ដោយត្រូវបានឧបត្ថម្ភដោយទីភ្នាក់ងារសហរដ្ឋអាមេរិក សំរាប់ការអភិវឌ្ឍន៍អន្តរជាតិ (USAID) និងដោយត្រូវបានអនុវត្តតាមរយៈភាពជាដៃគូរវាងសាកលវិទ្យាល័យភូមិន្ទភ្នំពេញ និងសាកលវិទ្យាល័យ University Kebangsaan Malaysia កម្មវិធីអ្នកស្ម័គ្រចិត្តយុវជនអាស៊ាននឹងបិទសកម្មភាពរយៈពេលមួយខែ ក្នុងការពង្រឹងជំនាញជាអ្នកដឹកនាំផ្នែកបរិស្ថាន និងជាអ្នកស្ម័គ្រចិត្ត នៅភ្នំពេញ នៅថ្ងៃសុក្រ ទី២៨ ខែសីហា ឆ្នាំ២០១៥។
អ្នកសារព័ត៌មានត្រូវបានអញ្ជើញអោយចូលរួមនៅក្នុងពិធីបិទ នៅថ្ងៃសុក្រទី២៨ ខែសីហា វេលាម៉ោង ២:៣០ រសៀល នៅសាលប្រជុំនៃវិទ្យាស្ថានបច្ចេកទេសនៃកម្ពុជា តាមមហាវិថីសហព័ន្ធរុស្ស៊ី ក្នុងរាជធានីភ្នំពេញ។
ក្នុងចំណោមវាគ្មិនដែលថ្លែងនៅក្នុងពិធីនោះមានលោកស្រី Julie Chung ភារធារីនៃស្ថានទូតសហរដ្ឋអាមេរិក នៅរាជធានីភ្នំពេញ ឯកឧត្តម បណ្ឌិត ហង់ ជួនណារ៉ុន រដ្ឋមន្រ្តីក្រសួងអប់រំ យុវជន និងកីឡា បណ្ឌិត Datuk បណ្ឌិត Noor Azlan Ghazali អនុប្រធានសាកលវិទ្យាល័យ University Kebangsaan Malaysia និងបណ្ឌិត ឱម រមនី អគ្គនាយកនៃវិទ្យាបច្ចេកទេសនៃកម្ពុជា។
នៅក្នុងពេលរៀនសូត្រ យុវជនស្ម័គ្រចិត្តអាស៊ានចំនួន ៤៩ នាក់ រួមទាំង១១ នាក់ មកពីប្រទេសកម្ពុជា បានរៀនជំនាញស្តីពីភាពជាអ្នកដឹកនាំរបស់គេ តាមរយៈសកម្មភាពជាក់ស្តែង ដើម្បីស្វែងយល់ថា តើយុវជនអាស៊ានអាចដើរតួបានយ៉ាងដូចម្តេច នៅក្នុងសហគមន៍របស់គេ ពិសេស ដោយការពារបរិស្ថាន។ ជាផ្នែកមួយនៃសកម្មភាពរបស់គេ គេចូលរួមជាមួយសហគមន៍នៅភូមិបណ្តែតទឹកក្រគនៃខេត្តពោធិសាត់ នៅក្នុងគំរោងអនាម័យទឹក និងអនាម័យខ្លួនប្រាណ។ ពិធីនៅថ្ងៃសុក្រនឹងមានការថ្លែងសុន្ទរកថារបស់មេឃុំ ដែលមកពីភូមិបណ្តែតទឹក ព្រមទាំងការបញ្ចាំងវីដេអូឯកសារល្អបំផុត ដែលផលិតដោយអ្នកស្ម័គ្រចិត្ត។
កម្មវិធីអ្នកស្ម័គ្រចិត្តយុវជនអាស៊ានធ្វើការជាមួយសហគមន៍ ដើម្បីរកមើលដំណោះស្រាយថ្មីៗ ចំពោះបញ្ហាប្រឈមផ្នែកបរិស្ថាន សេដ្ឋកិច្ច វប្បធម៌ និងសង្គម នៅក្នុងតំបន់ ដោយទន្ទឹមនឹងនោះ បណ្តុះស្មារតីនៃអត្តសញ្ញាណអាស៊ាន៕
