កំពង់ស្ពឺ
ថ្ងៃទី១០ ខែមេសា ឆ្នាំ២០១៥
សូមជំរាបសួ ឯកឧត្តម ឧត្តមសេនីយ សែម សុវណ្ណនី ភ្ញៀវកិត្តិយស កំលាំងថែរក្សាសន្តិភាព អស់លោកលោកស្រី។ តាងនាមអោយស្ថានទូតសហរដ្ឋអាមេរិក ខ្ញុំមានកិត្តិយសសូមអបអរសាទរអ្នករៀនសូត្រក្នុងវគ្គហ្វឹកហ្វឺនគ្រូក្នុងប្រតិបត្តិការថែរក្សាសន្តិភាពរបស់អង្គការសហប្រជាជាតិ ដែលបានឆ្លងកាត់ការហ្វឹកហ្វឺនដ៏មានតំលៃនេះ។
ខ្ញុំសូមអបអរសិស្សប្រលងជាប់ទាំងអស់ ដែលនៅចំពោះមុខយើងនាថ្ងៃនេះ ទីមួយ ដោយសារការចូលរួមរបស់គេនៅក្នុងបុព្វហេតុនៃប្រតិបត្តិការថែរក្សាសន្តិភាពអន្តរជាតិ តែក៏ដោយសារការដែលគេបានទទួលឋានៈនៅក្នុងវគ្គនេះជាគ្រូផ្នែកថែរក្សាសន្តិភាពផងដែរ។ ក្នុងនាមជាអ្នកត្រូវបានគេប្រគល់សេចក្តីទុកចិត្តអោយបង្រៀនអ្នកថែរក្សាសន្តិភាពនៅពេលអនាគតរបស់ប្រទេសខ្លួន ខ្ញុំមានជំនឿថា អ្នករៀនសូត្រទាំងនេះតំណាងអោយបុគ្គលិកល្អបំផុតនៅក្នុងយោធារបស់គេ។
ចំពោះអ្នកដែលទើបរៀនចប់ថ្មីៗនេះ ខ្ញុំសូមនិយាយថា ខ្ញុំសូមវាយតំលៃខ្ពស់ចំពោះពេលវេលា និងការខិតខំដែលលោកអ្នកបានចំណាយក្នុងការរៀនសូត្រនៅទីនេះ ហើយខ្ញុំសូមលើកទឹកចិត្តអោយលោកអ្នកចែករំលែកមេរៀនដែលលោកអ្នកបានរៀនពីវគ្គហ្វឹកហ្វឺននេះ ហើយយកវាទៅអនុវត្តនៅក្នុងការហ្វឹកហ្វឺននៅក្នុងប្រទេសរបស់លោកអ្នក។ ការចូលរួមដោយផ្ទាល់របស់លោកអ្នកនៅក្នុងការថែរក្សាសន្តិភាព និងឆន្ទៈរបស់លោកអ្នកក្នុងការគាំទ្រ និងបង្ហាត់ដល់អ្នកដទៃលើប្រតិបត្តិការថែរក្សាសនិ្តភាព ឆ្លុះបញ្ចាំងអោយឃើញពីចរិកលក្ខណៈដ៏ប្រពៃ។
អ្នកថែរក្សាសន្តិភាពត្រូវប្រឈមនឹងគ្រោះថ្នាក់ខ្លាំងចំពោះខ្លួនគេ ដើម្បីជួយអ្នកដទៃអោយមានជីវិតរស់នៅតទៅទៀត នៅកន្លែងមានជំលោះ ដែលគេមិនអាចគេចចេញបាន។ការហ្វឹកហ្វឺននិងចំណេះដឹងដែលគេបានទទួលនៅក្នុងវគ្គហ្វឹកហ្វឺននេះ អាចជួយអនាគតអ្នកថែរក្សាសន្តិភាពអោយដឹងថា ត្រូវធ្វើអ្វីដើម្បីជួយម្តាយដែលគ្មានផ្ទះ កុមារដែលគ្មានអ្វីបរិភោគ ឬជីតាដែលហៀបនឹងស្លាប់ហើយគ្មានលុយទិញថ្នាំ។ សហរដ្ឋអាមេរិកមើលឃើញពីតំលៃនិងផលដែលអាចមាននៃវគ្គហ្វឹកហ្វឺននេះ ហើយមានកិត្តិយសក្នុងការជួយដល់ភារកិច្ចនៃការហ្វឹកហ្វឺន និងធ្វើអោយកងកំលាំងមានការត្រៀមរៀបចំជាស្រេចសំរាប់បំពេញការងារ នៅក្នុងបេសកកម្មថែរក្សាសន្តិភាព។
យើងមានអ្នកសិក្សាមកពីប្រទេសកម្ពុជា ឥណ្តូនេស៊ី ម៉ាឡេស៊ី ម៉ុងហ្គោលី នេប៉ាល់ ហ្វីលីពីន និងវៀតណាម ដែលជាការធ្វើអោយពិធីបិទវគ្គពេលរៀនចប់នេះមានសារៈសំខាន់ជាពិសេស ជាមួយនឹងអត្ថន័យអន្តរជាតិពិតៗ។ ចំពោះតួនាទីរបស់គេក្នុងការធ្វើអោយវគ្គហ្វឹកហ្វឺននេះមានជោគជ័យ ដំបូង តាងនាមអោយសហរដ្ឋអាមេរិក ខ្ញុំសូមអរគុណប្រទេសកម្ពុជាជាម្ចាស់ផ្ទះ កងយោធពលខេមរភូមិន្ទ និងដោយឡែក មជ្ឈមណ្ឌលជាតិសំរាប់ថែរក្សាសន្តិភាព និងលុបបំបាត់គ្រាប់មីន និងសំណល់ជាតិផ្ទុះសល់ពីសង្គ្រាម ។ គេបានផ្តល់ទីកន្លែង ធ្វើការសំខាន់ៗដែលបានកែប្រែផែនការអោយទៅជាការពិត ហើយបង្ហាញភាពរាក់ទាក់និងកក់ក្តៅ នៅក្នុងពិធីនាថ្ងៃនេះ។
ខ្ញុំសូមអរគុណផងដែរចំពោះគ្រូរបស់យើងដែលមកពីប្រទេសអូស្រ្តាលី ប្រេស៊ីល នូវែលសេឡង់ និងស៊ុយអែដ ដែលបានមកចែករំលែកចំណេះដឹង និងឯកទេស ក្នុងប្រតិបត្តិការថែរក្សាសន្តិភាព។ ការចូលរួម និងការរួមចំណែករបស់ប្រទេសជាច្រើននៅក្នុងវគ្គនេះ បង្ហាញអោយឃើញអ្វីដែលអាចធ្វើបាន តាមរយៈការធ្វើសហប្រតិបត្តិការជាអន្តរជាតិ ហើយសហរដ្ឋអាមេរិកមានមោទនភាពដោយស្ថិតក្នុងចំណោមអ្នកធ្វើការឧបត្ថម្ភ។
នៅទីបញ្ចប់ ខ្ញុំសូមជូនពរអោយអ្នកចូលរួមកម្ពុជានូវពរឆ្នាំថ្មីអោយប្រកបតែនឹងវិបុលភាព ជោគជ័យ និងសុភមង្គល។ ចំពោះអ្នកដែលនឹងវិលត្រឡប់ទៅមាតុប្រទេសវិញ សូមអោយការធ្វើដំណើរប្រកបដោយជោគជ័យ។ ចំពោះអ្នកចូលរួមទាំងអស់ សូមអោយជួបតែសំណាងល្អនៅក្នុងការហ្វឹកហ្វឺនផ្នែកថែរក្សាសន្តិភាពរបស់លោកអ្នក និងបេសកកម្មនៅពេលអនាគតដែលលោកអ្នកនឹងចូលរួម។ សូមអរគុណ។
