ថ្ងៃទី២១ ខែសីហា ឆ្នាំ២០១៥
តាងនាមអោយស្ថានទូតសហរដ្ឋអាមេរិក ខ្ញុំសូមសំដែងការស្វាគមន៍ និងអំណរគុណដល់លោកលោកស្រីទាំងអស់ ដែលមានវត្តមានជាមួយយើង នៅពេលនេះ។ យើងមានកិត្តិយសដោយបានធ្វើការជាមួយមជ្ឈមណ្ឌលបុប្ផាណា ដើម្បីឧបត្ថម្ភដល់ការបញ្ចាំងជាអន្តរជាតិលើកដំបូងនូវភាពយន្ត ដែលមានចំណងជើងថា វាលពិឃាត វេជ្ជបណ្ឌិត ហាំង ង៉ោ ដែលជាភាពយន្តឯកសារបានទទួលរង្វាន់ ហើយត្រូវបានផលិតដោយអ្នកផលិតភាពយន្តអាមេរិក ដែលត្រូវបានតែងតាំងសំរាប់ទទួលរង្វាន់ Oscar គឺលោក Arthur Dong ។ យើងរីករាយដោយលោក Arthur មានវត្តមានជាមួយយើងនាយប់នេះ សំរាប់ឱកាសដ៏ពិសេសមួយនេះ។
ភាយន្តរបស់លោក Arthur គឺស្តីពីរឿងដែលធ្វើអោយមានការទាក់ទាញចិត្តយ៉ាងខ្លាំង ស្តីពីរឿងផ្ទាល់ខ្លួនរបស់លោកវេជ្ជបណ្ឌិត ហាំង ង៉ោ ដែលមានឈ្មោះល្បីចំពោះការសំដែងដែលនាំអោយលោកទទួលបានរង្វាន់ Oscar នៅក្នុងរឿង វាលពិឃាត ។ ក្នុងនាមជាអ្នករួចជីវិតពីសម័យខ្មែរក្រហម វេជ្ជបណ្ឌិត ហាំង ង៉ោ បានគេចេញពីរយៈពេលរាប់ឆ្នាំនៃការធ្វើទារុណកម្ម ហើយក្រោយមក បានទទួលការសាទរជាអន្តរជាតិជាអ្នកសំដែងភាពយន្ត និងជាអ្នកតស៊ូមតិ។ ដូចដែលលោកអ្នកនឹងឃើញនៅក្នុងភាពយន្តនៅយប់នេះ ដំណើរដ៏អស្ចារ្យរបស់លោកតំណាងអោយភាពខ្លាំង និងស្មារតីរឹងប៉ឹងនៃប្រជាជនកម្ពុជា។
អំណាចនៃភាពយន្តមានភាពអស្ចារ្យមែន។ ភាពយន្តធ្វើអោយមនុស្សរួបរួមគ្នា បំពេរអារម្មណ៍ ហើយមានខ្លះទៀតធ្វើអោយគេសើច ឬយំ។ ខ្ញុំជឿផងដែរថា ភាពយន្តបង្រៀនយើងអំពីសង្គមរបស់យើង ទាំងនៅពេលអតីតកាល ទាំងនៅពេលបច្ចុប្បន្នកាល ដោយក្លាយជាផ្នែកសំខាន់មួយនៃការចងចាំរបស់យើងស្តីពីប្រវត្តិសាស្រ្ត។ វេជ្ជបណ្ឌិត ហាំង ង៉ោ យល់ហើយអោយតំលៃដល់ភាពយន្ត និងសិល្បៈ ដូចដែលគាត់ធ្លាប់បានមានប្រសាសន៍ថា “សិល្បៈអាចពន្យល់អ្វីៗគ្រប់យ៉ាងតាមដែលអាចធ្វើទៅបាន ដើម្បីប្រាប់ទៅពិភពលោក”។ រឿងមួយដែលភាពយន្តនេះប្រាប់យើងគឺថា យើងមិនត្រូវភ្លេចមេរៀនពីអតីតកាលទេ ក្នុងពេលដែលយើងដើរទៅមុខ។
ខ្ញុំសូមសំដែងអំណរគុណ ដោយស្មោះចំពោះលោក ជា សុភាព និងមិត្តភក្តិរបស់យើងនៅមជ្ឈមណ្ឌលបុប្ផា ណា ដែលជាដៃគូដ៏ល្អរបស់ស្ថានទូតអាមេរិក នៅក្នុងការងារ និងគំរោងមួយចំនួន ហើយព្រឹត្តិការណ៍នេះគឺជាឧទាហរណ៍មួយទៀតនៃភាពជាដៃគូដ៏ល្អនេះ។ ខ្ញុំសូមអរគុណផងដែរដល់ក្រសួងវប្បធម៌ និងវិចិត្រសិល្បៈ និងរោងភាពយន្ត Major Cineplex by Cellcard របស់ផ្សាទំនើបអេអន ដែលបានជួយធ្វើអោយមានការបញ្ចាំងភាពយន្តនេះឡើង។ ការខិតខំរបស់លោកអ្នកពិតជាជួយធ្វើអោយចំណងទាក់ទងរវាងសហរដ្ឋអាមេរិក និងប្រទេសកម្ពុជាមានភាពកាន់តែជ្រាលជ្រៅ។
ជាទីបញ្ចាប់នេះ ខ្ញុំសូមលើកឡើងនូវសុភាសិតខ្មែរដ៏ល្បីមួយ ដែលទូន្មានកុមារអោយប្រតិបត្តិតាម និងអភិរក្សវប្បធម៌ ដ៏សំបូរបែបរបស់ព្រះរាជាណាចក្រកម្ពុជា គឺសុភាសិតដែលនិយាយថា “វប្បធម៌រលត់ ជាតិរលាយ វប្បធម៌ពណ្ណរាយ ជាតិថ្កើងថ្កាន” ។ យើងសូមអរគុណដ៏ជ្រាលជ្រៅបំផុតចំពោះលោក Arthur Dong និងអ្នកដែលមានចំណែកក្នុងការនាំយករឿងរបស់វេជ្ជបណ្ឌិត ង៉ោ អោយគេបានដឹងលឺគ្រប់គ្នា ដែលជាការជួយអោយប្រទេសកម្ពុជាធ្វើការអភិរក្សបេតិកភណ្ឌវប្បធម៌ដ៏អស្ចារ្យរបស់ខ្លួន។
សូមអរគុណច្រើន ហើយខ្ញុំសង្ឃឹមថា លោកអ្នកនឹងពេញចិត្តភាពយន្តនេះ។
