នីតិវិធី​ដាក់​ពាក្យ​សុំ​ទិដ្ឋាការ​សម្រាប់​ការ​ធ្វើ​ដំណើរ​ជា​លក្ខណៈ​ការទូត និង​ផ្លូវការ

សូម​ជម្រាប​ថា​គោល​បំណង​នៃ​ការ​ធ្វើ​ដំណើរ​របស់​អ្នក​ទៅ​សហរដ្ឋ​អាមេរិក​កំណត់​នូវ​ប្រភេទ​របស់​ទិដ្ឋាការ​តាម​ការ​តម្រូវ​នៃ​ច្បាប់​សហរដ្ឋ​អាមេរិក​។ ការ​ប្រើប្រាស់​លិខិត​ឆ្លងដែន​ការទូត ឬ​លិខិត​ឆ្លង​ដែន​ផ្លូវការ​មិន​អាច​ធ្វើ​អោយ​អ្នក​មាន​លក្ខណៈសម្បត្តិ​អាច​ទទួល​បាន​ទិដ្ឋាការ​ប្រភេទ A, G ឬ C-3 ដោយ​ស្វ័យប្រវត្តិ​គ្រប់​ពេល​នោះ​ទេ​។ ប្រសិន​បើ​អ្នក​មិន​មាន​លក្ខណៈសម្បត្តិ​គ្រប់គ្រាន់​ដើម្បី​ទទួល​បាន​ទិដ្ឋាការ​ការទូត ឬ​ផ្លូវការ​ទេ​នោះ ការិយាល័យ​កុងស៊ុល​នឹង​ផ្តល់​ព័ត៌មាន​ជូន​អ្នក​អំពី​ការ​តម្រូវ​អោយ​មក​សម្ភាសន៍ និង​ការ​បង់​ប្រាក់​ថ្លៃ​ដាក់​ពាក្យ​សុំ​ទិដ្ឋាការ​។ បេក្ខជន​គួរតែ​រួសរាន់​ដាក់​ពាក្យ​សុំ​ទិដ្ឋាការ​អោយ​បាន​ឆាប់​មុន​ពេល​ដែល​ពួកគេ​គ្រោង​ធ្វើ​ដំណើរ​។

បន្ទាប់​ពី​បាន​កំណត់​ប្រភេទ​ទិដ្ឋាការ​សមស្រប (​ប្រភេទ A, G ឬ C-3) សម្រាប់​គោលបំណង​នៃ​ការ​ធ្វើ​ដំណើរ​របស់​អ្នក​ទៅ​កាន់​សហរដ្ឋ​អាមេរិក​រួច​ហើយ សូម​ត្រៀម​ឯកសារ​ដូច​ខាង​ក្រោម​នេះ​ដើម្បី​យក​មក​ដាក់​នៅ​ការិយាល័យ​កុងស៊ុល​ដោយ​ផ្ទាល់ ឬ​តាមរយៈ​អ្នក​នាំ​សារ​រៀងរាល់​ថ្ងៃ​ចន្ទ ដល់​ថ្ងៃ​ព្រហស្បតិ៍ ពី​ម៉ោង ១:៣០ នាទី ដល់​ម៉ោង ៣:០០ ​រសៀល​គត់​

  1. លិខិត​ឆ្លង​ដែន​ដែល​មាន​សុពលភាព​យ៉ាង​តិច​បំផុត​៦​ខែ គិត​ចាប់​ពី​រយៈពេល​ដែល​អ្នក​បញ្ចប់​ការ​ស្នាក់​នៅ​សហរដ្ឋ​អាមេរិក និង​នៅ​មាន​ទំព័រ​ទំនេរ​សម្រាប់​បិត​ទិដ្ឋាការ​។ ប្រសិន​បើ​អ្នក​មាន​លិខិត​ឆ្លង​ដែន​ផ្សេង​ៗ​ទៀត ទោះ​បី​ជា​មាន​សុពលភាព ឬ​អស់​សុពលភាព​ហើយ​ក៏​ដោយ ក៏​ត្រូវ​ភ្ជាប់​មក​ជាមួយ​ផង​ដែរ​។
  2. បំពេញ​ពាក្យសុំ​ទិដ្ឋាការ​មិន​មែន​អន្តោប្រវេសន៍ (DS-160) តាម​ប្រព័ន្ធ​អ៊ីនធើណិត នៅ​វែបសាយ​នេះ ហើយ​សូម​កុំ​ភ្លេច​​ព្រីន​ទំព័រ​បញ្ជាក់​របស់​ពាក្យ​សុំ​ទិដ្ឋាការ​ដែល​មាន​លេខ​បាកូត​។ ប្រសិន​បើ​មាន​ចម្ងល់​អំពី​ទម្រង់ DS-160 សូម​អាន​សំណួរ​-​ចម្លើយ​ដែល​សួរ​ញឹកញាប់​នៅ​ទី​នេះ​
  3. សូម​ត្រៀម​រូបថត​ពណ៌​ធម្មជាតិ​ពី​ព្រោះ​អ្នក​ត្រូវ​ដាក់​បញ្ជូល​រូបថត​នេះ​ទៅ​ក្នុង​ពាក្យសុំ​ទិដ្ឋាការ​នៅ​ពេល​បំពេញ​ទម្រង់ DS-160 ។ ម្យ៉ាង​វិញ​ទៀត​អ្នក​ត្រូវ​យក​រូបថត​មួយ​សន្លឹក​មក​ជាមួយ​នៅ​ថ្ងៃ​សម្ភាសន៍ (​ទំហំ​៥​សង់ទីម៉ែត​បួន​ជ្រុង ផ្ទៃ​ក្រោយ​ពណ៌​ស​)​។ សូម​អាន​ព័ត៌មាន​បន្ថែម​អំពី​តម្រូវការ​រូបថត​នៅ​ទី​នេះ​
  4. រៀបចំ​ឯកសារ​យោង ឬ​ភស្តុតាង​នានា​ដែល​ពាក់ព័ន្ធ​នឹង​ការ​ធ្វើ​ដំណើរ​របស់​អ្នក រួម​មាន​លិខិត​អញ្ជើញ កំណត់​ទូត​ចេញ​ដោយ​ក្រសួង​ការបរទេស និង​កិច្ចសហប្រតិបត្តិការ​អន្ដរជាតិ​នៃ​ព្រះរាជាណាចក្រ​កម្ពុជា ឬ​កំណត់​ទូត​ចេញ​ដោយ​អង្គការ​អន្តរជាតិ​ដែល​បញ្ជូន​អ្នក​អោយ​ទៅ​បំពេញ​បេសកកម្ម​នៅ​សហរដ្ឋ​អាមេរិក​។

    ចាប់​ពី​ថ្ងៃ​ទី​១ ខែ​កក្កដា ឆ្នាំ​២០១៤​មក កំណត់​ទូត​ដែល​អម​ជាមួយ​ពាក្យសុំ​ទិដ្ឋាការ​ប្រភេទ A-1, A-2, C-2, C-3, G-1 ដល់ G-4 ឬ​ប្រភេទ NATO-1 ដល់ NATO-6 ត្រូវ​មាន​ព័ត៌មាន​របស់​បេក្ខជន​គោល ដូចជា​ឈ្មោះ ថ្ងៃ​ខែ​ឆ្នាំ​កំណើត ឋានៈ​និង​តួនាទី ទីកន្លែង​ដែល​ត្រូវ​ទៅ​បំពេញ​បេសកកម្ម គោលបំណង​នៃ​ការ​ធ្វើ​ដំណើរ ការ​រៀបរាប់​សង្ខេប​អំពី​ការងារ របស់​បេក្ខជន​គោល កាលបរិចេ្ឆទ​នៃ​ការ​ធ្វើ​ដំណើរ និង​រយៈពេល​ដែល​គ្រោង​ទៅ​ស្នាក់នៅ​សហរដ្ឋ​អាមេរិក​។ ម្យ៉ាង​ទៀត​កំណត់​ទូត​នេះ​ក៏​ត្រូវ​រាយ​ឈ្មោះ និង​ថ្ងៃ​ខែ​ឆ្នាំ​កំណើត​របស់​សមាជិក​ក្រុម​គ្រួសារ​ក្នុង​បន្ទុក ឬ​សមាជិក​ក្នុង​ផ្ទះ​ដែល​ត្រូវ​រួម​ដំណើរ​ទៅ​សហរដ្ឋ​អាមេរិក​ជាមួយ​បេក្ខជន​គោល ហើយ​ត្រូវ​បញ្ជាក់​អំពី​ទំនាក់ទំនង​របស់​ពួកគេ​ជាមួយ​បេក្ខជន​គោល​ផង​ដែរ​។ សម្រាប់​មន្ត្រី​របស់​រដ្ឋាភិបាល​ដែល​សហរដ្ឋ​អាមេរិក​ទទួល​ស្គាល់ និង​និយោជិត​ដែល​ត្រូវ​បាន​គេ​តែងតាំង​អោយ​ទៅ​បំពេញ​ការងារ​នៅ​ស្ថាន​បេសកកម្ម ​ឬ​ស្ថាប័ន​ណា​មួយ​នៅ​សហរដ្ឋ​អាមេរិក​ក្នុង​រយៈពេល​៩០​ថ្ងៃ ឬ​យូរ​ជាង​នេះ (​ប៉ុន្តែ​មិន​មែន​ជា​មន្ត្រី​ទៅ​បំរើ​ការងារ​ជា​បណ្តោះ​អាសន្ន​ទេ​) កំណត់​ទូត​នេះ​ជា​ទូទៅ​ត្រូវ​ចេញ​ពី​ក្រសួង​ការ​បរទេស​របស់​រដ្ឋាភិបាល​ដែល​បញ្ជូន​អ្នក​ទៅ​។

    បន្ទាប់​ពី​យើង​បាន​ផ្ទៀងផ្ទាត់​រាល់​ព័ត៌មាន​ដែល​អ្នក​បាន​ផ្ដល់​នៅ​ក្នុង​ពាក្យ​សុំ​ទិដ្ឋាការ​ដែល​បញ្ជូន​មក​តាម​ប្រព័ន្ធ​អ៊ីនធើណិត និង​ឯកសារ​តម្រូវ​ផ្សេង​ៗ​ទៀត​ដែល​អ្នក​បាន​យក​មក​ដាក់​ ពាក្យ​សុំ​ទិដ្ឋាការ​របស់​អ្នក​នឹង​ដាក់​ជូន​មន្រ្តី​កុងស៊ុល​ដើម្បី​ធ្វើការ​ពិនិត្យ​សម្រេច​។ អ្នក​នឹង​ទទួល​បាន​ប័ណ្ណ​ពណ៌​ផ្កា​ឈូក​មួយ​ដែល​មាន​កាលបរិច្ឆេទ និង​ម៉ោង​ពេល​ច្បាស់លាស់​ដែល​អ្នក​ត្រូវ​ត្រលប់​មក​យក​លិខិត​ឆ្លង​ដែន​វិញ​។

    ប្រសិន​ពាក្យសុំ​ទិដ្ឋាការ​របស់​អ្នក​ត្រូវ​បាន​សម្រេច​ផ្តល់​ជូន ជា​ទូទៅ​លោក​អ្នក​អាច​មក​ទទួល​យក​លិខិត​ឆ្លង​ដែន​របស់​លោក​អ្នក​វិញ​បាន​ក្នុង​រយៈពេល​មួយ​សប្តាហ៍ (​ចាប់​ពី​ថ្ងៃ​ចន្ទ ​ដល់​ថ្ងៃ​ព្រហស្បត្តិ៍​) វេលា​ម៉ោង ៤ រសៀល​។ សូម​យក​ប័ណ្ណ​ពណ៌​ផ្កា​ឈូក​មក​ជាមួយ​ផង​។ យើង​មិន​អាច​ធានា​ជា​មុន​ថា​អាច​ចេញ​ទិដ្ឋាការ​អោយ​បុគ្គល​ណា​ម្នាក់​បាន​នោះ​ទេ ​ហើយ​អ្នក​មិន​គួរ​រៀបចំ​គម្រោង​ធ្វើ​ដំណើរ​ជាក់លាក់​ណា​មួយ ឬ​ទិញ​សំបុត្រ​យន្តហោះ​មុន​ពេល​ទទួល​បាន​ទិដ្ឋាការ​អាមេរិក​នៅ​ក្នុង​ដៃ​នោះ​ទេ​។

    ក្នុង​ករណី​ខ្លះ​ពាក្យ​សុំ​ទិដ្ឋាការ​របស់​អ្នក​អាច​នឹង​ត្រូវ​ឆ្លង​កាត់​ការ​ត្រួត​ពិនិត្យ​រដ្ឋបាល​។ អ្នក​អាច​ពិនិត្យ​មើល​ស្ថានភាព​ពាក្យ​សុំ​ទិដ្ឋាការ​របស់​អ្នក​បាន​ដោយ​ចូល​ទៅ​កាន់​គេហទំព័រ https://ceac.state.gov/CEAC/។ ប្រសិន​បើ​ពាក្យសុំ​ទិដ្ឋាការ​របស់​អ្នក​មិន​មាន​លក្ខណៈសម្បតិ្ត​គ្រប់គ្រាន់​សម្រាប់​ទិដ្ឋាការ​ប្រភេទ​ការ​ទូត ឬ​ផ្លូវការ​ទេ​នោះ ការិយាល័យ​កុងស៊ុល​នឹង​បញ្ជូន​ពាក្យសុំ​នោះ​ទៅ​ឲ្យ​អ្នក ឬ​អ្នក​នាំសារ​វិញ​។ បន្ទាប់​មក បេក្ខជន​នឹង​ត្រូវ​ណែនាំ​ឲ្យ​ចូល​ទៅ​​អាន​ព័ត៌មាន​ក្នុង​គេហទំព័រ​នេះ​ដើម្បី​ទទួល​បាន​ការ​ណែនាំ​លំអិត​អំពី​នីតិវិធី​ដាក់​ពាក្យ​សុំ​ទិដ្ឋាការ​ប្រភេទ​ផ្សេង​ទៀត​វិញ​។

ប្រសិន​បើ​អ្នក​មាន​សំណួរ​-​ចម្ងល់​ផ្សេង​ៗ​សូម​ផ្ញើ​អ៊ីម៉ែល​មក dipvisasphnompenh@state.gov