សណ្ឋាគារ រ៉ាហ្វលឡីរ៉ូយ៉ាល់ រាជធានីភ្នំពេញ
ថ្ងៃទី៣ ខែធ្នូ ឆ្នាំ២០១៥
សូមជំរាបសួឯកឧត្តម ជួន ចាន់ថន ឯកឧត្តម លោកជំទាវ ភ្ញៀវកិតិ្តយស អស់លោក លោកស្រី
សូមស្វាគមន៍មកកាន់សិក្ខាសាលាលើកដំបូងស្តីពីការយល់ដឹងលើការគ្រប់គ្រងពាណិជ្ជកម្មជាយុទ្ធសាស្រ្តរវាងសហរដ្ឋអាមេរិក និងកម្ពុជា ដែលឧបត្ថម្ភដោយស្ថានទូតអាមេរិក នៅរាជធានីភ្នំពេញ។ ខ្ញុំមានកិត្តិយសដោយមានវត្តមានជាមួយអស់លោក លោកស្រី នៅព្រឹកនេះ នៅក្នុងពិធីជាសាធារណៈលើកទី១ សំរាប់ខ្ញុំ តាំងពីខ្ញុំបានជូនសារតាំងដល់ប្រមុខរដ្ឋស្តីទី នៅព្រឹកម្សិលម៉ិញ។
ខ្ញុំរីករាយណាស់ ដោយមានឱកាសនិយាយជាមួយលោក លោកស្រីបន្តិច អំពីការដែលប្រទេសកម្ពុជានឹងទទួលបានផលចំណេញ សំរាប់សេដ្ឋកិច្ច និងសន្តិសុខរបស់ខ្លួន តាមរយៈការធ្វើអោយមានរបបគ្រប់គ្រងពាណិជ្ជកម្មជាយុទ្ធសាស្រ្តរឹងមាំមួយ។
ខ្ញុំគិតថា លោក លោកស្រីជាច្រើនដឹងថា ខ្ញុំទើបតែត្រឡប់មកប្រទេសកម្ពុជាវិញ នៅក្នុងពេលថ្មីៗនេះ បន្ទាប់ពីបានអវត្តមានអស់រយៈពេល ១៥ ឆ្នាំមក។ តាំងពីខ្ញុំបានវិលត្រឡប់មកវិញ ខ្ញុំមានការចាប់អារម្មណ៍យ៉ាងខ្លាំងចំពោះការរីកចំរើនរបស់ប្រទេសកម្ពុជា នៅក្នុងវិស័យសង្គមកិច្ច សុខាភិបាល និងសេដ្ឋកិច្ច។ កំណើនសេដ្ឋកិច្ចចំនួន ៧% ក្នុងរយៈពេល ២០ ឆ្នាំមកនេះរបស់ប្រទេសកម្ពុជាគឺជាជោគជ័យដ៏ធំមួយ។ សព្វថ្ងៃនេះ ប្រទេសកម្ពុជានឹងចូលរួមជាមួយប្រទេសដែលមានប្រាក់ចំណូលក្រោមមធ្យម នៅក្នុងពិភពលោក។
តែកំណើនសេដ្ឋកិច្ចខ្ពស់ក៏មានន័យផងដែរថា មានការនាំចេញ និងនាំចូល អ្នកទេសចរឆ្លងកាត់ព្រំដែន នៃប្រទេសកម្ពុជាច្រើនឡើងផងដែរ ក្នុងមួយឆ្នាំៗ។ និន្នាការនេះនឹងមានល្បឿនកាន់តែលឿន ក្នុងពេលដែលកម្ពុជាធ្វើសមាហរណកម្មសេដ្ឋកិច្ចជាមួយតំបន់ ក្រោមសហគមន៍សេដ្ឋកិច្ចអាស៊ាន។ នៅពេលដែលក្រុមហ៊ុនអន្តរជាតិច្រើនឡើងមករកស៊ីនៅទីនេះ កម្ពុជានឹងរឹតតែទទួលបានផលចំណេញថែមទៀត ពីការបង្កើតអោយមានក្របខ័ណ្ឌច្បាប់ទំលាប់កំរិតពិភពលោកផ្នែកពាណិជ្ជកម្ម។
ការគ្រប់គ្រងជាយុទ្ធសាស្រ្តផ្នែកពាណិជ្ជកម្ម គឺជាផ្នែកសំខាន់ចាំបាច់មួយនៃការខិតខំជាអន្តរជាតិ ដើម្បីការពារកុំអោយមានការសាយភាយនៃអាវុធប្រល័យលោក។ វាជំរុញដល់សន្តិសុខ និងស្ថិរភាពសាកលលោក ហើយសំរួលដល់ការអភិវឌ្ឍន៍សេដ្ឋកិច្ច ដោយផ្តោតធនធានរបស់រដ្ឋាភិបាល ទៅលើសកម្មភាពជួញដូរខុសច្បាប់ ឬដែលគួរអោយសង្ស័យ។ វាពង្រឹងទំនុកចិត្តរបស់អ្នកវិនិយោគ ដោយសំរួលដល់ការផ្ទេរបច្ចេកទេស រវាងអ្នកធ្វើពាណិជ្ជកម្មប្រកបដោយការទទួលខុសត្រូវ។ វាថែមទាំងបណ្តុះភាពជាដៃគូក្នុងចំណោមរដ្ឋាភិបាល និងឧស្សាហកម្ម ដែលចូលរួម នៅក្នុងចង្វាក់ផ្គត់ផ្គង់អន្តរជាតិ។
កម្មវិធីស្តីពីការគ្រប់គ្រងការនាំចេញ និងសន្តិសុខព្រំដែន ដែលមានការទាក់ទងជាមួយរឿងនេះ ដែលហៅកាត់ថា EXBS ហើយដែលធ្វើការឧបត្ថម្ភដល់សន្និសីទនេះ គឺជាគំនិតផ្តួចផ្តើមដំបូងរបស់រដ្ឋាភិបាលសហរដ្ឋអាមេរិក ក្នុងការគាំទ្រ ដល់ការខិតខំរបស់ប្រទេសដទៃទៀត ក្នុងការបំពេញកាតព្វកិច្ចរបស់គេ នៅក្រោមសេចក្តីសំរេចចិត្តលេខ ១៥៤០ នៃក្រុមប្រឹក្សាសន្តិសុខនៃអង្គការសហប្រជាជាតិ។
សេចក្តីសំរេចចិត្តនេះអំពាវនាវអោយបណ្តាប្រទេសនានាបង្កើតប្រព័ន្ធគ្រប់គ្រងពាណិជ្ជកម្ម ជាយុទ្ធសាស្រ្តជាតិដ៏មានប្រសិទ្ធភាព។ ប្រព័ន្ធបែបនេះគួរបញ្ចូលសមត្ថភាពក្នុងការពង្រឹងការអនុវត្តលើការគ្រប់គ្រងពាណិជ្ជកម្ម ជាយុទ្ធសាស្រ្ត នៅតាមព្រំដែនរបស់គេ។ ហេតុដូច្នេះហើយបានជាយើងមានការចូលរួមរបស់តំណាងនៃផ្នែកគយកម្ពុជា នៅថ្ងៃនេះ។ EXBS កំពុងធ្វើការជាមួយប្រទេសចំនួនជាង ៦០ ដើម្បីពង្រឹងសមត្ថភាពថ្នាក់ជាតិក្នុងការតាមដាន និងការពារកុំអោយមានការផ្ទេរគ្រាប់រំសេវ និងរបស់ដែលអាចប្រើបានពីរយ៉ាង និងក្នុងការធ្វើកុំអោយភេរវជន និងអ្នកដែលមានបំណងអាក្រក់ អាចទទួលបាននូវអាវុធដ៏គ្រោះថ្នាក់ទាំងនេះ។
ការចុះផ្សព្វផ្សាយមានសារៈសំខាន់ណាស់ សំរាប់បង្កើនការយល់ដឹងលើគ្រោះថ្នាក់នៃការរីករាលដាល។ សន្និសីទដូចជាសន្តិសីទនេះ គឺជាឱកាសមួយក្នុងចំណោមឱកាសនានាសំរាប់អោយលោកអ្នកកសាង និងរក្សាអ្នកធ្វើគោលនយោបាយ និងអ្នកជំនាញបច្ចេកទេស ដែលយកចិត្តទុកដាក់ ចំពោះការអនុវត្តប្រព័ន្ធគ្រប់គ្រងពាណិជ្ជកម្មដ៏មានប្រសិទ្ធភាព ដែលបំពេញបានតាមការទាមទារជាអន្តរជាតិ ក្នុងពេលដែលប្រទេសកម្ពុជាមានការអភិវឌ្ឍន៍ទៅមុខ។
ខ្ញុំសង្ឃឹមថា លោកអ្នកចង់លឺដោយផ្ទាល់ពីអ្នកគ្រប់គ្រងច្បាប់ទំលាប់នៅក្នុងប្រទេសជិតខាង ដែលមានវត្តមានជាមួយយើង នៅថ្ងៃនេះ ដើម្បីប្រាប់ពីវិធី ដែលគេបង្កើត និងរក្សាការគ្រប់គ្រងពាណិជ្ជកម្មជាយុទ្ធសាស្រ្ត។
យើងអាចរួមគ្នាប្រយុទ្ធប្រឆាំងនឹងការរីកសាយនៃអាវុធប្រល័យលោក ហើយការពារកុំអោយមានការផ្ទេរដោយខុសច្បាប់នូវអាវុធធម្មតា។ យើងអាចរួមគ្នាធ្វើអោយមានសុវត្ថិភាពដល់ផែនដី ដែលជាផ្ទះរបស់យើង ហើយខ្ញុំសូមជូនពរអោយសនិ្នសីទនេះប្រកបដោយផ្លែផ្កា។
សូមអរគុណ។
