សូមជំរាបសួ ឯកឧត្តម ឱម យិនទៀង ទីប្រឹក្សាផ្ទាល់សម្តេចនាយករដ្ឋមន្រ្តី និងជាអនុប្រធាននៃគណកម្មាធិការជាតិប្រឆាំងភេរវកម្ម ឯកឧត្តម អ៊ុង អៀង រដ្ឋលេខាធិការ និងជាអនុប្រធានក្នុងលេខាធិការដ្ឋាននៃគណកម្មាធិការជាតិប្រឆាំងភេរវកម្ម ឧត្តមនាវីទោ Colin Kilrain ភ្ញៀវកិត្តិយស និងសហការីកម្ពុជា និងសហការីមកពីជុំវិញតំបន់ អស់លោក លោកស្រី
ខ្ញុំមានសេចក្តីរីករាយដោយមានវត្តមាននៅថ្ងៃនេះ ដើម្បីចំណាយពេលជាមួយក្រុមអ្នកជំនាញដ៏ចំណានៗក្នុងអាជីព ការប្តេជ្ញាចិត្តដូចគ្នាចំពោះការចែករំលែកព័ត៌មានសំខាន់ៗ ការសំរបសំរួលគ្នា និងចំពោះការកសាងស្ពានមេត្រីចាំបាច់សំរាប់ប្រឆាំងនឹងភាពជ្រុលនិយមហឹង្សា នៅក្នុងប្រទេសទាំងអស់របស់យើង។
ខ្ញុំសូមអរគុណជាពិសេសចំពោះរាជរដ្ឋាភិបាលកម្ពុជា ដែលបានដឹកនាំក្នុងការរៀបចំកិច្ចប្រជុំនេះឡើង នៅថ្ងៃនេះ។ ប្រទេសកម្ពុជាបានធ្វើជាដៃគូដ៏សំខាន់មួយ នៅក្នុងការប្រយុទ្ធប្រឆាំងនឹងភាពជ្រុលនិយម ហើយខ្ញុំសូមអរគុណលោកទេសរដ្ឋមន្រ្តី ឱម យិនទៀង និងឯកឧត្តម អ៊ុង អៀង និងអ្នកចូលរួមសំខាន់ៗមួយចំនួនទៀតក្នុងរាជរដ្ឋាភិបាល និងសង្គមស៊ីវិល ដែលបានខិតខំក្នុងការរៀបចំកិច្ចប្រជុំនេះឡើង។
ជាបឋម ខ្ញុំសូមសំដែងសមានទុក្ខដល់សហការីរបស់យើងដែលមកពីប្រទេសឥណ្តូនេស៊ី ចំពោះការបាត់បង់ជីវិតពីការវាយប្រហារភេរវកម្មដ៏គួរអោយរន្ធត់ដោយពួក ISIS នៅទីក្រុង Jakarta កាលពីថ្ងៃទី១៤ ខែមករា។ ខ្ញុំជឿថា ពួកយើងទាំងអស់នៅទីនេះគាំទ្រប្រជាជនឥណ្តូនេស៊ីប្រឆាំងនឹងភេរវកម្ម និងមនោគមវិជ្ជាជ្រុលនិយម ដែលនាំអោយមានហឹង្សាភេរវកម្ម។
ការវាយប្រហារនៅទីក្រុង Jakarta ព្រមទាំងឧប្បត្តិហេតុដទៃទៀតក្នុងពេលថ្មីៗនេះ នៅទីក្រុង Paris និងនៅរដ្ឋ California រំលឹកយើងថា យុទ្ធសាស្រ្តស្នូលនៃអង្គការជ្រុលនិយម គឺដើម្បីប៉ុនប៉ងឆ្លៀតទាញប្រយោជន៍ពីភាពខុសគ្នាខាងសាសនា និងវប្បធម៌ ដើម្បីធ្វើអោយសង្គមរបស់យើងមានការបែកបាក់។
គោលដៅរបស់គេគឺមិនត្រឹមតែដើម្បីបន្ថែមភាពភ័យខ្លាចដល់ជីវិតប្រចាំថ្ងៃរបស់យើងតែប៉ុណ្ណោះទេ តែថែមទាំងដើម្បីបំផ្លាញការរកស៊ីចិញ្ចឹមជីវិតនៃគ្រួសារ និងអ្នកជិតខាងរបស់យើងថែមទៀតផង ដោយធ្វើអោយអ្នកវិនិយោគ និងទេសចរមិនហ៊ានមក ហើយបំផ្លាញជំនឿជាធម្មតា ដែលជាគ្រឹះនៃសេដ្ឋកិច្ចទាំងអស់ ដែលមានដំណើរការទៅមុខល្អ។ នេះគឺជាហេតុផលមួយក្នុងចំណោមហេតុផលនានាដែលពួក ISIS បានកំទេចបេតិកភណ្ឌវប្បធម៌ និងវត្ថុបូរាណដែលមានតំលៃមិនអាចកាត់ថ្លៃបាននៅប្រទេសអ៊ីរ៉ាក់ សេរី និងប្រទេសលីប៊ី។
ការជួបជុំគ្នានៅថ្ងៃនេះគឺជាការទទួលស្គាល់សារៈសំខាន់លើសលុបនៃការដែលប្រទេសរបស់យើងត្រូវធ្វើអោយពួកហឹង្សាជ្រុលនិយមបរាជ័យ។ នេះគឺជាយុទ្ធានាការដែលត្រូវធ្វើនៅក្នុងសមរភូមិដោយចលនាសាកលលោកមួយដែលមានការសាមគ្គីគ្នាក្នុងបេសកកម្មបន្ថយឥទ្ធិពល ហើយនៅទីបំផុត លុបបំបាត់ក្រុម ISIS អោយអស់តែម្តង។
តែក្រៅពីការបំបាក់ពួក ISIS នៅលើសមរភូមិ យើងត្រូវការពារកុំអោយក្រុមនេះ និងក្រុមជ្រុលនិយមដទៃទៀតអាចធ្វើការជ្រើសរើសមនុស្សបាន ហើយកុំអោយបំផុសអ្នកដទៃអោយប្រកាន់យកធម៌ហឹង្សា ពីដំបូងទៅ។ មធ្យោបាយនេះធ្វើអោយមនោគមវិជ្ជារបស់ពួកគេបរាជ័យ លើកសំឡេងរបស់អ្នកប្រាជ្ញ អាចារ្យ និងអ្នកដឹកនាំមតិដែលមិនប្រកាន់គំនិតជ្រុលនិយម ហើយធ្វើមិនអោយគេជឿលើការឃោសនារបស់ពួកជ្រុលនិយម ពិសេសការឃោសនាតាមអ៊ិនធ័រណែត។
គេត្រូវប្រឈមដោះស្រាយផងដែរចំពោះការមិនសប្បាយចិត្តទាក់ទងនឹងផ្នែកសេដ្ឋកិច្ច និងនយោបាយដែលនាំអោយចំណេញដល់ពួកហឹង្សាជ្រុលនិយម។ ភាពក្រីក្រមិនបង្ករអោយមានភេរវកម្មទេ តែអំពើពុករលួយ និងភាពគ្មានសង្ឃឹមដែលមានមកជាមួយនឹងអំពើពុករលួយ អាចជំរុញអោយមានភាពទោមនស្ស ដែលពួកភេរវករអាចឆ្លៀតកេងចំណេញបាន។
ដូច្នេះ ការអភិវឌ្ឍន៍ដែលមាននិរន្តភាព ពោលគឺការបង្កើតអោយមានឱកាស និងភាពថ្នៃថ្នូរ ពិសេសសំរាប់យុវជន គឺជាផ្នែកមួយនៃការប្រឆាំងតបទៅនឹងភាពជ្រុលនិយមហឹង្សា។ ដូច្នេះត្រូវមានការបង្កើតស្ថាប័នរដ្ឋដែលមានការទទួលខុសត្រូវច្រើន ហើយត្រូវមានការការពារសេរីភាពក្នុងការនិយាយស្តី សេរីភាពសាសនា និតិរដ្ឋ និងសង្គមស៊ីវិលដែលរឹងមាំល្អ។
តែនៅទីបំផុត ដៃគូដែលល្អបំផុតក្នុងការការពារជនងាយរងគ្រោះពីមនោគមវិជ្ជារបស់ក្រុមជ្រុលនិយមដែលប្រើហឹង្សា គឺសហគមន៍ខ្លួនឯង ពោលគឺគ្រួសារ មិត្តភក្តិ អ្នកជិតខាង និងមេដឹកនាំសាសនាដែលស្រឡាញ់ ហើយគិតគូរពីយុវជន នៅក្នុងសហគមន៍របស់គេ។ ការងាររបស់យើងគឺកសាងភាពជាដៃគូពិតប្រាកដជាមួយសហគមន៍ ដែលប្រឈមនឹងបញ្ហា ដោយឈរលើមូលដ្ឋាននៃការទុកចិត្ត និងការធ្វើសហប្រតិបត្តិការជាមួយគ្នា ដើម្បីអោយគេអាចជួយការពារមនុស្សដែលគេស្រឡាញ់កុំអោយក្លាយជាមនុស្សមានគំនិតជ្រុលនិយមបាន។
នៅត្រង់នេះហើយដែលក្រុមការងារពហុភាគីប្រឆាំងហឹង្សាជ្រុលនិយមអាចធ្វើការរួមចំណែកយ៉ាងសំខាន់។ ក្រុមការងារនេះធ្វើសកម្មភាព ដោយឈរលើជំនឿនិងទស្សនៈថា គ្រួសារ សហគមន៍ និងស្ថាប័នក្នុងស្រុក គឺជាការការពារយ៉ាងមាំទប់ទល់នឹងមនោគមវិជ្ជានៃពួកជ្រុលនិយម។
អង្គប្រជុំប្រមូលផ្តុំនូវបុគ្គលិកផ្នែកសន្តិសុខ អ្នកជំនាញផ្នែកសិក្សាស្រាវជ្រាវ និងអង្គការមិនមែនរដ្ឋាភិបាល ដើម្បីធ្វើការចែករំលែកគ្នានូវការអនុវត្តល្អ កសាងទំនាក់ទំនងក្នុងតំបន់ ហើយរកដំណោះស្រាយសំរាប់ប្រឆាំងទប់ទល់ និងធ្វើកុំអោយមាននូវភាពជ្រុលនិយមហឹង្សា។ នៅក្នុងការប្រឹងប្រែងទាំងអស់នេះ ការសហការគ្នារវាងប្រទេសនានាមានសារៈសំខាន់ជាងពេលណាៗទាំងអស់ ពីព្រោះភេរវករខិតខំពង្រីកបណ្តាញរបស់គេទៅតំបន់ថ្មីៗ ឬតាមប្រព័ន្ធផ្សព្វផ្សាយសង្គម។
អ្នកចូលរួមនៅក្នុងកិច្ចប្រជុំនៃក្រុមការងារនេះគឺជាអ្នកជំនាញនិងអ្នកអនុវត្ត ដែលមានបទពិសោធន៍ច្រើនក្នុងការប្រឆាំងនឹងភាពជ្រុលនិយម និងភេរវកម្ម។ ខ្ញុំរំពឹងថា អស់លោកអ្នកជាច្រើនមានការយល់ដឹងអំពីយុទ្ធសាស្រ្តដែលមានប្រសិទ្ធភាពនៅក្នុងប្រទេសរបស់លោកអ្នក អ្វីដែលលោកអ្នកអាចធ្វើដើម្បីអោយមានភាពប្រសើរជាងនេះ និងវិធីដែលយើងអាចចែករំលែកព័ត៌មាននិងមេរៀនដែលបានរៀន បានឆាប់និងប្រកបដោយប្រសិទ្ធភាព។
ខ្ញុំមានសេចក្តីរីករាយផងដែរដោយដឹងថានៅថ្ងៃពុធ លោកអ្នកនឹងមានឱកាសបានដើរមើលប្រាសាទអង្គរ ដែលជាកន្លែងទាក់ទាញបំផុតមួយក្នុងពិភពលោក ហើយដែលជានិមិត្តរូបរួបរួមជាតិមួយរបស់កម្ពុជា។ វាជាប្រាសាទដ៏អស្ចារ្យមួយដែលត្រូវបានកសាងដោយមនុស្ស ហើយនៅឆ្នាំ ២០១៥ មានមនុស្សចំនួន ២ លាននាក់បានមកទស្សនាសួនឧទ្យានអង្គរ។ តែប្រាសាទនេះបានរងផលដោយមិនផ្ទាល់ពីភេរវកម្មផងដែរ កាលពីឆ្នាំទៅ។ អ្នកជំនាញជឿថា ការវាយប្រហារនៅទីក្រុង Paris នៅខែវិច្ឆិកាបានកាត់បន្ថយចំនួនទេសចរមកពីអឺរ៉ុបយ៉ាងច្រើន ដែលធម្មតាគេធ្វើដំណើរមកកម្ពុជា នៅរដូវឈប់សំរាក។
លើសពីនេះទៀត អង្គរវត្តបង្ហាញអោយឃើញ មិនដូចកន្លែងផ្សេងទៀតទេថា ការអភិរក្សបេតិកភណ្ឌវប្បធម៌គឺជាអ្វីដែលគេត្រូវធ្វើអោយខាងតែបាន មិនមែនតែនៅកម្ពុជាតែប៉ុណ្ណោះទេ តែនៅក្នុងតំបន់ដទៃទៀតដែលងាយរងនឹងការវាយប្រហារភេរវកម្ម នៅជុំវិញពិភពលោកផងដែរ។ ខ្ញុំសូមអរគុណចំពោះភាគីម្ចាស់ផ្ទះកម្ពុជាដែលធ្វើការចែករំលែកបេតិកភណ្ឌ ដ៏អស្ចារ្យនេះអោយយើងឃើញ។
ខ្ញុំសូមលើកទឹកចិត្ត ដល់អស់លោកអ្នកទាំងអស់គ្នាអោយប្រើឱកាសនៅសប្តាហ៍នេះ អោយបានច្រើនបំផុតដើម្បីចាកចេញពីសៀមរាបទៅវិញ ដោយមានគំនិតថ្មីៗ បណ្តាញទំនាក់ទំនងកាន់តែធំ និងការតាំងចិត្តខ្ពស់ក្នុងការធ្វើការជាមួយគ្នា ដើម្បីធ្វើអោយពួកជ្រុលនិយមប្រើហឹង្សាទទួលការបរាជ័យ។
ខ្ញុំសូមអរគុណម្តងទៀតដែលផ្តល់ឱកាសអោយខ្ញុំបានចូលរួមជាមួយលោកអ្នកនៅព្រឹកនេះ។ សូមអោយការប្រជុំនៃក្រុមការងារនេះទទួលបានជោគជ័យ និងសូមអោយការប្រឹងប្រែងនៅពេលអនាគតរបស់លោកអ្នកជួបតែនឹងសំណាងល្អ។ សូមអរគុណច្រើន។
