យោងតាមរបាយការណ៍ប្រចាំឆ្នាំឈ្មោះ Open Doors ស្តីពីការផ្លាស់ប្តូរជាអន្តរជាតិផ្នែកការសិក្សាអប់រំ ដែលបានចេញថ្មីៗនេះ ចំនួននិស្សិតអន្តរជាតិដែលសិក្សានៅស្ថាប័នឧត្តមសិក្សា នៅក្នុងសហរដ្ឋអាមេរិក បានកើនឡើងចំនួន ១០% ដល់ចំនួនដែលមិនដែលមានពីមុនមក គឺចំនួន ៩៧៤ ៩២៦ នាក់ នៅក្នុងឆ្នាំសិក្សា ២០១៤/២០១៥។
របាយការណ៍នេះបង្ហាញផងដែរថា ចំនួននិស្សិតកម្ពុជាដែលកំពុងសិក្សានៅក្នុងសហរដ្ឋអាមេរិកមានកំណើនពី៤៣២នាក់ នៅឆ្នាំ២០១៣-២០១៤ ដល់ ៤៩២ នាក់ នៅឆ្នាំ ២០១៤ – ២០១៥ ដែលជាកំណើនរហូតដល់ ១៤%។
លោក Jay Raman មន្រ្តីផ្នែកកិច្ចការសាធារណៈរបស់ស្ថានទូតអាមេរិក នៅរាជធានីភ្នំពេញ បានមានប្រសាសន៍ថា “ការអង្កេតថ្មីបំផុតរបស់របាយការណ៍ Open Doors បង្ហាញអោយឃើញថា និស្សិតកម្ពុជាដែលមានលក្ខណៈសម្បត្តិក្នុងការសិក្សា ហើយចេះនិយាយភាសាអង់គ្លេស ពិតជាអាចសំរេចគោលដៅរបស់គេបាន នៅក្នុងការសិក្សានៅតាមមហាវិទ្យាល័យ និងសាកលវិទ្យាល័យ ក្នុងសហរដ្ឋអាមេរិក។ ស្ថានទូតអាមេរិក និងមជ្ឈមណ្ឌល EducationUSA ដែលជាដៃគូរបស់យើង ចាំជួយក្នុងគ្រប់ដំណាក់កាល រាប់ពីពេលជ្រើសរើសមហាវិទ្យាល័យ ដល់ពេលដាក់ពា្យសុំអាហារូបករណ៍ និងសុំជំនួយថវិកា”។
មជ្ឈមណ្ឌល EducationUSA គឺជាបណ្តាញនៃមជ្ឈមណ្ឌលផ្តល់ប្រឹក្សាចំនួនជាង ៤០០ របស់ក្រសួងការបរទេសសហរដ្ឋអាមេរិក នៅតាមប្រទេសចំនួនជាង ១៧០ ដែលផ្តល់ប្រឹក្សាដល់និស្សិតអន្តរជាតិ។ មជ្ឈមណ្ឌលទាំងនេះផ្តល់ព័ត៌មានស្តីពីស្ថាប័នអប់រំនៅសហរដ្ឋអាមេរិក និងការណែនាំដល់អ្នកដែលមានលក្ខណៈសម្បត្តិគ្រប់គ្រាន់ ក្នុងការដាក់ពាក្យទៅសិក្សានៅសហរដ្ឋអាមេរិក។ មានមជ្ឈមណ្ឌលផ្តល់ប្រឹក្សាចំនួនពីរនៅរាជធានីភ្នំពេញ ដោយមួយស្ថិតនៅក្នុងសាកលវិទ្យាល័យបញ្ញាសាស្រ្តនៃកម្ពុជា និងមួយទៀតស្ថិតនៅក្នុងសាកលវិទ្យាល័យភូមិន្ទភ្នំពេញ។
កន្លែងផ្តល់ព័ត៌មានមួយទៀតដែលស្ថានទូតអាមេរិកមានសំរាប់ប្រជាជនកម្ពុជាដែលមានការចាប់អារម្មណ៍ចង់ទៅសិក្សានៅសហរដ្ឋអាមេរិក គឺបណ្ណាល័យស្ថាន American Corners។ ដោយមានទីតាំងនៅរាជធានីភ្នំពេញ ខេត្តសៀមរាប បាត់ដំបង និងខេត្តកំពង់ចាម បណ្ណាល័យ American Corner និមួយៗមានសៀវភៅ និងព័ត៌មាននានាជាច្រើនជាភាសាអង់គ្លេស ឯកសារណែនាំដល់សិស្ស និងអាសយដ្ឋាននៃគេហទំព័រស្តីពីសាកលវិទ្យាល័យ និងអាហារូបករណ៍ ឯកសារត្រៀមរៀបចំសំរាប់ការធ្វើតេស្ត និងព័ត៌មានស្តីពីទិដ្ឋាកាសំរាប់សិស្ស។
ការកើនឡើងចំនួន ១០% ក្នុងចំនួននិស្សិតអន្តរជាតិនៅក្នុងសហរដ្ឋអាមេរិក គឺជាអត្រាកំណើនខ្ពស់បំផុត នៅក្នុងរយៈពេល ៣៥ ឆ្នាំមកនេះ។ ការកើនឡើងនេះត្រូវបានរាយការណ៍មកថា មាននៅតាមរដ្ឋចំនួន ៤៤។ ការចំណាយរបស់និស្សិតបរទេស នៅក្នុងរដ្ឋទាំង ៥០ បានរួមចំណែកប្រាក់ចំនួនជាង ៣០ ពាន់លានដុល្លាអាមេរិក ដល់សេដ្ឋកិច្ចរបស់សហរដ្ឋអាមេរិក ក្នុងឆ្នាំ២០១៤ ដោយមានកំណើនជាង ៣ ពាន់លានដុល្លាអាមេរិក គិតពីឆ្នាំ២០១៣ មក។ និស្សិតក្នុងសហរដ្ឋអាមេរិកដែលមកពីតំបន់អាមេរិកឡាទីន និងតំបន់ការ៉ាអ៊ីប មានអត្រាកើនឡើងលឿនជាងគេ តែកំណើនដ៏ច្រើនក៏ត្រូវបានឃើញផងដែរមកពីតំបន់អាស៊ី មជ្ឈឹមបូព៌ា អាហ្រ្វិកខាងជើង និងតំបន់សាហារ៉ាខាងក្រោមនៃទ្វីបអាហ្វ្រិក។
ការចេញរបាយការណ៍ Open Doors ត្រូវបានធ្វើនៅក្នុងសប្តាហ៍នៃការអប់រំអន្តរជាតិ ដែលអបអរ និងជំរុញការផ្លាស់ប្តូរគ្នា និងការអប់រំអន្តរជាតិ នៅទូទាំងពិភពលោក។ សប្តាហ៍នេះត្រូវបានរួមគ្នារៀបចំដោយក្រសួងការបរទេស និងក្រសួងអប់រំនៃសហរដ្ឋអាមេរិក។
ចំពោះព័ត៌មានបន្ថែមស្តីពីរបាយការណ៍ Open Doors នៅឆ្នាំនេះ និងសប្តាហ៍នៃការអប់រំអន្តរជាតិ សូមទាក់ទងមក ECA-Press@state.gov ឬ (202) 632-6452 ឬចុច link នេះ និង link នេះ។
ចំពោះព័ត៌មានលំអិតបន្ថែម សូមចូលទៅទំព័ររបស់មជ្ឈមណ្ឌល EducationUSA និងបណ្ណាល័យ American Corners នៅកម្ពុជា។
