នៅថ្ងៃទី២១ សីហា ទីភ្នាក់ងារទទួលបន្ទុកទាហានបាត់ខ្លួនរបស់ក្រសួងការពារប្រទេសសហរដ្ឋអាមេរិក (DPAA) បានប្រកាសថា អដ្ឋិធាតុរបស់ទាហានអាមេរិក ដែលបានបាត់ខ្លួននៅក្នុងសង្គ្រាមវៀតណាម ត្រូវបានរកឃើញ ហើយនឹងត្រូវបានបញ្ចុះ ក្នុងកិត្តិយសយោធាពេញលេញ។
វរសេនីយត្រី Dale W. Richardson អាយុ ២៨ ឆ្នាំ មកពី Mount Sterling រដ្ឋ Illinois នឹងត្រូវបានបញ្ចុះនៅ Mountain View ក្នុងរដ្ឋ Arkansas ។ Richardson បំរើនៅក្នុងកងវរសេនាតូចទី២ ក្នុងកងវរសេនាធំរថពាសដែកទី២៤ នៃកងពលធំជើងគោកទី១ ហើយជាអ្នកដំណើរនៅក្នុងឧទ្ធម្ភាគចក្រ Huey ដែលកំពុងហោះទៅកាន់មូលដ្ឋានផ្តល់ជំនួយ Kantum នៅប្រទេសវៀតណាមខាងត្បូង តែឧទ្ធម្ភាគចក្រនោះត្រូវបង្វែរទិសដោយសារអាកាសធាតុមិនល្អ។ បន្ទាប់ពីហោះចូលដែនអាកាសនៃប្រទេសកម្ពុជា ឧទ្ធម្ភាគចក្រនោះបានរងការបាញ់យ៉ាងខ្លាំងពីក្រោម ដែលបណ្តាលអោយអ្នកបើកត្រូវធ្វើការចុះចតជាបន្ទាន់ នៅខេត្តកំពង់ចាម។ នាវិកទាំង៤នាក់ និងអ្នកដំណើរទាំង៤ នាក់នៅលើឧទ្ធម្ភាគចក្រនោះនៅរស់ជីវិតបន្ទាប់ពីការចុះចត។ នាវិកម្នាក់បានរួចខ្លួនពីការចាប់ខ្លួនរបស់សត្រូវ ហើយបានវិលមកដល់ខ្សែត្រៀមរបស់ខាងខ្លួន។ នាវិក ៣ នាក់ទៀត និងអ្នកដំណើរម្នាក់ត្រូវបានចាប់ខ្លួន។ នាវិក ២ នាក់ដែលត្រូវបានចាប់ខ្លួន ត្រូវបានដោះលែងវិញដោយវៀតណាម នៅក្នុងឆ្នាំ ១៩៧៣ ហើយអដ្ឋិធាតុរបស់បុរស ២ នាក់ទៀត ដែលត្រូវបានចាប់ខ្លួន ត្រូវបានប្រគល់អោយសហរដ្ឋអាមេរិក នៅក្នុងទសវត្សឆ្នាំ១៩៨០ ហើយត្រូវបានកំណត់អត្តសញ្ញាណកម្ម។ Richardson បានស្លាប់នៅកន្លែងចុះចត នៅក្នុងពេលបាញ់តគ្នាជាមួយកំលាំងសត្រូវ។ អិដ្ឋធាតុរបស់គាត់មិនត្រូវបានគេយកមកទេ បន្ទាប់ពីការប្រយុទ្ធគ្នានោះ។
ពីឆ្នាំ១៩៩២ ដល់ឆ្នាំ២០០៨ ក្រុមស្រាវជ្រាវរួមគ្នា កម្ពុជា អាមេរិកបានធ្វើការស៊ើបអង្កេតទីតាំងនោះ តែមិនបានជោគជ័យទេ។ នៅថ្ងៃទី១៨ ខែកុម្ភៈ ឆ្នាំ២០០៩ ក្រុមស្រាវជ្រាវរួមគ្នាមួយបានសំភាសន៍សាក្សីនៅស្រុកមេមត់ ដែលបានអះអាងថា បានដឹងពីការបាត់បង់នោះ។ សាក្សីនោះបានប្រាប់ពីកន្លែងកប់សព។ ក្រុមនោះបានកកាយកន្លែងកប់សព តែនៅតែរកមិនឃើញអដ្ឋិធាតុ។
ពីថ្ងៃទី១៦ មករា ដល់ថ្ងៃទី១១ មិនា ឆ្នាំ២០១១ ក្រុមស្រាវជ្រាវរួមគ្នាកម្ពុជា អាមេរិកបានគាស់កកាយកន្លែងនោះ តែរកមិនឃើញអិដ្ឋធាតុរបស់នាវិកនោះទេ។
នៅខែកុម្ភៈ ឆ្នាំ២០១២ ក្រុមស្រាវជ្រាវរួមគ្នា កម្ពុជា អាមេរិកមួយក្រុមទៀត បានធ្វើការសំភាសន៍ម្តងទៀតជាមួយសាក្សី ២ នាក់ ដែលបានប្រាប់កន្លែងកប់ទី២ នៅក្បែរកន្លែងកាយលើកមុន។ ក្រុមស្រាវជ្រាវនោះក៏បានរកឃើញអិដ្ឋធាតុមនុស្ស និងគ្រឿងប្រដាប់យោធាពីក្នុងផ្នូរតែមួយ។
នៅក្នុងការកំណត់អត្តសញ្ញាណកម្មរបស់ Richardson អ្នកវិទ្យាសាស្រ្តរបស់ DPAA និងមន្ទីរពិសោធន៍កំណត់ឌីអិនអេរបស់កងទ័ព (AFDIL) បានវិភាគលើភស្តុតាង ដែលសំអាងលើហេតុការណ៍ ហើយបានប្រើឧបករណ៍កំណត់កោសល្យវិច្ច័យ ហើយបានកំណត់ថា ឌីអិនអេនៃអិដ្ឋធាតុនោះត្រូវគ្នាជាមួយនឹងឌីអិនអេរបស់ប្អូនស្រីគាត់។
នៅថ្ងៃទី៣១ ខែមិនា ឆ្នាំ២០១៥ DPAA បានប្រកាសអិដ្ឋធាតុនៃយុទ្ធជន ២ នាក់ទៀតត្រូវបានរកឃើញនៅកន្លែងតែមួយ ក្នុងស្រុកមេមត់ ក្នុងខេត្តត្បូងឃ្មុំ ដែលពីមុន ស្ថិតក្នុងខេត្តកំពង់ចាម។ ពលបាល Bunyan D. Price អាយុ ២០ ឆ្នាំ មកពីតំបន់ Monroe ក្នុងរដ្ឋ North Carolina និងពលបាល Rodney L. Griffin អាយុ ២១ ឆ្នាំ មកពីក្រុង Mexico នៃរដ្ឋ Missouri ដែលបំរើនៅក្នុងកងវរសេនាតូចទី២ ក្នុងកងវរសេនាធំរថពាសដែកទី ៣៤ នៃកងពលធំថ្មើជើងទី២៥ កំពុងធ្វើដំណើរតាមឧទ្ធម្ភាគចក្រ Huey ជាមួយ Richardson ។ Price ត្រូវបានបញ្ចុះនៅថ្ងៃទី១១ មេសា នៅ Belmont រដ្ឋ North Carolina ហើយ Griffin ត្រូវបានបញ្ចុះនៅថ្ងៃទី២៥ មេសា នៅក្រុង Mexico រដ្ឋ Missouri ក្នុងកិតិ្តយសយោធាពេញលេញសំរាប់អ្នកទាំងពីរ។
នៅពេលនេះ មានទាហានអាមេរិកចំនួន ១៦២៩ នាក់នៅបាត់ខ្លួននៅឡើយ ក្នុងសង្រ្គាមវៀតណាម។
ចំពោះព័ត៌មានបន្ថែមស្តីពីបេសកកម្មរបស់ក្រសួងការពារប្រទេសសហរដ្ឋអាមេរិកនៅក្នុងការរុករកទាហានបាត់ខ្លួនអាមេរិក ក្នុងពេលដែលពួកគេបំរើមាតុភូមិរបស់គេ សូមចូលមើលគេហទំព័ររបស់ទីភ្នាក់ងារ DPAA ដែលមានអាសយដ្ឋាន www.dpaa.mil ឬហៅទូរស័ព្ទទៅកាន់លេខ (៧០៣) ៦៩៩ ១១៦៩ ។
