សូមជំរាបសួ។ ខ្ញុំមានកិត្តិយសដោយមានវត្តមាននៅថ្ងៃនេះ ដើម្បីអបអរបទថ្មីបំផុតមួយសំរាប់ពិធីបង្សកូលនៅកម្ពុជា។ សូមអបអរសាទរចំពោះលោកព្រឹម ភឿនដែលបានដឹកនាំអង្គការខ្មែរអមរតាសិល្បៈ (CLA) ព្រមទាំងបណ្ឌិត ហ៊ីម សុភី បណ្ឌិត រិទ្ធិ ផាន និងក្រុមសមាជិកប្រកបដោយទេពកោសល្យទាំងមូល ដែលបានធ្វើអោយមានបទនេះឡើង។

អង្គការ CLA បានធ្វើការយ៉ាងល្អក្នុងការលើកកំពស់ និងអភិរក្សសិល្បៈនៅកម្ពុជា ហើយស្ថានទូតអាមេរិកមានមោទនភាពដែលបានសហការជាមួយអង្គការនេះ ក្នុងគំរោងនានា នៅក្នុងរយៈពេលរាប់ឆ្នាំមកនេះ។ ស្ថានទូតមានសេចក្តីរីករាយដែលបានជួយក្នុងគំរោងនេះ ដោយបាននាំគ្រូភ្លេងអាមេរិកដែលត្រូវបានតែងតាំងសំរាប់ទទួលរង្វាន់ Grammy គឺលោក Andrew Cyr មកប្រទេសកម្ពុជា។ នៅកម្ពុជា លោក Andrew នឹងធ្វើការលើគំរោងខុសៗគ្នាមួយចំនួន ដូចជាធ្វើការជាមួយតន្រ្តីករខ្លះពាក់ព័ន្ធនឹងពិធីបង្សកូល ដើម្បីអោយពួកគេមានការរៀបចំខ្លួនសំរាប់ដំណើរទស្សនកិច្ចរបស់គេទៅកាន់ទីក្រុង New York និងទីក្រុង Boston នៅខែធ្នូ។

ដូចលោកអ្នកដឹងហើយ បទនេះគឺជាការរំលឹកដល់សោកនាដកម្មនៅក្នុងអំឡុងទសវត្សទី ៧០ ក្នុងសម័យកាលខ្មែរក្រហម។ តែសំខាន់ជាងនេះទៅទៀត គឺស្តីពីក្តីសង្ឃឹម និងការបន្តដើរទៅមុខ។ ខ្ញុំដឹងថា ទស្សនិកជនដែលបានលឺបទនេះនៅទីក្រុង New York និងទីក្រុង Boston ដោយរួមទាំងជនជាតិអាមេរិកមានដើមកំណើតខ្មែរ ដែលរស់នៅឆ្លងកាត់សម័យកាលនោះ នឹងមានការរំជួលចិត្តជាខ្លាំង។ ស្ថានទូតអាមេរិកតែងតែគោរពដល់វិញ្ញាណខ័ន្ធនៃជនរងគ្រោះដោយពួកខ្មែរក្រហម ស្មារតីរឹងប៉ឹងរបស់គេ ហើយធ្វើយ៉ាងណាកុំអោយគេភ្លេចប្រវត្តិសាស្រ្តនេះ។ ឧទាហរណ៍ នៅខែមិនា ទីភ្នាក់ងារសហរដ្ឋអាមេរិកសំរាប់ការអភិវឌ្ឍន៍អន្តរជាតិ (USAID) បានប្រកាសការគាំទ្ររបស់ខ្លួនចំពោះ ផ្កាស្លាក្រោមអង្គការ ដែលជារបាំមួយមានបំណងសំរាលការឈឺចាប់ដែលទទួលរងដោយអ្នកដែលបានទទួលរងនឹងហឹង្សាផ្លូវភេទ ក្រោមពួកខ្មែរក្រហម។ បណ្ឌិសភាសិល្បៈខ្មែរ ក្តីករុណា មជ្ឈមណ្ឌលបុប្ផាណា និងអង្គការចិត្តសាស្រ្តចំរុះវប្បធម៌ (Transcultural Psychological Organization) សុទ្ធតែបានសហការគ្នាដើម្បីធ្វើអោយគំរោងនេះមានជោគជ័យ។

ការអភិរក្សប្រវត្តិសាស្រ្តរបស់កម្ពុជាតាមរយៈសិល្បៈ ពិសេសតាមរយៈអំណាចនៃតន្រ្តី មានសារៈសំខាន់ណាស់។ គេមានចិត្តរំភើបរីករាយដោយឃើញការសហការគ្នារវាងអង្គការ និងអ្នកសិល្បៈនានា នៅកម្ពុជា និងនៅបរទេស ដែលធ្វើការលើគំរោងបង្សកូល និងផ្កាស្លា។ តាមរយៈការធ្វើការជាមួយគ្នា ក្រុមអ្នកសិល្បៈកម្ពុជាកាន់តែមានភាពរឹងមាំឡើង។

ស្ថានទូតអាមេរិកនឹងបន្តជានិច្ចក្នុងការជំរុញសិល្បៈដែលមានលក្ខណៈច្នៃប្រឌិត និងរស់រវើក នៅកម្ពុជា ហើយខ្ញុំសូមគោរពចំពោះទឹកចិត្តក្លាហាន និងគំនិតច្នៃប្រឌិតរបស់អង្គការខ្មែរអមរតាសិល្បៈ បណ្ឌិត ហ៊ីម សុភី និងបណ្ឌិត រិទ្ធី ផានម្តងទៀត ចំពោះការសំរេចបានដ៏ប្រពៃនេះ។ សូមអរគុណដែលបានអញ្ជើញចូលរួម។