សាកលវិទ្យាល័យភូមិន្ទភ្នំពេញ
ថ្ងៃទី១៩ ខែមិនា ឆ្នាំ២០១៦
សូមជំរាបសួ ឯកឧត្តមបណ្ឌិតសាបូ អូយ៉ាណូ រដ្ឋលេខាធិការនៃក្រសួងបរិស្ថាន លោកឈិត សំអាត ប្រធានអង្គការមូលនិធិសត្វព្រៃពិភពលោក (WWF) នៅកម្ពុជា សមាជិកនៃក្រុមប្រឹក្សាយុវជនឯកអគ្គរដ្ឋទូតសហរដ្ឋអាមេរិក ភ្ញៀវកិត្តិយស សិស្ស និស្សិត លោកគ្រូ អ្នកគ្រូ អស់លោក លោកស្រី។
សូមអរគុណ និងសួស្តី។ ខ្ញុំមានកិត្តិយសដោយមានវត្តមាននៅពេលនេះជាមួយលោកអ្នកទាំងអស់ សំរាប់អ្វីដែលពិតជាបទពិសោធន៍មួយដែលមិនអាចបំភ្លេចបាន។ ម៉ោងអបអរទិវាផែនដី ឆ្នាំ២០១៦ ទីបំផុត បានមកដល់ហើយ ដូច្នេះ សូមចាប់ដៃគ្នា ដើម្បីអបអរព្រឹត្តិការណ៍ដ៏ពិសេសនេះ!
ខ្ញុំមានការចាប់អារម្មណ៍យ៉ាងខ្លាំងចំពោះភាពស្វាហាប់ និងភាពសាទររបស់លោកអ្នកម្នាក់ៗ នៅយប់នេះ។ នៅប្រទេសកម្ពុជា ខ្ញុំបានជួបមនុស្សមួយចំនួន ពិសេសយុវជន ដែលមានការគិតគូរខ្ពស់ក្នុងការការពារ អភិរក្ស និងធ្វើការអប់រំអ្នកដទៃស្តីពីបរិស្ថាន។ ខ្ញុំសូមសរសើរក្រសួងបរិស្ថាន ដែលបានធ្វើការដើម្បីកែលំអការងារអភិរក្ស សំរួលដល់ការអភិវឌ្ឍន៍ប្រកបដោយនិរន្តភាព ហើយការពារធនធានធម្មជាតិនៅកម្ពុជា។
ខ្ញុំសូមអរគុណផងដែរចំពោះមិត្តដ៏ល្អរបស់យើងនៅក្នុងអង្គការ WWF នៅកម្ពុជា ដែលជាអង្គការឈានមុខគេមួយផ្នែកបរិស្ថាន នៅកម្ពុជា។ លោកប្រធានអង្គការ ឈិត សំអាត បានរួមចំណែកយ៉ាងច្រើនដល់ការយល់ដឹង និងការធ្វើសហប្រតិបត្តិការច្រើន ដើម្បីដោះស្រាយបញ្ហានៃការគំរាមកំហែងចំពោះបរិស្ថាន។ គំរូរបស់លោកគឺជាការបំផុសទឹកចិត្តដល់ខ្ញុំ និងអ្នកដទៃទៀត នៅកម្ពុជា និងនៅជុំវិញពិភពលោក។ យើងសូមវាយតំលៃខ្ពស់ចំពោះការខិតខំរបស់លោកអ្នក ក្នុងការធ្វើអោយមនុស្សជំនាន់ក្រោយមានការយល់ដឹងច្រើនលើបញ្ហាបរិស្ថាន ហើយមានលទ្ធភាពធ្វើសកម្មភាពការងារ។
ពេលនេះ ខ្ញុំសូមបង្ហាញមនុស្សមួយក្រុមចុងក្រោយ គឺមេដឹកនាំយុវជននៅក្នុងក្រុមប្រឹក្សាយុវជន (AYC) របស់លោកឯកអគ្គរដ្ឋទូតអាមេរិក William Heidt ។ សូមសមាជិក AYC ទាំងអស់លើកដៃឡើងដើម្បីអោយគេស្គាល់។ ស្ថានទូតអាមេរិកមានមោទនភាពនឹងធ្វើការឧបត្ថម្ភម្តងទៀតដល់ការអបអរម៉ោងផែនដី នៅឆ្នាំនេះ តាមរយៈ AYC ដែលបានដឹកនាំក្នុងការរៀបចំពិធីនេះឡើង ជាលើកទី ២ ជាប់គ្នាមកនេះ។ ជាមួយនឹងភាពស្វាហាប់ និងគំនិតច្នៃប្រឌិតខ្ពស់ AYC មិនគ្រាន់តែធ្វើជាទីប្រឹក្សាអោយលោកឯកអគ្គរដ្ឋទូត Heidt លើបញ្ហានានា ដែលមានសារៈសំខាន់សំរាប់យុវជនកម្ពុជាតែប៉ុណ្ណោះទេ តែពួកគេថែមទាំងរៀបចំ និងដំណើរការគំរោងមួយចំនួន ដែលផ្តល់ផលដល់ជីវិតប្រជាជនកម្ពុជារាប់ពាន់នាក់។ ការងារនិងទឹកចិត្តដែលមិនខ្លាចនឿយហត់របស់គេ នៅក្នុងការរៀបចំពិធីអបអរម៉ោងផែនដី ឆ្នាំ ២០១៦ គឺជាការបំផុសទឹកចិត្តមួយដល់យើងទាំងអស់គ្នា។
សមាជិក AYC ម្នាក់ៗគឺជាសមាជិកនៃគំរោងគំនិតផ្តួចផ្តើមស្តីពីមេដឹកនាំយុវជននៅអាស៊ីអាគ្នេយ៍ (YSEALI) ដែលមានការចូលរួមរបស់យុវជនកម្ពុជាជាតិ ៥ ០០០ នាក់! ដូចលោកអ្នកជាច្រើនជ្រាបស្រាប់ហើយ គំរោង YSEALI ត្រូវបានបង្កើតឡើងដោយលោកប្រធានាធិបតី Barack Obama ជាគំនិតផ្តួចផ្តើមរបស់លោកក្នុងការជំរុញអោយយុវជនមានសិទ្ធិអំណាច ធ្វើការទំនាក់ទំនងគ្នាជាបណ្តាញ និងធ្វើការអភិវឌ្ឍន៍លើភាពជាអ្នកដឹកនាំនៅទូទាំងតំបន់នៃសមាគមអាស៊ាន។ វាបានបើកទ្វារសំរាប់យុវជនអោយធ្វើសកម្មភាពលើបញ្ហាជាគន្លឹះ ដូចជាការការពារបរិស្ថាន ការអភិវឌ្ឍន៍សេដ្ឋកិច្ច ការអប់រំ និងការចូលរួមរបស់ពលរដ្ឋ។ ខ្ញុំបានជួបយុវជនឆ្នើមៗខ្លះជាសមាជិក YSEALI ហើយខ្ញុំសូមអោយអ្នកលើកទឹកចិត្តអ្នកដទៃទៀតអោយចូលរួមនៅក្នុងគំរោងនេះ ដែលនៅពេលនេះ មានសមាជិកជាង ៦០ ០០០ នាក់ នៅទូទាំងតំបន់អាស៊ីអាគ្នេយ៍។
នៅក្នុងសន្និសីទនៅទីក្រុងប៉ារីស កាលពីឆ្នាំទៅ លោកប្រធានាធិបតី Obama បាននិយាយអំពីការជួបជាមួយយុវជនមកពីប្រទេសកម្ពុជា និងមកពីទូទាំងតំបន់ នៅក្នុងកិច្ចប្រជុំកំពូល YSEALI ឆ្នាំ២០១៥ នៅប្រទេសម៉ាឡេស៊ី។ នៅពេលលោកប្រធានាធិបតីបើកអោយមានវគ្គសួរឆ្លើយជាមួយមេដឹកនាំវ័យក្មេងទាំងនោះ សំណួរដំបូងមិនទាក់ទងនឹងភេរវកម្ម សេដ្ឋកិច្ច ឬសិទ្ធិមនុស្សទេ។ គឺវាស្តីពីការប្រែប្រួលអាកាសធាតុ និងអ្វីដែលយុវជនអាចជួយបាន។ នៅក្នុងចំណោមប្រទេសចំនួនជិត ២០០ ដែលចូលរួមនៅក្នុងសន្និសីទនោះ គេមើលឃើញថា នៅពេលទាក់ទងនឹងការប្រែប្រួលអាកាសធាតុ ការការពារបរិស្ថាន និងនិរន្តភាព យុវជនគួរត្រូវបានគេលើកទឹកចិត្តអោយឡើងនិយាយ ហើយចូលរួម។ ក្នុងពេលយើងអបអរម៉ោងផែនដី ឆ្នាំ២០១៦ នេះគឺជាឱកាសរបស់យើងសំរាប់បង្ហាញពិភពលោកទាំងមូលថា យុវជនកម្ពុជាកំពុងតែធ្វើការលើរឿងនេះ។
ខ្ញុំមានសេចក្តីរីករាយដោយដឹងថា លោកអ្នកទាំងអស់ ដែលមានវត្តមាននៅពេលនេះ សំរាប់ពេលឥឡូវ និងទៅអនាគត មានការប្តេជ្ញាចិត្ត ក្នុងការធ្វើអោយសហគមន៍របស់លោកអ្នកមានភាពប្រសើរ ដោយធ្វើសកម្មភាពច្បាស់លាស់ ដើម្បីដោះស្រាយការគំរាមកំហែងចំពោះបរិស្ថានរួមរបស់យើង។ ក្នុងនាមជាម្តាយម្នាក់ ខ្ញុំចង់ធ្វើយ៉ាងណាអោយកូនប្រុសខ្ញុំធំឡើងនៅក្នុងពិភពលោកមួយដែលផ្តល់សុខភាពល្អ និងសុវត្ថិភាព។ នេះគ្រាន់តែជាហេតុផលមួយក្នុងចំណោមហេតុផលនានា ដែលនាំអោយខ្ញុំគិតថា វាជាការសំខាន់ដែលត្រូវ “បញ្ចាំងភ្លើង” អោយគេឃើញការផ្លាស់ប្តូរអាកាសធាតុ សូម្បីតែម៉ោងអបអរផែនដីបានកន្លងទៅហើយក្តី។ ខ្ញុំប្រាកដក្នុងចិត្តថា ការចូលរួមរបស់លោកអ្នកនៅក្នុងព្រឹត្តិការណ៍នេះគឺជាទង្វើមួយក្នុងចំណោមទង្វើសំខាន់ៗជាច្រើន ដែលមានផលយ៉ាងជ្រាលជ្រៅ មិនមែនត្រឹមតែនៅកម្ពុជាតែប៉ុណ្ណោះទេ តែថែមទាំងនៅទូទាំងតំបន់ និងពិភពលោកផងដែរ។
ខ្ញុំសូមបញ្ចប់សុន្ទរកថាដោយដកស្រង់សំដីរបស់បណ្ឌិត Seuss ដែលជាអ្នកនិពន្ធសៀវភៅប្រជាប្រិយកុមារម្នាក់ ដែលមានចំណងជើងដូចជា The Cat in the Head, Green Eggs និង How the Grinch Stole Christmas ។ សៀវភៅមួយដែលកូនប្រុសខ្ញុំចូលចិត្តក្នុងចំណោមសៀវភៅរបស់បណ្ឌិត Seuss មានចំណងជើងថា The Lorax ដែលក្នុងនោះ តួនិយាយថា “បើអ្នកណាម្នាក់ដូចអ្នក មិនគិតគូរទេ គ្មានអ្វីនឹងបានប្រសើរទេ។ មិនបានទេ”។ ខ្ញុំសូមអរគុណដល់ក្រសួងបរិស្ថាន អង្គការ WWF ក្រុមប្រឹក្សាយុវជនឯកអគ្គរដ្ឋទូត និងលោកអ្នកទាំងអស់ដែលមានវត្តមាននៅពេលនេះ ដែលយកចិត្តទុកដាក់ចំពោះការប្រែប្រួលអាកាសធាតុ និងចំពោះការឆ្លើយតបនឹងការអំពាវនាវអោយធ្វើសកម្មភាពលើបញ្ហានេះ។ សូមអរគុណ។
