ដោយសហការជាមួយសមាគមកីឡាបាល់បោះបុរស និងសមាគមកីឡាបាល់បោះនារីនៅសហរដ្ឋអាមេរិក ក្រសួងការបរទេសសហរដ្ឋអាមេរិកនឹងបញ្ជូនឈ្មោះ Wayne Ellington និង Sue Wicks ក្នុងនាមជាបេសកជនកីឡា មករាជធានីភ្នំពេញ នៃប្រទេសកម្ពុជា ពីថ្ងៃទី១២ ដល់ថ្ងៃទី១៧ ខែកក្កដា។ បេសកជនកីឡាទាំងពីររូបនេះនឹងជួយពង្រឹងជំនាញ និងធ្វើអោយមានការចាប់អារម្មណ៍ច្រើនថែមទៀត នៅកម្ពុជា ចំពោះកីឡាដ៏មានប្រជាប្រិយភាពបំផុតនេះ ក្នុងពិភពលោក។ យុវជនកម្ពុជាមិនត្រឹមតែបានរៀន និងបង្កើនភាពប៉ិនប្រសប់ក្នុងការលេងកីឡាបាល់បោះតែប៉ុណ្ណោះទេ តែបេសកជនកីឡាទាំងពីររូបនឹងផ្តោតផងដែរលើការងារជាក្រុម ការទំនាក់ទំនងជាមួយគ្នាបានល្អ ការបង្កើនការចេះអោយតំលៃលើខ្លួនឯង និងមេរៀនដទៃទៀត ដែលត្រូវបានរៀន តាមរយៈការលេងកីឡាបាល់បោះ។
ស្ថានទូតអាមេរិកនៅភ្នំពេញកំពុងធ្វើការជាមួយក្រសួងអប់រំ យុវជន និងកីឡា និងគណកម្មាធិការជាតិអូឡាំពិកកម្ពុជា សហព័ន្ធកីឡាបាល់បោះកម្ពុជា និងសមាគមអតីតនិស្សិតអាហារូបករណ៍ Fulbright នៃកម្ពុជា ដើម្បីទទួលបេសកជនកីឡា និងរៀបចំសកម្មភាពនានា នៅក្នុងសប្តាហ៍។ ក្នុងចំណោមសកម្មភាពទាំងនេះ មានសកម្មភាព ២ ដែលនឹងត្រូវបានបើកអោយសាធារណជនចូលមើលដោយសេរី និងដោយមិនគិតថ្លៃ៖
- ម៉ោង ៩ ព្រឹក ថ្ងៃទី ១៤ កក្កដា៖ គំរោងជួសជុលទីលានលេងកីឡាបាល់បោះ នៅវត្តកោះ ក្នុងក្រុងភ្នំពេញ បើកទទួលអ្នកស្ម័គ្រចិត្តមកពីសហគមន៍ក្នុងមូលដ្ឋាន។
- ម៉ោង ៥ រសៀល ថ្ងៃទី ១៥ កក្កដា កម្មវិធីពិសេសនៅពហុកីឡាដ្ឋានអូឡាំពិក ដោយមានការលេងបាល់បោះ ការប្រគំតន្រ្តី និងមានកម្មវិធីជាច្រើនទៀត។
បេសកជនកីឡាគឺជាកីឡាករ កីឡាការិនី និងគ្រូកីឡា ដែលធ្វើដំណើរទៅបរទេស ដើម្បីដឹកនាំកម្មវិធីដែលត្រូវបានរៀបចំឡើងដោយស្ថានទូត និងស្ថានកុងស៊ុល។ បេសកជនកីឡាធ្វើការបង្ហាត់បង្ហាញដល់មនុស្សក្មេងៗ និងគ្រូកីឡា ចូលរួមនៅក្នុងសកម្មភាពនៅតាមសហគមន៍ ធ្វើការពិភាក្សាជាមួយយុវជន លើសារៈសំខាន់នៃភាពជាអ្នកដឹកនាំ និងការគោរពចំពោះមនុស្សផ្សេងៗគ្នា។ គំរោង ដែលមានឈ្មោះថា SportsUnited គ្រប់គ្រងកម្មវិធីបេសកជនកីឡា ដោយធ្វើការសហការជាមួយគណកម្មាធិការអូឡាំពិកសហរដ្ឋអាមេរិក សហព័ន្ធកីឡាសហរដ្ឋអាមេរិក និងលីកអាជីព។
បើចង់ដឹងព័ត៌មានបន្ថែមស្តីពីកម្មវិធីបេសកជនកីឡា និងការសំដែងអោយមើលនៅកម្ពុជា សូមទាក់ទងផ្នែកកិច្ចការសាធារណៈរស់ស្ថានទូតអាមេរិក នៅភ្នំពេញ។ អ្នកសារព័ត៌មានដែលចង់យកព័ត៌មានពីសកម្មភាពណាមួយ ឬចូលរួមក្នុងសន្និសីទសារព័ត៌មាន គួរទាក់ទងមកអ៊ីម៉េល ChreaV@state.gov ។
Wayne Ellington ត្រូវបានជ្រើសរើសជាមនុស្សទី ២៨ ដោយក្រុមកីឡា Minnesota Timberwolves នៅក្នុងការជ្រើសរើសសមាជិកក្រុមកីឡាបាល់បោះប្រចាំឆ្នាំនៅសហរដ្ឋអាមេរិក ក្នុងឆ្នាំ២០០៩។ Ellington ដែលបានលេងអោយក្រុម Brooklyn Nets កាលពីឆ្នាំទៅ ក៏បានលេងផងដែរអោយក្រុម Memphis Grizzlies, Cleveland Cavaliers, Dallas Mavericks និង Los Angeles Lakers ។ ក្នុងនាមជាកីឡាករលេងនៅតាមសាកលវិទ្យាល័យ លោកបានជួយនាំរដ្ឋ North Carolina ទៅកាន់ការប្រកួតជើងឯកថ្នាក់ជាតិ នៅឆ្នាំ២០០៩ ហើយបានជាប់ជាកីឡាករឆ្នើម នៅក្នុងចំណោមក្រុមកីឡាបាល់បោះ ៤ ក្រុមចុងក្រោយ ក្នុងការប្រកួតបាល់បោះជើងឯក នៅក្នុងសហរដ្ឋអាមេរិក កាលពីឆ្នាំ២០០៩។ Ellington បានទទួលរង្វាន់ 2015-16 J. Walter Kennedy Citizenship Award ដែលត្រូវបានផ្តល់អោយរាល់ឆ្នាំ ដោយសមាគមអ្នកនិពន្ធស្តីពីកីឡាបាល់បោះអាជីព ដល់កីឡាករនៅក្នុងសមាគមកីឡាបាល់បោះ គ្រូបង្ហាត់ ឬអ្នកបង្ហាត់កីឡាករ ដែលមានស្នាដៃឆ្នើមក្នុងការងារ និងមានការយកចិត្តទុកដាក់ចំពោះសហគមន៍។
Sue Wicks ជាប់ជាជំរើសជុំដំបូងដោយក្រុម New York Liberty នៅក្នុងការជ្រើសរើសកីឡាការិនីជាលើកដំបូង ក្នុងឆ្នាំ១៩៩៧ របស់សមាគមកីឡាការិនីបាល់បោះក្នុងសហរដ្ឋអាមេរិក។ Wicks បានបន្តលេងអោយក្រុម Liberty បាន៦ រដូវកាល ដោយត្រូវបានជ្រើសរើសចូលក្នុងក្រុម All-Star នៅឆ្នាំ២០០០។ លោកស្រីក៏បានទទួលផងដែរនូវរង្វាន់ Kim Perrot Sportsmanship Award នៅឆ្នាំ២០០០ ហើយបានបញ្ចប់អាជីពរបស់លោកស្រីនៅក្នុងសមាគមបាល់បោះនារីអាមេរិក ដោយជាប់លេខ ៨។ លោកស្រីបានលេងអោយសាកលវិទ្យាល័យ Rutgers University ដែលនៅក្នុងនោះ លោកស្រីបានជាប់ជាកីឡាការិនីស្ម័គ្រចិត្តល្អជាងគេចំនួន ៣ លើក ក្នុងសហរដ្ឋអាមេរិក ហើយនៅឆ្នាំ១៩៨៨ បានក្លាយជាអ្នកលេងល្អបំផុតប្រចាំឆ្នាំក្នុងសហរដ្ឋអាមេរិក។ លោកស្រីត្រូវបានបញ្ចូលទៅក្នុងក្រាំងមាសផ្នែកកីឡាការិនីបាល់បោះក្នុងសាកលវិទ្យាល័យ Rutgers នៅខែមិថុនា ឆ្នាំ២០១៣។ ក្នុងនាមជាអ្នកទទួលមេដាយមាសនៅក្នុងការប្រកួត Pan-American Games លោកស្រី Wicks បានលេងបាល់បោះនៅក្រៅប្រទេសចំនួនជាង ១៥ ឆ្នាំ៕
