កំពង់ចាម
ថ្ងៃទី១៦ ខែកុម្ភៈ ឆ្នាំ២០១៦
សូមជំរាបសួ ឯកឧត្តម ម៉ម ប៊ុនហេង រដ្ឋមន្រ្តីក្រសួងសុខាភិបាល ឯកឧត្តម លន់ លឹមថៃ អភិបាលខេត្តកំពង់ចាម ភ្ញៀវកិត្តិយស អស់លោក លោកស្រី
សូមអរគុណចំពោះការអញ្ជើញខ្ញុំមកចូលរួមក្នុងពិធីនាថ្ងៃនេះ។ ថ្ងៃនេះគឺជាថ្ងៃប្រកបដោយមោនទនភាពមួយសំរាប់ប្រទេសកម្ពុជា ដែលបង្ហាញពីការសំរេចបានរបស់ប្រទេសកម្ពុជា នៅក្នុងការអភិវឌ្ឍប្រព័ន្ធសុខាភិបាលរបស់ខ្លួន ក្នុងរយៈពេល ១៥ ឆ្នាំកន្លងទៅនេះ។
ខ្ញុំនៅចាំច្បាស់ពីស្ថានភាពនៃប្រទេសកម្ពុជា នៅពេលខ្ញុំធ្វើការក្នុងស្ថានទូតអាមេរិក នៅចុងទសវត្សទី១៩៩០ ។ នៅពេលនោះ គំនិតដែលថា ខេត្តកំពង់ចាមអាចមានមជ្ឈមណ្ឌលផ្តល់ឈាមភូមិភាគរបស់ខ្លួន និងមន្ទីរពិសោធន៍មួយប្រកបដោយសមត្ថភាពខ្ពស់ក្នុងការកំណត់រោគវិនិច្ឆ័យនៃជំងឺ មិនត្រូវបានគេគិតដល់ទេ។ ពេលនេះ ដោយសារការខិតខំរបស់ប្រជាជនកម្ពុជាជាច្រើន និងការធ្វើកិច្ចសហប្រតិបត្តិការរបស់គេយ៉ាងជិតស្និទ្ធជាមួយដៃគូអន្តរជាតិរបស់គេ កន្លែងវេជ្ជសាស្រ្តដ៏ទំនើបនេះបានក្លាយជាការពិត។
អស់រយៈកាលជិត ២០ ឆ្នាំមកហើយដែលសហរដ្ឋអាមេរិកបានធ្វើការយ៉ាងជិតស្និទ្ធជាមួយនឹងរដ្ឋាភិបាលនិងប្រជាជនកម្ពុជា ដើម្បីអភិវឌ្ឍប្រព័ន្ធសុខាភិបាលថ្នាក់ជាតិ។ មជ្ឈមណ្ឌលជាតិផ្តល់ឈាមភូមិភាគថ្មីនេះនឹងផ្តល់ឈាមសំរាប់ជនរងគ្រោះដោយគ្រោះថ្នាក់ចរាចរធ្ងន់ធ្ងរ ដែលបាត់បង់ឈាម សង្គ្រោះម្តាយដែលបាត់បង់ឈាមច្រើននៅពេលឆ្លងទន្លេ ហើយការពារសំរាប់ពេលមានជំងឺរាលដាលទាក់ទងនឹងឈាម។
ក្រៅពីនេះទៀត មន្ទីរពិសោធន៍របស់មន្ទីរពេទ្យកំពង់ចាមអាចផ្តល់រោគវិនិច្ឆ័យលើជំងឺប្រកបដោយគ្រោះថ្នាក់ ដូចជាជំងឺគ្រុនចាញ់ ជំងឺគ្រុនផ្តាសាយបក្សី និងជំងឺគ្រុនឈាម បានឆាប់រហ័ស ដែលជួយអោយវេជ្ជបណ្ឌិតផ្តល់ការព្យាបាលបានត្រឹមត្រូវដល់អ្នកជំងឺបានឆាប់រហ័ស។
ជាបថម ខ្ញុំសូមអរគុណឯកឧត្តម ម៉ម ប៊ុនហេង រដ្ឋមន្រ្តីក្រសួងសុខាភិបាល និងឯកឧត្តម លន់ លឹមថៃ អភិបាលខេត្តកំពង់ចាម ចំពោះការដឹកនាំរបស់លោក។ ខ្ញុំសូមអរគុណផងដែរដល់វេជ្ជបណ្ឌិត ហុក គឹមចេង នាយកមជ្ឈមណ្ឌលជាតិផ្តល់ឈាម និងលោកស្រី ញ៉ែម សុម៉ារី ប្រធានមន្ទីរពិសោធន៍ពេទ្យកំពង់ចាម។
ជាទីបញ្ចប់ ខ្ញុំសូមអរគុណដល់ដៃគូអន្តរជាតិទាំងអស់របស់កម្ពុជា ជាពិសេស បញ្ជាការដ្ឋាននៃកងទ័ពសហរដ្ឋអាមេរិកប្រចាំតំបន់ប៉ាស៊ីហ្វិក និងទីភ្នាក់ងារកាត់បន្ថយការគំរាមកំហែងក្នុងវិស័យការពារជាតិ (Defense Threat Reduction Agency) ។
តាងនាមអោយសហរដ្ឋអាមេរិក ខ្ញុំសូមសំដែងការប្តេជ្ញាចិត្តជាបន្តរបស់យើងក្នុងការជួយលើកកំពស់ការថែទាំសុខភាព សំរាប់ប្រជាជនកម្ពុជាទាំងអស់។
សូមអរគុណច្រើន។
