ថ្ងៃទី១៨ ខែមិនា ឆ្នាំ២០១៦
សូមជំរាបសួ លោកជំទាវ ភឿង សកុណា រដ្ឋមន្រ្តីក្រសួងវប្បធម៌ និងវិចិត្រសិល្បៈ និងតំណាងដទៃទៀត នៃរាជរដ្ឋាភិបាលកម្ពុជា សមាជិកអង្គទូត ភ្ញៀវកិត្តិយស លោក លោកស្រី និងអ្នកស្នេហារបាំគ្រប់វ័យទាំងអស់។
ខ្ញុំពិតជាមានកិត្តិយសណាស់ ដែលមានវត្តមាននៅល្ងាចនេះ ក្នុងសាលសន្និសីទចតុមុខដ៏ល្អពិសេស ដើម្បីស្វាគមន៍លោកអ្នកទាំងអស់ ដែលអញ្ជើញមកទស្សនាការសំដែងរួមគ្នាដ៏ពិសេសនេះ របស់ក្រុមរបាំ Dana Tai Soon Burgess Dance Company ដែលមកពីសហរដ្ឋអាមេរិក និងក្រុមរបាំកម្ពុជា ដែលមានឈ្មោះថា ក្រុមសិល្បះ សុភីលីន ដោយមានការឧបត្ថម្ភពីស្ថានទូតអាមេរិកប្រចាំនៅកម្ពុជា។
ក្រុមរបាំ Dana Tai Soon Burgess Dance Company ដែលមកពីទីក្រុងវ៉ាស៊ីនតោន ស្ថិតក្នុងចំណោមក្រុមរបាំល្បី ដែលបកស្រាយរបាំសម័យទំនើប ដែលយើងមាន មិនត្រឹមតែនៅទីក្រុងវ៉ាស៊ីនតោនតែប៉ុណ្ណោះទេ តែថែមទាំងនៅក្នុងប្រទេសអាមេរិកទាំងមូលថែមទៀតផង។ លោក Dana និងក្រុមរបស់គាត់គឺពិតជាឯកអគ្គរដ្ឋទូតរបាំមែន ដោយបានធ្វើដំណើរនៅទូទាំងសហរដ្ឋអាមេរិក និងពិភពលោក ដើម្បីសំដែងរបាំបែបថ្មី ពិបាក និងធ្វើអោយគេចាប់អារម្មណ៍ ដែលតាមសំដីរបស់លោក Dana គឺថាជា “ភាសារបាំជាសាកល”។
ថ្វីបើយើងមិនបានស្គាល់គ្នានៅមុនថ្ងៃនេះក្តី តែខ្ញុំមានអារម្មណ៍ថា មានទំនាក់ទំនងជិតដិតជាមួយលោក Dana ពីព្រោះយើងមានអ្វីៗដូចគ្នាច្រើន។ ខ្ញុំមិនអាចរាំបានដូចគាត់ទេ…តែយើងមានអាយុប្រហែលគ្នា យើងគឺជាជនជាតិអាមេរិកមានដើមកំណើតពីកូរ៉េ យើងទាំងពីរនាក់ធំឡើងនៅរដ្ឋ California។ វាជាការបង្ហាញយ៉ាងពិតប្រាកដនៃ “ភាសារបាំជាសាកល” ដែលយើងជួបគ្នាជាលើកដំបូងនៅរាជធានីភ្នំពេញនេះ នៅជ្រុងម្ខាងទៀតនៃពិភពលោក។
ពិតមែនហើយ ក្រុមសិល្បៈសុភីលីន និងអ្នកដឹកនាំក្រុមនេះ គឺលោកស្រី Sophiline Shapiro មិនត្រូវការការណែនាំអោយស្គាល់ទេ នៅក្នុងសាលចតុមុខនេះ ដែលគេមកសំដែងជាធម្មតា។ លោកស្រី Sophiline គឺជាដៃគូដ៏ល្អសំរាប់គំរោងនេះ ពីព្រោះលោកស្រីភ្ជាប់ទំនាក់ទំនងគ្នារវាងវប្បធម៌របស់យើងទាំងពីរបានល្អជាងអ្នកណាទាំងអស់ ដោយលោកស្រីបានសិក្សា និងធ្វើការនៅក្នុងប្រទេសកម្ពុជាផង នៅសហរដ្ឋអាមេរិកផង។ លោកស្រី Sophiline និងក្រុមរបាំរបស់លោកស្រីតំណាងអោយអ្វី ដែលល្អបំផុតនៃរបាំបូរាណ និងរបាំសម័យរបស់ខ្មែរ។ ខ្ញុំរីករាយនឹងរាប់លោកស្រី និងស្វាម៉ីរបស់លោកស្រីជាមិត្ត និងជាជនរួមជាតិអាមេរិក។
របាំគឺជាឧបករណ៍ពិសេស និងមានប្រសិទ្ធភាពមួយ សំរាប់សំរេចបានលើរឿងនេះ ពីព្រោះរបាំមិនទាមទារភាសារួមទេ។ វាពឹងតែនៃចលនានៃខ្លួនមនុស្ស ដើម្បីបំផុសអារម្មណ៍ និងនាំសារទៅកាន់មនុស្សដែលមានវប្បធម៌ខុសៗគ្នា។ សមត្ថភាពនេះដែលសំខាន់លើសវប្បធម៌ និងភាសា គឺជាហេតុផលមួយក្នុងចំណោមហេតុផលនានា ដែលមនុស្សជាតិបានរាំរបាំ តាំងពីការចាប់ផ្តើមនៃអារ្យធម៌របស់យើង ឬប្រហែលជាមុនហ្នឹងទៀតផង។ ជាការពិត ការរាំគឺជាផ្នែកមួយនៃអ្វីដែលធ្វើអោយយើងមានលក្ខណៈជាមនុស្សជាតិ។ ហេតុដូច្នេះហើយបានជាកម្មវិធីនៅយប់នេះ សំខាន់ពិសេសខ្លាំង។
មុនពេលខ្ញុំបញ្ចប់សុន្ទរកថារបស់ខ្ញុំនៅយប់នេះ ខ្ញុំសូមនិយាយពីយុវជនបីក្រុមដ៏អស្ចារ្យ ដែលមានវត្តមានជាមួយយើងនៅពេលនេះ ហើយដែលតំណាងអោយអ្វីដែលល្អបំផុតនៃអនាគតរបស់ប្រទេសកម្ពុជា។
ក្រុមទី១ យើងមានសិស្សក្នុងកម្មវិធីអាហារូបករណ៍ខ្នាតតូចផ្នែកភាសាអង់គ្លេសរបស់យើងនៅភ្នំពេញ។ កម្មវិធីនេះផ្តល់ការបណ្តុះបណ្តាលផ្នែកភាសាអង់គ្លេសចំនួន ២ ឆ្នាំ ដល់សិស្សដែលរៀនពូកែនៅវិទ្យាល័យ នៅទូទាំងប្រទេសកម្ពុជា ដើម្បីអោយគេមានជំនាញសំរាប់យកទៅប្រើក្នុងការងារ ឬដើម្បីបន្តការសិក្សារបស់គេ។ សិស្សក្នុងកម្មវិធីនេះ សូមលើកដៃឡើង។
ក្រុមទី២ មកពីមជ្ឈមណ្ឌលសិក្សា Liger Learning Center ដែលជាអង្គការមិនស្វែងរកកំរៃដ៏ល្អមួយរបស់អាមេរិក ហើយដែលផ្តល់អោយយុវជនកម្ពុជានូវធនធាន និងការតំរង់ផ្លូវ ដើម្បីអោយគេក្លាយជា “ភ្នាក់ងារនៃការផ្លាស់ប្តូរ” សំរាប់អនាគត។ ក្រុមទី២ សូមលើកដៃឡើង ដើម្បីអោយគេស្គាល់។
ក្រុមទី៣ គឺសមាជិកនៃក្រុមយុវជនក្នុងកម្មវិធីមេដឹកនាំយុវជនវ័យក្មេងរបស់យើងនៅអាស៊ីអាគ្នេយ៍ ឬ YSEALI។ YSEALI គឺជាកម្មវិធីផ្តួចផ្តើមសំខាន់របស់លោកប្រធានាធិបតី Obama ដើម្បីធ្វើអោយមានការចូលរួមរបស់យុវជននៅតំបន់អាស៊ីអាគ្នេយ៍។ តាំងពីកម្មវិធីនេះត្រូវបានចាប់ផ្តើមឡើងនៅ ឆ្នាំ២០១៣ សមាជិក YSEALI នៅកម្ពុជាបានទទួលអំណោយថវិកាសំរាប់ផ្តើមសកម្មភាពគំរោង បានចូលរួមនៅក្នុងសន្និសីទថ្នាក់ជាតិ និងថ្នាក់តំបន់ ហើយរហូតដល់បានធ្វើដំណើរទៅសេតវិមាន ដើម្បីជួបជាមួយលោកប្រធានាធិបតី Obama ។ ឯណាសមាជិក YSEALI របស់យើង នៅយប់នេះ?
ខ្ញុំសូមអរគុណលោកអ្នកទាំងអស់ ដែលបានអញ្ជើញមកយប់នេះ និងសូមអរគុណដល់ក្រសួងវប្បធម៌ អ្នករាំរបាំទាំងអស់ និងអរគុណដល់មនុស្សគ្រប់គ្នា ដែលបានខិតខំធ្វើអោយមានយប់នេះឡើង។ សូមទស្សនាការសំដែងរបាំដោយរីករាយទាំងអស់គ្នា!
