គំរោងថ្មីមួយដើម្បីការពារនិងលើកកំពស់សិទ្ធិរបស់ក្រុមអ្នកស្រឡាញ់ភេទដូចគ្នា អ្នកស្រឡាញ់មនុស្សទាំងពីរភេទ អ្នកកែភេទ និងអ្នកមានលក្ខណៈភេទមិនចំជាប្រុសឬស្រី ឬ LGBTI នៅកម្ពុជា ត្រូវបានប្រកាសនៅថ្ងៃនេះ ដោយទីភ្នាក់ងារសហរដ្ឋអាមេរិកសំរាប់ការអភិវឌ្ឍន៍អន្តរជាតិ (USAID)។ គំរោងដែលមានឈ្មោះថា “យើងដូចគ្នា” (We are the Same) ដែលត្រូវបានប្រគល់អោយអង្គការប្រព័ន្ធផ្សព្វផ្សាយដើម្បីការអប់រំ និងការអភិវឌ្ឍន៍ក្នុងសកម្មភាព (Media One) អនុវត្ត ហើយនឹងជួយដល់សកម្មភាពតស៊ូមតិ និងសកម្មភាពលើកកំពស់ការយល់ដឹងនានា ដើម្បីពង្រឹងសិទ្ធិរបស់ក្រុម LGBTI នៅកម្ពុជា។ គំរោងនេះបញ្ជាក់ពីការប្តេជ្ញាចិត្តរបស់រដ្ឋាភិបាលសហរដ្ឋអាមេរិកចំពោះសិទ្ធិរបស់ក្រុម LGBTI ជាផ្នែកសំខាន់មួយសំរាប់ទ្រទ្រង់សិទ្ធិមនុស្ស ទាំងនៅកម្ពុជា ទាំងនៅទូទាំងសាកលលោក។
លោកស្រីភារធារីស្ថានទូតអាមេរិក Julie Chung បានមានប្រសាសន៍ថា “ខ្ញុំមានមោទនភាពដែលរដ្ឋាភិបាលសហរដ្ឋអាមេរិកគាំទ្រដល់ការខិតខំដើម្បីការពារសិទ្ធិរបស់ក្រុម LGBTI នៅក្នុងប្រទេស និងនៅបរទេស។ គំរោងដូចជាគំរោង “យើងដូចគ្នា” ឆ្លុះបញ្ចាំងការប្តេជ្ញាចិត្តរបស់យើងក្នុងការលុបបំបាត់ឧបសគ្គចំពោះសមភាព ហើយប្រឆាំងនឹងការរើសអើងនិងហឹង្សា ដោយសារភេទដែលគេស្រឡាញ់ និងអត្តសញ្ញាណជេនឌ័រ”។
ដោយសារការមាក់ងាយនិងការភ័យខ្លាច ប្រហែល ១ ភាគ ៣ នៃប្រជាជនកម្ពុជាក្នុងក្រុម LGBTI មិនដែលសារភាពប្រាប់អំពីខ្លួនគេទេ ហើយចំនួនជាង ១ ភាគ ៥ ចង់អោយខ្លួនគេជាមនុស្សស្រឡាញ់មនុស្សភេទផ្ទុយគ្នាដូចមនុស្សធម្មតា នេះបើតាមលទ្ធផលនៃការអង្កេតដែលចេញនៅខែធ្នូ ឆ្នាំ២០១៥ ដោយអង្គការសហគមន៍ឥន្ទធនូកម្ពុជា។ គំរោង “យើងដូចគ្នា” ដែលមានរយៈពេល ២ ឆ្នាំ នឹងបង្កើនលទ្ធភាពរបស់ក្រុម និងបុគ្គលក្នុងក្រុមមនុស្ស LGBTI ក្នុងការទទួលបានព័ត៌មាន និងលទ្ធភាពក្នុងការធ្វើការប្រាស្រ័យទាក់ទងគ្នា។ គំរោងនេះក៏នឹងជួយផងដែរដល់ក្រុម LGBTI តាមរយៈប្រព័ន្ធផ្សព្វផ្សាយសង្គម និងកម្មវិធីសេវាតាមទូរស័ព្ទដៃ។
ស្តីពីទីភ្នាក់ងារសហរដ្ឋអាមេរិកសំរាប់ការអភិវឌ្ឍន៍អន្តរជាតិ (USAID)
USAID ត្រូវបានបង្កើតឡើងនៅឆ្នាំ ១៩៦១ ដោយលោកប្រធានាធិបតី John F. Kennedy ហើយគឺជាទីភ្នាក់ងារឈានមុខគេរបស់រដ្ឋាភិបាលសហរដ្ឋអាមេរិកក្នុងការផ្តល់ជំនួយ។ តាំងពីឆ្នាំ ១៩៩២ មក USAID បានផ្តល់ប្រាក់ចំនួនជាងមួយពាន់លានដុល្លាអាមេរិកសំរាប់ការអភិវឌ្ឍន៍នៅប្រទេសកម្ពុជា។
អង្គការប្រព័ន្ធផ្សព្វផ្សាយដើម្បីការអប់រំ និងការអភិវឌ្ឍន៍ក្នុងសកម្មភាព (Media One)
អង្គការ Media One ត្រូវបានបង្កើតឡើងនៅឆ្នាំ ២០១២ ជាអង្គការមិនមែនរដ្ឋាភិបាល ឯករាជ្យ និងមិនចូលបក្សខាងណាមួយ ហើយធ្វើការដើម្បីបំពេញសេចក្តីត្រូវការលើការទទួលបានព័ត៌មានស្មើភាពគ្នា និងប្រព័ន្ធផ្សព្វផ្សាយដែលមានការចូលរួមទាំងអស់គ្នា នៅប្រទេសកម្ពុជា។ អង្គការនេះបង្កើតប្រព័ន្ធផ្សព្វផ្សាយនិងដំណោះស្រាយពិសេស ដោយឡែក សំរាប់បញ្ហាប្រឈមធំៗក្នុងការអភិវឌ្ឍន៍របស់ប្រទេស។
