ក្នុងនាមជាអ្នកឧបត្ថម្ភប្រកបដោយមោទនភាព ចំពោះមជ្ឈមណ្ឌលសកម្មភាពមីនកម្ពុជា (CMAC) ស្ថានទូតសហរដ្ឋអាមេរិកនៅរាជធានីភ្នំពេញមានសេចក្តីរីករាយសូមអញ្ជើញអ្នកសារព័ត៌មានចូលរួមនៅក្នុងពិធីមួយក្នុងសហគមន៍ នៅថ្ងៃសុក្រ ទី១១ ខែកញ្ញា ពីម៉ោង ១២:៣០ រសៀល នៅអាងហែលទឹកនៃពហុកីឡាដ្ឋានជាតិអូឡាំពិក ក្នុងរាជធានីភ្នំពេញ។ ក្រុមមុជទឹកមកពីអង្គភាព CMAC ដោយសហការជាមួយនឹងសាលាអន្តរជាតិ iCAN របស់អង់គ្លេស និងមូលនិធិ Golden West Humanitarian Foundation នឹងរៀបចំធ្វើសកម្មភាពមុជទឹក និងសុវត្ថិភាពក្នុងទឹក នៅក្នុងពិធីពិសេសមួយ ដែលបើកអោយសាធារណជនចូលរួម។
អ្នកសារព័ត៌មានអាចចូលរួមយកពត៌មាននៅពេលណាមួយក៏បានក្នុងចន្លោះម៉ោងដូចខាងក្រោម។ គ្មានការតំរូវ អោយចុះឈ្មោះជាមុននោះទេ។ តារាងពេលវេលានៃកម្មវិធី ១២:៣០ ដល់ ១:៣០ រសៀល ការហែលបង្ហាញ និងមេរៀនសំរាប់កុមារ ១:៣០ ដល់ ៤:០០ រសៀល ក្រុមមុជទឹករបស់ CMAC បង្ហាញបច្ចេកទេសនានាក្នុងការមុជទឹកពិធីនោះចាប់ផ្តើមជាមួយនឹងការធ្វើបង្ហាញពីសុវត្ថិភាពនៅក្នុងទឹក និងការរៀនហែលទឹក សំរាប់កុមារគ្រប់អាយុទាំងអស់។ បន្ទាប់ពីការរៀនហែលទឹក ក្រុមមុជទឹករបស់ CMAC បង្ហាញជំនាញក្នុងការមុជទៅក្រោមទឹក ហើយអ្នកចូលរួមនឹងមើលឃើញអ្នកមុជទៅក្រោមទឹក តាមបង្អួចពិសេសសំរាប់មើល។ គេនឹងបង្ហាញផងដែរនូវគ្រឿងឧបករណ៏សំរាប់មុជក្រោមទឹក ហើយបន្ទាប់ពីការធ្វើការមុជក្រោមទឹករួច អ្នកចូលរួមនឹងត្រូវបានអនុញ្ញាតអោយថតរូបជាមួយក្រុមមុជទឹករបស់អង្គភាព CMAC ជាមួយគ្រឿងឧបករណ៏របស់គេ។
សហរដ្ឋអាមេរិកគឺជាអ្នកផ្តល់ថវិកាធំជាងគេដល់ការខិតខំក្នុងការបោសសំអាតមីន និងយុទ្ធភណ្ឌមិនទាន់ផ្ទុះ នៅទូទាំងសាកលលោក។ ជាផ្នែកមួយនៃការប្តេជ្ញានេះ ការិយាល័យកាត់បន្ថយ និងលុបបំបាត់អាវុធ នៅក្នុងកិច្ចការនយោបាយ និងយោធា របស់ក្រសួងការបរទេសសហរដ្ឋអាមេរិក ផ្តល់ការបណ្តុះបណ្តាល និងគាំទ្រដល់ក្រុមមុជទឹកចំណានៗរបស់ CMAC ។ គ្រាន់តែនៅប្រទេសកម្ពុជាមួយ ក្រសួងការបរទេសសហរដ្ឋអាមេរិកបានចំណាយថវិកាចំនួន ៦៥ លានដុល្លាអាមេរិកសំរាប់ប្រតិបត្តិការដោះមីន និងយុទ្ធភណ្ឌមិនទាន់ផ្ទុះ នៅក្នុងរយៈពេល ២០ ឆ្នាំកន្លងទៅនេះ។
ចំពោះព័ត៌មានបន្ថែមស្តីពីពិធីនេះ សូមទាក់ទងឯកឧត្តម ហេង រតនា នាយក CMAC តាមអ៊ីម៉េល hrattana@cmac.gov.kh ៕
