កោះពេជ្យ រាជធានីភ្នំពេញ
ថ្ងៃទី២៦ ខែកញ្ញា ឆ្នាំ២០១៥
សូមជំរាបសួឯកឧត្តម យក់ ង៉ុយ រដ្ឋលេខាធិការក្រសួងអប់រំ យុវជន និងកីឡា អស់លោក លោកស្រីជាភ្ញៀវកិត្តិយស
ខ្ញុំមានសេចក្តីរីករាយដោយមានវត្តមាននៅពេលនេះជាមួយលោកអ្នក សំរាប់ពិធីដ៏មានសារៈសំខាន់នេះក្នុងការរៀបចំពិព័រណ៍យុវជន ឆ្នាំ២០១៥។ តាងនាមអោយរដ្ឋាភិបាលសហរដ្ឋអាមេរិក ខ្ញុំសូមឆ្លៀតឱកាសនេះដើម្បីអរគុណលោក Yin Bendarom ដែលមកពីវិទ្យាស្ថាន International Republican Institute និងអ៊ឹម សុទ្ធី ដែលមកពីក្រុមប្រឹក្សាយុវជនកម្ពុជា និងក្រុមរបស់គាត់ ដែលបានរៀបចំពិធីនេះឡើង ហើយអញ្ជើញខ្ញុំមកថ្លែង នៅថ្ងៃនេះ។ ខ្ញុំសូមអរគុណផងដែរដល់លោក យក់ ង៉ុយ រដ្ឋលេខាធិការនៃក្រសួងអប់រំ យុវជន និងកីឡា។ ខ្ញុំសូមសរសើរក្រសួងអប់រំចំពោះកំណែលំអគួរអោយកត់សំគាល់ នៅក្នុងដំណើរការរៀបចំការប្រលងថ្នាក់ទុទិយភូមិ កាលពីខែមុន។ នេះជាជោគជ័យដ៏ធំមួយ!
ក្នុងពេលខ្ញុំក្រឡេកមើលទៅអ្នកមកមើល ខ្ញុំមានចិត្តរំភើប ដោយឃើញយុវជនកម្ពុជាជាច្រើន ដែលមានទេពកោសល្យ និងមានក្តីសោមនស្សរីករាយ។ ខ្ញុំបានលឺពីការងារដ៏ប្រពៃដែលគេកំពុងធ្វើ ដើម្បីជំរុញលទ្ធិប្រជាធិបតេយ្យ និងអភិបាលកិច្ច នៅតាមសហគមន៍គេ។ ខ្ញុំដឹងថា ពេលនេះមានអ្នកមកពីទូទាំងប្រទេសកម្ពុជា។ ពេលខ្ញុំធ្វើដំណើរទៅខេត្តកោះកុងនិងខេត្តបាត់ដំបង ក្នុងពេលថ្មីៗនេះ និងទៅខេត្តសៀមរាប នៅមុននោះ ខ្ញុំបានជួបនឹងយុវជនដូចអ្នកទាំងអស់គ្នា ដែលកំពុងជួយសហគមន៍របស់គេ។ នៅទូទាំងប្រទេសកម្ពុជា គេបានបង្ហាញអោយឃើញថា គេមានឆន្ទៈក្នុងការធ្វើអោយប្រទេសរបស់គេមានការរីកចំរើន។ ខ្ញុំដឹងថា គេម្នាក់ៗមានបញ្ហាប្រឈមផ្ទាល់ខ្លួនរបស់គេនៅក្នុងជីវិត ហើយឪពុកម្តាយ និងជីដូនជីតារបស់គេបានធ្វើការលះបង់ច្រើនសំរាប់ពួកគេ។ ជោគជ័យ និងស្មារតីរឹងប៉ឹងរបស់គេគឺជាការជំរុញទឹកចិត្តសំរាប់យើងទាំងអស់គ្នា។ ខ្ញុំសូមសរសើរដល់ពួកគេទាំងអស់ដែលបានខិតខំធ្វើការ ហើយខ្ញុំសូមលើកទឹកចិត្តដល់ពួកគេ កុំអោយបោះបង់ក្នុងការឈានទៅសំរេចគោលដៅក្នុងជីវិត។
ពិធីនេះបង្ហាញពីសារៈសំខាន់ចាំបាច់នៃយុវជនចំពោះការអភិវឌ្ឍន៍របស់ប្រទេសកម្ពុជា។ យុវជនក៏ជាផ្នែកសំខាន់ផងដែរនៃសង្គមស៊ីវិល។ ខ្ញុំជឿថា សង្គមស៊ីវិលមួយដែលមានសេរីភាព រស់រវើក និងរឹងមាំ ធ្វើអោយប្រទេសកម្ពុជាមានភាពរឹងមាំ។ ខ្ញុំគ្មានការសង្ស័យទេថា ការចំរើនទៅមុខដែលប្រទេសកម្ពុជាមាន នៅក្នុងពេលប៉ុន្មានឆ្នាំថ្មីៗនេះ ពោលគឺសេដ្ឋកិច្ច ដែលកំពុងរីកចំរើន កំណែលំអលើការថែទាំសុខភាព និងសាលារៀន ជាដើម មួយចំណែកធំគឺបានមកដោយសារការងាររបស់សង្គមស៊ីវិល ដែលធ្វើការស្របគ្នាជាមួយនឹងរដ្ឋាភិបាល និងវិស័យឯកជន។
សហរដ្ឋអាមេរិកកំពុងជួយកម្មវិធីល្អៗជាច្រើន ដែលលើកទឹកចិត្តអោយយុវជនចូលរួមនៅកម្ពុជា ពីព្រោះការចូលរួមរបស់យុវជនគឺជាគន្លឹះសំរាប់អោយប្រទេសឈានទៅមានលទ្ធិប្រជាធិបតេយ្យសំរាប់ទាំងអស់គ្នា។ តាំងពីឆ្នាំ២០០៩ មក មានយុវជនកម្ពុជាជាង ១៧ ០០០ នាក់បានឆ្លងកាត់កម្មវិធីអប់រំពលរដ្ឋ ដែលបង្រៀនដោយក្រុមប្រឹក្សាយុវជនកម្ពុជា តាមរយៈកម្មវិធីស្តីពីការទទួលខុសត្រូវក្នុងអភិបាលកិច្ច និងនយោបាយ ដែលឧបត្ថម្ភថវិកាដោយទីភ្នាក់ងារសហរដ្ឋអាមេរិកសំរាប់ការអភិវឌ្ឍន៍អន្តរជាតិ (USAID) ។ តាំងពីឆ្នាំ ២០១២ មក ទីភ្នាក់ងារ USAID បានឧបត្ថម្ភ ៤០ វគ្គក្នុងកម្មវិធីពិភាក្សាដេញដោលគ្នាលើគោលនយោបាយរបស់មនុស្សជំនាន់ថ្មីតាមទូរទស្សន៍ ដែលធ្វើអោយសារស្តីពីលទ្ធិប្រជាធិបតេយ្យ និងការពិភាក្សាដេញដោលលើគោលនយោបាយបានឃើញនិងលឺដោយមនុស្សរាប់លាននាក់ នៅទូទាំងប្រទេស។
នៅក្នុងសកម្មភាពដោយឡែកមួយ មានអ្នកចូលរួមចំនួន ៤១ នាក់ ដែលក្នុងនោះ មាន ១៤ នាក់ជានារី បានឆ្លងវគ្គរៀនសូត្រស្តីពីមេដឹកនាំពេលអនាគត ដែលឧបត្ថម្ភថវិកាដោយទីភ្នាក់ងារ USAID ។ អ្នករៀនសូត្រចំនួន ១៤ ក្នុងចំណោមនេះ ពេលនេះ កំពុងតែកាន់មុខតំណែងជាន់ខ្ពស់ក្នុងរដ្ឋាភិបាល។ ២ នាក់នៅក្នុងរដ្ឋសភាជាតិ និង ៤ នាក់នៅក្នុងមុខតំណែងដឹកនាំជាន់ខ្ពស់នៃគណបក្សនយោបាយ។ យើងមានមោទនភាពយ៉ាងខ្លាំងចំពោះយុវជនកម្ពុជាដ៏គួរអោយចាប់អារម្មណ៍ទាំងនេះ។ យើងចង់ឃើញនារីច្រើនថែមទៀតកាន់តំណែងជាអ្នកដឹកនាំ នៅក្នុងគ្រប់វិស័យទាំងអស់នៅកម្ពុជា ហើយនេះជាហេតុផលមួយដែលសហរដ្ឋអាមេរិកបានជួយបង្កើតមជ្ឈមណ្ឌលស្តីពីភាពជាសហគ្រិនរបស់ស្រ្តី កាលពីសប្តាហ៍មុន។
យុវជនកម្ពុជាក៏មានការចូលរួមសកម្មនៅក្រៅប្រទេសផងដែរ។ កាលពីខែមិថុនាកន្លងទៅ យុវជនកម្ពុជាចំនួន ៦ រូប ស្ថិតក្នុងចំណោមយុវជនក្នុងអាជីពមួយក្រុមដែលបានជួបលោកប្រធានាធិបតី Obama នៅសេតវិមាន។ អ្នកទាំង ៦ នោះបានចូលរួមជាផ្នែកមួយ នៃកម្មវិធីគំនិតផ្តួចផ្តើមស្តីពីមេដឹកនាំយុវជនវ័យក្មេងនៅអាស៊ីអាគ្នេយ៍ (YSEALI) ដែលឧបត្ថម្ភដោយរដ្ឋាភិបាលសហរដ្ឋអាមេរិក។ នៅក្នុងការជួបគ្នានោះ លោកប្រធានាធិបតី Obama បានដាស់តឿនអោយពួកគេប្រើបទពិសោធន៍របស់គេនៅសហរដ្ឋអាមេរិក ដើម្បីជួយក្រុមអ្នកមានជំនាញអាជីព និងក្រុមមនុស្សដែលមានវប្បធម៌ផ្សេងគ្នា នៅក្នុងប្រទេសរបស់គេ។ កម្មវិធី YSEALI គឺជាមធ្យោបាយមួយសំរាប់អោយយុវជនល្អៗនៅតំបន់អាស៊ានធ្វើការសហការជាមួយគ្នា និងជាមួយសហរដ្ឋអាមេរិក ដើម្បីប្រឈមដោះស្រាយបញ្ហាប្រឈមសំខាន់ៗបំផុតខ្លះ នៅក្នុងតំបន់។ តាមរយៈកម្មវិធី YSEALI អ្នកនឹងមានឱកាសល្អៗ ដូចជាការចងក្រងគ្នាជាបណ្តាញ ថវិកាសំរាប់ផ្តួចផ្តើមគំរោង និងមានរហូតដល់ឱកាសបានធ្វើដំណើរ ដូច្នេះខ្ញុំសូមអំពាវនាវអោយគ្រប់គ្នាចុះឈ្មោះតាមអ៊ិនធ័រណែត នៅថ្ងៃនេះ បើមិនទាន់បានចុះឈ្មោះទេ។
ដូចយុវជនកម្ពុជាដែលបានទៅសេតវិមាន នៅក្នុងពេលថ្មីៗនេះដែរ អ្នកគឺជាអនាគតអ្នកដឹកនាំ។ អ្នកមានតួនាទីយ៉ាងសំខាន់ក្នុងការជួយសហគមន៍របស់អ្នកអោយមានការយល់ដឹងច្រើនពីតួនាទីរបស់អ្នកដឹកនាំវ័យក្មេង ក្នុងការកំណត់អនាគតនៃប្រទេសជាតិរបស់អ្នក។
មុនពេលខ្ញុំបញ្ចប់ ខ្ញុំសូមសំដែងអំណរគុណម្តងទៀតដល់លោក យុក ង៉ុយ រដ្ឋលេខាធិការក្រសួងអប់រំ យុវជន និងកីឡា ចំពោះអ្វីៗដែលក្រសួងបានធ្វើដើម្បីគាំទ្រដល់យុវជន នៅកម្ពុជា។ ខ្ញុំសូមអរគុណផងដែរដល់វិទ្យាស្ថាន International Republican Institute និងក្រុមប្រឹក្សាយុវជនកម្ពុជា ដែលបានរៀបចំពិធីនេះឡើង។ ខ្ញុំមានចិត្តរំភើបរីករាយដោយមានវត្តមាននៅទីនេះ។ ខ្ញុំសូមជូនពរអោយគ្រប់គ្នាទទួលបានជោគជ័យជាបន្ត ក្នុងពេលដែលលោកអ្នកធ្វើការ ដើម្បីជំរុញការចូលរួមរបស់យុវជនក្នុងដំណើរការនយោបាយ។ ពាក្យស្លោកមួយរបស់ខ្មែរដែលខ្ញុំពេញចិត្តជាងគេ និយាយថា “រលកក្រោយច្រានរលកមុខ” ដែលមានន័យថា មនុស្សជំនាន់ក្រោយកំណត់មនុស្សជំនាន់មុន។ ខ្ញុំរីករាយនឹងលឺជោគជ័យនៅពេលអនាគតរបស់អ្នក។
