សៀមរាប
ថ្ងៃទី៣ ខែមិនា ឆ្នាំ២០១៦
សូមជំរាបសួ ឯកឧត្តម ម៉ម ប៊ុនហេង រដ្ឋមន្រ្តីក្រសួងសុខាភិបាល ឯកឧត្តម សុង រីហា អភិបាលរងខេត្តសៀមរាប វេជ្ជបណ្ឌិត ហុក គឹមហេង នាយកមជ្ឈមណ្ឌលជាតិផ្តល់ឈាម វេជ្ជបណ្ឌិត ក្រូស សារ៉ាត់ ប្រធានមន្ទីរសុខាភិបាលខេត្តសៀមរាប និងភ្ញៀវដទៃទៀតដែលមានវត្តមាននៅពេលនេះ។ ខ្ញុំរីករាយដោយបានមកខេត្តសៀមរាបដ៏ស្រស់ស្អាត ពិសេសនៅក្នុងឱកាសដូចថ្ងៃនេះ ដែលបញ្ជាក់ពីទំនាក់ទំនងនិងកិច្ចសហប្រតិបត្តិការជិតស្និទ្ធ រវាងប្រទេសយើងទាំងពីរ ហើយដែលនឹងធ្វើអោយមានភាពប្រសើរឡើងថ្មីៗ ចំពោះការថែទាំសុខភាពរបស់មនុស្សនៅក្នុងសហគមន៍។
ជាបឋម ខ្ញុំសូមទាញការចាប់អារម្មណ៍ទៅលើព្រឹត្តិការណ៍ដ៏សំខាន់នាថ្ងៃនេះ សំរាប់ការថែទាំសុខភាព នៅកម្ពុជា និងនៅខេត្តសៀមរាប។ មជ្ឈមណ្ឌលផ្តល់ឈាមភូមិភាគថ្មី ដែលយើងបើកនៅថ្ងៃនេះ នឹងទទួល រក្សាទុក ហើយចែកចាយឈាមស្អាត និងប្រកបដោយសុវត្ថិភាព សំរាប់សហគមន៍នេះ ដែលនឹងផ្តល់ប្រយោជន៍ច្រើនសំរាប់សុខភាពសាធារណៈ។
ដូចយើងដឹងច្បាស់ហើយ គ្រោះថ្នាក់ចរាចធ្ងន់ធ្ងរ ជាឧទាហរណ៍ អាចបណ្តាលអោយជនរងគ្រោះបាត់បង់ឈាមយ៉ាងច្រើន។ ឈាមដែលមជ្ឈមណ្ឌលថ្មីដែលយើងបើកនាថ្ងៃនេះ នឹងប្រមូលមករក្សាទុក អាចជាគន្លឹះសំរាប់ជួយអាយុជីវិតរបស់គេ។ វាដូចករណីម្តាយដែលបាត់បង់ឈាមច្រើនពេលឆ្លងទន្លេ ហើយដែលជីវិតរបស់គាត់កំពុងស្ថិតនៅក្រោមការគំរាមកំហែង ក៏ដូចជាជនរងគ្រោះ ដែលហូរឈាមនៅក្នុងក្រពះ ដោយសារការប្រើថ្នាំក្លែងក្លាយប្រកបដោយគ្រោះថ្នាក់ ដែលគេមិនដឹង។ ការរួចជីវិតនៅក្នុងករណីបែបនេះនៃកាបាត់បង់ឈាម ពឹងផ្អែកលើការមានឈាមយកមកជំនួស។
ការរួមចំណែកសំខាន់មួយទៀតរបស់មជ្ឈមណ្ឌលផ្តល់ឈាមភូមិភាគ មិនត្រឹមតែទប់ទល់បាននឹងបញ្ហាសុខភាពដែលបណ្តាលមកពីការបាត់បង់ឈាមនោះទេ តែថែមទាំងទប់ទល់បាននឹងជំងឺដែលឆ្លងដោយចៃដន្យ តាមរយៈឈាម។ ការគំរាមកំហែងដល់សុខភាពខ្លះដែលគ្រោះថ្នាក់បំផុតនៅកម្ពុជា ដូចជាជំងឺអេដស៍ និងជំងឺគ្រុនចាញ់ ស្ថិតនៅក្នុងជំពូកនេះ។ មជ្ឈមណ្ឌលផ្តល់ឈាមថ្មីភូមិភាគនេះមានបុគ្គលិក និងបរិក្ខាសំរាប់ធ្វើការវិភាគបានម៉ត់ចត់ សំរាប់រកមើល និងការពារការរាលដាលនៃជំងឺបែបនេះ។
ដើម្បីសំរេចការឈានឡើងទៅមុខបែបនេះ នៅក្នុងការថែទាំសុខភាពនៅកម្ពុជា ខ្ញុំសូមអបអរសាទរ និងអរគុណចំពោះឯកឧត្តម ម៉ម ប៊ុនហេង ចំពោះការរៀបចំផែនការ និងមានចក្ខុវិស័យទៅមុខ។ នៅក្នុងការប្រមូល និងគ្រប់គ្រងឈាម វេជ្ជបណ្ឌិត ហុក គឹមចេង គឺជាអ្នកអនុវត្តការងារដោយស្មោះ និងប្រកបដោយសមត្ថភាព។
នៅខេត្តសៀមរាប ខ្ញុំសូមអរគុណចំពោះឯកឧត្តម ឃឹម ប៊ុនសុង អភិបាលខេត្តសៀមរាប ព្រមទាំងអភិបាលរង សុង រីហា ដែលបានដឹកនាំក្នុងការធ្វើអោយការថែទាំសុខភាពជាវិស័យអាទិភាពសំរាប់តំបន់នេះ និងសូមអរគុណវេជ្ជបណ្ឌិត ក្រូស សារ៉ាត់ ប្រធានមន្ទីរសុខាភិបាលខេត្តសៀមរាប ដែលខ្ញុំដឹងថាជាអ្នកបានធ្វើអោយមានភាពប្រសើរឡើងច្រើនដល់ការថែទាំសុខភាពរបស់ខេត្តនេះ។ ចំពោះលោកអ្នកទាំងអស់ និងមនុស្សប្រុសស្រី ដែលខិតខំបំពេញការងារ និងដែលអស់លោកដឹកនាំ ហើយដែលមានវត្តមាននៅទីនេះជាច្រើន ខ្ញុំសូមអបអរសាទរចំពោះការងារជួយសង្រ្គោះជីវិត ដែលលោកអ្នកធ្វើរាល់ថ្ងៃ។
សហរដ្ឋអាមេរិកមានកិត្តិយសក្នុងការបានធ្វើជាដៃគូជាមួយលោកអ្នក នៅក្នុងការធ្វើអោយខេត្តសៀមរាប និងតំបន់ដទៃទៀតនៃប្រទេសកម្ពុជាជាកន្លែងប្រកបដោយសុខភាព និងសុភមង្គល។ ខ្ញុំមានមោទនភាពដែលបញ្ជាការដ្ឋាននៃកងទ័ពសហរដ្ឋអាមេរិកនៅតំបន់ប៉ាស៊ីហ្វិកបានធ្វើជាដៃគូជាមួយប្រទេសកម្ពុជា មិនត្រឹមតែនៅក្នុងការកសាង និងបំពាក់បរិក្ខាដល់អាគារនៃមជ្ឈមណ្ឌលផ្តល់ឈាមភូមិភាគថ្មីនេះទេ តែថែមទាំងសំខាន់ជាងនេះទៀតនោះ គឺធ្វើការបណ្តុះបណ្តាល និងរៀបចំដល់បុគ្គលិកប្រុសស្រីដែលនឹងធ្វើការនៅកន្លែងនេះ។
ការយកចិត្តទុកដាក់ខ្ពស់របស់អ្នកធ្វើការនៅក្នុងប្រព័ន្ធថែទាំសុខភាពរបស់ប្រទេសកម្ពុជា រាប់ពីថ្នាក់កំពូលដល់ថ្នាក់ក្រោមបំផុត បានទាក់ទាញការវិនិយោគជាបន្តជាច្រើនពីសហរដ្ឋអាមេរិក លើបេសកកម្ម និងជោគជ័យរបស់គេ។ កាលពីជាង ២ សប្តាហ៍មុន ប្រទេសកម្ពុជានិងសហរដ្ឋអាមេរិកបានបើកមជ្ឈមណ្ឌលផ្តល់ឈាមដូចគ្នានេះនៅខេត្តកំពង់ចាម ហើយនៅចុងឆ្នាំនេះ នឹងមានការបើកមជ្ឈមណ្ឌលជាតិផ្តល់ឈាមមួយថ្មី នៅភ្នំពេញ។
កម្មវិធីបន្ទាន់សំរាប់ការបន្ធូរបន្ថយផ្នែកជំងឺអេដស៍របស់ប្រធានាធិបតីសហរដ្ឋអាមេរិក (PEPFAR) និងទីភ្នាក់ងារបង្ការនិងកំចាត់ជំងឺឆ្លងសហរដ្ឋអាមេរិកថែមទាំងមានទំនាក់ទំនងដ៏យូរមកហើយក្នុងការជួយផ្នែកផ្តល់ឈាមស្អាត និងប្រកបដោយសុវត្ថិភាព សំរាប់កម្ពុជា។ រួមជាមួយនឹងមិត្តរបស់យើងគឺកាកបាទក្រហមអូស្ត្រាលី និងអង្គការសុខភាពពិភពលោក ពួកគេបានជួយក្នុងការធ្វើផែនការជាយុទ្ធសាស្រ្ត ការបណ្តុះបណ្តាល និងការអភិវឌ្ឍសំរាប់ផ្នែកផ្តល់ឈាមនៅកម្ពុជា ហើយបានធ្វើការដើម្បីអោយអន្តរជាតិទទួលស្គាល់មជ្ឈមណ្ឌលជាតិផ្តល់ឈាមនៅកម្ពុជា។ សហរដ្ឋអាមេរិកវាយតំលៃខ្ពស់ចំពោះការបានចូលរួមនៅក្នុងភាពជាដៃគូ និងធ្វើសហប្រតិបត្តិការបែបនេះ។
នៅទីបញ្ចប់ តាងនាមអោយសហរដ្ឋអាមេរិក ខ្ញុំសូមសំដែងជាថ្មីនូវការមានកិត្តិយស ដែលបានជួយដល់ការងារដ៏សំខាន់ ដែលលោកអ្នកធ្វើដើម្បីទ្រទ្រង់ដល់សុខភាពរបស់ប្រជាជនកម្ពុជា។ ខ្ញុំសូមអោយលោកអ្នកទទួលបានជោគជ័យជាបន្ត ក្នុងការការពារអាយុជីវិត និងសុខមាលភាពរបស់អ្នកជិតខាង មិត្តភក្តិ គ្រួសារ និងអ្នកទស្សនាអន្តរជាតិជាច្រើន ដែលមកមើលប្រាសាទអង្គរវត្ត ហើយទទួលបានភាពរាក់ទាក់របស់ប្រជាជននៅសៀមរាប ដែលជាកន្លែងគោលដៅទេសចរដ៏ល្បី ក្នុងពិភពលោក។ ជាចុងក្រោយ ខ្ញុំសូមអរគុណអស់ពីដួងចិត្តដល់អ្នកធ្វើការផ្នែកថែទាំសុខភាពទាំងអស់នៅទីនេះ ដែលខិតខំធ្វើការរាល់ថ្ងៃដើម្បីសហគមន៍របស់គេ។ សូមអរគុណ។
