ភ្នំពេញ
ថ្ងៃទី២៣ ខែកក្កដា ឆ្នាំ២០១៦
សូមអរគុណ Charles! សូមជំរាបសួលោក Ho Yuming ភ្ញៀវកិត្តិយស លោក លោកស្រី។ ខ្ញុំមានសេចក្តីរំភើបដោយមានវត្តមាន នៅថ្ងៃនេះ នៅក្នុងពិធីបើកហាងធំរបស់ក្រុមហ៊ុន Nike នៅកម្ពុជា។ Nike គឺជាម៉ាកមួយក្នុងចំណោមម៉ាកដ៏ល្បីបំផុត ក្នុងពិភពលោក។ ខ្ញុំសូមអបអរសាទរក្រុមហ៊ុន Empreyean Alliance ដែលបាននាំក្រុមហ៊ុនអាមេរិកដ៏មានឈ្មោះល្បីនេះ មករកស៊ីនៅកម្ពុជា។
Nike មិនមែនគ្រាន់តែជាក្រុមហ៊ុនផលិតស្បែកជើង និងរបស់ដែលអ្នកកីឡាពាក់តែប៉ុណ្ណោះទេ តែម៉ាកយីហោនៃក្រុមហ៊ុននេះតំណាងអោយការបំផុសទឹកចិត្ត និងជោគជ័យ។ លោក Phil Knight អ្នកបង្កើតក្រុមហ៊ុន Nike ដែលមកពីរដ្ឋ Oregon នៃសហរដ្ឋអាមេរិក បានបង្កើតក្រុមហ៊ុននេះ នៅឆ្នាំ១៩៦៤ ដែលពេលនោះមានឈ្មោះថា Blue Ribbon Sports នៅកន្លែងមួយដែលប្រជុំដោយហាងទំនិញក្នុងតំបន់រស់នៅរបស់មនុស្សក្នុងវណ្ណៈកណ្តាល ក្នុងទីក្រុង Portland ។ សព្វថ្ងៃនេះ គ្រប់គ្នាចាំពាក្យស្លោកដ៏ល្បីរបស់ក្រុមហ៊ុន Nike គឺពាក្យស្លោកថា “Just Do It.” (ធ្វើទៅ) តែមានពាក្យស្លោកមួយរបស់ក្រុមហ៊ុន Nike ដែលធ្វើអោយខ្ញុំគិតមកដល់ប្រទេសកម្ពុជា មិនមែនគ្រាន់តែក្នុងន័យនៃកីឡាតែប៉ុណ្ណោះទេ តែថែមទាំងក្នុងន័យនៃការអភិវឌ្ឍន៍នៃប្រទេសកម្ពុជា និងគោលបំណងរបស់យុវជនកម្ពុជាថែមទៀតផង។ ពាក្យស្លោកនេះគឺ “Work Hard Dream Big.” (ខំធ្វើការ ស្រម៉ៃចង់បានធំ)។
កាលពីដប់ ម្ភៃឆ្នាំមុន គេមិននឹកស្រម៉ៃថា នឹងបានឈរនៅក្នុងហាងដ៏ល្អប្រណិតនេះ ក្នុងរាជធានីភ្នំពេញទេ។ តែពេលនេះ ប្រទេសកម្ពុជាបានដើរមកដល់ការទាក់ទាញការវិនិយោគពីសហរដ្ឋអាមេរិក និងពីជុំវិញពិភពលោក។ នេះគឺជាសញ្ញាបង្ហាញអោយឃើញនូវការប្រែប្រួលផ្នែកសេដ្ឋកិច្ច ដែលកំពុងកើតមានឡើងនៅកម្ពុជា ពោលគឺជាការប្រែប្រួលដែលយើងសង្ឃឹមថា សហរដ្ឋអាមេរិក និងក្រុមហ៊ុនអាមេរិកអាចបន្តជួយបាន។
សូមអបអរសាទរ និងសូមជូនពរអោយមានសំណាងល្អ!
