខ្ញុំសូមថ្លែងអំណរគុណដល់អ្នកទាំងអស់គ្នាដែលបាន និងកំពុងបន្តនាំមកនូវការផ្លាស់ប្តូរដល់ប្រទេសកម្ពុជា។ សូមបន្តការងារ ដោយក្តីសង្ឃឹម និងដោយសុទិដ្ឋិនិយម។
សូមព្រះជាម្ចាស់ជួយប្រទានពរជ័យដល់លោកអ្នកទាំងអស់ ដល់ព្រះរាជាណាចក្រកម្ពុជា និងដល់សហរដ្ឋអាមេរិក។ សូមអរគុណ!
សូមសម្តេច ព្រះអង្គម្ចាស់ អ្នកអង្គម្ចាស់ ឯកឧត្តម លោកជំទាវ និងភ្ញៀវកិត្តិយសទាំងអស់មេត្តាលើកកែវឡើងដើម្បីព្រះរាជសុខភាពរបស់ព្រះមហាក្សត្រ និងព្រះវរៈរាជមាតានៃកម្ពុជា និងចំណងមិត្តភាពរឹងមាំ រវាងប្រជាជននៃប្រទេសយើងទាំងពីរ។
