ទីភ្នាក់ងារសហរដ្ឋអាមេរិកដើម្បីអភិវឌ្ឍអន្តរជាតិ (USAID) ដោយធ្វើ ដៃគូរជាមួយរាជរដ្ឋាភិបាលកម្ពុជា បានសម្ពោធកម្មវិធីថ្មីមួយនៅថ្ងៃទី១៣ កក្កដា ដើម្បីគាំទ្រជនពិការនៅក្នុងប្រទេសកម្ពុជា។ គំរោងកម្មវិធី ស្តារលទ្ធភាពពលកម្មនិងអវៈយវៈសប្បនិមិ្មតសម្រាប់ជនពិការកម្ពុជា ត្រូវបានផ្តល់អោយអង្គការអតីតយុទ្ធជនអន្តរជាតិកម្ពុជា (VIC) ដើម្បីផ្តល់សេវាកម្មស្តារលទ្ធភាពពលកម្មនិងអវៈយវៈសប្បនិមិ្មតដល់ជនពិការ។ ជាលទ្ធផល នៃជំនួយនេះ ជនពិការកម្ពុជានឹងមានលទ្ធភាពកាន់តែច្រើនក្នុងការចូលរួម និងលូតលាស់នៅក្នុងសហគមន៍របស់គេ។ កម្មវិធីនេះបញ្ជាក់ពីការប្តេជ្ញាចិត្ត របស់រដ្ឋាភិបាលសហរដ្ឋអាមេរិក ក្នុងការគាំទ្រជនពិការដែលជាផ្នែកមួយនៃ កិច្ចប្រឹងប្រែងទូទៅ ក្នុងការលើកកំពស់និងការពារសិទ្ធិមនុស្សនៅក្នុងប្រទេសកម្ពុជា។
លោកស្រី Julie Chung ភារធារីស្ថានទូតសហរដ្ឋអាមេរិកប្រចាំនៅ កម្ពុជា បានមានប្រសាសន៍ថា “ជាញឹកញាប់ ជនពិការស្ថិតនៅក្នុងក្រុម មនុស្សដែលងាយរងគ្រោះបំផុតនៅក្នុងសង្គម។ ជាទូទៅ ពួកគេប្រឈមមុខ នឹងឧបសគ្គផ្នែករាងកាយ សង្គមនិងសេដ្ឋកិច្ច ដែលរារាំងមិនអោយពួកគេ ទទួលបានសេវាកម្មថែទាំសុខភាពដែលមានគុណភាពនិងតំលៃសមរម្យ សេវាកម្មស្តារលទ្ធភាពពលកម្ម ការអប់រំ និងសេវាកម្មជនពិការផ្សេងៗទៀត។ វាជាការសំខាន់ដែលជនពិការអាចជំនះនូវឧបសគ្គទាំងនេះ និង ចូលរួមក្នុងសហគមន៍របស់ពួកគេបានកាន់តែពេញលេញ។ យើងសង្ឃឹមថា កម្មវិធីនេះនឹងជួយជនពិការនៅក្នុងប្រទេសកម្ពុជាដើម្បីជំនះនូវឧបសគ្គទាំងនោះ”។
កម្មវិធីដែលមានរយៈពេល១៨ខែនេះ បង្ហាញនូវសមាសធាតុដ៏សំខាន់ សំរាប់ការគាំទ្ររបស់ USAID ចំពោះប្រជាជនងាយរងគ្រោះនៅក្នុងប្រទេសកម្ពុជា។ កម្មវិធីនេះបន្តតាមប្រវត្តិយូរអង្វែង នៃការគាំទ្ររបស់រដ្ឋាភិបាល សហរដ្ឋអាមេរិកចំពោះជនពិការ។ អង្គការអតីតយុទ្ធជនអន្តរជាតិកម្ពុជា នឹងធ្វើការដោយសហការជិតស្និទ្ធជាមួយក្រសួងសង្គមកិច្ច អតីតយុវជន និងយុវនីតិសម្បទា ខណៈពេលដែលរាជរដ្ឋាភិបាលកម្ពុជា បន្តទទួលខុសត្រូវ កាន់តែច្រើនក្នុងការផ្តល់សេវាកម្មសំខាន់ៗទាំងនេះដល់ជនពិការ។
ទីភ្នាក់ងារសហរដ្ឋអាមេរិកដើម្បីអភិវឌ្ឍអន្តរជាតិ (USAID) ត្រូវបានបង្កើតឡើងនៅឆ្នាំ១៩៦១ ដោយលោកប្រធានាធិបតីអាមេរិក John F. Kennedy ហើយដើរតួនាទីជាទីភ្នាក់ងារនាំមុខគេ ក្នុងការផ្តល់ជំនួយបរទេសរបស់រដ្ឋាភិបាលសហរដ្ឋអាមេរិក។ ចាប់តាំងពីឆ្នាំ១៩៩២ មកទីភ្នាក់ងារ USAID បានផ្តល់ថវិកាប្រហែល ១ ពាន់លានដុល្លាអាមេរិក សំរាប់ការអភិវឌ្ឍន៍នៅក្នុងប្រទេសកម្ពុជា។
អង្គការអតីតយុទ្ធជនអន្តរជាតិកម្ពុជា ជាអង្គការក្រៅរដ្ឋាភិបាលមិនយកប្រាក់កំរៃ បង្កើតឡើងក្នុងស្រុកចេញពីអង្គការដើមដែលបង្កើតនៅក្នុងឆ្នាំ១៩៧៧ មានទីតាំងនៅទីក្រុង Washington។ VIC បានចុះបញ្ជី ជាមួយក្រសួងមហាផ្ទៃជាអង្គការក្រៅរដ្ឋាភិបាលក្នុងស្រុកនៅឆ្នាំ២០១៤។
