ការិយាល័យកុងស៊ុល នៃស្ថានទូតអាមេរិក ប្រចាំនៅទីក្រុងភ្នំពេញ មានភារកិច្ចផ្តល់សេវាទិដ្ឋាការដល់អ្នក ដែលចង់ធ្វើដំំណើរទៅសហរដ្ឋអាមេរិក ក្នុងរយៈពេលបណ្តោះអាសន្ន និងសម្រាប់អ្នកដែលមានបំណងស្នាក់នៅមិនមានការកំណត់ ឬអចិន្ត្រៃយ៍នៅសហរដ្ឋអាមេរិក។
សូមចូលមើលគេហទំព័រសេវាគាំទ្រសកលរបស់យើង (GSS) ដើម្បីទទួលបានព័ត៌មានបន្ថែម រួមទាំងបញ្ជីប្រភេទទិដ្ឋាការមិនមែនអន្តោប្រវេសន៍ផ្សេងៗ។
ព័ត៌មានស្តីពីការផ្អាកលែងផ្តល់ទិដ្ឋាការប្រភេទមិនមែនអន្តោប្រវេសន៍មួយចំនួននៅប្រទេសកម្ពុជា
ចាប់ពីថ្ងៃទី១៣ ខែកញ្ញា ឆ្នាំ២០១៧ ស្ថានទូតសហរដ្ឋអាមេរិកប្រចាំទីក្រុងភ្នំពេញនៃព្រះរាជាណាចក្រកម្ពុជានឹងផ្អាកលែងចេញទិដ្ឋាការប្រភេទ B1 ប្រភេទ B2 និងប្រភេទ B1/B2 ដល់មន្ត្រីនៃក្រសួងការបរទេសកម្ពុជាដែលមានតួនាទីចាប់ពីថ្នាក់អគ្គនាយករហូតដល់ថ្នាក់ដឹកនាំកំពូលនៃក្រសួងនេះ និងសមាជិកក្រុមគ្រួសាររបស់ពួកគេ ដោយមានករណីលើកលែងតិចតួចប៉ុណ្ណោះ។
ដោយយោងតាមមាត្រា 243(d) នៃច្បាប់អន្តោប្រវេសន៍ និងសញ្ជាតិសហរដ្ឋអាមេរិក នៅពេលទទួលបានសំណើពីរដ្ឋមន្ត្រីក្រសួងសន្តិសុខមាតុភូមិថា មានប្រទេសមួយចំនួនបានបដិសេធមិនទទួលយក ឬប្រើប្រាស់ហេតុផលដែលមិនសមស្របដើម្បីពន្យារពេលទទួលយកពលរដ្ឋនៃប្រទេសរបស់ពួកគេវិញនោះ រដ្ឋមន្រ្តីការបរទេសអាមេរិកត្រូវបញ្ជាអោយមន្ត្រីកុងស៊ុលបញ្ឈប់លែងផ្តល់ទិដ្ឋាការរហូតទាល់តែរដ្ឋមន្រ្តីសន្តិសុខមាតុភូមិទទួលបានព័ត៌មានថា ប្រទេសដែលពាក់ព័ន្ធទាំងនោះបានយល់ព្រមទទួលយកពលរដ្ឋរបស់គេវិញហើយ។
ប្រសិនបើអ្នកស្ថិតនៅក្នុងក្រុមដែលត្រូវបានគេផ្អាកការចេញទិដ្ឋាការ ហើយអ្នកសម្រេចចិត្តដាក់ពាក្យសុំទិដ្ឋាការនោះ មន្ត្រីកុងស៊ុលនឹងសម្ភាសអ្នក ប៉ុន្តែមិនអាចផ្តល់ទិដ្ឋាការជូនបានទេ រហូតទាល់តែការផ្អាកនោះត្រូវបានលើកលែង។ សូមពិចារណាអោយបានដិតដល់មុនពេលដាក់ពាក្យសុំទិដ្ឋាការ។
សូមជំរាបថាថ្លៃដាក់ពាក្យសុំទិដ្ឋាការដែលបានបង់រួច មិនអាចបង្វិលសងវិញបានទេ។
ពត៌មានសំរាប់ធ្វើការទាក់ទង
ដើម្បីទាក់ទងតំណាងផ្នែកសេវាអតិថិជន សូមចូលមើលវែបសាយ GSS ឬប្រើព័ត៌មានទំនាក់ទំនងខាងក្រោម:
- ទូរស័ព្ទ: (៨៥៥ ២៣) ៩៦២ ៥៣០ (សម្រាប់ទិដ្ឋាការមិនមែនអន្តោប្រវេសន៍)
- អ៊ីម៉ែល: យើងមិនអាចទទួលទូរស័ព្ទ ពីបុគ្គលដែលសាកសួរអំពីករណីទិដ្ឋាការបានទេ។ សូមផ្ញើសំណួរទិដ្ឋការរបស់អ្នកទៅអ៊ីម៉ែលខាងក្រោម:ទិដ្ឋាការមិនមែនអន្តោប្រវេសន៍: support-cambodia@ustraveldocs.com
ទិដ្ឋាការអន្តោប្រវេសន៍: IVPhnomPenh@state.gov
នៅក្នុងប្រអប់ប្រធានបទ សូមសរសេរពាក្យ “IV Inquiry” និងលេខករណីរបស់អ្នក (ដែលចាប់ផ្ដើមដោយអក្សរ “PHP” បន្ទាប់មកមានលេខ ១០ ខ្ទង់)
ការចូលក្នុងស្ថានទូត
នីតិវិធីសុវត្ថិភាពរបស់ស្ថានទូតតម្រូវឱ្យភ្ញៀវទាំងអស់ទទួលបានការត្រួតពិនិត្យសន្តិសុខ។ អ្នកត្រូវផ្ញើទូរស័ព្ទដៃរបស់អ្នកជាមួយបុគ្គលិកសន្តិសុខរបស់ស្ថានទូត ប៉ុន្តែយើងខ្ញុំមិនទទួលខុសត្រូវចំពោះការបាត់បង់ឬខូចទូរស័ព្ទដៃរបស់អ្នកឡើយ។ ក្រៅពីនេះ អ្នកមិនអាចយករបស់ខាងក្រោមនេះចូលក្នុងស្ថានទូតបានទេ៖
- រាល់ឧបករណ៍ឌីជីថល និងឧបករណ៍ដែលប្រើអាគុយឫថ្ម ដូចជាកុំព្យូទ័រ ម៉ាស៊ីនថត ឧបករណ៍ចាក់ភ្លេង ស៊ីឌី និងកាសែតវីដេអូ ជាដើម។
- កាបូបដៃ ដែលមានទំហំធំពេក។
- កាបូបធ្វើដំណើរ ឬវ៉ាលី ដែលមានទំហំធំ។ អ្នកគួរដាក់ឯកសារចាំបាច់សម្រាប់ការណាត់ជួប ក្នុងថង់ថ្លា
- ម្ហូបអាហារ
- ស្រោមសំបុត្រ ឬកញ្ចប់ដែលបិទជិត។
- បារី ដែកកេះ ឈើគូស
- វត្ថុស្រួចៗ ដូចជាកន្ត្រៃ និងកាំបិត
- អាវុធឬគ្រឿងផ្ទុះគ្រប់ប្រភទ។
យើងមិនអាចបរិយាយគ្រប់វត្ថុដែលហាមឃាត់នោះទេ ប៉ុន្តែគួរកត់សំគាល់ថាបុគ្គលិកសន្តិសុខមានសិទ្ធិហាមឃាត់ វត្ថុផ្សេងទៀត ដែលអាចមានការសង្ស័យ។ ក្រៅពីទូរស័ព្ទចល័តមួយស្ថានទូតអាមេរិកនឹងមិនទទួលការផ្ញើ នូវវត្ថុដែលបានរៀបរាប់ខាងលើទេ។ អ្នកត្រូវធ្វើការរៀបចំទុករបស់ទាំងនេះដោយខ្លួនឯង មុនពេលអ្នកចូលស្ថានទូត។
មានតែអ្នកដាក់ពាក្យសុំទិដ្ឋាការដែលបានទទួលការបញ្ជាក់រួចហើយ ត្រូវបានអនុញ្ញាតិអោយចូលបរិវេណស្ថានទូត។ បងប្អូនញ្ញាត្តិមិត្តរបស់អ្នកដាក់ពាក្យ ត្រូវរង់ចាំនៅខាងក្រៅស្ថានទូត។
ប្រសិនបើអ្នកមិនបានប្រតិបត្តិតាមនីតិវិធីខាងលើនេះទេ អ្នកនឹងអាចប្រឈមនឹងការពន្យារពេល ឬការលុបចោលចំពោះការណាត់ជួបរបស់អ្នក។
ទិដ្ឋាការការទូត ឬផ្លូវការ
សូមចូលមើលវែបសាយរបស់ក្រសួងការបរទេសអាមេរិក ដើម្បីទទួលបានព័ត៌មានអំពីទិដ្ឋាការការទូតឬផ្លូវការ។ សម្រាប់ព័ត៌មានអំពីរបៀបដាក់ពាក្យសុំទិដ្ឋាការការទូតឬផ្លូវការ សូមចុចត្រង់នេះ។ អ្នកអាចផ្ញើអ៊ីមែលមកយើងតាមរយៈ dipvisasphnompenh@state.gov សម្រាប់សំណួរអំពីទិដ្ឋាការការទូតឬផ្លូវការ។
