ថ្ងៃទី៩ ខែកុម្ភៈ ឆ្នាំ២០១៥
សូមជំរាបសួ ឯកឧត្តម លោកជំទាវ ភ្ញៀវកិត្តិយស សិស្សនិងបុគ្គលិកសាលារំចេក និងប្រជាជននៅខេត្តកំពង់ចាម។ សូមអរគុណដែលបានអញ្ជើញខ្ញុំមកចូលរួមក្នុងពិធីដ៏សប្បាយនាថ្ងៃនេះ។ ខ្ញុំរីករាយដោយបានមកកាន់ខេត្តកំពង់ចាម ហើយជួបជាមួយមនុស្សល្អៗ ដែលចាត់ទុកតំបន់នេះជាស្រុកកំណើតរបស់គេ។
ថ្ងៃនេះ យើងអបអរការកសាងអាគារថ្មីៗ ដូច្នេះ ខ្ញុំគិតថា វាមានភាពសមហេតុផលដោយជាដំបូងធ្វើការរៀបរាប់ពីទំនាក់ទំនងរវាងសាលារៀន និងសហគមន៍ដែលសាលារៀននេះស្ថិតនៅ ទៅតាមពាក្យដែលអ្នកធ្វើការសាងសង់ប្រើ គឺថា សាលារៀនគឺជាគ្រឹះនៃសហគមន៍។ បើគ្មានមូលដ្ឋានរឹងមាំនៃស្ថាប័នមួយដែលធ្វើអោយកុមារអាចទទួលបានការសិក្សាដ៏មានតំលៃទេ ដែលក្នុងនោះ គ្រូបង្រៀនបង្កើនចំណេះដឹង និងភាពវាងវៃនៃសិស្សរបស់គាត់ នោះការចំរើនទៅមុខ និងស្ថិរភាពនៃរចនាសម្ព័ន្ធសហគមន៍ដែលមានគ្រឹះពឹងផ្អែកលើសាលារៀន នឹងមិនមានច្រើនទេ។ សហគមន៍មួយត្រូវការមនុស្សដែលមានភាពវាងវៃ ហើយនិងចំណេះដឹង អោយធ្វើជាអ្នកដឹកនាំ អ្នកផ្គត់ផ្គង់សំរាប់គ្រួសាររបស់គេ និងឪពុកម្តាយដែលមានការទទួលខុសត្រូវ។ ទាំងអស់នេះស្ថិតនៅក្នុងចំណោមតួនាទីដទៃទៀតដែលមានច្រើនរាប់មិនអស់ របស់មនុស្ស នៅក្នុងសង្គមមួយដែលមានការរីកចំរើន។ ដោយសារកិច្ចសហប្រតិបត្តិការរវាងសហរដ្ឋអាមេរិក និងប្រទេសកម្ពុជា ពេលនេះ យើងកំពុងអបអរការបើកសាលារៀនថ្មីមួយដែលផ្តល់អោយឃុំរំចេកនូវមូលដ្ឋានរឹងមាំនៃឱកាសក្នុងការទទួលបានការសិក្សាអប់រំ ដែលគ្រប់សហគមន៍ទាំងអស់ត្រូវការ ហើយគ្រប់កុមារទាំងអស់សមនឹងទទួលបាន។
តាងនាមអោយស្ថានទូតអាមេរិក ខ្ញុំសូមអរគុណចំពោះការងារដ៏ប្រពៃរបស់ក្រុមវិស្វករនៃកងទ័ពជើងគោកសហរដ្ឋអាមេរិក និងដៃគូខាងកម្ពុជារបស់គេដែលជាអ្នកម៉ៅការ ក្នុងការកសាងទីកន្លែងថ្មី ដែលយើងកំពុងបើកនៅថ្ងៃនេះ។ យើងរីករាយនឹងឃើញគំរូនេះនៃយោធាអាមេរិក នៅក្នុងការផ្តល់អោយសហគមន៍នានា ដូចជាសហគមន៍រំចេកនេះ។ គុណភាព និងការយកចិត្តទុកដាក់ដែលគេបានផ្តល់អោយទីកន្លែងនានា ដូចជាកន្លែងសំរាប់ផ្តល់ការថែទាំសុខភាព និងការសិក្សាអប់រំ នៅទូទាំងប្រទេសកម្ពុជា មានភាពគួរអោយកត់សំគាល់។ តែពួកគេមិនត្រឹមតែគិតគូរតែពីសំណង់តែប៉ុណ្ណោះទេ។ សំខាន់ជាងនេះទៅទៀត គេបានធ្វើការសំរេចចិត្តដែលបង្ហាញថា គេគិតគូរពីមនុស្ស ដែលប្រើប្រាស់អាគារថ្មីទាំងនេះ។ លោកអ្នកអាចកត់សំគាល់ឃើញថា កងវិស្វករនៃកងទ័ពជើងគោកអាមេរិកបានសង់សាលារៀនខ្ពស់ពីដី ដើម្បីកុំអោយទឹកចូលដល់ នៅពេលមានទឹកជំនន់។ អាគារត្រូវបានសង់ខ្ពស់បន្តិច ដើម្បីអោយគេអាចដើរនៅពីក្រោមបានដោយសុវត្ថិភាព និងដោយស្រួល ហើយអាចចតកង់ ម៉ូតូបាន។ បង្គន់ថ្មីត្រូវបានបញ្ចូលទៅក្នុងគំរោងសំរាប់ភាពងាយស្រួលនិងអនាម័យសំរាប់កុមារ និងបុគ្គលិក ហើយមានបន្ទប់បង្គន់មួយត្រូវបានធ្វើឡើងសំរាប់រទេះជនពិការចូលដល់។ ជាទូទៅ លោកអ្នករំពឹងថា អ្នកសាងសង់មានដៃរឹងមាំ តែការខិតខំប្រកបដោយការចេះគិតគូរទាំងនេះបង្ហាញអោយឃើញថា អ្នកធ្វើការសាងសង់របស់យើងមានចិត្តទូលាយថែមទៀតផង។ សូមទះដៃអបអរសាទរចំពោះវិស្វករ និងអ្នកសាងសង់ ដែលបានធ្វើការក្នុងគំរោងសាលារៀនដ៏ល្អនេះ។
ជាទីបញ្ចប់នេះ ខ្ញុំសូមលើកឡើងនូវពាក្យប្រៀនប្រដៅមួយរបស់ខ្មែរសំរាប់កុមារ ដែលនិយាយថា ចង់គាប់ប្រសើរ ត្រូវស្វះស្វែងរៀនសូត្រ រៀនត្រេះរិះគ្រប់សារពើ។ ខ្ញុំចង់អោយកុមារនៅឃុំរំចេក និងកុមារកម្ពុជាទាំងអស់ មានជីវិតរស់នៅសុខស្រួល ដោយប្រើប្រាស់អំណាចនៃការសិក្សាដែលគេបានទទួល ដើម្បីសំរេចបំណងរបស់គេ។
ខ្ញុំសូមអបអរចំពោះប្រជាជននៅខេត្តកំពង់ចាម ពិសេសកុមារ និងបុគ្គលិកនៃសាលាឃុំរំចេក។ សូមអរគុណ។
