សណ្ឋាគារ រ៉ាហ្វលឡីរ៉ូយ៉ាល់ ភ្នំពេញ
ថ្ងៃទី៥ ខែកក្កដា ឆ្នាំ២០១៦
សូមជំរាបសួ ឯកឧត្តម អ៊ិត សំហេង រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ លោកស្រីឯកអគ្គរាជទូតស៊ុយអែត Anna Maj Hulgard និងភ្ញៀវកិត្តិយស។ ខ្ញុំមានសេចក្តីរីករាយដោយឃើញថាទីនេះពេញទៅដោយមិត្តភក្តិ និងដៃគូ ដែលសុទ្ធតែធ្វើការជាមួយគ្នានៅក្នុងផ្នែកការងារ និងទំនាក់ទំនងវិជ្ជាជីវៈរវាងកម្មករ និងអ្នកគ្រប់គ្រង។
តាងនាមអោយរដ្ឋាភិបាលសហរដ្ឋអាមេរិក ខ្ញុំសូមឆ្លៀតឱកាសនេះដើម្បីអរគុណមូលនិធិក្រុមប្រឹក្សាអាជ្ញាកណ្តាល និងក្រសួងការងារ និងបណ្តុះបណ្តាលវិជ្ជាជីវៈ ដែលបានរៀបចំសន្និសីទដ៏មានសារៈសំខាន់នេះ។
ដូចលោកអ្នកជ្រាបស្រាប់ហើយ បើយោងតាមអង្គការពលកម្មអន្តរជាតិ ក្រសួងសេដ្ឋកិច្ច និងហិរញ្ញវត្ថុ និងក្រសួងពាណិជ្ជកម្ម មានប្រជាជនកម្ពុជាចំនួនប្រហែល ៦២០ ០០០ នាក់កំពុងធ្វើការ នៅតាមរោងចក្រកាត់ដេរសំលៀកបំពាក់ និងស្បែកជើងចំនួនប្រហែល ៧០០ នៅទូទាំងប្រទេស។ គ្រាន់តែវិស័យមួយនេះរកចំណូលបានរហូតដល់ ៦,២ ពាន់លានដុល្លាអាមេរិក ក្នុងមួយឆ្នាំៗ ដែលត្រូវជាចំនួន ៧៣% នៃតំលៃទំនិញនាំចេញទាំងមូលរបស់ប្រទេសកម្ពុជា ហើយត្រូវជាប្រហែល ១០% នៃផលិតផលសរុបក្នុងស្រុករបស់ប្រទេសកម្ពុជា។
យើងនិយាយពីស្ថិតិទាំងនេះ ពីព្រោះវិស័យនេះមានទំហំធំ នៅកម្ពុជា។ ខ្ញុំសូមសរសើររដ្ឋាភិបាលកម្ពុជាដែលបានប្រកាន់តាមជំហានសំខាន់ៗ ក្នុងការធានានិរន្តភាព តំលាភាព និងជោគជ័យនៃវិស័យដ៏សំខាន់នេះ។ ជាពិសេស ខ្ញុំសូមអបអរសាទរការខិតខំរបស់ក្រសួងការងារ និងបណ្តុះបណ្តាលវិជ្ជាជីវៈ ក្នុងការបង្កើតវិធីជាប្រព័ន្ធនិងប្រកបដោយតំលាភាព សំរាប់កំណត់ប្រាក់ខែអប្បបរិមា នៅក្នុងវិស័យកាត់ដេរ។ តាមពិតទៅ ខ្ញុំគិតថា គំរូនេះគេអាចប្រើធ្វើជាមូលដ្ឋានប្រកបដោយជោគជ័យ សំរាប់កំណត់ប្រាក់ខែអប្បបរិមានៅទូទាំងវិស័យនេះទាំងមូល។ ខ្ញុំសូមលើកទឹកចិត្តអោយក្រសួងធ្វើការជាមួយអ្នកពាក់ព័ន្ធទាំងអស់ ដើម្បីស្វែងយល់បន្ថែមទៀតលើរឿងនេះ។ ការបង្កើតអោយមានប្រាក់ខែអប្បបរិមានៅទូទាំងប្រទេសមានសារៈសំខាន់ចាំបាច់ ក្នុងពេលដែលប្រទេសកម្ពុជាបន្តធ្វើសមាហរណកម្មទៅក្នុងអាស៊ាន។ ប្រទេសជិតខាងកម្ពុជា គឺប្រទេសឡាវ និងភូមាបានអនុម័តលើប្រាក់ខែជាតិអប្បបរិមាមួយហើយ ដូច្នេះមានគំរូមួយនៅក្នុងតំបន់ហើយសំរាប់អោយក្រសួងការងារពិចារណាលើវិធានការនេះ។
ខ្ញុំសូមអរគុណផងដែរចំពោះការខិតខំរបស់ក្រសួងក្នុងការធ្វើការជាមួយអ្នកពាក់ព័ន្ធទាំងអស់ ដើម្បីដោះស្រាយជំលោះក្នុងការងារ តាមរយៈយន្តការ ដូចជាក្រុមប្រឹក្សាអាជ្ញាកណ្តាល។ ការដោះស្រាយជំលោះបែបនេះនាំអោយមានគ្រឹះរឹងមាំ ដើម្បីអោយឧស្សាហកម្មនេះមានសមត្ថភាពប្រកួតប្រជែងជាបន្តទៀត។ នៅត្រង់នេះ មានជំហានសមស្របមួយទៀតផងដែរ ហើយខ្ញុំសូមលើកទឹកចិត្តអោយរដ្ឋាភិបាលពិចារណាធ្វើពង្រាងច្បាប់ចាំបាច់សំរាប់បង្កើតតុលាការការងារ។ តុលាការនេះ បើត្រូវបានបង្កើតឡើងដោយតំលាភាព និងមានការចូលរួមទាំងអស់គ្នា អាចជួយកម្ពុជាអោយឈានដល់កំរិតខ្ពស់ផ្នែកសេដ្ឋកិច្ច ដែលខ្លួនចង់បាន។
វាជាសញ្ញាវិជ្ជមានមួយដែលសហជីពមានការដុះដាលឡើង នៅក្នុងរយៈពេល ២ ទសវត្សកន្លងទៅនេះ ពិសេសនៅក្នុងឧស្សាហកម្មកាត់ដេរសំលៀកបំពាក់ និងស្បែកជើង។ នេះគឺជាអ្វីដែលប្រទេសកម្ពុជាគួរមានមោទនភាពទៅលើ។
ការមានសហជីព នៅតាមកន្លែងជាច្រើនបង្កើតអោយមានលទ្ធភាពនៃការមានទំនាក់ទំនងវិជ្ជាជីវៈ រវាងអ្នកគ្រប់គ្រងនិងកម្មករប្រកបដោយការគ្រប់គ្រងល្អ ដែលអាចជួយធានាបានថា ឧស្សាហកម្មនេះមានលក្ខណៈល្អ យុត្តិធម៌ ផ្តល់ផលល្អ និងមាននិរន្តភាព។ នេះមិនមែនមានន័យថា គ្មានកន្លែងដែលត្រូវធ្វើការកែលំអទេ។ វានៅមានកង្វល់នៅឡើយ ទាក់ទងនឹងការធ្វើដំណើរ ការដួលសន្លប់ច្រើន ប្រាក់ខែអប្បបរិមាមានកំរិតទាបរបស់កម្មករ និងជំលោះក្នុងការងារដែលមិនទាន់ត្រូវបានដោះស្រាយ។ តែខ្ញុំនៅតែជឿថា គំរូនៃសហជីពគឺជាគំរូបែបផែនល្អមួយ ហើយខ្ញុំជឿថា គេគួរពង្រីកវាថែមទៀតដើម្បីបញ្ជូលវិស័យនានា ដូចជាវិស័យសំណង់ ទេសចរណ៍ អាហារនិងសេវា ដែលនៅតែមានបញ្ហាប្រឈមនៅឡើយ។ សំរាប់រយៈពេលយូរទៅមុខ ការបណ្តុះបណ្តាលវិជ្ជាជីវៈ និងការពង្រឹងជំនាញសំរាប់អ្នកធ្វើការមានសារៈសំខាន់ចាំបាច់ បើកម្ពុជាចង់បង្កើនសមត្ថភាពប្រកួតប្រជែង និងទិន្នផលការងារ។
សហរដ្ឋអាមេរិកគឺជាគោលដៅធំជាងគេតែមួយគត់សំរាប់ផលិតផលសំលៀកបំពាក់ និងស្បែកជើងរបស់ប្រទេសកម្ពុជា។ ដូច្នេះ យើងមានការចាប់អារម្មណ៍ជាខ្លាំងក្នុងការធ្វើការជាមួយដៃគូខាងកម្ពុជា ដើម្បីធ្វើអោយវិស័យនេះមានការចំរើនទៅមុខល្អ។ យើងធ្វើការងារនេះតាមលក្ខណៈជាច្រើន។ តាមរយៈទីភ្នាក់ងារសហរដ្ឋអាមេរិកសំរាប់ការអភិវឌ្ឍន៍អន្តរជាតិ (USAID) យើងកំពុងធ្វើការ ជាមួយមូលនិធិក្រុមប្រឹក្សាអាជ្ញាកណ្តាលដើម្បីកែលំអទំនាក់ទំនងវិជ្ជាជីវៈរវាងអ្នកគ្រប់គ្រងនិងកម្មករ និងដំណើរការដោះស្រាយជំលោះនៅកម្ពុជា។ ទីភ្នាក់ងារ USAID ក៏សហការផងដែរជាមួយមជ្ឈមណ្ឌលសាមគ្គីភាព ដើម្បីពង្រឹងអំណាចសេដ្ឋកិច្ច និងអំណាចនយោបាយរបស់កម្មករកម្ពុជា តាមរយៈសហជីពដែលធ្វើការមានប្រសិទ្ធភាពល្អ មានឯករាជ្យភាព និងប្រកបដោយលក្ខណៈប្រជាធិបតេយ្យ។ ដោយមានការជួយឧបត្ថម្ភរបស់យើង មជ្ឈមណ្ឌលអប់រំច្បាប់សហគមន៍ធ្វើការដោយផ្ទាល់ជាមួយសហជីពមូលដ្ឋាន និងកម្មករ ដើម្បីលើកកំពស់សិទ្ធិរបស់កម្មករ។ ក្រៅពីនេះទៀត ក្រសួងការងារនៃសហរដ្ឋអាមេរិកកំពុងជួយកម្មវិធីរោងចក្រល្អនៅកម្ពុជា ដើម្បីកែលំអស្ថានភាពនៅតាមរោងចក្រ និងលើកកំពស់សុខមាលភាពរបស់កម្មករ។ សហរដ្ឋអាមេរិកមានមោទនភាពចំពោះការគាំទ្ររបស់ខ្លួនចំពោះសិទ្ធិកម្មករ ពីព្រោះវាដើរស្របគ្នាជាមួយការប្តេជ្ញាចិត្តរបស់យើងចំពោះភាពជាដៃគូក្នុងសេដ្ឋកិច្ចពាណិជ្ជកម្មជាមួយប្រទេសកម្ពុជា។
ខ្ញុំសង្ឃឹមថា សន្និសីទនេះនឹងធ្វើអោយមានការសន្ទនាគ្នាច្រើន នៅក្នុងចំណោមសហជីព និយោជក និយោជិត មន្រ្តីរដ្ឋាភិបាល និងសមាជិកសង្គមស៊ីវិល។ ការប្រាស្រ័យជាមួយគ្នាបែបនេះអាចជួយកែលំអស្ថានភាពការងារ ហើយធ្វើអោយឧស្សាហកម្មកាត់ដេរស្បែកជើង និងសំលៀកបំពាក់រឹតតែមានសមត្ថភាពប្រកួតប្រជែងច្រើនថែមទៀត នៅក្នុងតំបន់។ ធនាគារពិភពលោកបានលើកឋានៈសេដ្ឋកិច្ចរបស់ប្រទេសកម្ពុជាជាប្រទេសមានចំណូលមធ្យមក្នុងកំរិតទាប (Lower middle income) ។ ការងើបឡើងនៃក្បាលម៉ាស៊ីនសេដ្ឋកិច្ចរបស់អាស៊ាននឹងបន្តបង្កើនសមត្ថភាពប្រកួតប្រជែង។ នៅក្នុងបរិយាកាសនេះ វាមានសារៈសំខាន់ជាងពេលណាទាំងអស់ដែលត្រូវជំរុញការគោរពចំពោះសិទ្ធិរបស់កម្មករ ទំនាក់ទំនងវិជ្ជាជីវៈល្អរវាងអ្នកគ្រប់គ្រងនិងកម្មករ ស្ថានភាពការងារដែលមានភាពអនុគ្រោះ ការបែងចែកអត្ថប្រយោជន៍អោយបានត្រឹមត្រូវ និងការដោះស្រាយជំលោះការងារដោយសន្តិភាព ដើម្បីអោយប្រទេសកម្ពុជាមានជោគជ័យ។ សូមអរគុណ។
